ಚಿಕಿತ್ಸೆ ಸಿಗದೆ ನರಳಿ ನರಳಿ.. KSRP ಕಾನ್ಸ್​ಟೇಬಲ್ ಸಾವು, ಎಲ್ಲಿ?

ಬಾಗಲಕೋಟೆ: ಲೋ ಬಿಪಿ ಹಾಗೂ ಸಕ್ಕರೆ ಕಾಯಿಲೆಯಿಂದ ಬಳಲುತ್ತಿದ್ದ KSRP ಕಾನ್ಸ್​ಟೇಬಲ್ ಗೆ ಆಸ್ಪತ್ರೆಯಲ್ಲಿ ಕೋವಿಡ್ ವರದಿ ಇಲ್ಲ ಎಂಬ ಕಾರಣದಿಂದಾಗಿ ಬೆಡ್ ನೀಡಿಲ್ಲ. ಇದರಿಂದಾಗಿ ಕಾನ್ಸ್​ಟೇಬಲ್ ಚಿಕಿತ್ಸೆ ಸಿಗದೆ ನರಳಿ ನರಳಿ ಸಾವನ್ನಪ್ಪಿರುವ ಘಟನೆ ಬಾಗಲಕೋಟೆಯ ಕೋವಿಡ್ ಆಸ್ಪತ್ರೆಯಲ್ಲಿ ನಡೆದಿದೆ.

ಬೆಂಗಳೂರಿನಲ್ಲಿ KSRP ಸಿಬ್ಬಂದಿಯಾಗಿ ಕೆಲಸ ನಿರ್ವಹಿಸುತ್ತಿದ್ದ ಕಾನ್ಸ್​ಟೇಬಲ್, ಅನಾರೋಗ್ಯದ ಕಾರಣದಿಂದಾಗಿ ಬಾಗಲಕೋಟೆಯ ಕೋವಿಡ್ ಆಸ್ಪತ್ರೆಗೆ ಚಿಕಿತ್ಸೆಗೆಂದು ತೆರಳಿದ್ದಾರೆ. ಆದರೆ ಕೋವಿಡ್ ವರದಿ ಇಲ್ಲ ಎಂಬ ಕಾರಣ ಹೇಳಿ ಆಸ್ಪತ್ರೆಯ ವೈದ್ಯರು ಕಾನ್ಸ್​ಟೇಬಲ್ ಗೆ ಚಿಕಿತ್ಸೆ ನೀಡಲು ಹಿಂದೇಟು ಹಾಕಿದ್ದಾರೆ. ಹೀಗಾಗಿ ರಾತ್ರಿ ಒಂದು ಗಂಟೆವರೆಗೂ ಆಸ್ಪತ್ರೆಯ ಮುಂದೆ ಇರುವ ಗಣಪತಿ ದೇವಸ್ಥಾನದಲ್ಲಿಯೇ ಕಾನ್ಸ್​ಟೇಬಲ್ ನರಳುತ್ತಾ ಮಲಗಿದ್ದಾರೆ.

ಕೊನೆಗೆ ಖಾಸಗಿ ವೈದ್ಯರೊಬ್ಬರ ಹೇಳಿಕೆಯ ನಂತರ ಆಸ್ಪತ್ರೆ ಸಿಬ್ಬಂದಿ ಕಾನ್ಸ್​ಟೇಬಲ್ ಗೆ ಬೆಡ್ ವ್ಯವಸ್ಥೆ ಮಾಡಿದ್ದಾರಾದರೂ, ಯಾವುದೇ ಚಿಕಿತ್ಸೆ ನೀಡಲು ಹತ್ತಿರ ಸುಳಿಯದೆ ನಿರ್ಲಕ್ಷ ತೋರಿದ್ದಾರೆ. ಇದರಿಂದ ಮುಂಜಾನೆ 4 ಗಂಟೆವರೆಗೂ ಬೆಡ್ ಮೇಲೆ ನರಳಾಡಿದ ಕಾನ್ಸ್ಟೇಬಲ್ ಉಸಿರಾಟದ ತೊಂದರೆಯಿಂದ ಸಾವನ್ನಪ್ಪಿದ್ದಾರೆ.

ಕಾನ್ಸ್​ಟೇಬಲ್ ಸಾವಿನ ನಂತರ ವ್ಯಕ್ತಿಗೆ ಕೊರೊನಾ ಪಾಸಿಟಿವ್ ವರದಿ ಬಂದಿದೆ ಎಂದು ಹೇಳಿರುವ ವೈದ್ಯರ ವಿರುದ್ಧ ಕಾನ್ಸ್​ಟೇಬಲ್ ಪತ್ನಿ ಕಿಡಿಕಾರಿದ್ದು, ನನ್ನ ಪತಿಯ ಸಾವಿಗೆ ಆಸ್ಪತ್ರೆ ಸಿಬ್ಬಂದಿಯ ನಿರ್ಲಕ್ಷವೇ ಕಾರಣವೆಂದು ಕಣ್ಣೀರಿಟ್ಟಿದ್ದಾರೆ.