Toxic Twitter Review: ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ಪಡೆದ ‘ಟಾಕ್ಸಿಕ್’; ಇಲ್ಲಿದೆ ಟ್ವಿಟರ್ ರಿವ್ಯೂ

ಗೀತು ಮೋಹನ್​ದಾಸ್ ನಿರ್ದೇಶನದ, ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ‘ಟಾಕ್ಸಿಕ್’ (Toxic) ಸಿನಿಮಾ ಮೇಲೆ ಅಭಿಮಾನಿಗಳು ಭಾರಿ ನಿರೀಕ್ಷೆ ಇಟ್ಟುಕೊಂಡಿದ್ದರು. ಚಿತ್ರತಂಡದವರು ವಿವಿಧ ನಗರಗಳಿಗೆ ತೆರಳಿ ಭಾರಿ ಪ್ರಚಾರ ನೀಡಿದ್ದರು. ಯಶ್ ಮೇಲಿನ ನಂಬಿಕೆಯಿಂದಾಗಿ ಹಾಗೂ ಬಹುತಾರಾಗಣ ಇದೆ ಎಂಬ ಕಾರಣದಿಂದಾಗಿ ಮೊದಲ ದಿನವೇ ಈ ಸಿನಿಮಾದ ಶೋಗಳು ಹೌಸ್​ಫುಲ್ ಆದವು. ಸಿನಿಮಾ ನೋಡಿ ಚಿತ್ರಮಂದಿರದಿಂದ ಹೊರಬಂದ ಪ್ರೇಕ್ಷಕರು ಸೋಶಿಯಲ್ ಮೀಡಿಯಾದಲ್ಲಿ ತಮ್ಮ ಅನಿಸಿಕೆ ತಿಳಿಸುತ್ತಿದ್ದಾರೆ. ಜನರು ಹಂಚಿಕೊಂಡ ಎಕ್ಸ್ (ಟ್ವಿಟರ್) ವಿಮರ್ಶೆ (Toxic Twitter Review) ಇಲ್ಲಿದೆ.

ಅಪ್ಪಟ ಅಭಿಮಾನಿಗಳಿಗೆ ಈ ಸಿನಿಮಾ ಇಷ್ಟ ಆಗಿದೆ. ಸಿನಿಮಾದಲ್ಲಿ ಆ್ಯಕ್ಷನ್ ದೃಶ್ಯಗಳನ್ನು ಫ್ಯಾನ್ಸ್ ಎಂಜಾಯ್ ಮಾಡುತ್ತಿದ್ದಾರೆ. ಸಿನಿಮಾದಲ್ಲಿನ ಅದ್ದೂರಿತನಕ್ಕೆ ಯಶ್ ಅಭಿಮಾನಿಗಳು ಫಿದಾ ಆಗಿದ್ದಾರೆ. ‘ಇದೊಂದು ಪ್ರಾಮಾಣಿಕ ಪಯತ್ನ’ ಎಂದು ಕೆಲವರು ಪೋಸ್ಟ್ ಮಾಡಿದ್ದಾರೆ. ಯಶ್ ಅವರ ನಟನೆ ಇಷ್ಟ ಆಗಿದೆ ಎಂದು ಫ್ಯಾನ್ಸ್ ಕಮೆಂಟ್ ಮಾಡುತ್ತಿದ್ದಾರೆ.

ಈ ಸಿನಿಮಾದಲ್ಲಿ ಅನೇಕ ಸ್ಟಾರ್ ಕಲಾವಿದರು ನಟಿಸಿದ್ದಾರೆ. ಬಾಲಿವುಡ್ ನಟಿ ಕಿಯಾರಾ ಅಡ್ವಾಣಿ ಅವರ ನಟನೆಗೆ ಮೆಚ್ಚಿಗೆ ಸಿಕ್ಕಿದೆ. ನಯನತಾರಾ ಅವರ ಆ್ಯಕ್ಷನ್ ಸೀನ್​ಗಳು ಗಮನ ಸೆಳೆದಿವೆ. ಒಂದು ಮಾಸ್, ಕಮರ್ಷಿಯಲ್ ಸಿನಿಮಾಗೆ ಇರಬೇಕಾದ ಎಲ್ಲ ಅಂಶಗಳು ಟಾಕ್ಸಿಕ್ ಚಿತ್ರದಲ್ಲಿ ಇವೆ ಎಂದು ಕೆಲವು ಪ್ರೇಕ್ಷಕರು ಹೊಗಳುತ್ತಿದ್ದಾರೆ.

ಆದರೆ ಇನ್ನು ಕೆಲವು ಪ್ರೇಕ್ಷಕರಿಗೆ ಈ ಸಿನಿಮಾ ಇಷ್ಟ ಆಗಿಲ್ಲ. ನಿರೀಕ್ಷಿತ ಮಟ್ಟದಲ್ಲಿ ಸಿನಿಮಾ ಮೂಡಿಬಂದಿಲ್ಲ ಎಂದು ಜನರು ಪೋಸ್ಟ್ ಮಾಡುತ್ತಿದ್ದಾರೆ. ಸಿನಿಮಾದಲ್ಲಿನ ಮೈನಸ್ ಅಂಶಗಳನ್ನು ಎತ್ತಿ ಹೇಳುತ್ತಿದ್ದಾರೆ. ಈ ಸಿನಿಮಾದಲ್ಲಿ ಇರುವುದು ಕೇವಲ 2 ಸಾಲಿನ ಸ್ಟೋರಿ ಮಾತ್ರ. ಚಿತ್ರಕಥೆ ಗಟ್ಟಿಯಾಗಿಲ್ಲ. ಒಟ್ಟಾರೆ ಕಥೆ ಗೊಂದಲಮಯವಾಗಿದೆ ಎಂಬ ಅಭಿಪ್ರಾಯ ಬಂದಿದೆ.

‘ತಾಂತ್ರಿಕ ಗುಣಮಟ್ಟ ಚೆನ್ನಾಗಿದೆ. ಆದರೆ ಸಿನಿಮಾದ ಕಥೆ ಮತ್ತು ಬರವಣಿಗೆ ಚೆನ್ನಾಗಿಲ್ಲ. ಪಾತ್ರಗಳ ಇಂಟ್ರೊಡಕ್ಷನ್ ಕೂಡ ಚೆನ್ನಾಗಿ ಮೂಡಿಬಂದಿಲ್ಲ. ಸಂಭಾಷಣೆ ಮತ್ತು ಸಂಕಲನ ಚೆನ್ನಾಗಿಲ್ಲ’ ಎಂದು ನೆಟ್ಟಿಗರೊಬ್ಬರು ಪೋಸ್ಟ್ ಮಾಡಿದ್ದಾರೆ. ಈ ಸಿನಿಮಾಗೆ ನೀಡಿದ ಹೈಪ್ ಜಾಸ್ತಿ ಆಯಿತು. ಹೈಪ್ ನೀಡಿದಷ್ಟು ಉತ್ತಮವಾಗಿ ಸಿನಿಮಾ ಮೂಡಿಬಂದಿಲ್ಲ ಎಂದು ಇನ್ನು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.