ಬರದಿಂದ ಹೆಚ್ಚಿದ ನೀರಿನ ಕೊರತೆ: ಕರ್ನಾಟಕದಲ್ಲಿ ಅಂತರ್ಜಲ ಬಳಕೆ ಶೇ 70ರ ಗಡಿ ದಾಟುವ ಆತಂಕ

ಬೆಂಗಳೂರು, ಅಕ್ಟೋಬರ್ 22: ರಾಜ್ಯದಲ್ಲಿ ಬರ ಪರಿಸ್ಥಿತಿ ತೀವ್ರವಾಗಿರುವುದರಿಂದ ಅಂತರ್ಜಲದ ಮೇಲಿನ ಅವಲಂಬನೆ ಹೆಚ್ಚಾಗುತ್ತಿದೆ. ಈ ವರ್ಷ ಕರ್ನಾಟಕದಲ್ಲಿ ಅಂತರ್ಜಲ ಬಳಕೆಯ ಪ್ರಮಾಣ ಶೇ 70ರ ಗಡಿ ದಾಟುವ ಸಾಧ್ಯತೆಯಿದೆ ಎಂದು ತಜ್ಞರು ಎಚ್ಚರಿಕೆ ನೀಡಿದ್ದಾರೆ. ಕಡಿಮೆ ಮಳೆ, ಅಂತರ್ಜಲ ಮರುಪೂರಣದ ಕೊರತೆ ಹಾಗೂ ಅತಿಯಾದ ನೀರು ಬಳಕೆಯಿಂದ ಅಂತರ್ಜಲ ಮಟ್ಟ ಕುಸಿಯುವ ಆತಂಕ ಹೆಚ್ಚಾಗಿದೆ. ರಾಜ್ಯದಲ್ಲಿ ಈಗಾಗಲೇ 227 ತಾಲೂಕುಗಳನ್ನು ಬರಪೀಡಿತ ಎಂದು ಘೋಷಿಸಲಾಗಿದೆ. ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ನಿರ್ವಹಣಾ ಕೇಂದ್ರದ ಅಂಕಿಅಂಶಗಳ ಪ್ರಕಾರ, ರಾಜ್ಯದ 14 ಜಲಾಶಯಗಳ ಒಟ್ಟು ಸಂಗ್ರಹ ಸಾಮರ್ಥ್ಯ 895 ಟಿಎಂಸಿ ಅಡಿ ಇದೆ. ಸದ್ಯ ಈ ಜಲಾಶಯಗಳಲ್ಲಿ 540 ಟಿಎಂಸಿ ಅಡಿ ನೀರು ಲಭ್ಯವಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 827 ಟಿಎಂಸಿ ಅಡಿ ನೀರು ಸಂಗ್ರಹವಾಗಿತ್ತು. ಇದರಿಂದ ರಾಜ್ಯದ ಜಲಸಂಪನ್ಮೂಲಗಳ ಮೇಲಿನ ಒತ್ತಡ ಹೆಚ್ಚಿರುವುದು ಸ್ಪಷ್ಟವಾಗುತ್ತದೆ.

2025ರಲ್ಲಿ ಎಷ್ಟಿತ್ತು ಅಂತರ್ಜಲ ಬಳಕೆ?

2025ರ ಜನವರಿಯಲ್ಲಿ ಬಿಡುಗಡೆಯಾದ ವಾರ್ಷಿಕ ಅಂತರ್ಜಲ ಸಂಪನ್ಮೂಲ ವರದಿಯ ಪ್ರಕಾರ, ಕರ್ನಾಟಕದಲ್ಲಿ ವಾರ್ಷಿಕವಾಗಿ ಬಳಸಲು ಲಭ್ಯವಿರುವ ಅಂತರ್ಜಲದ ಪ್ರಮಾಣ 17.41 ಬಿಲಿಯನ್ ಘನ ಮೀಟರ್‌ಗಳಷ್ಟಿತ್ತು. ಇದರಲ್ಲಿ 11.58 ಬಿಲಿಯನ್ ಘನ ಮೀಟರ್ ಅಂತರ್ಜಲವನ್ನು ಬಳಸಲಾಗಿದ್ದು, ಬಳಕೆಯ ಪ್ರಮಾಣ ಶೇ 66.49ರಷ್ಟಿತ್ತು. ಆದರೆ, ಈ ವರ್ಷ ಬರ ಪರಿಸ್ಥಿತಿ ಮುಂದುವರಿದಿರುವುದರಿಂದ ಅಂತರ್ಜಲ ಬಳಕೆಯ ಪ್ರಮಾಣ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಸಾಮಾನ್ಯವಾಗಿ ಶೇ 70ರವರೆಗಿನ ಅಂತರ್ಜಲ ಬಳಕೆಯನ್ನು ಸುರಕ್ಷಿತ ಎಂದು ಪರಿಗಣಿಸಲಾಗುತ್ತದೆ. ಈ ಮಿತಿಯನ್ನು ದಾಟಿದರೆ ಅಂತರ್ಜಲ ಸಂಪನ್ಮೂಲಗಳ ಮೇಲೆ ಹೆಚ್ಚಿನ ಒತ್ತಡ ಉಂಟಾಗುವ ಆತಂಕವಿದೆ.

45 ತಾಲೂಕುಗಳಲ್ಲಿ ಅತಿಯಾದ ಅಂತರ್ಜಲ ಬಳಕೆ

ಅಂತರ್ಜಲದ ಸ್ಥಿತಿಯನ್ನು ಸುರಕ್ಷಿತ, ಅರೆ-ನಿರ್ಣಾಯಕ, ನಿರ್ಣಾಯಕ ಮತ್ತು ಅತಿಯಾದ ಬಳಕೆ ಎಂಬ ನಾಲ್ಕು ವರ್ಗಗಳಾಗಿ ವಿಂಗಡಿಸಲಾಗುತ್ತದೆ. 2025ರ ವರದಿಯ ಪ್ರಕಾರ, ರಾಜ್ಯದ 145 ತಾಲೂಕುಗಳು ಸುರಕ್ಷಿತ ವರ್ಗದಲ್ಲಿವೆ. 36 ತಾಲೂಕುಗಳು ಅರೆ-ನಿರ್ಣಾಯಕ ವರ್ಗದಲ್ಲಿದ್ದು, ಇಲ್ಲಿ ಅಂತರ್ಜಲ ಬಳಕೆ ಶೇ 70ರಿಂದ ಶೇ 90ರಷ್ಟಿದೆ. 11 ತಾಲೂಕುಗಳು ನಿರ್ಣಾಯಕ ವರ್ಗದಲ್ಲಿದ್ದು, ಬಳಕೆಯ ಪ್ರಮಾಣ ಶೇ 90ರಿಂದ ಶೇ 100ರಷ್ಟಿದೆ. ಇನ್ನು 45 ತಾಲೂಕುಗಳಲ್ಲಿ ಅಂತರ್ಜಲ ಬಳಕೆ ಲಭ್ಯವಿರುವ ಸಂಪನ್ಮೂಲದ ಶೇ 100ಕ್ಕಿಂತ ಹೆಚ್ಚಾಗಿದೆ.

ಈ ವರ್ಷ ಮಳೆ ಕೊರತೆ ಮತ್ತು ಹೆಚ್ಚಿದ ನೀರಿನ ಬಳಕೆಯಿಂದ ಅರೆ-ನಿರ್ಣಾಯಕ, ನಿರ್ಣಾಯಕ ಹಾಗೂ ಅತಿಯಾದ ಬಳಕೆಯ ವರ್ಗದಲ್ಲಿರುವ ತಾಲೂಕುಗಳ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಬಹುದು ಎಂದು ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.

ಅಕ್ಟೋಬರ್ ಮಳೆಯಲ್ಲೂ ಶೇ 50ರಷ್ಟು ಕೊರತೆ ಆತಂಕ

ರಾಜ್ಯದಲ್ಲಿ ಅಂತರ್ಜಲ ಬಳಕೆಯ ಸರಾಸರಿ ಪ್ರಮಾಣ ಈ ವರ್ಷ ಶೇ 70ರ ಗಡಿ ದಾಟುವ ಸಾಧ್ಯತೆಯಿದೆ. ರಾಜ್ಯದ ವಾರ್ಷಿಕ ಮಳೆಗೆ ಈಶಾನ್ಯ ಮುಂಗಾರು ಸುಮಾರು ಶೇ 16ರಷ್ಟು ಕೊಡುಗೆ ನೀಡುತ್ತದೆ. ಆದರೆ, ಈ ಬಾರಿಯ ಈಶಾನ್ಯ ಮುಂಗಾರು ಕೂಡ ನಿರೀಕ್ಷಿತ ಮಟ್ಟದಲ್ಲಿ ಇಲ್ಲ ಎಂದು ಪರಿಸರ ವಿಜ್ಞಾನಿ ಜಿ.ಎಸ್. ಶ್ರೀನಿವಾಸ ರೆಡ್ಡಿ ಹೇಳಿರುವುದಾಗಿ ‘ದಿ ನ್ಯೂ ಇಂಡಿಯನ್ ಎಕ್ಸ್​ಪ್ರೆಸ್’ ವರದಿ ಮಾಡಿದೆ. ಅಕ್ಟೋಬರ್ ತಿಂಗಳ ಮಳೆಯಲ್ಲೇ ಶೇ 50ರಷ್ಟು ಕೊರತೆ ಎದುರಾಗುವ ಆತಂಕವಿದೆ. ಅಂತರ್ಜಲದ ಅತಿಯಾದ ಬಳಕೆಯಿಂದ ಬೇಸಿಗೆಯಲ್ಲಿ ಲಕ್ಷಾಂತರ ಕೊಳವೆಬಾವಿಗಳಲ್ಲಿ ನೀರಿಲ್ಲದಾಗಲಿದೆ ಎಂದು ಶ್ರೀನಿವಾಸ ರೆಡ್ಡಿ ಎಚ್ಚರಿಸಿದ್ದಾರೆ.

ಅಂತರ್ಜಲದ ಗುಣಮಟ್ಟದ ಮೇಲೂ ಪರಿಣಾಮ

ಅಂತರ್ಜಲದ ಪ್ರಮಾಣ ಕುಸಿಯುವುದಷ್ಟೇ ಅಲ್ಲದೆ, ಅದರ ಗುಣಮಟ್ಟದ ಮೇಲೂ ಪರಿಣಾಮ ಬೀರುವ ಆತಂಕವಿದೆ. ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರದ ಮೂಲಗಳ ಪ್ರಕಾರ, ಅಂತರ್ಜಲದ ಗುಣಮಟ್ಟದ ಪರಿಶೀಲನೆಯಲ್ಲಿ 17 ತಾಲೂಕುಗಳಲ್ಲಿ ಲವಣಾಂಶ, 41 ತಾಲೂಕುಗಳಲ್ಲಿ ನೈಟ್ರೇಟ್, 15 ತಾಲೂಕುಗಳಲ್ಲಿ ಫ್ಲೋರೈಡ್ ಮತ್ತು 13 ತಾಲೂಕುಗಳಲ್ಲಿ ಯುರೇನಿಯಂ ಅಂಶ ಗುರುತಿಸಲಾಗಿದೆ.

ಕಲುಷಿತ ಅಂತರ್ಜಲ ಬಳಕೆಯಿಂದ ಭಾರಿ ಹಾನಿ

ಈ ವರ್ಷ ಅಂತರ್ಜಲದ ಬಳಕೆ ಹೆಚ್ಚಾದರೆ ಇಂತಹ ಸಮಸ್ಯೆಗಳು ಮತ್ತಷ್ಟು ಹೆಚ್ಚಾಗಬಹುದು ಎಂದು ಅಧಿಕಾರಿಗಳು ಆತಂಕ ವ್ಯಕ್ತಪಡಿಸಿದ್ದಾರೆ. ಕಲುಷಿತ ಅಂತರ್ಜಲ ಬಳಕೆಯಿಂದ ಮೂತ್ರಪಿಂಡ, ಯಕೃತ್ತು, ಮೂಳೆ ಸೇರಿದಂತೆ ಹಲವು ಆರೋಗ್ಯ ಸಮಸ್ಯೆಗಳು ಉಂಟಾಗುವ ಅಪಾಯವಿದೆ ಎಂದು ಅವರು ಎಚ್ಚರಿಸಿದ್ದಾರೆ.

ನೀರಿನ ಮಿತಬಳಕೆಗೆ ತಜ್ಞರ ಸಲಹೆ

ಉತ್ತಮ ಮಳೆಯಾದಾಗ ನೀರನ್ನು ಸಂಗ್ರಹಿಸಿ, ಬರದ ಸಮಯದಲ್ಲಿ ಸಮರ್ಪಕವಾಗಿ ಬಳಸುವ ವ್ಯವಸ್ಥೆ ಅಗತ್ಯ. ಮುಂದಿನ ಜೂನ್‌ವರೆಗೆ ನೀರನ್ನು ಎಚ್ಚರಿಕೆಯಿಂದ ಬಳಸಬೇಕು ಎಂದು ನೀರು ಸಂರಕ್ಷಣಾ ತಜ್ಞ ವಿಶ್ವನಾಥ್ ಶ್ರೀಕಂಠಯ್ಯ ಸಲಹೆ ನೀಡಿರುವುದನ್ನೂ ವರದಿ ಉಲ್ಲೇಖಿಸಿದೆ.

ಕೃಷಿಯಲ್ಲಿ ಹನಿ ನೀರಾವರಿ ಮತ್ತು ತುಂತುರು ನೀರಾವರಿ ಪದ್ಧತಿಗಳಿಗೆ ಹೆಚ್ಚಿನ ಪ್ರೋತ್ಸಾಹ ನೀಡಬೇಕು. ನೀರಿನ ಕೊರತೆಗೆ ರೈತರನ್ನಷ್ಟೇ ಹೊಣೆ ಮಾಡದೆ, ನೀರಿನ ಸಂಗ್ರಹ, ನಿರ್ವಹಣೆ ಮತ್ತು ಬಳಕೆಯ ವಿಧಾನಗಳ ಬಗ್ಗೆಯೂ ಗಮನ ಹರಿಸಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಒಟ್ಟಿನಲ್ಲಿ, ರಾಜ್ಯದಲ್ಲಿ ಅಂತರ್ಜಲದ ಮೇಲಿನ ಒತ್ತಡ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ನೀರಿನ ಮಿತಬಳಕೆ, ಮಳೆನೀರು ಸಂಗ್ರಹ ಮತ್ತು ಪರಿಣಾಮಕಾರಿ ಜಲ ನಿರ್ವಹಣೆಗೆ ಹೆಚ್ಚಿನ ಆದ್ಯತೆ ನೀಡಬೇಕಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ