ಪಟಾಕಿ ಅಬ್ಬರಕ್ಕೆ ಬೆಂಗಳೂರಿನಲ್ಲಿ ವಾಯು ಮಾಲಿನ್ಯ ಭಾರಿ ಏರಿಕೆ: ರಾತ್ರಿ 11 ನಂತರ ಪಟಾಕಿ ಹಚ್ಚಿದರೆ CCTV ಆಧರಿಸಿ ಕೇಸ್
ಬೆಂಗಳೂರಿನಲ್ಲಿ ದೀಪಾವಳಿ ಪಟಾಕಿಗಳಿಂದ ವಾಯು ಮತ್ತು ಶಬ್ದ ಮಾಲಿನ್ಯ ತೀವ್ರವಾಗಿ ಏರಿಕೆಯಾಗಿದೆ. ಕಳೆದ ವರ್ಷಕ್ಕಿಂತಲೂ ಈ ಬಾರಿ AQI ಸೂಚ್ಯಂಕ ಗಣನೀಯವಾಗಿ ಹೆಚ್ಚಿದ್ದು, ಸಚಿವ ರಾಮಲಿಂಗಾರೆಡ್ಡಿ ಕಳವಳ ವ್ಯಕ್ತಪಡಿಸಿದ್ದಾರೆ. ರಾತ್ರಿ 11 ಗಂಟೆಯ ನಂತರ ಪಟಾಕಿ ಸಿಡಿಸುವವರ ವಿರುದ್ಧ ಸಿಸಿಟಿವಿ ಆಧಾರದಲ್ಲಿ ಕಠಿಣ ಕ್ರಮ ಜರುಗಿಸಲಾಗುವುದು ಎಂದು ಎಚ್ಚರಿಸಿದ್ದಾರೆ. ಮುಂದಿನ ವರ್ಷದಿಂದ ಗ್ರೀನ್ ಪಟಾಕಿ ಕಡ್ಡಾಯಗೊಳಿಸುವ ಹೊಸ ನಿಯಮಾವಳಿಗಳ ಭರವಸೆ ನೀಡಿದ್ದಾರೆ.
Updated on: Nov 10, 2026 | 9:47 PM
ಬೆಂಗಳೂರು, ನ.10: ದೀಪಾವಳಿ ಹಬ್ಬದ ಪಟಾಕಿ ಸದ್ದಿಗೆ ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ವಾಯು ಮಾಲಿನ್ಯ ಮತ್ತು ಶಬ್ದ ಮಾಲಿನ್ಯ ಭಾರಿ ಪ್ರಮಾಣದಲ್ಲಿ ಹೆಚ್ಚಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ನಗರದಲ್ಲಿ ಗಾಳಿಯ ಗುಣಮಟ್ಟ ತೀವ್ರವಾಗಿ ಕುಸಿದಿದ್ದು, ವಾಯು ಗುಣಮಟ್ಟ ಸೂಚ್ಯಂಕ ಗಣನೀಯವಾಗಿ ಏರಿಕೆಯಾಗಿದೆ. ಈ ಕುರಿತು ಸಾರ್ವಜನಿಕರಲ್ಲಿ ಕಳವಳ ವ್ಯಕ್ತವಾದ ಬೆನ್ನಲ್ಲೇ ಸ್ಪಷ್ಟನೆ ನೀಡಿರುವ ಅರಣ್ಯ ಮತ್ತು ಪರಿಸರ ಸಚಿವ ರಾಮಲಿಂಗಾರೆಡ್ಡಿ, ರಾತ್ರಿ 11 ಗಂಟೆಯ ನಂತರ ನಿಯಮ ಮೀರಿ ಪಟಾಕಿ ಸಿಡಿಸುವವರ ವಿರುದ್ಧ ಸಿಸಿಟಿವಿ ಕ್ಯಾಮೆರಾ ದೃಶ್ಯಾವಳಿ ಪರಿಶೀಲಿಸಿ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಿದ್ದಾರೆ.
ಕಳೆದ ವರ್ಷಕ್ಕಿಂತ ಈ ಬಾರಿ ಮಾಲಿನ್ಯ ಹೆಚ್ಚಾಗಿದ್ದೇಕೆ?: ಸಚಿವ ರಾಮಲಿಂಗಾರೆಡ್ಡಿ ವಿವರಣೆ
“ಕಳೆದ ವರ್ಷ ದೀಪಾವಳಿ ಸಮಯದಲ್ಲಿ ಜಡಿಮಳೆ ಇತ್ತು. ಹೀಗಾಗಿ ಜನ ಪಟಾಕಿ ಹಚ್ಚಿರಲಿಲ್ಲ. ಆದರೆ ಈ ಬಾರಿ ಮಳೆ ಇಲ್ಲದಿರುವುದರಿಂದ ಅತಿ ಹೆಚ್ಚು ಪಟಾಕಿ ಹಚ್ಚಿದ್ದಾರೆ. ಇದರಿಂದ ಮಾಲಿನ್ಯ ಪ್ರಮಾಣ ಹೆಚ್ಚಿದೆ” ಎಂದು ಸಚಿವರು ತಿಳಿಸಿದ್ದಾರೆ. ಕಳೆದ ವರ್ಷ (2025) ದೀಪಾವಳಿ ವೇಳೆ ಬೆಂಗಳೂರಿನಲ್ಲಿ ಗರಿಷ್ಠ AQI 95 ದಾಖಲಾಗಿತ್ತು. ಆದರೆ ಈ ಬಾರಿ (2026) ದೀಪಾವಳಿ ದಿನದಂದು ಬೆಳಗಿನ ಜಾಗ 9 ಗಂಟೆಯ ವೇಳೆಗೆ AQI 132ಕ್ಕೆ ಏರಿಕೆಯಾಗಿದೆ.
ಇದನ್ನೂ ಓದಿ: ದೀಪಾವಳಿ ಆಚರಿಸುತ್ತಲೇ ಕಣ್ಣೀರಿಡುವ ಬಂಜಾರ ಯುವತಿಯರು: ಯಾದಗಿರಿಯ ಗುಂಡಳ್ಳಿ ತಾಂಡಾದಲ್ಲಿ ಜಾನಪದ ಸೊಗಡಿನ ‘ತೋಲಿ ಶೀರಾಲಿ’ ವೈಭವ
ಬೆಂಗಳೂರಿನ ವಿವಿಧ ಏರಿಯಾಗಳ AQI
| ಪ್ರಮುಖ ಏರಿಯಾಗಳು | ವಾಯು ಗುಣಮಟ್ಟ ಸೂಚ್ಯಂಕ (AQI) |
| ಸಿಲ್ಕ್ ಬೋರ್ಡ್ (Silk Board) | 179 (ಅತಿ ಹೆಚ್ಚು) |
| ಹೊಂಬೇಗೌಡ ನಗರ (Hombegowda Nagar) | 176 |
| ಹೆಬ್ಬಾಳ (Hebbal) | 168 |
| ಜಿಗಣಿ (Jigani) | 122 |
| ಪೀಣ್ಯ (Peenya) | 120 |
| ಸನೇಗುರುವನಹಳ್ಳಿ (Saneguravanahalli) | 113 |
| ಬಾಪೂಜಿ ನಗರ (Bapuji Nagar) | 112 |
| RVCE ಮೈಲಸಂದ್ರ (RVCE Mailasandra) | 110 |
| ಬಿಟಿಎಂ ಲೇಔಟ್ (BTM Layout) | 🟡 109 |
ರಾತ್ರಿ 11 ಗಂಟೆ ನಂತರ ಪಟಾಕಿ ಹಚ್ಚಿದರೆ ಕ್ರಮ
ಸುಪ್ರೀಂ ಕೋರ್ಟ್ ನಿರ್ದೇಶನದಂತೆ ಶಬ್ದ ಹಾಗೂ ವಾಯು ಮಾಲಿನ್ಯ ಉಂಟುಮಾಡದ ಗ್ರೀನ್ ಪಟಾಕಿ ಹಚ್ಚಲು ಮಾತ್ರ ನಗರದಲ್ಲಿ 2 ದಿನಗಳ ಕಾಲ ರಾತ್ರಿ 8 ರಿಂದ 10 ಗಂಟೆಯವರೆಗೆ ಅವಕಾಶ ನೀಡಲಾಗಿದೆ. “ಅಧಿಕಾರಿಗಳ ಕೊರತೆ ಇರುವುದು ನಿಜ. ಆದರೆ ರಾತ್ರಿ 11 ಗಂಟೆಯ ನಂತರ ಯಾರಾದರೂ ಪಟಾಕಿ ಸಿಡಿಸಿದರೆ ಸಿಸಿಟಿವಿ ಕ್ಯಾಮೆರಾ ದೃಶ್ಯಗಳನ್ನು ಪರಿಶೀಲಿಸಿ ತಕ್ಷಣ ಕ್ರಮ ಜರುಗಿಸುತ್ತೇವೆ. ಎಷ್ಟೇ ಜಾಗೃತಿ ಮೂಡಿಸಿದರೂ ಜನ ಅರ್ಥ ಮಾಡಿಕೊಳ್ಳುತ್ತಿಲ್ಲ” ಎಂದು ಸಚಿವರು ಬೇಸರ ವ್ಯಕ್ತಪಡಿಸಿದ್ದಾರೆ. “ಮುಂದಿನ ವರ್ಷದಿಂದ ಕಡ್ಡಾಯವಾಗಿ ಶೇ.100 ರಷ್ಟು ಗ್ರೀನ್ ಪಟಾಕಿಗೆ ಮಾತ್ರವೇ ಅವಕಾಶ ನೀಡುವಂತೆ ಹೊಸ ಕಠಿಣ ನಿಯಮಾವಳಿಗಳನ್ನು ತರುತ್ತೇವೆ” ಎಂದು ಸಚಿವ ರಾಮಲಿಂಗಾರೆಡ್ಡಿ ಹೇಳಿದ್ದಾರೆ.
ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
