Mrunal Thakur: ನಟಿ ಮೃಣಾಲ್​ ಠಾಕೂರ್ ಸಂಬಳ ಎಷ್ಟು? ‘ಸೀತಾ ರಾಮಂ’ ಸೂಪರ್​ ಹಿಟ್​ ಆದ್ಮೇಲೆ ಹೆಚ್ಚಿದೆ ಡಿಮ್ಯಾಂಡ್​​

ದುಲ್ಕರ್​ ಸಲ್ಮಾನ್​, ರಶ್ಮಿಕಾ ಮಂದಣ್ಣ ಹಾಗೂ ಮೃಣಾಲ್​ ಠಾಕೂರ್​ ಅವರು ಮುಖ್ಯಭೂಮಿಕೆ ನಿಭಾಯಿಸಿರುವ ‘ಸೀತಾ ರಾಮಂ’ (Sita Ramam) ಸಿನಿಮಾ ಸೂಪರ್​ ಹಿಟ್​ ಆಗಿದೆ. ಈ ಚಿತ್ರದಲ್ಲಿ ಕೆಲಸ ಮಾಡಿದ ಎಲ್ಲರ ಖ್ಯಾತಿಯೂ ಹೆಚ್ಚಿದೆ. ಅದರಲ್ಲೂ ಅತಿ ಹೆಚ್ಚು ಗಮನ ಸೆಳೆಯುತ್ತಿರುವುದು ಮೃಣಾಲ್​ ಠಾಕೂರ್ (Mrunal Thakur)​. ಎರಡು ಶೇಡ್​ ಇರುವ ಪಾತ್ರವನ್ನು ನಿಭಾಯಿಸಿರುವ ಅವರು ಪ್ರೇಕ್ಷಕರ ಮನ ಗೆದ್ದಿದ್ದಾರೆ. ಅವರ ನಟನೆಗೆ ಎಲ್ಲ ಕಡೆಗಳಿಂದಲೂ ಮೆಚ್ಚುಗೆ ಕೇಳಿಬರುತ್ತಿದೆ. ಈ ಹಿನ್ನೆಲೆಯಲ್ಲಿ ಮೃಣಾಲ್​ ಠಾಕೂರ್​ ಅವರ ಸಂಭಾವನೆ (Mrunal Thakur Remuneration) ಕೂಡ ಹೆಚ್ಚಾಗಿದೆ. ಬಣ್ಣದ ಲೋಕದಲ್ಲಿ ಅವರಿಗೆ ಭರ್ಜರಿ ಡಿಮ್ಯಾಂಡ್​ ಬಂದಿದೆ. ಪ್ಯಾನ್​ ಇಂಡಿಯಾ ನಟಿಯಾಗಿ ಅವರೀಗ ಮಿಂಚುತ್ತಿದ್ದಾರೆ.

ದಕ್ಷಿಣ ಭಾರತಕ್ಕೆ ಕಾಲಿಡುವುದಕ್ಕೂ ಮುನ್ನವೇ ಹಿಂದಿ ಕಿರುತೆರೆ ಪ್ರೇಕ್ಷಕರಿಗೆ ಮೃಣಾಲ್​ ಠಾಕೂರ್​ ಪರಿಚಿತರಾಗಿದ್ದರು. ಅನೇಕ ಧಾರಾವಾಹಿಗಳಲ್ಲಿ ನಟಿಸಿ ಅವರು ಮನೆ ಮಾತಾಗಿದ್ದರು. 2018ರಲ್ಲಿ ಅವರು ಬಾಲಿವುಡ್​ ಕದ ತಟ್ಟಿದರು. ಬಳಿಕ ‘ಸೂಪರ್​ 30’, ‘ಜೆರ್ಸಿ’ ಮುಂತಾದ ಚಿತ್ರಗಳಲ್ಲಿ ನಟಿಸಿ ಸೈ ಎನಿಸಿಕೊಂಡರು. ಆ ಮೂಲಕ ಅವರು ಕೋಟಿ ರೂಪಾಯಿ ಸಂಭಾವನೆ ಪಡೆಯುವ ನಟಿಯಾಗಿ ಬೆಳೆದುನಿಂತರು.

ಮೃಣಾಲ್​ ಠಾಕೂರ್​ ಅವರ ವೃತ್ತಿಜೀವನಕ್ಕೆ ‘ಸೀತಾ ರಾಮಂ’ ಸಿನಿಮಾ ದೊಡ್ಡ ಮೈಲೇಜ್​ ನೀಡಿದೆ. ಈ ಚಿತ್ರ ಆಗಸ್ಟ್​ 5ರಂದು ಥಿಯೇಟರ್​ನಲ್ಲಿ ಬಿಡುಗಡೆಯಾಗಿ ಉತ್ತಮ ಕಮಾಯಿ ಮಾಡಿತು. ನಂತರ ಒಟಿಟಿಗೂ ಕಾಲಿಟ್ಟು ದಾಖಲೆ ಪ್ರಮಾಣದಲ್ಲಿ ವೀವ್ಸ್​ ಪಡೆದುಕೊಂಡಿತು. ಸಿನಿಮಾ ನೋಡಿದ ಎಲ್ಲರೂ ಮೃಣಾಲ್ ಠಾಕೂರ್​ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನು ಆಡುತ್ತಿದ್ದಾರೆ. ರಶ್ಮಿಕಾ ಮಂದಣ್ಣ ನಿಭಾಯಿಸಿರುವ ಪಾತ್ರಕ್ಕಿಂತಲೂ ಮೃಣಾಲ್​ ಠಾಕೂರ್​ ಮಾಡಿರುವ ಪಾತ್ರವೇ ಸಖತ್​ ಹೈಲೈಟ್​ ಆಗಿದೆ ಎಂಬುದು ಪ್ರೇಕ್ಷಕರ ಅಭಿಪ್ರಾಯ.

ಒಂದು ಮೂಲದ ಪ್ರಕಾರ, ಮೃಣಾಲ್​ ಠಾಕೂರ್​ ಅವರ ಸಂಭಾವನೆ ಬಾಲಿವುಡ್​ನಲ್ಲಿ 2 ಕೋಟಿ ತಲುಪಿದೆ. ​ದಕ್ಷಿಣದಲ್ಲಿ ಅವರು ಒಂದು ಕೋಟಿ ರೂಪಾಯಿ ಡಿಮ್ಯಾಂಡ್​ ಮಾಡುತ್ತಿದ್ದಾರೆ ಎನ್ನಲಾಗಿದೆ. ಈ ಅಂಕಿ-ಸಂಖ್ಯೆಗಳ ಬಗ್ಗೆ ಅವರು ಎಲ್ಲಿಯೂ ಅಧಿಕೃತವಾಗಿ ಮಾತನಾಡಿಲ್ಲ. ಒಟ್ಟಿನಲ್ಲಿ ಅವರ ಡಿಮ್ಯಾಂಡ್​ ಹೆಚ್ಚಿರುವುದಂತೂ ನಿಜ.

ತಮಗೆ ಸಿಗುವ ಪಾತ್ರಕ್ಕೆ ಮೃಣಾಲ್​ ಠಾಕೂರ್​ ಅವರು ನ್ಯಾಯ ಒದಗಿಸುತ್ತಾರೆ. ಗ್ಲಾಮರ್​ ಮತ್ತು ನಟನೆ ಎರಡಕ್ಕೂ ಸೈ ಎಂಬಂತಿರುವ ಈ ಪ್ರತಿಭಾಂತ ಕಲಾವಿದೆಯ ಕೈಯಲ್ಲೀಗ ಹಲವು ಸಿನಿಮಾಗಳಿವೆ. ಬರುವ ಆಫರ್​ಗಳನ್ನು ಅವರು ಅಳೆದು-ತೂಗಿ ಒಪ್ಪಿಕೊಳ್ಳುತ್ತಿದ್ದಾರೆ. ‘ಸೀತಾ ರಾಮಂ’ ಸಿನಿಮಾದ ಗೆಲುವಿನ ಬಳಿಕ ಅವರಿಗೆ ದಕ್ಷಿಣ ಭಾರತದಿಂದ ಹೆಚ್ಚು ಆಫರ್ಸ್​ ಬರುತ್ತಿವೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.