ಶೇಕಡ 33ರಷ್ಟು ಐಟಿಬಿಟಿ ಕಂಪನಿಗಳಲ್ಲಿ ಕೆಲ್ಸಕ್ಕೆ ಅವಕಾಶ, ಬೆಂಗಳೂರಿಗೆ ವಾಪಾಸಾಗಲು ಒನ್ ಸೈಡ್ ಪಾಸ್

ಬೆಂಗಳೂರು: ಅಯ್ಯೋ.. ಆಗ್ತಿಲ್ಲ ಗುರೂ.. ಕೂಂತಲ್ಲಿ ಕೂರಂಗಿಲ್ಲ.. ನಿಂತಲ್ಲಿ ನಿಲ್ಲಂಗಿಲ್ಲ.. ಮನೆಯಲ್ಲಿ ಇರೋಕೆ ಆಗ್ತಾನೆ ಇಲ್ಲ. ಟೈಂ ಅಂತೂ ಮುಂದೆ ಸಾಗ್ತಾನೆ ಇಲ್ಲ. ವರ್ಕ್​ಫ್ರಮ್​ ಹೋಮ್ ವಾರ್​​​​ನಲ್ಲಿ ಸಿಲುಕಿ ಟೆಕ್ಕಿಗಳಂತೂ ಚಕ್ಕರ್ ಹೊಡೀತಿದ್ದಾರೆ. ಕೊರೊನಾ ಎಂಟ್ರಿಗೆ ಸಿಲಿಕಾನ್​​ ಸಿಟಿಯಲ್ಲಿದ್ದ ಸಾಫ್ಟ್​ವೇರ್​​​, ಹಾರ್ಡ್​​ವೇರ್, ಐಟಿ ಸೆಕ್ಟರ್ ಕಂಪನಿಗಳಲ್ಲಿ ಕೆಲಸ ಮಾಡ್ತಿದ್ದೋರು ತಮ್ಮೂರಿನತ್ತ ಹೆಜ್ಜೆ ಹಾಕಿದ್ದೇ ಹಾಕಿದ್ದು.

ಮಾಲ್​, ಫ್ರೆಂಡ್ಸ್.. ಪಬ್​​ ಅಂತ ಬ್ಯುಸಿಯಾಗಿರುತ್ತಿದ್ದ ಐಟಿ ಉದ್ಯೋಗಿಗಳು ಲಾಕ್​​ಡೌನ್​ ಸೆರೆಮನೆವಾಸಕ್ಕೆ ಮುಕ್ತಿಯಾವಾಗಪ್ಪ ಅಂತಿದ್ರು. ವರ್ಕ್​​ಫ್ರಮ್​ ಹೋಮ್​ ಟೆನ್ಷನ್​ಗೆ ಸಿಲುಕಿದ್ದೋರಿಗೆ ರಾಜ್ಯ ಸರ್ಕಾರ ಗಿಫ್ಟ್ ನೀಡಿದೆ. ಏಪ್ರಿಲ್​ 20ರ ನಂತರ ಕೇಂದ್ರ ಸರ್ಕಾರದ ಮಾರ್ಗಸೂಚಿಯಂತೆ ರಾಜ್ಯ ಸರ್ಕಾರ ಶೇಕಡ 33ರಷ್ಟು ಐಟಿ-ಬಿಟಿ ಕಂಪನಿಗಳಲ್ಲಿ ಕೆಲ್ಸ ನಿರ್ವಹಿಸಲು ಅವಕಾಶ ಕಲ್ಪಿಸಿದೆ. ಆದ್ರೀಗ, ಊರು ಸೇರಿದ್ದ ಉದ್ಯೋಗಿಗಳು ಬೆಂಗಳೂರಿಗೆ ಮರಳಬೇಕು. ಬಸ್​ ಬೇರೆ ಇಲ್ಲ, ಕಾರು ಬೈಕ್​ಗಳನ್ನ ತಂದ್ರೆ ಪೊಲೀಸ್ರು ಕಾಟ. ಬೆಂಗಳೂರಿಗೆ ಹೇಗಪ್ಪ ಬರೋದು ಎಂಬ ತಲೆನೋವಲ್ಲಿದ್ದಾರೆ.

ಬೆಂಗಳೂರಿಗೆ ವಾಪಸ್ ಆಗೋರಿಗೆ ಒನ್​​ ವೇ ಪಾಸ್​!
ಐಟಿ ಕಂಪನಿಯಲ್ಲಿ ಕೆಲಸ ಮಾಡೋರು ಒಂದ್ಕಡೆ ಖುಷಿ ಜೊತೆ ಟೆನ್ಷನ್​​​ನಲ್ಲಿದ್ರೂ ಇದಕ್ಕೂ ಸರ್ಕಾರ ಸೆಲ್ಯೂಷನ್ ನೀಡಿದೆ. ಐಟಿ ನೌಕಕರು ಬೆಂಗಳೂರಿಗೆ ವಾಪಸ್​ ಆಗೋಕೆ ಒನ್ ಸೈಡ್ ಪಾಸ್ ವಿತರಿಸೋಕೆ ಪ್ಲ್ಯಾನ್ ಮಾಡಿದೆ. ಹಾಗಿದ್ರೆ, ಒನ್​ ಸೈಡ್ ಪಾಸ್​ ಅಂದ್ರೇನು? ಇದು ಎಲ್ಲಿ ಸಿಗುತ್ತೆ? ಏನೇನ್ ರೂಲ್ಸ್ ಇರುತ್ತೆ ಅನ್ನೋದನ್ನ ನೋಡೋದಾದ್ರೆ.

ಏನಿದು ಒನ್ ಸೈಡ್ ಪಾಸ್?
ಐಟಿ-ಬಿಟಿ ಕಪನಿಗಳಲ್ಲಿ ಕರ್ತವ್ಯ ನಿರ್ವಹಿಸುವ ನೌಕರರಿಗೆ ಪಾಸ್ ವಿತರಿಸಲಾಗುತ್ತೆ. ಅಂತರ್​​​​ ಜಿಲ್ಲಾ ಪ್ರಯಾಣ ನಿಷೇಧದ ಹಿನ್ನೆಲೆಯಲ್ಲಿ ಪಾಸ್ ವಿತರಣೆ ಮಾಡಲಾಗುತ್ತದೆ. ಐಟಿ ನೌಕರರು ಆಯಾ ಜಿಲ್ಲೆಗಳ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಪಾಸ್ ಪಡೀಬೋದಾಗಿದೆ. ಅದ್ರಲ್ಲೂ ಕೇವಲ 1 ಬಾರಿ ಮಾತ್ರ ಬೆಂಗಳೂರಿಗೆ ವಾಪಸ್​​ ಆಗಲು ಪಾಸ್ ಬಳಕೆ ಮಾಡ್ಬೋದಾಗಿದೆ. ಈ ಪಾಸ್ ಮೂಲಕ ಬೆಂಗಳೂರಿನಿಂದ ಬೇರೆಡೆ ಅಥವಾ ಅಂತರ್​ ರಾಜ್ಯ ಜಿಲ್ಲೆಗಳಿಗೆ ವಾಪಸ್ ಹೋಗೋಕೆ ಆಗಲ್ಲ. ಪಾಸ್ ಪಡೆದವರು ತಮ್ಮ ಸ್ವಂತ ಪ್ರಯಾಣದ ವ್ಯವಸ್ಥೆ ಮಾಡಿಕೊಳ್ಳಬೇಕಾಗಿದ್ದು, ಈ ಮೂಲಕ ಬೆಂಗಳೂರಿಗೆ ಬರ್ಬೋದಾಗಿದೆ.

ಒಟ್ನಲ್ಲಿ ರಾಜ್ಯದಲ್ಲಿ ಕೊರೊನಾ ಕ್ರೌರ್ಯ ಹೆಚ್ಚಾಗ್ತನೇ ಇದೆ.. ಆದ್ರೆ ಏಪ್ರಿಲ್ 20ರ ಬಳಿಕ ಐಟಿ-ಬಿಟಿ ಕಂಪನಿಗಳಿಗೆ ರಾಜ್ಯ ಸರ್ಕಾರ ವಿನಾಯಿತಿ ನೀಡಿರೋದು ಎಲ್ಲರ ನಿದ್ದೆಗೆಡಿಸಿದೆ. ಹಳ್ಳಿ ಹಳ್ಳಿಯಿಂದ ಪಾಸ್​ ಪಡೆದು ಬೆಂಗಳೂರಿಗೆ ಸಾವಿರಾರು ವಾಹನಗಳು ಬಂದ್ರೆ ಸಂಚಾರ ದಟ್ಟಣೆ ಆಗೋದು ಫಿಕ್ಸ್.. ಬೇಕಾಬಿಟ್ಟಿ ಓಡಾಡೋರನ್ನೇ ಕಂಟ್ರೋಲ್ ಮಾಡೋಕೆ ಪೊಲೀಸ್ರು ಒದ್ದಾಡ್ತಿದ್ದಾರೆ. ಆದ್ರೀಗ ಮುಂದೇನ್ ಅನಾಹುತವಾಗುತ್ತೋ ಅನ್ನೋದು ಎಲ್ರಿಗೂ ಟೆನ್ಷನ್ ಶುರುವಾಗಿದೆ. ದ್ವಿಚಕ್ರ ವಾಹನಗಳ ಓಡಾಟಕ್ಕೆ ಅವಕಾಶ ಕೊಟ್ಟು ಯೂಟರ್ನ್ ಹೊಡೆದಿರೋ ಸರ್ಕಾರ ಈ ಒನ್​​ ವೇ ಪಾಸ್​​ ವಿಚಾರದಲ್ಲಿ ಏನ್​ ಮಾಡುತ್ತೆ ಕಾದು ನೋಡ್ಬೇಕು.