ಬಿಗ್ ಬಾಸ್: ಕ್ಯಾಪ್ಟನ್ ಆದ ಯಶಸ್, ಉತ್ತಮ ಪಟ್ಟ ಪಡೆದ ತಾಂಡವ್ ರಾಮ್

‘ಬಿಗ್ ಬಾಸ್ ಕನ್ನಡ ಸೀಸನ್ 13’ ರಿಯಾಲಿಟಿ ಶೋನಲ್ಲಿ ಯಶಸ್ ಅವರು ಈ ವಾರದ ಕ್ಯಾಪ್ಟನ್ ಆಗಿದ್ದಾರೆ. ಕ್ಯಾಪ್ಟೆನ್ಸಿ ಓಟದಲ್ಲಿ ಫೈನಲ್ ಆಗಿ ಗಾನವಿ ಮತ್ತು ಯಶಸ್ ನಡುವೆ ಪೈಪೋಟಿ ಏರ್ಪಟ್ಟಿತ್ತು. ಅಂತಿಮವಾಗಿ ಯಶಸ್ ಅವರು ಬಹುಬೇಗ ಟಾಸ್ಕ್ ಪೂರ್ಣಗೊಳಿಸುವ ಮೂಲಕ ಮನೆಯ ಕ್ಯಾಪ್ಟನ್ ಪಟ್ಟ ಪಡೆದುಕೊಂಡರು. ಯಶಸ್ ಕ್ಯಾಪ್ಟನ್ ಆಗಿದ್ದಕ್ಕೆ ಆಸಿಯಾ, ಸೌಂದರ್ಯಾ ಮುಂತಾದವರು ಖುಷಿಪಟ್ಟರು.

ಈ ವಾರ ತಾಂಡವ್ ರಾಮ್ ಅವರಿಗೆ ‘ಉತ್ತಮ’ ಪಟ್ಟ ನೀಡಲಾಗಿದೆ. ಜಗದೀಶ್, ಗಗನ್ ಚಿನ್ನಪ್ಪ, ಪ್ರಶಾಂತ್ ಹಾಗೂ ಯಶಸ್ ಅವರು ಓಟ್ ಮಾಡಿದ್ದಕ್ಕಾಗಿ ತಾಂಡವ್ ರಾಮ್ ಅವರಿಗೆ ಉತ್ತಮ ಪಟ್ಟ ಸಿಕ್ಕಿದೆ. ಈ ವಾರದ ಅವರ ಆಟವನ್ನು ಬಹುತೇಕರು ಮೆಚ್ಚಿಕೊಂಡಿದ್ದಾರೆ. ಯಶಸ್, ಧನುಷ್ ಕೂಡ ತಲಾ ಮೂರು ಓಟ್ ಪಡೆದು ಮೆಚ್ಚುಗೆ ಗಳಿಸಿದರು.

ಮನೆಯವರಿಂದ ಪತ್ರ ಪಡೆಯುವ ಅವಕಾಶವನ್ನು ಈ ವಾರ ನೀಡಲಾಗಿತ್ತು. ಅದರ ಬೆನ್ನಲ್ಲೇ ಒಂದು ಟ್ವಿಸ್ಟ್ ಕೂಡ ಎದುರಾಗಿದೆ. ಈಗ ಮನೆಯೊಳಗೆ ಇರುವ ಸದಸ್ಯರು ತಮ್ಮ ಸಹ-ಸ್ಪರ್ಧಿಗಳಿಗೆ ಪತ್ರ ಬರೆಯುವ ಅವಕಾಶ ಕಲ್ಪಿಸಲಾಗಿದೆ. ಆದರೆ ಈ ಪತ್ರ ಅನಾಮಧೇಯ ಆಗಿರುತ್ತದೆ. ತಮಗೆ ಇಷ್ಟ ಆಗದೇ ಇರುವ ಮೂವರು ಸ್ಪರ್ಧಿಗಳಿಗೆ ಕಟು ಮಾತುಗಳಿಂದ ಪತ್ರ ಬರೆಯಬಹುದು.

ಯಾರು ಬರೆದಿದ್ದಾರೆ ಎಂಬ ಗುರುತನ್ನು ಬಹಿರಂಗ ಮಾಡದೇ ಪತ್ರಗಳನ್ನು ನೀಡಲಾಗಿದೆ. ಸೌಂದರ್ಯಾ, ಪ್ರಶಾಂತ್, ಕಿರಣ್ ಶಾಸ್ತ್ರಿ ಮುಂತಾದ ಸ್ಪರ್ಧಿಗಳ ಬಗ್ಗೆ ಕಟುವಾಗಿ ಟೀಕೆ ಮಾಡಲಾಗಿದೆ. ಪತ್ರದಲ್ಲಿನ ಮಾತುಗಳನ್ನು ತಿಳಿದುಕೊಂಡು ಎಲ್ಲ ಸ್ಪರ್ಧಿಗಳಿಗೆ ಬೇಸರ ಆಗಿದೆ. ಅದರಿಂದಾಗಿ ಬಿಗ್ ಬಾಸ್ ಮನೆಯಲ್ಲಿ ಮಾತಿನ ಚಕಮಕಿ ಕೂಡ ಹೆಚ್ಚಾಗಿದೆ.

ಇದನ್ನೂ ಓದಿ: ಬಿಗ್ ಬಾಸ್ ಕನ್ನಡ 13: ಕ್ಯಾಪ್ಟನ್ ಆಗಲು ಯೋಗ್ಯತೆ ಇಲ್ಲದ 4 ಸ್ಪರ್ಧಿಗಳು ಯಾರು?

‘ವಯಸ್ಸಿನಲ್ಲಿ ಸಣ್ಣವ ಶಾಸ್ತ್ರಿ. ಗುಣ, ಬುದ್ಧಿ, ನಡತೆಯಲ್ಲಿಯೂ ಸಣ್ಣವ. ಆಟ ಮತ್ತು ಟಾಸ್ಕ್​ನಲ್ಲಿ ಝೀಯೋ. ಎಲ್ಲರಿಗೂ ಕೆಟ್ಟದನ್ನು ಬಯಸುತ್ತ, ಮತ್ತೊಬ್ಬರ ದುಃಖದಲ್ಲಿ ಖುಷಿಕಾಣುವ ಕಳ್ಳ ಶಾಸ್ತ್ರಿ. ನೀನು ತುಂಬಾ ನೀಚ. ನಿನ್ನನ್ನು ವರ್ಣಿಸಲು ಕನ್ನಡದ ಶಬ್ದಕೋಶದಲ್ಲಿನ ತುಚ್ಛ ಪದಗಳು ಬೇಕಾಗುತ್ತವೆ. ಆದಷ್ಟು ಬೇಗ ನೀನು ಮನೆಗೆ ಹೊರಡು’ ಎಂದು ಕಿರಣ್ ಶಾಸ್ತ್ರಿಗೆ ಅನಾಮಧೇಯ ಪತ್ರ ಬಂದಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.