777 Charlie: ನಾಯಿಯ ಸಿನಿಮಾ ನೋಡಲು ನಾಯಿಗೇ ಅವಕಾಶ ಇಲ್ಲ; ಡಯಾನಾಗೆ ತೀವ್ರ ನಿರಾಸೆ
777 Charlie Movie: ಡಯಾನಾ ಎಂಬ ನಾಯಿಯ ಜೊತೆ ‘777 ಚಾರ್ಲಿ’ ಸಿನಿಮಾ ನೋಡಲು 3 ಟಿಕೆಟ್ ಬುಕ್ ಮಾಡಲಾಗಿತ್ತು. ಆದರೆ ಈ ಶ್ವಾನಕ್ಕೆ ಚಿತ್ರಮಂದಿರದೊಳಗೆ ಪ್ರವೇಶ ನಿರಾಕರಿಸಲಾಗಿದೆ.
‘777 ಚಾರ್ಲಿ’ (777 Charli) ಸಿನಿಮಾಗೆ ಎಲ್ಲೆಡೆಯಿಂದ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ. ನಾಯಿ ಮತ್ತು ಮನುಷ್ಯನ ನಡುವಿನ ಸಂಬಂಧದ ಕಥೆಯನ್ನು ಹೊಂದಿರುವ ಈ ಚಿತ್ರ ಎಲ್ಲ ಚಿತ್ರಮಂದಿರಗಳಲ್ಲೂ ಹೌಸ್ಫುಲ್ ಪ್ರದರ್ಶನ ಕಾಣುತ್ತಿದೆ. ನಟನಾಗಿ, ನಿರ್ಮಾಪಕನಾಗಿ ರಕ್ಷಿತ್ ಶೆಟ್ಟಿ (Rakshit Shetty) ಅವರಿಗೆ ಈ ಸಿನಿಮಾ ಮೂಲಕ ದೊಡ್ಡ ಗೆಲುವು ಸಿಕ್ಕಿದೆ. ನಿರ್ದೇಶಕ ಕಿರಣ್ ರಾಜ್ ಅವರ ಪ್ರಯತ್ನವನ್ನು ಎಲ್ಲರೂ ಕೊಂಡಾಡುತ್ತಿದ್ದಾರೆ. ಪ್ರಾಣಿಗಳ ಬಗ್ಗೆ, ಅದರಲ್ಲೂ ವಿಶೇಷವಾಗಿ ನಾಯಿಗಳ ಬಗ್ಗೆ ಜನರಿಗೆ ಕಾಳಜಿ ಮೂಡಿಸುವಲ್ಲಿ ಈ ಸಿನಿಮಾ ಯಶಸ್ವಿ ಆಗಿದೆ. ‘777 ಚಾರ್ಲಿ’ ಸಿನಿಮಾದಲ್ಲಿ ನೀಡಿರುವ ಮೆಸೇಜ್ ಎಲ್ಲರನ್ನೂ ತಲುಪಿದೆ. ಕೆಲವರು ಈ ಸಿನಿಮಾ ನೋಡಲು ತಮ್ಮ ಶ್ವಾನದ ಜೊತೆಗೆ ಬರುತ್ತಿದ್ದಾರೆ. ಆದರೆ ಚಿತ್ರಮಂದಿರದೊಳಗೆ ಅನುಮತಿ ಸಿಗುತ್ತಿಲ್ಲ ಎಂದು ಬೇಸರ ವ್ಯಕ್ತಪಡಿಸುತ್ತಿದ್ದಾರೆ. ದಾವಣಗೆರೆಯ (Davanagere) ಅಭಿಮಾನಿಯೊಬ್ಬರಿಗೆ ಈ ರೀತಿ ಆಗಿದೆ.
ಹೌದು, ದಾವಣಗೆರೆಯಲ್ಲಿ ಇರುವ ಪ್ರೇಕ್ಷಕರೊಬ್ಬರು ಡಯಾನಾ ಎಂಬ ತಮ್ಮ ಸಾಕುನಾಯಿ ಜೊತೆಗೆ ಗೀತಾಂಜಲಿ ಚಿತ್ರಮಂದಿರಕ್ಕೆ ಬಂದಿದ್ದಾರೆ. ನಾಯಿ ಕುರಿತ ಕಥಾಹಂದರ ಇರುವ ಸಿನಿಮಾವನ್ನು ನಾಯಿಯ ಜೊತೆಗೆ ಕುಳಿತು ನೋಡಬೇಕು ಎಂಬುದು ಅವರ ಆಸೆ. ತಮ್ಮ ಶ್ವಾನ ಕೂಡ ‘777 ಚಾರ್ಲಿ’ ಚಿತ್ರವನ್ನು ನೋಡಲಿ ಎಂದು ಅವರು ಹಂಬಲಿಸಿದ್ದಾರೆ. ಆದರೆ ನಾಯಿಗೆ ಚಿತ್ರಮಂದಿರದ ಒಳಗೆ ಪ್ರವೇಶ ನಿರಾಕರಿಸಿದ್ದು ಅವರಿಗೆ ಬೇಸರ ಮೂಡಿಸಿದೆ. ಈ ಕುರಿತು ಅವರು ‘ಟಿವಿ9 ಕನ್ನಡ’ ಜೊತೆ ಮಾತನಾಡಿದ್ದಾರೆ.
ಇದನ್ನೂ ಓದಿ: ‘777 ಚಾರ್ಲಿ’ ಚಿತ್ರದಿಂದ ನಾಯಿಗಳಿಗೂ ಬಂತು ಕಾಲ; ಚಾರ್ಲಿ ಹೆಸರಿನಲ್ಲಿ ಹುಟ್ಟಿಕೊಂಡ ಅಭಿಮಾನಿ ಸಂಘ
‘ಆನ್ಲೈನ್ನಲ್ಲಿ 3 ಟಿಕೆಟ್ ಬುಕ್ ಮಾಡಿದ್ವಿ. ನಮ್ಮ ಡಯಾನಾನನ್ನು (ಶ್ವಾನ) ಮಧ್ಯ ಕೂರಿಸಿಕೊಂಡು ಅದರ ಅಕ್ಕ-ಪಕ್ಕ ನಾವು ಕುಳಿತು ಸಿನಿಮಾ ನೋಡೋಣ ಅಂತ ಬಂದೆವು. ಈ ನಾಯಿ ಯಾರಿಗೂ ತೊಂದರೆ ಕೊಡುವುದಿಲ್ಲ. ಆದರೂ ಕೂಡ ಇದಕ್ಕೆ ಚಿತ್ರಮಂದಿರದ ಒಳಗೆ ಹೋಗಲು ಅನುಮತಿ ಸಿಕ್ಕಿಲ್ಲ. ಮನವಿ ಮಾಡಿಕೊಂಡರೂ ಕೂಡ ನಮ್ಮ ನಾಯಿಯನ್ನು ಚಿತ್ರಮಂದಿರದವರು ಒಳಗೆ ಬಿಡುತ್ತಿಲ್ಲ’ ಎಂದು ಅವರು ಪ್ರತಿಕ್ರಿಯೆ ನೀಡಿದ್ದಾರೆ.
‘777 ಚಾರ್ಲಿ’ ಚಿತ್ರದ ಪ್ರಮೋಷನ್ ವೇಳೆ ಬೆಂಗಳೂರಿನ ಖಾಸಗಿ ಹೋಟೆಲ್ ಒಳಗೆ ಬರಲು ಶಾರ್ಲಿ ಶ್ವಾನಕ್ಕೆ ಅವಕಾಶ ನೀಡಿರಲಿಲ್ಲ. ಅದರ ಬಗ್ಗೆ ರಕ್ಷಿತ್ ಶೆಟ್ಟಿ ಮಾತನಾಡಿದ್ದರು. ಈ ಸಿನಿಮಾ ನೋಡಿದ ಬಳಿಕ ಅನೇಕ ಜನರ ಮನಸ್ಥಿತಿ ಬದಲಾಗುತ್ತದೆ ಎಂದು ಅವರು ಹೇಳಿದ್ದರು.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.