ದಸರಾ, ದೀಪಾವಳಿ ಹಬ್ಬಗಳ ಪ್ರಯುಕ್ತ ‘ಸನ್‌ ಉದಯ’ ವಾಹಿನಿಯಲ್ಲಿ ‘ನವಶಕ್ತಿ ವೈಭವ’

ಹಬ್ಬಗಳ ಸೀಸನ್ ನಡೆಯುತ್ತಿದೆ. ಈ ಪ್ರಯುಕ್ತ ‘ಸನ್ ಉದಯ’ ವಾಹಿನಿ ವಿಶೇಷ ದೈವಿಕ ಕಥೆಗಳನ್ನು ವೀಕ್ಷಕರಿಗೆ ತೋರಿಸಲು ಸಜ್ಜಾಗಿದೆ. ಹೊಸ ಥರದ ಕೌಟುಂಬಿಕ ಕಥೆಗಳಿಂದ ನೋಡುಗರ ಮನ ಗೆಲ್ಲುತ್ತಿರುವ ಈ ವಾಹಿನಿಯಲ್ಲಿ ದಸರಾ, ದೀಪಾವಳಿ ಹಬ್ಬದ ಪ್ರಯುಕ್ತ ‘ನವಶಕ್ತಿ ವೈಭವ’ ವಿಶೇಷ ಸಂಚಿಕೆಗಳ ಮೂಲಕ ಮಹಿಳಾ ಶಕ್ತಿಯನ್ನು ಸಂಭ್ರಮಿಸಲು ತಯಾರಿ ನಡೆಸಿದೆ. ಆ ಬಗ್ಗೆ ವಾಹಿನಿ ಮಾಹಿತಿ ಹಂಚಿಕೊಂಡಿದೆ.

ಒಂಭತ್ತು ದೇವಿ ಕ್ಷೇತ್ರಗಳಲ್ಲಿ ನಡೆಯುವ ಒಂಭತ್ತು ದೈವಿಕ ಕಥೆಗಳಲ್ಲಿ ‘ಸನ್‌ ಉದಯ’ ವಾಹಿನಿಯ ‘ರಥಸಪ್ತಮಿ’, ‘ಮಹಾಲಕ್ಷ್ಮೀ ಮದುವೆ’, ‘ಗೆಳತಿ ಗಾಯತ್ರಿ’, ‘ಮೂಗುತಿ ಮಲ್ಲಿ’, ‘ಶಾಂತಿ ನಿವಾಸ’, ‘ಮಾಂಗಲ್ಯ’, ‘ಕೃಷ್ಣವಂಶಿ’ ಮತ್ತು ‘ಮೈನಾ’ ಧಾರಾವಾಹಿಗಳ 9 ನಾಯಕಿಯರು ದೇವಿ ಅಂಶವಾಗಿ ಕಾಣಿಸಿಕೊಳ್ಳಲಿದ್ದಾರೆ.

‘ಮೈಸೂರು, ಕೊಲ್ಲೂರು, ಕಟೀಲು, ಶಿರಸಿ, ಸವದತ್ತಿ ಮುಂತಾದ 9 ದೇವಿ ಕ್ಷೇತ್ರಗಳಲ್ಲೇ ವಿಶೇಷ ಸಂಚಿಕೆಗಳು ಚಿತ್ರೀಕರಣಗೊಳ್ಳುತ್ತಿರುವುದು ವಿಶೇಷ. ಇದು ನಂಬಿಕೆಗಳಿಗಿಂತ ಮಿಗಿಲಾಗಿ ಮಹಿಳೆಯರ ಆತ್ಮವಿಶ್ವಾಸ ಹಾಗೂ ಅಂತಃಶಕ್ತಿಗಳನ್ನು ಬಡಿದೆಬ್ಬಿಸುವ ಕಥಾಗುಚ್ಛವಾಗಿದೆ. ದೈವೀಕ ಶಕ್ತಿ ಸ್ತ್ರೀಯಲ್ಲಿ ಅಡಕವಾಗಿರುತ್ತದೆ ಮತ್ತು ಮಹಿಳಾ ಶಕ್ತಿಯನ್ನು ದಮನಿಸಲು ಯಾರಿಂದಲೂ ಸಾಧ್ಯವಿಲ್ಲ ಎಂಬ ಸಂದೇಶ ರವಾನಿಸುವಂಥ ಕಥೆಗಳು ರೂಪುಗೊಳ್ಳುತ್ತಿವೆ’ ಎಂದು ‘ಸನ್‌ ಉದಯ’ ವಾಹಿನಿ ತಿಳಿಸಿದೆ.

ʻನವಶಕ್ತಿ ವೈಭವ’ ಸರಣಿಯಲ್ಲಿ ಅಕ್ಟೋಬರ್‌ 11ರ ಭಾನುವಾರ ರಾತ್ರಿ 9 ಗಂಟೆಗೆ ಮೊದಲ ಸಂಚಿಕೆ ‘ರಥ ಸಪ್ತಮಿ’ ಪ್ರಸಾರವಾಗಲಿದೆ. ಇದು ಮೈಸೂರಿನಲ್ಲಿ ಚಿತ್ರೀಕರಣಗೊಂಡಿದೆ. ಮೈಕ್ರೋಫೈನಾನ್ಸ್‌ ಸಾಲದ ಸುಳಿಗೆ ಸಿಲುಕಿದ ಶಿಕ್ಷಕಿ ಹಾಗೂ ಆಕೆಯ ಪುತ್ರಿಯನ್ನು ಬಚಾವು ಮಾಡಲು, ಸಪ್ತಮಿ ತನ್ನ ಬುದ್ಧಿ ಶಕ್ತಿ ಹಾಗೂ ಆತ್ಮಬಲವನ್ನೇ ಅಸ್ತ್ರಗಳನ್ನಾಗಿ ಬಳಸಿ ದುಷ್ಟ ಮರ್ದನ ಮಾಡಿ ಹೇಗೆ ನೊಂದವರ ಪಾಲಿಗೆ ದೇವಿಯಾಗಿ ಕಂಗೊಳಿಸುತ್ತಾಳೆ ಎಂಬುದು ಕಥಾಹಂದರ.

ಇದನ್ನೂ ಓದಿ: ಮೈಸೂರು ದಸರಾ: ಸಿಡಿಮದ್ದು ತಾಲೀಮು ಯಶಸ್ವಿ; ಭಾರೀ ಶಬ್ದಕ್ಕೆ ಅಂಜದ ಗಜಪಡೆ, ಅಶ್ವದಳ

ಇದು ಪವಾಡಗಳಿಗಿಂತ ಮಿಗಿಲಾಗಿ ವಾಸ್ತವದ ನೆಲೆಗಟ್ಟಿನ ಮೇಲೆ ಹೆಣ್ಣನ್ನು ದೈವೀಕತೆಯೊಂದಿಗೆ ಸಮೀಕರಿಸುತ್ತದೆ. ‘ರಥ ಸಪ್ತಮಿ’ ನಾಯಕಿ ಮೌಲ್ಯ ಗೌಡ ಅವರು ನಾಯಕ ಜೀವನ್ ಜೊತೆಗೆ ವಿಶೇಷ ಪಾತ್ರಗಳಲ್ಲಿ ಸ್ವಪ್ನಾ ರಾಜ್‌, ಸುದರ್ಶನ್‌, ಇಶಿಕಾ ಮುಂತಾದ ಕಲಾವಿದರು ನಟಿಸಿದ್ದಾರೆ. ʻನವಶಕ್ತಿ ವೈಭವ’ ಒಂದು ಗಂಟೆಯ ವಿಶೇಷ ಸಂಚಿಕೆಗಳು ಅಕ್ಟೋಬರ್‌ 11ರಿಂದ ಭಾನುವಾರ ರಾತ್ರಿ 9 ಗಂಟೆಗೆ ಪ್ರಸಾರಗೊಳ್ಳಲಿವೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.