Sameera Reddy: ಮುದ್ದಾದ ಮಗು ಜನಿಸಿದರೂ ಖುಷಿಪಡುವ ಬದಲು ಡಿಪ್ರೆಷನ್ಗೆ ಹೋಗಿದ್ದ ವರದನಾಯಕ ನಟಿ ಸಮೀರಾ ರೆಡ್ಡಿ; ಕಾರಣ ಏನು?
ತಾಯಿ ಆದ ಬಳಿಕ ಒಂದು ವರ್ಷ ಸಮೀರಾ ರೆಡ್ಡಿ ಆಗಾಗ ಡಿಪ್ರೆಷನ್ಗೆ ಹೋಗುತ್ತಿದ್ದರು. ಚಿತ್ರರಂಗದಿಂದ ಅವರು ಅಂತರ ಕಾಯ್ದುಕೊಂಡರು. 2 ವರ್ಷಗಳ ಕಾಲ ಕಣ್ಮರೆಯಾಗಿಬಿಟ್ಟರು. ಅಂತಿಮವಾಗಿ ಅವರಿಗೆ ಎಲ್ಲವೂ ಅರಿವಾಯಿತು.
ಸುದೀಪ್ ನಟನೆಯ ವರದನಾಯಕ ಸಿನಿಮಾ ಮೂಲಕ ಕನ್ನಡದ ಸಿನಿಪ್ರಿಯರಿಗೆ ಪರಿಚಿತರಾದವರು ನಟಿ ಸಮೀರಾ ರೆಡ್ಡಿ. ಆ ಸಿನಿಮಾ ಬಳಿಕ ಅವರ ಚಿತ್ರರಂಗದಿಂದ ದೂರ ಸರಿದರು. ಮದುವೆ-ಮಕ್ಕಳು ಅಂತ ಸಂಸಾರದಲ್ಲಿ ಬ್ಯುಸಿ ಆದರು. ಸಮೀರಾ ಈಗ ಎರಡು ಮಕ್ಕಳ ತಾಯಿ. ಸೋಶಿಯಲ್ ಮೀಡಿಯಾದಲ್ಲೂ ಅವರು ಸಿಕ್ಕಾಪಟ್ಟೆ ಆ್ಯಕ್ಟೀವ್ ಆಗಿ ಇರುತ್ತಾರೆ. ಇತ್ತೀಚೆಗೆ ಖಾಸಗಿ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಅವರು ಕೆಲವು ಮುಖ್ಯ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.
2015ರಲ್ಲಿ ಸಮೀರಾ ರೆಡ್ಡಿ ಮೊದಲ ಮಗುವಿಗೆ ಜನ್ಮ ನೀಡಿದರು. ಅವರಿಗೆ ಮುದ್ದಾದ ಗಂಡು ಮಗು ಜನಿಸಿತು. ಆ ಸಂದರ್ಭದಲ್ಲಿ ಅವರಿಗೆ ಖುಷಿ ಆಗುವುದರ ಬದಲು ಬೇಸರ ಆಗಿತ್ತು. ಮಗು ಜನಿಸಿದ ಬಳಿಕ ಅವರು ಖಿನ್ನತೆಗೆ ಹೋಗಿದ್ದರು. ಮಗನನ್ನು ನೋಡಿಕೊಳ್ಳುವ ಬದಲು ಬೇರೆ ಚಿಂತೆಯಲ್ಲೇ ಅವರು ಮುಳುಗಿ ಹೋಗಿದ್ದರು. ಮೇ 9ರಂದು ವಿಶ್ವ ತಾಯಂದಿರ ದಿನದ ಹಿನ್ನೆಲೆಯಲ್ಲಿ ಈ ವಿಷಯಗಳ ಬಗ್ಗೆ ಸಮೀರಾ ಮಾತನಾಡಿದ್ದಾರೆ.
‘ನಾನು ಗರ್ಭಿಣಿ ಆದಾಗ ಬೇರೆ ನಟಿಯರ ರೀತಿ ಸುಂದರವಾಗಿ ಕ್ಯಾಮರಾಗೆ ಪೋಸ್ ಕೊಡುತ್ತೇನೆ ಎಂದುಕೊಂಡಿದ್ದೆ. ಆದರೆ ಆ ಸಮಯದಲ್ಲಿ ನನ್ನ ದೇಹದ ತೂಕ 105 ಕೆಜಿ ಆಗಿತ್ತು. ಹಾಗಾಗಿ ಮಗು ಜನಿಸಿದ ಬಳಿಕ ನಾನು ಖಿನ್ನತೆಗೆ ಒಳಗಾದೆ. ಆ ಸಮಯದಲ್ಲಿ ಮಗುವನ್ನು ಗಂಡ ಅಕ್ಷಯ್ ಅವರೇ ನೋಡಿಕೊಂಡರು. ಬೇರೆ ನಟಿಯರು ತಾಯಿ ಆದ ಬಳಿಕ ಕೆಲವೇ ತಿಂಗಳಲ್ಲಿ ಹಳೆಯ ಶೇಪ್ಗೆ ಮರಳುತ್ತಾರಲ್ಲ ಅದು ಹೇಗೆ ಎಂಬುದನ್ನೇ ನಾನು ದಿನವಿಡೀ ಯೋಚಿಸುತ್ತಿದೆ. ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆದ ಬಳಿಕ ಜೋರಾಗಿ ಅತ್ತೆ. ಮಗನನ್ನು ಸರಿಯಾಗಿ ನೋಡಿಕೊಳ್ಳಲಿಲ್ಲ ಎಂಬ ಪಾಪಪ್ರಜ್ಞೆ ನನ್ನನ್ನು ಕಾಡಿತು’ ಎಂದು ಸಮೀರಾ ಹೇಳಿದ್ದಾರೆ.
ನಂತರ ಒಂದು ವರ್ಷದ ತನಕವೂ ಸಮೀರಾ ರೆಡ್ಡಿ ಆಗಾಗ ಡಿಪ್ರೆಷನ್ಗೆ ಹೋಗುತ್ತಿದ್ದರು. ಆಗಲೂ ಅವರ ದೇಹದ ತೂಕ 105 ಕೆಜಿ ಇತ್ತು. ಚಿತ್ರರಂಗದಿಂದ ಅವರು ಅಂತರ ಕಾಯ್ದುಕೊಂಡರು. 2 ವರ್ಷಗಳ ಕಾಲ ಕಣ್ಮರೆಯಾಗಿಬಿಟ್ಟರು. ಅಂತಿಮವಾಗಿ ಅವರಿಗೆ ಎಲ್ಲವೂ ಅರಿವಾಯಿತು. ನಂತರ ಸೋಶಿಯಲ್ ಮೀಡಿಯಾಗೆ ಕಾಲಿಟ್ಟರು. ಸೌಂದರ್ಯದ ಬಗ್ಗೆ ಇದ್ದ ಎಲ್ಲ ಸುಳ್ಳು ಪರಿಕಲ್ಪನೆಗಳನ್ನು ತಳ್ಳಿಹಾಕಿ ತಮ್ಮದೇ ಹಾದಿಯಲ್ಲಿ ಜೀವನ ಸಾಗಿಸಲು ಆರಂಭಿಸಿದರು.
2018ರಲ್ಲಿ ಎರಡನೇ ಬಾರಿಗೆ ಗರ್ಭಿಣಿಯಾದ ಸಮೀರಾ ರೆಡ್ಡಿ ಯಾವುದಕ್ಕೂ ಅಂಜಲಿಲ್ಲ. ಆಗ ಅವರಿಗೆ 40 ವರ್ಷ ಆಗಿತ್ತು. ತಮ್ಮದೇ ಶೈಲಿಯಲ್ಲಿ ಪ್ರೆಗ್ನೆನ್ಸಿ ಫೋಟೋಶೂಟ್ ಮಾಡಿಸಿದರು. ಇಂದು ಅವರು ಗ್ಲಾಮರ್ಗೆ ಬೆಲೆ ನೀಡುತ್ತಿಲ್ಲ. ಅದು ಅನೇಕ ಮಹಿಳೆಯರಿಗೆ ಸ್ಫೂರ್ತಿ ನೀಡುತ್ತಿದೆ.
ಇದನ್ನೂ ಓದಿ:
Sameera Reddy: ಕೊರೊನಾ ಸೋಂಕಿತ ‘ವರದನಾಯಕ’ ನಟಿ ಸಮೀರಾ ರೆಡ್ಡಿಗೆ ಕೆಟ್ಟ ಕಮೆಂಟ್
‘ಅಂದು ಪ್ಯಾಡೆಡ್ ಬ್ರಾ ಧರಿಸುತ್ತಿದ್ದೆ; ಇಂದು ಹೀಗಾಗಿದ್ದೇನೆ’: ವರದನಾಯಕ ನಟಿ ಸಮೀರಾ ವಿಡಿಯೋ ವೈರಲ್!