ಅಬ್ಬಾ! ಮಹಿಳೆಯರು ಎಷ್ಟೊಂದು ಶಕ್ತಿಶಾಲಿಗಳು, ನಾನೂ ಅವರಂತಾಗುತ್ತೇನೆ: ವೇಟ್ಲಿಫ್ಟಿಂಗ್ ನೋಡುತ್ತಾ ಪುಟ್ಟ ಬಾಲೆ ಕಂಡ ಕನಸಿದು
Viral Video: ಟೊಕಿಯೊದಲ್ಲಿ ನಡೆಯುತ್ತಿರುವ ಒಲಂಪಿಕ್ಸ್ ಸ್ಪರ್ಧೆಯ ಮಹಿಳಾ ವೇಟ್ಲಿಫ್ಟಿಂಗ್ ಸ್ಪರ್ಧೆಯನ್ನು ನೋಡುತ್ತಾ ಪುಟ್ಟ ಬಾಲೆಯೊಬ್ಬಳು ಮಾತನಾಡಿದ್ದಾಳೆ. ಮಹಿಳಾ ಕ್ರೀಡಾಪಟುವಿನ ಶಕ್ತಿಯನ್ನು ಕೊಂಡಾಡುತ್ತಾ, ತಾನೂ ಅವರಂತೆಯೇ ಆಗುತ್ತೇನೆ ಎಂದು ಕನಸು ಕಾಣುವ ಆಕೆ ಈಗ ನೆಟ್ಟಿಗರ ಮನ ಗೆದ್ದಿದ್ದಾಳೆ.
Updated on: Jul 29, 2021 | 3:27 PM
ಟೊಕಿಯೊ ಒಲಂಪಿಕ್ಸ್ನ ವೇಟ್ಲಿಫ್ಟಿಂಗ್ ನೋಡುತ್ತಾ ಪುಟ್ಟ ಕಂದಮ್ಮ ಒಬ್ಬಳು ಕಾಮೆಂಟರಿ ನೀಡಿದ್ದು ಈಗ ನೆಟ್ಟಿಗರ ಮನ ಗೆದ್ದಿದೆ. ಅತ್ಯಂತ ಬೆರಗಿನಿಂದ ವೇಟ್ಲಿಫ್ಟಿಂಗ್ನಲ್ಲಿ ಅಮೇರಿಕಾದ ಮಹಿಳಾ ಸ್ಪರ್ಧಿಯೋರ್ವರು ಭಾರ ಎತ್ತುವುದನ್ನು ನೋಡುತ್ತಾ ಪುಟ್ಟ ಬಾಲೆ ಹಲವು ಮಾತುಗಳನ್ನು ಮುದ್ದಾಗಿ ಹೇಳಿದ್ದಾಳೆ. ‘ಅಬ್ಬಾ, ಮಹಿಳೆಯರು ಎಷ್ಟೊಂದು ಶಕ್ತಿಶಾಲಿ, ಎಷ್ಟು ತೂಕವನ್ನು ಅವರು ಎತ್ತುತ್ತಾರೆ. ನಾನೂ ದೊಡ್ಡವಳಾದ ಮೇಲೆ ಅವರ ರೀತಿಯೇ ಆಗುತ್ತೇನೆ. ಬಹಳ ಬಲಶಾಲಿಯಾಗುತ್ತೇನೆ’ ಎಂದು ಪುಟ್ಟ ಬಾಲೆ ಕನಸನ್ನು ಕಂಡಿದ್ದಾಳೆ.
ತನ್ನ ತಂದೆಯ ಜೊತೆ ಕುಳಿತುಕೊಂಡು ಟಿವಿಯಲ್ಲಿ ಪಂದ್ಯ ನೋಡುತ್ತಿದ್ದ ಬಾಲೆ, ತಾನು ದೊಡ್ಡವಳಾಗಿ ಬಲಶಾಲಿಯಾದಾಗ ಅಲ್ಲಿ ಹೋಗುತ್ತೇನೆ ಎಂದೂ ಹೇಳುತ್ತಾಳೆ. ಕೊನೆಗೆ ಅವಳ ಇಷ್ಟದ ವೇಟ್ಲಿಫ್ಟರ್ ಗೆದ್ದ ತಕ್ಷಣ ‘ಅವಳು ಗೆದ್ದಳು, ಅವಳು ಗೆದ್ದಳು!’(She’s the winner! She’s the winner) ಎನ್ನುತ್ತಾ ಕುಣಿದು ಕುಪ್ಪಳಿಸಿದ್ದಾಳೆ. ಮೂಲದಲ್ಲಿ ಟಿಕ್ಟಾಕ್ನಲ್ಲಿ ಅಪ್ಲೋಡ್ ಆಗಿರುವ ಈ ವಿಡಿಯೊ ಎಲ್ಲೆಡೆ ಜನಪ್ರಿಯವಾಗುತ್ತಿದ್ದು, ಈಗ ಟ್ವಿಟರ್ನಲ್ಲೂ ಹಂಚಿಕೊಳ್ಳಲಾಗಿದೆ. ಕ್ರೀಡೆಗಳನ್ನು ನಿಮ್ಮ ಮಕ್ಕಳೊಂದಿಗೆ ಏಕೆ ನೋಡಬೇಕು ಎಂಬ ಪ್ರಶ್ನೆಯಿದ್ದರೆ ದಯವಿಟ್ಟು ಈ ವಿಡಿಯೊ ನೋಡಿ ಎಂದು ಬರೆದುಕೊಂಡು ಎಲಿಜಬೆತ್ ಓಯ್ಲರ್ ಎಂಬ ಕೋಚ್ ಒಬ್ಬರು ಮೈಕ್ರೊ ಬ್ಲಾಗಿಂಗ್ ತಾಣ ಟ್ವಿಟರ್ನಲ್ಲಿ ಈ ವಿಡಿಯೊ ಹಂಚಿಕೊಂಡಿದ್ದಾರೆ.
ಟ್ವಿಟರ್ನಲ್ಲಿ ಹಂಚಿಕೊಳ್ಳಲಾದ ವಿಡಿಯೊ ಇಲ್ಲಿದೆ:
Why you should watch the Olympics with your kids… pic.twitter.com/OCuZS0aMbU
— Elisabeth Oehler (@eo_performance) July 25, 2021
ವಿಡಿಯೊದ ಕಾಮೆಂಟ್ ಸೆಕ್ಷನ್ ಜನರ ಮೆಚ್ಚುಗೆಯಿಂದ ತುಂಬಿ ಹೋಗಿದ್ದು, ಪುಟ್ಟ ಬಾಲೆಯಿಂದ ಇನ್ನಷ್ಟು ಕಾಮೆಂಟರಿ ನೀಡುವ ವಿಡಿಯೊ ಬಿಡುಗಡೆ ಮಾಡಿ ಎಂದು ಕೋರಿಕೆ ಸಲ್ಲಿಸಿದ್ಧಾರೆ. ಕೆಲವರು ಆಕೆ ವೇಟ್ಲಿಫ್ಟಿಂಗ್ಗೆ ಹೀಗೆ ಕಾಮೆಂಟ್ ಕೊಡುವುದಾದರೆ- ಇನ್ನು ಜಿಮ್ನಾಸ್ಟಿಕ್ಸ್ ಅಥವಾ ಓಟದ ಸ್ಪರ್ಧೆಗಳಿಗೆ ಹೇಗೆ ಪ್ರತಿಕ್ರಿಯಿಸಬಹುದು ಎಂದು ಕುತೂಹಲ ವ್ಯಕ್ತಪಡಿಸಿದ್ದಾರೆ.
ಕೆಲವು ದಿನಗಳ ಹಿಂದೆ ಭಾರತದ ವೇಟ್ಲಿಫ್ಟರ್ ಸತೀಶ್ ಶಿವಲಿಂಗಮ್ ಅವರ ಪುತ್ರಿ ಒಲಂಪಿಕ್ಸ್ನಲ್ಲಿ ಬೆಳ್ಳಿ ಪದಕ ಗೆದ್ದ ಮೀರಾಬಾಯಿ ಚಾನು ಅವರನ್ನು ಅನುಕರಿಸಿ ‘ಜೂನಿಯರ್ ಮೀರಾಬಾಯಿ ಚಾನು’ ಎಂದು ಸುದ್ದಿಯಾಗಿದ್ದರು.
ಇದನ್ನೂ ಓದಿ: Viral Video: ಬಾಟಲಿಯಲ್ಲಿ ಹಾಲು ಕುಡಿಯುತ್ತಾ, ಮಣ್ಣಿನಲ್ಲಿ ಹೊರಳಾಡುತ್ತಿದೆ ಖಡ್ಗಮೃಗ; ಕ್ಯೂಟ್ ವಿಡಿಯೋ ವೈರಲ್
ಇದನ್ನೂ ಓದಿ: Viral Video: ಯಮಹಾ ಬೈಕ್ ಓಡಿಸಿ ಕ್ಯಾಮರಾಕ್ಕೆ ಪೋಸ್ ಕೊಟ್ಟ ವೃದ್ದೆ! ಯುವಕರೆಲ್ಲಾ ಬೆರಗಾಗುವ ವಿಡಿಯೋವಿದು
(Little girl cute reaction while watching the women weightlifting competition of Tokyo Olympics got netizens love)
