ಇಂದು ಪ್ರಸಾರವಾಗುತ್ತಾ ಬಿಗ್​​​ಬಾಸ್? ಎಷ್ಟು ಎಪಿಸೋಡ್​​ಗಳ ಚಿತ್ರೀಕರಣ ಆಗಿದೆ?

ಬಿಗ್​​ಬಾಸ್​ ಕನ್ನಡ ಸೀಸನ್ 12 (Bigg Boss Kannada season 12) ಹಠಾತ್ತನೆ ಬಂದ್ ಆಗಿದೆ. ಕೆಲ ನಿಯಮಗಳನ್ನು ಉಲ್ಲಂಘನೆ ಮಾಡಿರುವ ಆರೋಪದಲ್ಲಿ ಬಿಗ್​​ಬಾಸ್ ಮನೆಗೆ ಅಧಿಕಾರಿಗಳು ಬೀಗ ಜಡಿದಿದ್ದು, ಸ್ಪರ್ಧಿಗಳನ್ನೆಲ್ಲ ಬಿಗ್​​ಬಾಸ್ ಮನೆಯಿಂದ ಹೊರಗೆ ಕಳಿಸಲಾಗಿದೆ. ಮನೆಯ ಸ್ಪರ್ಧಿಗಳೆಲ್ಲ ಈಗ ರಾಮನಗರದ ಬಳಿ ಇರುವ ಈಗಲ್​​ಟನ್ ರೆಸಾರ್ಟ್​​​ನಲ್ಲಿದ್ದಾರೆ. ಬಿಗ್​​ಬಾಸ್ ಆಯೋಜಕರು, ಸರ್ಕಾರದ ಕ್ರಮದ ವಿರುದ್ಧ ನ್ಯಾಯಾಲಯದ ಮೆಟ್ಟಿಲೇರುವ ಸಾಧ್ಯತೆ ಇದೆ. ನಿನ್ನೆ ಸಂಜೆ ವೇಳೆಗೆ ಬಿಗ್​​ಬಾಸ್ ಮನೆಗೆ ಬೀಗ ಜಡಿಯಲಾಗಿದ್ದು, ಇಂದು (ಅಕ್ಟೋಬರ್ 08) ಬಿಗ್​​ಬಾಸ್ ಎಪಿಸೋಡ್ ಪ್ರಸಾರವಾಗುತ್ತದೆಯಾ? ಎಂಬ ಅನುಮಾನ ಪ್ರೇಕ್ಷಕರಲ್ಲಿ ಮೂಡಿದೆ.

ಬಿಗ್​​ಬಾಸ್ ಮನೆಗೆ ಬೀಗ ಹಾಕಿ ಮನೆ ಖಾಲಿ ಮಾಡಿದ್ದರೂ ಸಹ ಜಿಯೋ ಹಾಟ್​​ಸ್ಟಾರ್​​​ನಲ್ಲಿ ಬಿಗ್​​ಬಾಸ್ ಮನೆಯ ಲೈವ್ ಚಾಲ್ತಿಯಲ್ಲಿದೆ. ಬೆಳಿಗಿನ ವೇಳೆಗೆ ಬಿಗ್​​​ಬಾಸ್ ಮನೆಯ ಸ್ಪರ್ಧಿಗಳು ಮಲಗಿದ್ದಾರೆ ಎಂದು ಲೈವ್​​​ನಲ್ಲಿ ತೋರಿಸಲಾಗುತ್ತಿದೆ. ಅಸಲಿಗೆ ಬಿಗ್​​​ಬಾಸ್ ಶೋ ಪ್ರಸಾರಕ್ಕೆ 24 ಗಂಟೆ ಅಂತರ ಇರುವ ಕಾರಣ, ಇಂದು ರಾತ್ರಿ ಬಿಗ್​​​ಬಾಸ್ ಎಪಿಸೋಡ್ ಪ್ರಸಾರ ಆಗಲಿದೆ. ಭಾನುವಾರ-ಸೋಮವಾರ ನಡೆದ ಟಾಸ್ಕ್, ಮನೆಯ ಇನ್ನಿತರೆ ಡ್ರಾಮಾಗಳನ್ನು ಮಂಗಳವಾರ ಅಂದರೆ ನಿನ್ನೆಯ ಶೋನಲ್ಲಿ ಪ್ರಸಾರ ಮಾಡಲಾಗಿದೆ.

ಸೋಮವಾರ-ಮಂಗಳವಾರ ಚಿತ್ರೀಕರಣ ಮಾಡಿ ಎಡಿಟ್ ಮಾಡಲಾಗಿರುವ ಎಪಿಸೋಡ್​​ ಅನ್ನು ಇಂದು ಪ್ರಸಾರ ಮಾಡಲಾಗುತ್ತದೆ. ಅದು ಮಾತ್ರವೇ ಅಲ್ಲದೆ ಒಂದೊಮ್ಮೆ ಬಿಗ್​​ಬಾಸ್ ಆಯೋಜಕರು ಮನಸ್ಸು ಮಾಡಿದರೆ ಇನ್ನೂ ಒಂದೆರಡು ದಿನಗಳು ಪ್ರಸಾರ ಮಾಡಬಹುದಾದಷ್ಟು ಕಂಟೆಂಟ್ ಅವರುಗಳ ಬಳಿ ಇದೆ ಎನ್ನಲಾಗುತ್ತಿದೆ. ಹಾಗಾಗಿ ಮುಂದಿನ ಒಂದೆರಡು ದಿನಗಳ ಕಾಲ ಯಾವುದೇ ಅಡಚಣೆ ಇಲ್ಲದೆ ಬಿಗ್​​ಬಾಸ್ ಪ್ರಸಾರ ಆಗಲಿದೆ.

ಇದನ್ನೂ ಓದಿ:ರಣರಂಗವಾಯ್ತು ಬಿಗ್​​ಬಾಸ್ ಮನೆ: ಅಶ್ವಿನಿ ಗೌಡ vs ಅಶ್ವಿನಿ

ನಿನ್ನೆ ಸಹ ಜಿಯೋ ಹಾಟ್​​ಸ್ಟಾರ್​​​ನಲ್ಲಿ ಎಪಿಸೋಡ್​ ಪ್ರಸಾರದಲ್ಲಿ ತಡವಾಯ್ತು. ಈ ಬಗ್ಗೆ ಪ್ರಕಟಣೆ ಹೊರಡಿಸಿದ್ದ ಕಲರ್ಸ್ ಕನ್ನಡ, ‘ಅನಿರೀಕ್ಷಿತ ಕಾರಣಗಳಿಂದಾಗಿ ಜಿಯೋ ಹಾಟ್‌ಸ್ಟಾರ್‌ನಲ್ಲಿ ‘ಬಿಗ್‌ಬಾಸ್‌’ನ ಇಂದಿನ ಸಂಚಿಕೆಯ ಪ್ರಕಟಣೆಯ ಸಮಯದಲ್ಲಿ ವ್ಯತ್ಯಯ ಸಂಭವಿಸಿದೆ. ಈ ಅಡಚಣೆಗಾಗಿ ಕ್ಷಮೆ ಕೋರುತ್ತೇವೆ. ಇಂದಿನ ಸಂಚಿಕೆ ಈಗ ಜಿಯೋಹಾಟ್‌ಸ್ಟಾರ್‌ನಲ್ಲಿ ವೀಕ್ಷಣೆಗೆ ಲಭ್ಯವಿದೆ’ ಎಂದು ಪ್ರಕಟಣೆ ಹೊರಡಿಸಿತು.

ಬಿಗ್​​ಬಾಸ್ ಮನೆಗೆ ಬೀಗ ಹಾಕಿರುವ ಹಿನ್ನೆಲೆಯಲ್ಲಿ ಇದೀಗ ಜಾಲಿವುಡ್ ಸ್ಟುಡಿಯೋ, ಬಿಗ್​​ಬಾಸ್ ಆಯೋಜಕರು ನ್ಯಾಯಾಲಯದ ಮೆಟ್ಟಿಲೇರಲಿದ್ದು, ಘಟನೆಗೆ ಸಂಬಂಧಿಸಿದಂತೆ ಇಂದೇ ಆದೇಶ ಹೊರಬೀಳುವ ಸಾಧ್ಯತೆ ಇದೆ. ಒಂದೊಮ್ಮೆ ಇಂದೇ ಆದೇಶ ಹೊರಬಿದ್ದರೆ, ಬಿಗ್​​​ಬಾಸ್ ಕಾರ್ಯಕ್ರಮ ಯಾವುದೇ ಅಡಚಣೆ ಇಲ್ಲದೆ ಮುಂದುವರೆಯಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ