ವರ್ತೂರ್ ಪ್ರಕಾಶ್​ಗೆ ಕೈ ಮೇಲೆ ವ್ಯಾಮೋಹ: ಮತ್ತೆ ಕಾಂಗ್ರೆಸ್ ಪಕ್ಷ ಸೇರುತ್ತಾರಾ​​ ವರ್ತೂರ್ ?

ಕೋಲಾರ: ಜಿಲ್ಲೆಯ ಮಾಜಿ ಶಾಸಕ ಹಾಗೂ ಮಾಜಿ ಸಚಿವ ವರ್ತೂರ್​ ಪ್ರಕಾಶ್​ಗೆ ಕಾಂಗ್ರೆಸ್ ಪಕ್ಷದ​ ಮೇಲೆ ಮನಸ್ಸಾಗಿದ್ದು, ಮತ್ತೆ ಕಾಂಗ್ರೆಸ್ ಪಕ್ಷ ಸೇರುವುದಕ್ಕೆ ಹಾತೊರೆಯುತ್ತಿದ್ದಾರೆ! ಹೀಗೆಂದು ಸ್ವತಃ ವರ್ತೂರ್​ ಪ್ರಕಾಶ್​ ಗ್ರಾಮ ಪಂಚಾಯತಿಯ ಗೆದ್ದ ಅಭ್ಯರ್ಥಿಗಳ ಅಭಿನಂದನಾ ಸಮಾರಂಭದಲ್ಲಿ ತಮ್ಮ ಮನದಾಳದ ಮಾತುಗಳನ್ನು ಬಿಚ್ಚಿಟ್ಟಿದ್ದಾರೆ.

ಕಾಂಗ್ರೆಸ್ ಜಪ, ಕೆ.ಹೆಚ್​.ಮುನಿಯಪ್ಪರ ಮೇಲೆ ಪ್ರೀತಿ! ಕೋಲಾರದಲ್ಲಿ ನಡೆದ ಗ್ರಾಮ ಪಂಚಾಯತಿ ಚುನಾವಣೆಯಲ್ಲಿ ಗೆದ್ದ ವರ್ತೂರ್ ಪ್ರಕಾಶ್​ ಬೆಂಬಲಿತ ಅಭ್ಯರ್ಥಿಗಳಿಗೆ ಅಭಿನಂದನಾ ಸಮಾರಂಭದಲ್ಲಿ ಮಾತನಾಡಿದ ವರ್ತೂರ್​ ಪ್ರಕಾಶ್,​ ತಾವು ಕಾಂಗ್ರೆಸ್​ ಪಕ್ಷ ಸೇರುವ ಇಂಗಿತ ವ್ಯಕ್ತಪಡಿಸಿದ್ದಾರೆ. ಈ ಗ್ರಾಮ ಪಂಚಾಯತಿ ಚುನಾವಣೆ ವೇಳೆ ಸಾಕಷ್ಟು ನಷ್ಟ ಅನುಭವಿಸಿದ್ದ ವರ್ತೂರ್​ ಪ್ರಕಾಶ್​ಗೆ ಮಾಜಿ ಸಂಸದ ಕೆ.ಹೆಚ್​.ಮುನಿಯಪ್ಪ ಹಣ ನೀಡಿ ಶಕ್ತಿ ತುಂಬಿದ್ದಾರೆ. ಗ್ರಾಮ ಪಂಚಾಯತಿ ಚುನಾವಣೆ ಕಾಂಗ್ರೆಸ್ ಅಭ್ಯರ್ಥಿಗಳಿಗೆ ನೀಡಿದ ಹಣದಲ್ಲೇ ನಮ್ಮ ಅಭ್ಯರ್ಥಿಗಳನ್ನು ಗೆಲ್ಲಿಸಿಕೊಂಡು ಬರಲಾಗಿದೆ. ಹಿಂದಿನ ಹಲವು ಚುನಾವಣೆಗಳಲ್ಲಿ ನಾನು ಕಾಂಗ್ರೆಸ್ ಪಕ್ಷದ ಪರವಾಗಿ ಕೆಲಸ ಮಾಡಿಕೊಂಡು ಬಂದಿದ್ದೇವೆ ಎಂದು ವರ್ತೂರ್ ಪ್ರಕಾಶ್ ಹೇಳಿದ್ದಾರೆ.

​2008 ವಿಧಾನಸಭಾ ಚುನಾವಣೆಯಿಂದ ವರ್ತೂರ್ ಪ್ರಕಾಶ್​​ ಕಾಂಗ್ರೆಸ್​​ ಸೇರಲು ಹಾತೊರೆಯುತ್ತಿದ್ದಾರೆ! 2008 ರ ವಿಧಾನಸಭಾ ಚುನಾವಣೆಗೆ ಕೋಲಾರ ವಿಧಾನಸಭಾ ಕ್ಷೇತ್ರಕ್ಕೆ ಬಂದಿಳಿದಿದ್ದ ವರ್ತೂರ್​ ಪ್ರಕಾಶ್​ ಕೋಲಾರದಲ್ಲಿ ಬೃಹತ್​ ಅಹಿಂದ ಸಮಾವೇಶವನ್ನು ಮಾಡುವ ಮೂಲಕ ಸಿದ್ದರಾಮಯ್ಯ, ಜಿ.ಪರಮೇಶ್ವರ್​ ಸೇರಿದಂತೆ ಕಾಂಗ್ರೆಸ್ ಪಕ್ಷದ ಹಿರಿಯ ಮುಖಂಡರನ್ನು ಒಂದೆಡೆ ಸೇರಿಸಿ ಅಹಿಂದ ಕಹಳೆ ಊದಿದ್ದರು. ಆ ಸಮಾವೇಶದ ನಂತರ ಕೋಲಾರ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್​ ಟಿಕೆಟ್​ ಆಕಾಂಕ್ಷಿಯಾಗಿ ಹೊರಹೊಮ್ಮಿದ ವರ್ತೂರ್​ ಪ್ರಕಾಶ್​ಗೆ ಹಾಲಿ ಶಾಸಕ ಕೆ. ಶ್ರೀನಿವಾಸಗೌಡರು ಪ್ರಭಲ ಪ್ರತಿಸ್ಪರ್ಧಿಯಾಗಿ ಕಂಡು ಬಂದರು. ಸತತವಾಗಿ 3 ಬಾರಿ ಶಾಸಕರಾಗಿದ್ದ ಕೆ. ಶ್ರೀನಿವಾಸಗೌಡರಿಗೆ ಕಾಂಗ್ರೆಸ್ ಪಕ್ಷ ಟಿಕೆಟ್ ನೀಡುವ ಮೂಲಕ ವರ್ತೂರ್​ ಪ್ರಕಾಶ್​ಗೆ ನಿರಾಸೆ ಮಾಡಿತ್ತು. ಆದರೆ ವರ್ತೂರ್​ ಪ್ರಕಾಶ್​ ಎದೆಗುಂದದೆ​ ಪಕ್ಷೇತರ ಅಭ್ಯರ್ಥಿಯಾಗಿ ಕಣಕ್ಕಿಳಿದು ಕೋಲಾರ ಕ್ಷೇತ್ರದಲ್ಲಿ ಅಬ್ಬರದ ಪ್ರಚಾರ ಮಾಡುವ ಮೂಲಕ 2008ರ ಚುನಾವಣೆಯಲ್ಲಿ ವಿಧಾನಸಭೆಗೆ ಆಯ್ಕೆಯಾಗಿದ್ದರು.

ಸಚಿವ ವರ್ತೂರ್​ ಪ್ರಕಾಶ್​

ಬಿಜೆಪಿಯ ಭರ್ಜರಿ ಆಫರ್​ನ್ನು ಲೆಕ್ಕಿಸದೆ, ಕಾಂಗ್ರೆಸ್​ ಮತ್ತು ಸಿದ್ದರಾಮಯ್ಯರನ್ನು ಜಪಿಸುತ್ತಿದ್ದ ವರ್ತೂರ್​! 2008ರ ವಿಧಾನಸಭೆ ಚುನಾವಣೆಯಲ್ಲಿ ಗೆದ್ದ ನಂತರ ಅತಂತ್ರ ವಿಧಾನಸಭೆ ಸೃಷ್ಟಿಯಾಗಿ ಪಕ್ಷೇತರ ಶಾಸಕರಿಗೆ ಭರ್ಜರಿ ಬೇಡಿಕೆ ಬಂದಿತ್ತು. ಈ ವೇಳೆ ವರ್ತೂರ್​ ಪ್ರಕಾಶ್​ ಬಿಜೆಪಿ ಜೊತೆಗೆ ಕೈಜೋಡಿಸಿದ್ದರೆ ಅವರು ಮೊದಲ ಬಾರಿಗೆ ಸಚಿವರಾಗಿರುತ್ತಿದ್ದರು.ಆದರೆ ಅಂದಿಗೆ ಬಿಜೆಪಿ ಜೊತೆಗೆ ಕೈಜೋಡಿಸದ ವರ್ತೂರ್​ ಪ್ರಕಾಶ್​ ಕಾಂಗ್ರೆಸ್ ಜೊತೆಗೆ ಗುರುತಿಸಿಕೊಂಡಿದ್ದರು.ಈ ವೇಳೆ ಬಿಜೆಪಿ ಪಕ್ಷೇತರ ಶಾಸಕರ ಬೆಂಬಲದೊಂದಿಗೆ ಸರ್ಕಾರ ರಚನೆ ಮಾಡಿತ್ತು ಆಗಲೂ ವರ್ತೂರ್​ ಪ್ರಕಾಶ್​ ಬಿಜೆಪಿಯಿಂದ ದೂರ ಉಳಿದಿದ್ದರು. ಆದರೆ ಬಿಜೆಪಿ ಸರ್ಕಾರಕ್ಕೆ 2 ವರ್ಷಗಳ ನಂತರ ಮತ್ತೆ ಸಂಕಷ್ಟ ಎದುರಾದಾಗ ವರ್ತೂರ್​ ಪ್ರಕಾಶ್ ಬಿಜೆಪಿ ಜೊತೆಗೆ ಕೈಜೋಡಿಸಿ ಜವಳಿ ಸಚಿವರಾಗಿ, ಕುಡಿಯುವ ನೀರು ಹಾಗೂ ಒಳಚರಂಡಿ ನಿಗದ ಅಧ್ಯಕ್ಷರಾಗಿ ಕೆಲಸ ಮಾಡಿದ್ದರು.

ಈಗ ಕೇಂದ್ರ ಮತ್ತು ರಾಜ್ಯದಲ್ಲಿ ಬಿಜೆಪಿ ಸರ್ಕಾರವಿದ್ದರೂ ಕಾಂಗ್ರೆಸ್​ ಜಪ: ಹೀಗೆ ವರ್ತೂರ್​ ಪ್ರಕಾಶ್​ ಬಿಜೆಪಿ ಸರ್ಕಾರದ ಅವದಿಯಲ್ಲಿ ಸಚಿವರಾಗಿ ಅಧಿಕಾರಗಳನ್ನು ಅನುಭವಿಸಿದ್ದರೂ ವರ್ತೂರ್​ ಪ್ರಕಾಶ್​ಗೆ ಮಾತ್ರ ಕಾಂಗ್ರೆಸ್ ಮೇಲಿನ ವ್ಯಾಮೋಹ ತಪ್ಪಿಲ್ಲ. 2013ರ ವಿಧಾಸಭೆ ಚುನಾವಣೆಯಲ್ಲೂ ಕಾಂಗ್ರೆಸ್ ಬಹುಮತದಿಂದ ಸರ್ಕಾರ ರಚನೆ ಮಾಡಿದಾಗಲೂ ವರ್ತೂರ್​ ಪ್ರಕಾಶ್​ ಸಿದ್ದರಾಮಯ್ಯರನ್ನೇ ಜಪಿಸುತ್ತಿದ್ದರೂ. ಆದರೆ ಸಿದ್ದರಾಮಯ್ಯರಾಗಲೀ ಕಾಂಗ್ರೆಸ್​ ಪಕ್ಷವಾಗಲೀ ಇವರನ್ನು ಹತ್ತಿರಕ್ಕೆ ಬಿಟ್ಟುಕೊಳ್ಳದೆ ದೂರವೇ ಇಟ್ಟಿತ್ತು. ಇದರಿಂದ ಬೇಸರಗೊಂಡ ವರ್ತೂರ್​ ಪ್ರಕಾಶ್​ ಕಾಂಗ್ರೆಸ್ ನಾಯಕರ ಮೇಲೆ ತಮ್ಮ ಮಾತಿನಿಂದ ಕುಟುಕುತ್ತಿದ್ದರು. ಆಗ ವರ್ತೂರ್​ ಪ್ರಕಾಶ್​ ಕಾಂಗ್ರೆಸ್​ ಹಾಗೂ ಸಿದ್ದರಾಮಯ್ಯರ ಕೆಂಗಣ್ಣಿಗೆ ಗುರಿಯಾಗಿ 2018 ವಿಧಾಸಭಾ ಚುನಾವಣೆಯಲ್ಲಿ ಸೋಲನ್ನು ಅನುಭವಿಸಿದ್ದರು.

ಗ್ರಾಮ ಪಂಚಾಯತಿಯ ಗೆದ್ದ ಅಭ್ಯರ್ಥಿಗಳ ಅಭಿನಂದನಾ ಸಮಾರಂಭದ ಧೃಶ್ಯ

ವರ್ತೂರ್​ಗೆ ಡ್ಯಾಮೇಜಿಂಗ್​ ಸ್ಟೇಟ್​ಮೆಂಟ್​ ನಿಂದಲೇ ಡ್ಯಾಮೇಜ್​ ವರ್ತೂರ್​ ಪ್ರಕಾಶ್​ ಎಂದರೆ ವಿವಾದಿತ ಹೇಳಿಕೆಗಳಿಂದಲೇ ಪ್ರಖ್ಯಾತಿ ಪಡೆದವರು. ಹೀಗಾಗಿಯೇ ಕಾಂಗ್ರೇಸ್​ನಲ್ಲಿ 150 ಕೆ.ಜಿ ತೂಕದ ನಾಯಕರು ಇರುವವರೆಗೂ ಪಕ್ಷ ಏಳಿಗೆ ಆಗಲ್ಲ, ಸಿದ್ದರಾಮಯ್ಯರನ್ನು ನಾವೇ ಬೆಳೆಸಿದ್ದು, ಅವರನ್ನು ಕುರುಬ ಸಮುದಾಯದ ನಾಯಕ ಎಂದು ಮಾಡಿದ್ದು ನಾನೇ, ರಾಜ್ಯದಲ್ಲಿ ಕುರುಬ ಸಮುದಾಯದಲ್ಲಿ ಸಿದ್ದರಾಮಯ್ಯರನ್ನು ಹೊರತು ಪಡಿಸಿದರೆ ನಾನೇ ಮುಂಚೂಣಿ ನಾಯಕ ಈ ರೀತಿ ಹೇಳಿಕೆಗಳಿಂದ ಪ್ರಮುಖ ನಾಯಕರ ಕೆಂಗಣ್ಣಿಗೆ ಗುರಿಯಾಗಿದ್ದ ವರ್ತೂರ್​ ಪ್ರಕಾಶ್​ ಕ್ರಮೇಣ ಮೂಲೆಗುಂಪಾದರು.

ಹೊಸ ಪಕ್ಷ ಕಟ್ಟಿದರು ಪ್ರಯೋಜನವಾಗಲಿಲ್ಲ: 2018ರ ವಿಧಾನಸಭೆ ಚುನಾವಣೆ ವೇಳೆಗೆ ನಮ್ಮ ಕಾಂಗ್ರೆಸ್ ಎನ್ನುವ ಹೊಸ ಪಕ್ಷವನ್ನು ಸ್ಥಾಪನೆ ಮಾಡಿದರಾದರೂ ಅದು ಹೇಳ ಹೆಸರಿಲ್ಲದಂತೆ ಹೋಗಿತ್ತು. ವಿಧಾನಸಭೆ ಚುನಾವಣೆಯಲ್ಲಿ ಆ ಪಕ್ಷದಿಂದಲೂ ಕೆಲವು ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ್ದ ವರ್ತೂರ್​ ಪ್ರಕಾಶ್​ ತನ್ನನ್ನು ಸೇರಿ ಯಾರೊಬ್ಬರೂ ನಮ್ಮ ಕಾಂಗ್ರೆಸ್​ ಎನ್ನುವ ಹೊಸ ಪಕ್ಷದಿಂದ ಆಯ್ಕೆಯಾಗಲೇ ಇಲ್ಲ.

ಸಿಎಂ BSY ರಾಜಕೀಯ ಕಾರ್ಯದರ್ಶಿ NR ಸಂತೋಷ್ ಆತ್ಮಹತ್ಯೆ ಯತ್ನ, ರಾಜಕೀಯ ಒತ್ತಡ ಎಂದ ಕುಟುಂಬಸ್ಥರು

Published On - 7:16 pm, Thu, 7 January 21