Shruti Haasan: ‘ಸಲಾರ್​’ ನಟಿ ಶ್ರುತಿ ಹಾಸನ್​ ಮೂಗಿಗೆ ಪ್ಲಾಸ್ಟಿಕ್​ ಸರ್ಜರಿ ಆಗಿದ್ದು ನಿಜವೇ? ಮತ್ತೆ ಸ್ಪಷ್ಟನೆ ನೀಡಿದ ಕಮಲ್​ ಪುತ್ರಿ

ಪ್ರಭಾಸ್​ ನಟನೆಯ ‘ಸಲಾರ್​’ (Salaar) ಸಿನಿಮಾ ಮೂಲಕ ನಟಿ ಶ್ರುತಿ ಹಾಸನ್​ (Shruti Haasan) ಅವರು ದೊಡ್ಡ ಗೆಲುವು ಪಡೆಯುವ ನಿರೀಕ್ಷೆಯಲ್ಲಿದ್ದಾರೆ. ಈ ಚಿತ್ರಕ್ಕೆ ಅವರು ಆಯ್ಕೆ ಆದಾಗ ಒಂದಷ್ಟು ಜನರು ಟ್ರೋಲ್​ ಮಾಡಿದ್ದರು. ಈ ರೀತಿಯ ಹಲವು ಟೀಕೆಗಳನ್ನು ಎದುರಿಸಿಕೊಂಡೇ ಬಂದಿದ್ದಾರೆ ಶ್ರುತಿ ಹಾಸನ್​. ವೃತ್ತಿಜೀವನದ ಆರಂಭದಿಂದ ಇಲ್ಲಿಯವರೆಗೆ ಅನೇಕ ವಿಚಾರಗಳಲ್ಲಿ ಅವರು ಟೀಕೆಗೆ ಒಳಗಾಗಿದ್ದುಂಟು. ಅದರಲ್ಲೂ ಅವರ ಮೂಗಿನ ಬಗ್ಗೆ ನೆಟ್ಟಿಗರು ನೂರಾರು ರೀತಿಯ ಕಮೆಂಟ್​ ಮಾಡಿದ್ದಾರೆ. ಈಗಲೂ ಆ ಬಗ್ಗೆ ಚರ್ಚೆ ಆಗುತ್ತಲೇ ಇದೆ. ಕಮಲ್​ ಹಾಸನ್​ ಪುತ್ರಿಯಾದ ಶ್ರುತಿ ಹಾಸನ್​ ಅವರು ಮೂಗಿಗೆ ಪ್ಲಾಸ್ಟಿಕ್​ ಸರ್ಜರಿ (Shruti Haasan Plastic Surgery) ಮಾಡಿಸಿಕೊಂಡಿದ್ದಾರೆ ಎಂಬುದನ್ನು ಕೆಲವರು ಪದೇಪದೇ ಹೇಳಲು ಆರಂಭಿಸಿದರು. ಹಾಗಂತ ಆ ವಿಚಾರವನ್ನು ಶ್ರುತಿ ಮುಚ್ಚಿಟ್ಟಿಲ್ಲ. ಬಹಳ ಹಿಂದೆಯೇ ಅವರು ಈ ಬಗ್ಗೆ ಸ್ಪಷ್ಟನೆ ನೀಡಿದ್ದರು. ಹಾಗಿದ್ದರೂ ಜನರು ಮಾತನಾಡುವುದನ್ನು ನಿಲ್ಲಿಸಿಲ್ಲ. ಇತ್ತೀಚೆಗೆ ನೀಡಿದ ಸಂದರ್ಶನದಲ್ಲಿ ಮತ್ತೆ ಈ ಬಗ್ಗೆ ಪ್ರಸ್ತಾಪ ಆಗಿದೆ.

ಅಷ್ಟಕ್ಕೂ ಶ್ರುತಿ ಹಾಸನ್​ ಅವರು ಮೂಗಿಗೆ ಪ್ಲಾಸ್ಟಿಕ್​ ಸರ್ಜರಿ ಮಾಡಿಸಿಕೊಂಡಿದ್ದು ಯಾಕೆ? ಆ ಬಗ್ಗೆ ಅವರು ಮಾತನಾಡಿದ್ದಾರೆ. ‘ನಾನು ಮೂಗು ಸರಿಪಡಿಸಿಕೊಂಡಿದ್ದು ನಿಜ. ಅದು ತುಂಬ ಸ್ಪಷ್ಟ. ನನಗೆ ಮೂಗಿನ ಸಮಸ್ಯೆ (deviated septum) ಇತ್ತು. ಅದನ್ನೇ ನೆಪವಾಗಿಸಿಕೊಂಡೆ ಅಂತ ಜನ ಹೇಳ್ತಾರೆ. ಮೂಗಿನ ಸಮಸ್ಯೆಯಿಂದ ನನಗೆ ನೋವಾಗುತ್ತಿತ್ತು. ಚೆನ್ನಾಗಿ ಕಾಣಲು ಯಾಕೆ ಪ್ಲಾಸ್ಟಿಕ್​ ಸರ್ಜರಿ ಮಾಡಿಸಬಾರದು? ಅದು ನನ್ನ ಆಯ್ಕೆಗೆ ಬಿಟ್ಟಿದ್ದು’ ಎಂದು ಶ್ರುತಿ ಹಾಸನ್​ ಹೇಳಿದ್ದಾರೆ. ಅವರು ಫಿಲ್ಲರ್ಸ್​ ಕೂಡ ಬಳಸಿದ್ದಾರೆ. ನಾಳೆ ಫೇಸ್​ ಲಿಫ್ಟ್​ ಮಾಡಿಸುವುದು ಅಥವಾ ಬಿಡುವುದು ಕೂಡ ತಮ್ಮದೇ ಆಯ್ಕೆ ಎಂದಿದ್ದಾರೆ.

ಪ್ಲಾಸ್ಟಿಕ್​ ಸರ್ಜರಿ ಮಾಡಿಸಿಕೊಂಡ ಕಾರಣಕ್ಕೆ ಅನೇಕ ನಟಿಯರು ಟ್ರೋಲ್​ ಆದ ಉದಾಹರಣೆ ಇದೆ. ಶ್ರುತಿ ಹಾಸನ್​ ಅವರಿಗೂ ಆ ಕಾಟ ತಪ್ಪಿಲ್ಲ. ಆದರೆ ಅದನ್ನೆಲ್ಲ ಮೀರಿ ಅವರು ಬೆಳೆದಿದ್ದಾರೆ. ಅನೇಕ ಸ್ಟಾರ್​ ಕಲಾವಿದರ ಸಿನಿಮಾಗಳಿಗೆ ಅವರು ಹೀರೋಯಿನ್​ ಆಗಿ ಮಿಂಚಿದ್ದಾರೆ. ಈಗ ಬಹುನಿರೀಕ್ಷಿತ ‘ಸಲಾರ್​’ ಸಿನಿಮಾದಲ್ಲಿ ಅವರು ನಟಿಸುತ್ತಿದ್ದಾರೆ. ಪ್ರಭಾಸ್​ಗೆ ಜೋಡಿ ಆಗುವ ಅವಕಾಶ ಅವರಿಗೆ ಸಿಕ್ಕಿದೆ. ಪ್ರಶಾಂತ್​ ನೀಲ್​ ಜೊತೆ ಕೆಲಸ ಮಾಡುತ್ತಿರುವುದಕ್ಕೆ ಅವರಿಗೆ ಖುಷಿ ಇದೆ.

ತಮಿಳು, ತೆಲುಗು, ಹಿಂದಿ ಮತ್ತು ಕನ್ನಡ ಚಿತ್ರರಂಗದಲ್ಲಿ ಶ್ರುತಿ ಹಾಸನ್​ ಅವರಿಗೆ ಭರ್ಜರಿ ಬೇಡಿಕೆ ಇದೆ. ನಂದಮೂರಿ ಬಾಲಕೃಷ್ಣ ನಟನೆಯ 107ನೇ ಚಿತ್ರರಂಗಕ್ಕೆ ಅವರೇ ನಾಯಕಿ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.