ಧ್ರುವ ಹಿಂದೆ ಬಿದ್ದ ತೆಲುಗು ಸ್ಟಾರ್​ ನಿರ್ದೇಶಕ? ಇದು ಧೂಳ್​ ಧಮಾಕಾ ಕಾಂಬಿನೇಷನ್​!

ಕನ್ನಡ ಚಿತ್ರರಂಗದ ‘ಆ್ಯಕ್ಷನ್​ ಪ್ರಿನ್ಸ್​’ ಧ್ರುವ ಸರ್ಜಾ ಅವರು ಸದ್ಯ ‘ಪೊಗರು’ ಸಿನಿಮಾದ ಯಶಸ್ಸಿನ ಖುಷಿಯಲ್ಲಿ ತೇಲುತ್ತಿದ್ದಾರೆ. ಆ ಚಿತ್ರದ ಗೆಲುವಿನಿಂದಾಗಿ ಅವರ ಖ್ಯಾತಿ ಅಕ್ಕಪಕ್ಕದ ರಾಜ್ಯಗಳಿಗೂ ಹಬ್ಬಿದೆ. ಪರಭಾಷೆಯಲ್ಲೂ ಅವರಿಗೆ ಅಭಿಮಾನಿಗಳು ಹೆಚ್ಚಾಗಿದ್ದಾರೆ. ಅಷ್ಟೇ ಅಲ್ಲದೆ, ಅಲ್ಲಿನ ಸ್ಟಾರ್​ ನಿರ್ದೇಶಕರು ಕೂಡ ಧ್ರುವ ಜೊತೆ ಸಿನಿಮಾ ಮಾಡಲು ಇಂಟರೆಸ್ಟ್​ ತೋರಿಸುತ್ತಿದ್ದಾರೆ.

ಹೌದು, ಇಂಥದ್ದೊಂದು ಸುದ್ದಿ ಬಲವಾಗಿ ಕೇಳಿಬರುತ್ತಿದೆ. ಟಾಲಿವುಡ್​ನ ಖ್ಯಾತ ನಿರ್ದೇಶಕ ಪುರಿ ಜಗನ್ನಾಥ್​ ಜೊತೆ ಧ್ರುವ ಸಿನಿಮಾ ಮಾಡಲಿದ್ದಾರೆ ಎಂಬ ಮಾಹಿತಿ ಹರಿದಾಡುತ್ತಿದೆ. ಟಾಲಿವುಡ್​ನಲ್ಲಿ ಅನೇಕ ಹಿಟ್​ ಸಿನಿಮಾಗಳನ್ನು ನೀಡಿರುವ ಪುರಿ ಜಗನ್ನಾಥ್​ ಅವರಿಗೆ 2019ರಲ್ಲಿ ‘ಇಸ್ಮಾರ್ಟ್​ ಶಂಕರ್​’ ಮೂಲಕ ಭರ್ಜರಿ ಗೆಲುವು ಸಿಕ್ಕಿತ್ತು. ಅದರ ನಂತರ ಅವರು ವಿಜಯ್​ ದೇವರಕೊಂಡ ಜೊತೆ ‘ಲೈಗರ್​’ ಸಿನಿಮಾ ಅನೌನ್ಸ್​ ಮಾಡಿದರು. ಈಗ ಅವರು ಧ್ರುವ ಜೊತೆ ಕೈ ಜೋಡಿಸಲಿರುವುದು ವಿಶೇಷ.

ತಮ್ಮ ಸಿನಿಮಾದ ಹೀರೋಗಳನ್ನು ಸಿಕ್ಕಾಪಟ್ಟೆ ರಗಡ್​ ಆಗಿ ತೋರಿಸುವಲ್ಲಿ ಪುರಿ ಜಗನ್ನಾಥ್​ ಫೇಮಸ್​. ಅದಕ್ಕೆ ‘ಇಸ್ಮಾರ್ಟ್​ ಶಂಕರ್’ ಚಿತ್ರವೇ​ ಲೇಟೆಸ್ಟ್​ ಉದಾಹರಣೆ. ಇನ್ನು, ಧ್ರುವ ಕೂಡ ಪೊಗರು ಸಿನಿಮಾದಲ್ಲಿ ಹಿಂದೆಂದಿಗಿಂತಲೂ ರಗಡ್​ ಆಗಿ ಕಾಣಿಸಿಕೊಂಡಿದ್ದರು. ಈಗ ಇವರಿಬ್ಬರ ಕಾಂಬಿನೇಷನ್​ನ ಸಿನಿಮಾ ಸೆಟ್ಟೇರಿದ್ದೇ ಹೌದಾದರೆ ಧೂಳ್ ಧಮಾಕಾ ಆಗುವುದರಲ್ಲಿ ಅನುಮಾನವೇ ಇಲ್ಲ. ಈ ಕುರಿತಂತೆ ಧ್ರುವ ಮತ್ತು ಪುರಿ ನಡುವೆ ಒಂದು ಸುತ್ತಿನ ಮಾತುಕತೆ ನಡೆದಿದೆ ಎನ್ನಲಾಗಿದೆ. ಅಧಿಕೃತವಾಗಿ ಸುದ್ದಿ ನೀಡುವುದೊಂದೇ ಬಾಕಿ ಇದೆ ಎಂಬುದು ಮೂಲಗಳ ಮಾಹಿತಿ.

ಧ್ರುವ ಸರ್ಜಾಗೆ ಸಿಕ್ಕಾಪಟ್ಟೆ ಬೇಡಿಕೆ ಇದೆ. ಪೊಗರು ಬಳಿಕ ಮತ್ತೆ ಅವರು ನಿರ್ದೇಶಕ ನಂದಕಿಶೋರ್​ ಜೊತೆ ಸಿನಿಮಾ ಮಾಡುತ್ತಿದ್ದು, ಆ ಚಿತ್ರಕ್ಕೆ ದುಬಾರಿ ಎಂದು ಶೀರ್ಷಿಕೆ ಇಡಲಾಗಿದೆ. ಅತ್ತ, ಪುರಿ ಕೂಡ ‘ಲೈಗರ್​’ ಕೆಲಸಗಳಲ್ಲಿ ಬ್ಯುಸಿ ಆಗಿದ್ದಾರೆ. ಅದು ಮುಗಿದ ಬಳಿಕವೇ ಧ್ರುವ-ಪುರಿ ಸಿನಿಮಾ ಸೆಟ್ಟೇರುವ ಸಾಧ್ಯತೆ ಇದೆ.

ಇನ್ನು, ಕನ್ನಡ ಚಿತ್ರರಂಗದ ಜೊತೆ ಪುರಿ ಜಗನ್ನಾಥ್​ ಅವರಿಗೆ ಮೊದಲಿನಿಂದಲೂ ನಂಟು ಇದೆ. ಪುನೀತ್​ ರಾಜ್​ಕುಮಾರ್​ ಮೊದಲ ಬಾರಿಗೆ ಹೀರೋ ಆದ ‘ಅಪ್ಪು’ ಚಿತ್ರಕ್ಕೆ ಆ್ಯಕ್ಷನ್​-ಕಟ್​ ಹೇಳಿದ್ದು ಇದೇ ಪುರಿ ಜಗನ್ನಾಥ್​. ಶಿವರಾಜ್​ಕುಮಾರ್​ ನಟನೆಯ ‘ಯುವರಾಜ’ ಮತ್ತು ಇಶಾನ್​ ಅಭಿನಯದ ‘ರೋಗ್​’ ಚಿತ್ರಗಳು ಮೂಡಿಬಂದಿದ್ದು ಕೂಡ ಪುರಿ ನಿರ್ದೇಶನದಲ್ಲೇ.

ಇದನ್ನೂ ಓದಿ: ಧ್ರುವ ಸರ್ಜಾರನ್ನು ನೋಡಲು ಮುಗಿಬಿದ್ದ ಅಭಿಮಾನಿಗಳಿಗೆ ಬಿತ್ತು ಪೊಲೀಸ್ ಲಾಠಿ ಏಟು

Pogaru First Day Collection: ಧ್ರುವ ಸರ್ಜಾ ನಟನೆಯ ಪೊಗರು ಮೊದಲ ದಿನದ ಗಳಿಕೆ ಎಷ್ಟು ಗೊತ್ತಾ?