Yash: ‘ಕೆಜಿಎಫ್ 3’ ಮಾತ್ರ ನಿಮಗೆ ಉಳಿದಿರುವ ಆಯ್ಕೆ ಎಂದವರಿಗೆ ಯಶ್ ಕೊಟ್ರು ಖಡಕ್ ಉತ್ತರ
‘ನಿಮಗೆ ಉಳಿದಿರುವುದು ಕೆಜಿಎಫ್ 3 ಮಾತ್ರ. ನೀವು ಅದನ್ನೇ ಮಾಡಬೇಕು’ ಎಂದು ಯಶ್ಗೆ ಅನೇಕರು ಕಿವಿಮಾತು ಹೇಳಿದ್ದರಂತೆ. ಇವರಿಗೆ ಯಶ್ ತಿರುಗೇಟು ಕೊಟ್ಟಿದ್ದಾರೆ.
ಒಂದು ದೊಡ್ಡ ಯಶಸ್ಸು ಸಿಕ್ಕ ನಂತರದಲ್ಲಿ ಆ ವರ್ಚಸ್ಸನ್ನು ಮುಂದುವರಿಸಿಕೊಂಡು ಹೋಗುವುದು ತುಂಬಾ ಸವಾಲಿನ ಕೆಲಸ. ಇದಕ್ಕೆ ತಾಜಾ ಉದಾಹರಣೆ ಪ್ರಭಾಸ್(Prabhas). ‘ಬಾಹುಬಲಿ’ ಸರಣಿಯಿಂದ ಅವರಿಗೆ ಸಾಕಷ್ಟು ಜನಪ್ರಿಯತೆ ಸಿಕ್ಕಿತು. ಈ ಚಿತ್ರದಿಂದ ಅವರು ಗೆದ್ದರು. ಅವರ ಸಿನಿಮಾಗಳ ಬಗ್ಗೆ ಸಾಕಷ್ಟು ನಿರೀಕ್ಷೆ ಹುಟ್ಟಿತು. ‘ಬಾಹುಬಲಿ 2’ ಬಳಿಕ ಬಂದ ಎರಡು ಸಿನಿಮಾಗಳು ಸೋತವು. ಯಶ್ಗೂ (Yash) ಹೀಗೆಯೇ ಆಗುತ್ತದೆ ಎಂದು ಅನೇಕರು ಹೇಳಿದ್ದಿದೆ. ಇದಕ್ಕೆ ಯಶ್ ಖಡಕ್ ಆಗಿ ಉತ್ತರಿಸಿದ್ದಾರೆ.
ಯಶ್ ‘ಕೆಜಿಎಫ್ 2’ ಮೂಲಕ ಯಶಸ್ಸು ಕಂಡಿದ್ದಾರೆ. ಅವರ ಮುಂದಿನ ಸಿನಿಮಾ ‘ಕೆವಿಎನ್ ಪ್ರೊಡಕ್ಷನ್’ ಜತೆ ಎಂಬ ವಿಚಾರ ರಿವೀಲ್ ಆಗಿದೆ. ಆದರೆ, ನಿರ್ದೇಶಕರು ಯಾರು ಎಂಬುದು ಇನ್ನೂ ಘೋಷಣೆ ಆಗಿಲ್ಲ. ಹೀಗಿರುವಾಗಲೇ ಯಶ್ಗೆ ಅನೇಕರು ಅನೇಕ ರೀತಿಯಲ್ಲಿ ಪ್ರಶ್ನೆ ಮಾಡಿದ್ದಾರೆ. ‘ನಿಮಗೆ ಉಳಿದಿರುವುದು ಕೆಜಿಎಫ್ 3 ಮಾತ್ರ. ನೀವು ಅದನ್ನೇ ಮಾಡಬೇಕು’ ಎಂದು ಯಶ್ಗೆ ಅನೇಕರು ಕಿವಿಮಾತು ಹೇಳಿದ್ದರಂತೆ. ಇವರಿಗೆ ಯಶ್ ತಿರುಗೇಟು ಕೊಟ್ಟಿದ್ದಾರೆ. ಒಂದು ಕಡೆ ಸೆಟಲ್ ಆಗಿ ಕೆಲಸ ಮಾಡುವ ವ್ಯಕ್ತಿ ನಾನಲ್ಲ ಎಂದಿದ್ದಾರೆ.
ಸಂದರ್ಶನ ಒಂದರಲ್ಲಿ ಮಾತನಾಡಿರುವ ಯಶ್, ‘ಜನರು ಈಗಲೂ ಕೇಳುತ್ತಾರೆ. ಹೊಸ ಸಿನಿಮಾ ಘೋಷಿಸಲು ಇಷ್ಟೊಂದು ಸಮಯ ಏಕೆ ತೆಗೆದುಕೊಳ್ಳುತ್ತಿದ್ದೀರಿ? ನೀವು ಮುಂದೇನು ಮಾಡುತ್ತೀರಿ? ನನ್ನ ಪ್ರಕಾರ ನಿಮಗೆ ಉಳಿದಿರೋದು ಕೆಜಿಎಫ್ 3 ಮಾತ್ರ. ಗಡ್ಡ ತೆಗೆದರೆ ಜನರು ನಿಮ್ಮನ್ನು ಹೇಗೆ ಒಪ್ಪಿಕೊಳ್ಳುತ್ತಾರೆ? ಈ ರೀತಿಯ ಪ್ರಶ್ನೆಗಳು, ಮಾತುಗಳು ನನ್ನ ಗೆಳೆಯರ ವಲಯದಿಂದಲೇ ಬಂದಿದೆ’ ಎಂದಿದ್ದಾರೆ ಯಶ್.
‘ನಿಮ್ಮಿಂದ ಏನು ಮಾಡಲು ಸಾಧ್ಯ? ಇದೇ ಕೊನೆಯೇ? ಎಂದು ಕೇಳುತ್ತಾರೆ. ಅದು ನಿಮಗೆ ಇರಬಹುದು. ಗೆದ್ದಿರುವುದನ್ನು ನಿಭಾಯಿಸುವುದಕ್ಕಿಂತ ಹೊಸದನ್ನು ಗೆಲ್ಲುವುದು ನನಗಿಷ್ಟ. ಎಗ್ಸೈಟ್ಮೆಂಟ್ ಕೊಡುವ ಕೆಲಸವನ್ನು ನಾನು ಮಾಡುತ್ತೇನೆ. ಹೋರಾಡುತ್ತ ಮೃತಪಟ್ಟರೆ ನನಗೇನೂ ಬೇಸರ ಇಲ್ಲ. ಆದರೆ, ಹೋರಾಡುತ್ತಿದ್ದೇನಲ್ಲ ಅದು ಮುಖ್ಯ’ ಎಂದು ಯಶ್ ಹೇಳಿಕೊಂಡಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ