‘ಮಿಸ್ಟರ್ ಜಾಕ್’: ‘ಆರಂಭ ವಸಂತ’ ಹಾಡಿನಲ್ಲಿ ಗಮನ ಸೆಳೆದ ತಪಸ್ವಿನಿ-ಗುರು ನಂದನ್ ಕೆಮಿಸ್ಟ್ರಿ

‘ಪ್ರೇಮದ ಊರಲಿ’ ಸಿನಿಮಾ ಸೂಪರ್ ಹಿಟ್ ಆಗಿದೆ. ಈ ಚಿತ್ರದಲ್ಲಿ ರಮಿಕಾ ಶಿವು, ತಪಸ್ವಿನಿ ಪೂಣಚ್ಚ, ಶ್ರೀರಾಮ್ ಹಾಗೂ ರಂಗಾಯಣ ರಘು ನಟಿಸಿದ್ದಾರೆ. ಈ ಸಿನಿಮಾದ ಹವಾ ಜೋರಿರುವಾಗಲೇ ತಪಸ್ವಿನಿ ಪೂಣಚ್ಚ ಅವರ ಹೊಸ ಚಿತ್ರ ರಿಲೀಸ್​​ಗೆ ರೆಡಿ ಆಗಿದೆ. ತಪಸ್ವಿನಿ ಹಾಗೂ ‘ಫಸ್ಟ್ ರ್ಯಾಂಕ್’ ರಾಜು ಖ್ಯಾತಿಯ ಗುರು ನಂದನ್ ಅಭಿನಯದ ‘ಮಿಸ್ಟರ್​ ಜ್ಯಾಕ್’ ಡಿಸೆಂಬರ್ 4ರಂದು ತೆರೆಗೆ ಬರುತ್ತಿದೆ. ಈ ಚಿತ್ರದ ‘ಆರಂಭ ವಸಂತ ಆರಂಭ’ ಹಾಡು ಬಿಡುಗಡೆಯಾಗಿ ಗಮನ ಸೆಳೆದಿದೆ.

‘ಆರಂಭ ವಸಂತ ಆರಂಭ’ ಹಾಡಿಗೆ ಖ್ಯಾತ ಗೀತಸಾಹಿಸಿ ಪ್ರಮೋದ ಮರವಂತೆ ಅವರು ಸಾಹಿತ್ಯ ಬರೆದಿದ್ದಾರೆ. ಈ ಹಾಡು ತುಂಬಾನೇ ಮೆಲೋಡಿಯಾಗಿದೆ. ಈ ಹಾಡಿನ ಬಗ್ಗೆ ಮಾತನಾಡಿದ ಪ್ರಮೋದ್, ‘ಇತ್ತೀಚೆಗೆ ವಸಂತಾ ಪದ ಸಾಕಷ್ಟು ಟ್ರೆಂಡ್​​ನಲ್ಲಿದೆ. ಪ್ರೇಮದ ಊರಲಿ ಸಿನಿಮಾದಲ್ಲಿ ವಸಂತಾ ಪಾತ್ರ ಗಮನ ಸೆಳೆದಿದೆ. ಅದೇ ರೀತಿ ರುಕ್ಮಿಣಿ ವಸಂತ್ ಹೆಸರು ಕೂಡ ಚರ್ಚೆಯಲ್ಲಿದೆ. ಈ ಹಾಡಿನ ಸಾಲು ಕೂಡ ವಸಂತ ಆರಂಭ ವಸಂತ ಆರಂಭ ಎಂದಿದೆ. ಅದು ಕೇವಲ ಕಾಕತಾಳೀಯ’ ಎಂದರು. ಈ ಹಾಡಿಗೂ ರುಕ್ಮಿಣಿ ವಸಂತ್​ಗೂ ಯಾವುದೇ ನಂಟಿಲ್ಲ ಎಂದು ಸ್ಪಷ್ಟಪಡಿಸಿದರು.

‘ಆರಂಭ ವಸಂತ’ ಹಾಡನ್ನು ಮೊದಲು ಕಾಶ್ಮೀರದಲ್ಲಿ ಶೂಟ್ ಮಾಡುವ ಪ್ಲ್ಯಾನ್ ತಂಡದವರಿಗೆ ಇತ್ತು. ಆದರೆ, ನಂತರ ಈ ಪ್ಲ್ಯಾನ್ ಬದಲಾಯಿಸಲಾಯಿತು. ಗುರು ನಂದನ್ ಅವರ ಹುಟ್ಟೂರು ಚಿಕ್ಕಮಗಳೂರು. ಅಲ್ಲಿನ ವಾತಾವರಣ ಈ ಸಾಂಗ್​​ಗೆ ಪರ್ಫೆಕ್ಟ್ ಆಗಲಿದೆ ಎಂದು ಗುರು ನಂದನ್ ಅವರಿಗೆ ಅನಿಸಿತು. ನಿರ್ದೇಶಕರಿಗೆ ಈ ಬಗ್ಗೆ ತಿಳಿಸಿದಾಗ ಅವರು ಒಪ್ಪಿಕೊಂಡರು. ಕೊನೆಗೆ ಈ ಹಾಡಿನ ಶೂಟ್ ಚಿಕ್ಕಮಗಳೂರಿನಲ್ಲಿ ನಡೆದಿದೆ. ಜಸ್ಕರಣ್ ಸಿಂಗ್ ಅವರ ಕಂಠದಲ್ಲಿ ಈ ಸಾಂಗ್ ಹಾಡಿದ್ದಾರೆ. ಅವರು ಹಾಡಿನ ಮೆರುಗು ಹೆಚ್ಚಿಸಿದ್ದಾರೆ.

ಇದನ್ನೂ ಓದಿ: ‘ಪ್ರೇಮದ ಊರಲಿ’ ಸಿನಿಮಾ ರಿಲೀಸ್ ಆಗಿ ತಿಂಗಳು; ಮಾಡಿದ ಕಲೆಕ್ಷನ್ ಎಷ್ಟು?

ಈ ಹಾಡಿಗೆ ಕಿರಣ್ ರವೀಂದ್ರನಾಥ್ ಸಂಗೀತ ಸಂಯೋಜನೆ ಇದೆ. ಮಂಡಿಮನೆ ಟಾಕೀಸ್ ಬ್ಯಾನರ್ ಅಡಿಯಲ್ಲಿ ಈ ಸಿನಿಮಾ ಸಿದ್ಧವಾಗಿದೆ. ಸುಮಂತ್ ಗೌಡ ಅವರು ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಶಿವ ಸೇನಾ ಛಾಯಾಗ್ರಹಣ, ವಿಜಯ್ ರಾಜ್ ಸಂಕಲನ ಚಿತ್ರಕ್ಕಿದೆ. ಈ ಚಿತ್ರದಲ್ಲಿ ಗುರು ನಂದನ್, ತಪಸ್ವಿನಿ ಪೂಣಚ್ಚ, ಗೋಪಾಲ್ ದೇಶ್​ಪಾಂಡೆ, ಮಿತ್ರಾ, ಅರವಿಂದ್ ರಾವ್, ‘ಮಜಾಭಾರತ್’ ಖ್ಯಾತಿಯ ಸುಷ್ಮಿತಾ ಮೊದಲಾದವರು ಸಿನಿಮಾದಲ್ಲಿ ನಟಿಸಿದ್ದಾರೆ. ಸದ್ಯ ಸಿನಿಮಾ ಪ್ರಚಾರ ಆರಂಭಿಸಿದ್ದು, ಶೀಘ್ರವೇ ಟೀಸರ್ ಹಾಗೂಟ ಟ್ರೇಲರ್ ರಿಲೀಸ್ ಮಾಡಲು ತಂಡ ಪ್ಲ್ಯಾನ್ ಮಾಡಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.

Published On - 11:07 am, Tue, 27 October 26