ಶೀಘ್ರದಲ್ಲಿ ಬೆಂಗಳೂರಿನಲ್ಲೂ ಉಬರ್​ ಷಟಲ್​ ಬಸ್​ ಸೇವೆ ಆರಂಭ!

ಬೆಂಗಳೂರು, ಅಕ್ಟೋಬರ್​ 25: ಬೆಂಗಳೂರಿನ (Bengaluru) ಬಹುತೇಕ ಜನರು ಉಬರ್ (Ubar) ಆ್ಯಪ್​ ಬಳಸುತ್ತಿದ್ದಾರೆ. ಉಬರ್​ ಕಂಪನಿ ಕೂಡ ಜನರಿಗೆ ಉತ್ತಮ ಸೇವೆ ನೀಡುತ್ತಿದ್ದು, ಹೊಸ ಪ್ರಯೋಗಗಳ ಮೂಲಕ ಜನರಿಗೆ ಇನ್ನಷ್ಟು ಹತ್ತಿರವಾಗಲು ಪ್ರಯತ್ನ ಮಾಡುತ್ತಿದೆ. ಇದರ ಭಾಗವಾಗಿ ಎಂಬಂತೆ “ಉಬರ್​ ಷಟಲ್​ ಬಸ್” (Uber Shuttle) ಸೇವೆ ಆರಂಭಿಸಲು ಕಂಪನಿ ನಿರ್ಧರಿಸಿದೆ.

ಈ ಕುರಿತಾಗಿ ಉಬರ್ ಇಂಡಿಯಾ ಮತ್ತು ದಕ್ಷಿಣ ಏಷ್ಯಾದ ಅಧ್ಯಕ್ಷರಾದ ಪ್ರಭಜೀತ್ ಸಿಂಗ್ ಮಾತನಾಡಿ, ಉಬರ್ ಷಟಲ್​ ಸೇವೆಯನ್ನು ಈಗಾಗಲೆ ದೆಹಲಿ, ಕೊಲ್ಕತ್ತಾ, ಹೈದರಾಬಾದ್​ ಮತ್ತು ಮುಂಬೈನಂತಹ ಮಹಾನಗರಗಳಲ್ಲಿ ಆರಂಭಿಸಲಾಗಿದೆ. ಇನ್ಮುಂದೆ ಬೆಂಗಳೂರಿನಲ್ಲೂ ಉಬರ್ ಷಟಲ್​ ಸೇವೆ ಆರಂಭಿಸಲು ನಿರ್ಧರಿಸಲಾಗಿದೆ ಎಂದು ಹೇಳಿದರು.

ಟ್ರಾಫಿಕ್​ ಕಿರಿಕಿರಿಯಿಂದ ಬಸವಳಿದಿರುವ ಟೆಕ್ಕಿಗಳಿಗೆ ಅನುಕೂಲ ಮಾಡಿಕೊಡುವ ನಿಟ್ಟಿನಲ್ಲಿ ಪ್ರಾರಂಭಿಕ ಹಂತದಲ್ಲಿ ಐಟಿ ಕಾರಿಡಾರ್​ನ ಕೆಆರ್​ಪುರಂ ಮತ್ತು ಸಿಲ್ಕ್​​ ಬೋರ್ಡ್​ (18 ಕಿಮೀ) ಮಧ್ಯೆ ಉಬರ್ ಷಟಲ್​ ಆರಂಭಿಸಲು ನಿರ್ಧರಿಸಲಾಗಿದೆ. ಈ ಐಟಿ ಕಾರಿಡಾರ್ ಸುಮಾರು 30 ಟೆಕ್ ಪಾರ್ಕ್​​ಗಳನ್ನು ಒಳಗೊಂಡಿದ್ದು, 15 ಲಕ್ಷದಷ್ಟು ಐಟಿ ಉದ್ಯೋಗಿಗಳು ಇದ್ದಾರೆ. ಹೀಗಾಗಿ ಈ ಉಬರ್ ಷಟಲ್ ಬೆಂಗಳೂರಿನಲ್ಲೂ ಪ್ರಾರಂಭಿಸುವ ಉದ್ದೇಶ ಇದೆ ಎಂದು ತಿಳಿಸಿದರು.

ಉಬರ್​ ಷಟಲ್​ ಆರಂಭಿಸಲು ಕೆಲವು ಮಧ್ಯಸ್ಥಗಾರರೊಂದಿಗೆ ಸಭೆ ನಡೆಸುತ್ತಿದ್ದೇವೆ. ಉಬರ್ ಷಟಲ್ ಅತ್ಯಂತ ಪರಿಣಾಮಕಾರಿ, ಕೈಗೆಟುಕುವ ದರ ಮತ್ತು ಸಾರ್ವಜನಿಕ ಸಾರಿಗೆಗೆ ಪೂರಕವಾಗಿದೆ. ಹೆಬ್ಬಾಳ ಮತ್ತು ಹೊರವರ್ತುಲ ರಸ್ತೆಯಲ್ಲಿ ಹವಾನಿಯಂತ್ರಿತ ಬಸ್​​ ಸೇವೆ ಆರಂಭಿಸಬಹುದಾಗಿದೆ. ಇದು ಸಾರ್ವಜನಿಕ ಸಾರಿಗೆಗೆ ಪರ್ಯಾಯ ಆಯ್ಕೆ ಕಲ್ಪಿಸಲಿದೆ. ಉಬರ್​ ಷಟಲ್ ಸೇವೆ ಬೆಂಗಳೂರಿನಲ್ಲಿ ಒಂದು ಅಥವಾ ಎರಡು ವರ್ಷಗಳಲ್ಲಿ ಆರಂಭವಾಗುವ ನಿರೀಕ್ಷೆಯಲ್ಲಿದ್ದೇನೆ ಎಂದರು.

ಇದನ್ನೂ ಓದಿ: Viral: ಮರುಭೂಮಿಯಲ್ಲಿ ಸಿಕ್ಕಿಹಾಕಿಕೊಂಡು ಕೊನೆಗೆ ಉಬರ್‌ನಲ್ಲಿ ಒಂಟೆ ಟ್ಯಾಕ್ಸಿ ಬುಕ್‌ ಮಾಡಿದ ಮಹಿಳೆ

ಉಬರ್​ ವಾಹನ ಬಾಡಿಗೆ ಏರಿಕೆ ಮತ್ತು ಚಾಲಕರ ಮೇಲೆ ಹೆಚ್ಚಿನ ಕಮಿಷನ್​ ಶುಲ್ಕವನ್ನು ವಿಧಿಸಲಾಗಿದೆ ಎಂಬ ಆರೋಪಕ್ಕೆ ಉತ್ತರಿಸಿದ ಅವರು, ಪೀಕ್​ ಅವರ್​ಗಳಲ್ಲಿ ಉಬರ್​ ವಾಹನ ಕಡಿಮೆ ಪೂರೈಕೆಯಿದ್ದರೆ ಬೆಲೆಗಳು ಏರಿಳಿತವಾಗುತ್ತವೆ. ಇದಕ್ಕೆ ಪರಿಹಾರ ವಾಹನಗಳ ಸಂಖ್ಯೆ ಹೆಚ್ಚಳ ಮಾಡುವುದರ ಮುಖಾಂತರ ಬೆಲೆ ಕಡಿಮೆ ಮಾಡಬಹುದು ಎಂದು ಹೇಳಿದರು.

ಪೀಕ್ ಅವರ್‌ಗಳಲ್ಲಿ ಗ್ರಾಹಕರು 800 ರೂ. ಬದಲಿಗೆ 950 ರೂ. ಪಾವತಿಸಲು ಸಿದ್ಧರಿದ್ದರೆ, ಅವರು ಉಬರ್​ ಕಾರು ಪಡೆಯಬಹುದು. ಆದಾಗ್ಯೂ, ಬೆಲೆಯು 1,400 ರೂ. ನಂತಹ ಕೆಲವು ಮಿತಿಗಳನ್ನು ಮೀರಬಾರದು. ಅಧಿಕ ಪೂರೈಕೆಯ ಸಮಯದಲ್ಲೂ ಕಡಿಮೆ ಬೆಲೆ ಇರಬೇಕು ಎಂದು ವಿವರಿಸಿದರು.

ಉಬರ್​ ಷಟಲ್​ ಆರಂಭದ ಸಲುವಾಗಿ ಕರ್ನಾಟಕ ಸಾರಿಗೆ ಇಲಾಖೆ ಅನುಮತಿ ನೀಡಬೇಕಿದೆ. ಇದಕ್ಕೆ ಕೆಲವು ನಿಯಮಗಳನ್ನು ಸಡಿಲಗೊಳಿಸಬೇಕಿದೆ ಎಂದು ಹೇಳಿದರು.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ

Published On - 3:14 pm, Fri, 25 October 24