‘ಗಂಡನಾಗಿ ನನಗೆ ಮಡದಿಯ ಮೇಲೆ ಹೆಮ್ಮೆ’; ಪತ್ನಿ ಪರಿಮಳಾ ಸಾಧನೆ ಬಗ್ಗೆ ಹಮ್ಮೆ ವ್ಯಕ್ತಪಡಿಸಿದ ಜಗ್ಗೇಶ್

ನಟ ಜಗ್ಗೇಶ್ (Jaggesh) ಹಾಗೂ ಪರಿಮಳಾ ಅವರ ದಾಂಪತ್ಯಕ್ಕೆ 4 ದಶಕ ತುಂಬುವುದರಲ್ಲಿದೆ. ಇಬ್ಬರೂ ಹಾಯಾಗಿ ಸಂಸಾರ ನಡೆಸಿಕೊಂಡು ಬರುತ್ತಿದ್ದಾರೆ. ಜಗ್ಗೇಶ್ ಆಗಿನ್ನೂ ಚಿತ್ರರಂಗದಲ್ಲಿ ಗುರುತಿಸಿಕೊಂಡಿರಲಿಲ್ಲ. ಆಗಲೇ ಜಗ್ಗೇಶ್ ಹಾಗೂ ಪರಿಮಳಾ ಮದುವೆ ನಡೆದಿತ್ತು. ಪತ್ನಿಗೆ ನೀಡಿದ್ದ ಒಂದು ಭರವಸೆಯನ್ನು ಜಗ್ಗೇಶ್ ಈಡೇರಿಸಿದ್ದರು. ಈಗ ಪತ್ನಿ ಮಾಡಿದ ಸಾಧನೆ ಬಗ್ಗೆ ಜಗ್ಗೇಶ್ ಹೆಮ್ಮೆ ವ್ಯಕ್ತಪಡಿಸಿದ್ದಾರೆ. ಈ ಬಗ್ಗೆ ಸೋಶಿಯಲ್ ಮೀಡಿಯಾದಲ್ಲಿ ಅವರು ಬರೆದುಕೊಂಡಿದ್ದಾರೆ.

ಜಗ್ಗೇಶ್​ ಮತ್ತು ಪರಿಮಳಾ ಅವರದ್ದು ಲವ್​ ಮ್ಯಾರೇಜ್​. ತುಂಬ ಚಿಕ್ಕ ವಯಸ್ಸಿನಲ್ಲಿಯೇ ಜಗ್ಗೇಶ್ ಪ್ರೀತಿಯಲ್ಲಿ ಬಿದ್ದಿದ್ದರು. ಆಗ ಪರಿಮಳಾ ಅವರಿಗೆ ಕೇವಲ 14 ವರ್ಷ. ಜಗ್ಗೇಶ್​ ಅವರಿಗೆ 19ರ ಪ್ರಾಯ. ಕೆಲವೇ ಕೆಲವು ಸ್ನೇಹಿತರ ಸಮ್ಮುಖದಲ್ಲಿ 1984ರ ಮಾ.22ರಂದು ಜಗ್ಗೇಶ್​ ಮತ್ತು ಪರಿಮಳಾ ರಿಜಿಸ್ಟರ್​ ಮ್ಯಾರೇಜ್​ ಆದರು. ಆದರೆ, ಇದಕ್ಕೆ ಪರಿಮಳಾ ಕುಟುಂಬದವರಿಂದಲೇ ಅಡ್ಡಿ ಎದುರಾಗಿತ್ತು. ಮದುವೆ ಸಂದರ್ಭದಲ್ಲಿ ಜಗ್ಗೇಶ್ ಅವರು ಪರಿಮಳಾಗೆ ಶಿಕ್ಷಣ ಕೊಡಿಸುವ ಭರವಸೆ ನೀಡಿದ್ದರಂತೆ.

‘ಮಡದಿ ಪರಿಮಳಾ ಎಸ್​ಎಸ್​ಎಲ್​ಸಿ ಓದುವಾಗ ನನ್ನ ಮದುವೆ ಆದದ್ದು. ಪರಿಮಳ ನನ್ನ ಕೇಳಿಕೊಂಡಿದ್ದು ಓದಿಸು ಎಂದು. ನಾನು ಮಾತು ಕೊಟ್ಟೆ. ಎಲ್ಲಿಯವರೆಗೆ ಓದುತ್ತೀಯೋ, ಅಲ್ಲಿಯವರೆಗೆ ಓದಿಸುವೆ ಎಂದು ಭರವಸೆ ಕೊಟ್ಟಿದೆ. 1985ರ ಸಮಯ. ಕಾಸು, ಕೆಲಸ ಇಲ್ಲದ ದಿನಗಳು ಅವು. ಅವಳ ವಿದ್ಯಾಭ್ಯಾಸಕ್ಕೆ ಹೇಗೆ ಹಣ ಹೊಂದಿಕೆ ಮಾಡುವುದು ಎಂಬ ಚಿಂತೆ ಇತ್ತು’ ಎಂದು ಬರಹ ಆರಂಭಿಸಿದ್ದಾರೆ ಜಗ್ಗೇಶ್.

ಇದನ್ನೂ ಓದಿ: Totapuri: ‘ತೋತಾಪುರಿ’ ರಿಲೀಸ್​ ದಿನವೇ ಚಂಡಿಕಾ ಹೋಮ ಮಾಡಿಸಿದ ಜಗ್ಗೇಶ್​-ಪರಿಮಳಾ ದಂಪತಿ

‘ಪಿಯುಸಿಯಲ್ಲಿ ಮೆರಿಟ್ ಪಡೆದು BE ARCಗೆ ಬಿಎಂಎಸ್​​ನಲ್ಲಿ ಸೀಟ್​ ಪಡೆದೇ ಬಿಟ್ಟಳು. ಅಲ್ಲಿಂದ ಇಲ್ಲಿಯವರೆಗೂ ನ್ಯೂಟ್ರಿಷಿಯನ್​ನಲ್ಲೇ 5 ಪ್ರಮಾಣಪತ್ರ ಪಡೆದು ತನ್ನದೆ ಸ್ವಂತ ಸಂಸ್ಥೆ ನಡೆಸುತ್ತಿದ್ದಾಳೆ. ಪ್ರಪ್ರಥಮವಾಗಿ ವಿದೇಶ ನೆಲದಲ್ಲಿ ತನ್ನ ಪ್ರತಿಭೆ ಅನಾವರಣ ಮಾಡುವ ಅದೃಷ್ಟ ಅವಳ ಪ್ರತಿಭೆಗೆ ಒದಗಿ ಬಂದಿದೆ. ಗಂಡನಾಗಿ ನನಗೆ ಮಡದಿಯ ಮೇಲೆ ಹೆಮ್ಮೆ. ನಿಮ್ಮ ಶುಭಹಾರೈಕೆಯು ಇರಲಿ. ಶುಭದಿನ’ ಎಂದು ಜಗ್ಗೇಶ್ ತಮ್ಮ ಬರಹ ಕೊನೆಗೊಳಿಸಿದ್ದಾರೆ. ಪರಿಮಳಾಗೆ ಎಲ್ಲರಿಂದಲೂ ಶುಭಾಶಯ ಬರುತ್ತಿದೆ.