ಅವಶ್ಯಕತೆ ಇದ್ರೆ ಗೋ ರಕ್ಷಣೆಗಾಗಿ ಖಡ್ಗ ಎತ್ತಿ ಪರಾಕ್ರಮ ಮೆರೆಯಬೇಕು: ವಿಎಚ್ಪಿ ಮುಖಂಡನ ವಿಡಿಯೋ ವೈರಲ್
ರಾಯಚೂರು ಜಿಲ್ಲೆ ಮಾನ್ವಿ ಪಟ್ಟಣದಲ್ಲಿ ವಿಎಚ್ಪಿ ಮುಖಂಡ ಗೋಪಾಲ್ ನಾಗರಕಟ್ಟೆ ಅವರು ವಿವಾದಾತ್ಮಕ ಹೇಳಿಕೆ ನೀಡಿದ್ದು ವಿಡಿಯೋ ವೈರಲ್ ಆಗುತ್ತಿದೆ. ಗೋ ರಕ್ಷಣೆ ಮಾಡಲು ಅವಶ್ಯಕತೆ ಇದ್ರೆ ಖಡ್ಗವನ್ನ ಎತ್ತಿ ಪರಾಕ್ರಮವನ್ನ ಮೆರೆಯಬೇಕು ಎಂದು ಕರೆ ಕೊಟ್ಟಿದ್ದಾರೆ.
ರಾಯಚೂರು, ಅ.17: ಗೋ ರಕ್ಷಣೆಗೆ ಅವಶ್ಯಕತೆ ಇದ್ರೆ ಖಡ್ಗ ಎತ್ತುವಂತೆ ವಿಎಚ್ಪಿ ಮುಖಂಡ ಕರೆ ನೀಡಿದ್ದು ವಿವಾದಕ್ಕೆ ಗುರಿಯಾಗಿದೆ. ಹೌದು ರಾಯಚೂರು ಜಿಲ್ಲೆ ಮಾನ್ವಿ ಪಟ್ಟಣದಲ್ಲಿ ವಿಎಚ್ಪಿ ಮುಖಂಡ ಗೋಪಾಲ್ ನಾಗರಕಟ್ಟೆ (Gopal Nagarakatte) ಅವರು ವಿವಾದಾತ್ಮಕ ಹೇಳಿಕೆ ನೀಡಿದ್ದು ವಿಡಿಯೋ ವೈರಲ್ ಆಗುತ್ತಿದೆ. ಒಂದು ಗೋವು ಸಹ ಕಸಾಯಿ ಖಾನೆಗೆ ಹೋಗಬಾರದು. ಪ್ರತಿಯೊಬ್ಬರಿಂದ ಗೋ ರಕ್ಷಣೆ ನಡೀಬೇಕು. ಗೋ ರಕ್ಷಣೆಗೆ ಅವಶ್ಯಕತೆ ಇದ್ರೆ ಖಡ್ಗ ಎತ್ತಿ ಎಂದು ವಿಎಚ್ಪಿ (Vishva Hindu Parishad) ಮುಖಂಡ ಗೋಪಾಲ್ ನಾಗರಕಟ್ಟೆ ಅವರು ಕರೆ ಕೊಟ್ಟಿದ್ದಾರೆ.
ಭಾರತ ಗೋಮಾತೆಯ ನೆಲ. ಗೋ ಮಾತೆಯ ರಕ್ತದಿಂದ ಭಾರತ ಮಾತೆ ಆಕ್ರಂದನ ಪಡುತ್ತಿದ್ದಾಳೆ. ಗೋ ಮಾತೆ ಕೂಗು, ಅವಳನ್ನ ಕತ್ತಿರಿಸೋವಾಗಿನ ನೋವು ನೋಡಿ ಭೂ ಮಾತೆ ದುಖಃದಿಂದ ತತ್ತರಿಸುತ್ತಿದ್ದಾಳೆ. ಗೋ ಮಾತೆಯನ್ನ ದುಖಃದಿಂದ ನಿವಾರಣೆ ಮಾಡಿ, ಗೋ ಹತ್ಯೆ ನಿಲ್ಲಿಸಬೇಕಿದೆ. ನಮ್ಮದು ಮಾಂಸ ಮಾರಾಟ ಮಾಡೋ ದೇಶ ಆಗಬಾರದು. ಕೇಂದ್ರ ಸರ್ಕಾರಕ್ಕೆ ಆಗ್ರಹ ಮಾಡುತ್ತೇನೆ. ಒಂದು ಗೋವು ಸಹ ಕಸಾಯಿ ಖಾನೆಗೆ ಹೋಗಬಾರದು. ಗೋ ರಕ್ಷಣೆ ನಡಿಯಬೇಕು. ರೈತರು ನಿಶ್ಚಯ ಮಾಡಬೇಕು. ನಮ್ಮ ತಾಯಿಯನ್ನು ನೋಡಿದ ಹಾಗೆ ಗೋ ಮಾತೆಯನ್ನು ನೋಡಬೇಕು. ಕಟುಕರು ಗೋ ಅಪಹರಣ ಮಾಡಿದಾಗ ಶಿವಾಜಿ ಮಹಾರಾಜರ ಹಾಗೆ ನಮ್ಮ ರಕ್ತ ಬಿಸಿ ಮಾಡಿಕೊಂಡು, ಬಾಹು ಬಲವನ್ನ ಇಟ್ಟುಕೊಂಡು ಗೋ ಮಾತೆ ರಕ್ಷಣೆ ಮಾಡಬೇಕು. ಗೋ ರಕ್ಷಣೆ ಮಾಡಲು ಅವಶ್ಯಕತೆ ಇದ್ರೆ ಖಡ್ಗವನ್ನ ಎತ್ತಿ ಪರಾಕ್ರಮವನ್ನ ಮೆರೆಯಬೇಕು ಎಂದು ಗೋಪಾಲ್ ನಾಗರಕಟ್ಟೆ ಅವರು ಯುವಕರನ್ನು ಹುರಿದುಂಬಿಸಲು ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ.
ಹಿಂದೂ ಯುವತಿಯರನ್ನ ಪ್ರೇಮ ಜಾಲದಲ್ಲಿ ಸಿಲುಕಿಸಲಾಗ್ತಿದೆ
ಇನ್ನು ಮತ್ತೊಂದೆಡೆ ಗೋಪಾಲ್ ನಾಗರಕಟ್ಟೆ ಅವರು ಲವ್ ಜಿಹಾದ್ ವಿರುದ್ಧ ಕಿಡಿ ಕಾರಿದ್ದಾರೆ. ವಯಸ್ಸು ಜಾಸ್ತಿ ಆಗ್ತಿದೆ, ಶರೀರ ಬೆಳೆದಿದೆ, ಬುದ್ದಿ ಇನ್ನು ಸಂಪೂರ್ಣ ಬೆಳದಿಲ್ಲ. ಮುಂದಿನ ಆತಂಕದ ಅರಿವಿಲ್ಲದ ಹಿಂದೂ ಯುವತಿಯರನ್ನ ಪ್ರೇಮ ಜಾಲದಲ್ಲಿ ಸಿಲುಕಿಸಲಾಗ್ತಿದೆ. ಮತಾಂತರಗೊಳಿಸಿ ಲವ್ ಜಿಹಾದ್ ಅನ್ನೋ ದುಷ್ಟ ಯಂತ್ರದ ಮೂಲಕ ಮುಸಲ್ಮಾನರನ್ನಾಗಿ ನರಕಯಾತನೆ ಕೊಡಲಾಗ್ತಿದೆ. ಮುಸಲ್ಮಾನ ಯುವಕರ ಷಡ್ಯಂತ್ರಕ್ಕೆ ಬಲಿಯಾಗಿ ಮುಸಲ್ಮಾನರ ಮನೆಗೆ ನಮ್ಮ ಯುವತಿಯರು ಹೋಗುತ್ತಿದ್ದಾರೆ. ಮುಸಲ್ಮಾನರ ಗುಹೆಗೆ ತೆರಳಿ ನಮ್ಮ ಯುವತಿಯರನ್ನ ಭಜರಂಗದ ಮರಳಿ ಕರೆತರ್ತಿದೆ. ಬಳಿಕ ಹಿಂದೂ ಯುವಕರೊಂದಿಗೆ ಮದುವೆ ಮಾಡುವ ಪರಾಕ್ರಮ ಹಿಂದೂ ಯುವಕರು ಮಾಡ್ತಿದ್ದಾರೆ.
ಇಂಗ್ಲಿಷ್ನಲ್ಲಿ ಒಂದು ಮಾತಿದೆ ಅಫೇನ್ಸ್ ಇಸ್ ದ ಬೆಸ್ಟ್ ವೇ ಆಫ್ ಡಿಫೇನ್ಸ್ ಅಂತ. ಮೂಗು ಮುಚ್ಚಿದ್ರೆ ಬಾಯಿ ತೆರಿತಾರೆ. ನಮ್ಮ ಜಾತಿ ಯುವಕ ಯುವತಿಯರೇ ಬೇಗ ಯೋಚನೆ ಮಾಡಿ. ಇಡೀ ದೇಶದಲ್ಲಿ ಮುಸಲ್ಮಾನ ಯುವತಿಯರು ಇಷ್ಟ ಪಡೋದು ಹಿಂದೂ ಯುವಕರನ್ನ. ಯಾಕಂದ್ರೆ ಅವರಿಗೆ ಬುರ್ಕಾ ಬೇಕಿಲ್ಲ. ಹೀಗಾಗಿ ಬಹನ್ ಬಚಾವೋ, ಬೇಟಿ ಬಚಾವೋ, ಬಹು ಲಾವೋ ಕ್ರಮ ಮಾಡಬೇಕು. ಇದಕ್ಕೆ ಅಪ್ಪ ಅಮ್ಮನೂ ಕೂಡ ಸಮರ್ಥನೆ ಮಾಡೋ ಭಾವ ನಮ್ಮಲ್ಲಿ ಬರ್ಬೇಕು ಎಂದು ಗೋಪಾಲ್ ನಾಗರಕಟ್ಟೆ ಹೇಳಿದ್ದಾರೆ.
ರಾಯಚೂರಿಗೆ ಸಂಬಂಧಿಸಿದ ಸುದ್ದಿಗಳನ್ನು ಓದಲು ಇದರ ಮೇಲೆ ಕ್ಲಿಕ್ ಮಾಡಿ