SS Rajamouli: ಬದಲಾಯಿತು ರಾಜಮೌಳಿ ತಂಡ; ಪ್ರಮುಖರನ್ನೇ ಕೈಬಿಟ್ಟ ಸ್ಟಾರ್ ನಿರ್ದೇಶಕ

ಸ್ಟಾರ್ ನಿರ್ದೇಶಕ ರಾಜಮೌಳಿ (SS Rajamouli) ಮಾಡುವ ಸಿನಿಮಾಗಳಿಗೆ ಪ್ರೇಕ್ಷಕರನ್ನು ಆಕರ್ಷಿಸುವ ಶಕ್ತಿ ಇದೆ. ಅವರು ನಿರ್ದೇಶನ ಮಾಡುವ ಚಿತ್ರಗಳು ಎಲ್ಲರ ಗಮನ ಸೆಳೆಯುತ್ತವೆ. ಇದಕ್ಕೆ ಅವರ ತಾಂತ್ರಿಕ ವರ್ಗದ ಕೊಡುಗೆಯೂ ಇದೆ. ತಾಂತ್ರಿಕ ವರ್ಗದ ವಿಚಾರದಲ್ಲಿ ಅವರು ಒಂದು ಪದ್ಧತಿ ಇಟ್ಟುಕೊಂಡಿದ್ದರು. ರಾಜಮೌಳಿ ಒಂದು ಸಿನಿಮಾದಲ್ಲಿ ಯಾರದ್ದಾದರೂ ಜೊತೆ ಕೆಲಸ ಮಾಡಿ, ಅವರ ಕೆಲಸ ಇಷ್ಟ ಆಯಿತು ಎಂದರೆ ಮುಂದಿನ ಸಿನಿಮಾಗಳಿಗೆ ಅವರಿಗೇ ಅವಕಾಶ ನೀಡುತ್ತಿದ್ದರು. ಇದು ಮೊದಲಿನಿಂದಲೂ ನಡೆದುಕೊಂಡು ಬಂದಿದೆ. ಆದರೆ, ಈ ಪದ್ಧತಿಯನ್ನು ಅವರು ಕೈ ಬಿಡಲು ಮುಂದಾಗಿದ್ದಾರೆ. ಈ ಬೆಳವಣಿಗೆ ಅಚ್ಚರಿ ತಂದಿದೆ.

ರಾಜಮೌಳಿ ಹಾಗೂ ಮಹೇಶ್ ಬಾಬು ಒಟ್ಟಾಗಿ ಸಿನಿಮಾ ಮಾಡುತ್ತಿರುವುದು ಗೊತ್ತೇ ಇದೆ. ಈ ಚಿತ್ರಕ್ಕೆ ಸ್ಕ್ರಿಪ್ಟ್ ಕೆಲಸಗಳು ಬಹುತೇಕ ಪೂರ್ಣಗೊಂಡಿವೆ. ಮಹೇಶ್ ಬಾಬು ಅವರು ಈಗಾಗಲೇ ವಿದೇಶಕ್ಕೆ ತೆರಳಿ ವಿಶೇಷ ತರಬೇತಿ ಪಡೆದು ಬಂದಿದ್ದಾರೆ. ರಾಜಮೌಳಿ ಅವರು ಶೀಘ್ರವೇ ಸಿನಿಮಾ ಕೆಲಸ ಆರಂಭಿಸಲಿದ್ದಾರೆ. ಈ ಸಿನಿಮಾ ಕೆಲಸಕ್ಕೂ ಮೊದಲು ಅವರು ಹೊಸ ತಾಂತ್ರಿಕವರ್ಗವನ್ನು ಹುಡುಕಿಕೊಂಡಿದ್ದಾರೆ.

ರಾಜಮೌಳಿ ಸಿನಿಮಾಗಳಲ್ಲಿ ಛಾಯಾಗ್ರಹಣಕ್ಕೆ ವಿಶೇಷ ಪ್ರಾಮುಖ್ಯತೆ ಇರುತ್ತದೆ. ಅವರು ಆಲೋಚಿಸಿದಂತೆ ದೃಶ್ಯವನ್ನು ಸೆರೆ ಹಿಡಿಯೋದು ಒಂದು ಚಾಲೆಂಜ್. ಇದನ್ನು ಯಶಸ್ವಿಯಾಗಿ ನಿರ್ವಹಿಸುತ್ತಿದ್ದುದು ಸೇಂಥಿಲ್ ಕುಮಾರ್. ಈಗ ಅವರನ್ನು ಕೈ ಬಿಡಲಾಗಿದೆ. ಅವರ ಬದಲು ಪಿಎಸ್​ ವಿನೋದ್ ಛಾಯಾಗ್ರಹಣ ನಿರ್ವಹಿಸಲಿದ್ದಾರೆ. ರಾಜಮೌಳಿ ಸಿನಿಮಾಗಳಿಗೆ ಛಾಯಾಗ್ರಹಣದ ಜೊತೆ ವಿಎಫ್​ಎಕ್ಸ್ ಕೂಡ ಮುಖ್ಯ. ಈ ಮೊದಲು ಶ್ರೀನಿವಾಸ್ ಮೋಹನ್ ಅವರು ಇದರ ಮೇಲುಸ್ತುವಾರಿ ನಿರ್ವಹಿಸುತ್ತಿದ್ದರು. ಈಗ ಈ ಜವಾಬ್ದಾರಿ ಕಮಲ್ ಕಣ್ಣನ್ ಪಾಲಾಗಿದೆ ಎನ್ನಲಾಗುತ್ತಿದೆ.

ಇದನ್ನೂ ಓದಿ: SSMB 29: ರಾಜಮೌಳಿ ಜೊತೆಗಿನ ಚಿತ್ರಕ್ಕೆ ಮಹೇಶ್ ಬಾಬು ಪಡೆಯುತ್ತಿರೋ ಸಂಭಾವನೆ ಎಷ್ಟು?

ರಾಜಮೌಳಿ ಸಿನಿಮಾಗಳನ್ನು ಶ್ರೀಕರ್ ಪ್ರಸಾದ್ ಎಡಿಟ್ ಮಾಡುತ್ತಿದ್ದರು. ಪ್ರೊಡಕ್ಷನ್ ಡಿಸೈನರ್ ಆಗಿ ಸಾಬು ಸೈರಿಲ್ ಕೆಲಸ ಮಾಡುತ್ತಿದ್ದರು. ಇವರ ಸ್ಥಾನಕ್ಕೆ ಬೇರೆಯವರು ಬರಲಿದ್ದಾರೆ. ಅವರ ಹುಡುಕಾಟದಲ್ಲಿ ರಾಜಮೌಳಿ ಇದ್ದಾರೆ. ರಾಜಮೌಳಿ ಹಾಗೂ ಸಂಗೀತ ನಿರ್ದೇಶಕ ಎಂಎಂ ಕೀರವಾಣಿ ಹಲವು ವರ್ಷಗಳಿಂದ ಒಟ್ಟಾಗಿ ಕೆಲಸ ಮಾಡುತ್ತಿದ್ದಾರೆ. ಇವರ ಕಾಂಬಿನೇಷನ್ ಮುಂದುವರಿಯಲಿದೆ. ರಾಜಮೌಳಿ ಹಾಗೂ ಮಹೇಶ್ ಬಾಬು ಸಿನಿಮಾಗೆ ಕೀರವಾಣಿ ಸಂಗೀತ ಸಂಯೋಜನೆ ಇರಲಿದೆ. ‘ಆರ್​ಆರ್​ಆರ್’ ಸಿನಿಮಾದ ಸಂಗೀತ ಸಂಯೋಜನೆಗೆ ಕೀರವಾಣಿ ಆಸ್ಕರ್ ಪಡೆದಿದ್ದರು.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ