ಶಿವಸೇನೆಗೆ ಸೇರಿದ ಒಂದೇ ತಾಸಿನಲ್ಲಿ ವಿಧಾನ ಪರಿಷತ್​ ಸದಸ್ಯೆಯಾದ ಊರ್ಮಿಳಾ ಮಾತೋಂಡ್ಕರ್

ಮುಂಬೈ: ಕಳೆದ ವರ್ಷದ ಲೋಕಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್​ನಿಂದ ಸ್ಪರ್ಧಿಸಿ ಹೀನಾಯವಾಗಿ ಸೋತಿದ್ದ ಊರ್ಮಿಳಾ ಮಾತೋಂಡ್ಕರ್​ ಇಂದು ಶಿವಸೇನೆ ಸೇರಿಕೊಂಡಿದ್ದಾರೆ. ವಿಶೇಷವೆಂದರೆ ಶಿವಸೇನೆಗೆ ಸೇರಿದ ಒಂದು ತಾಸಿನಲ್ಲೇ ಅವರನ್ನು ಮಹಾರಾಷ್ಟ್ರ ವಿಧಾನ ಪರಿಷತ್​​ ಸದಸ್ಯರನ್ನಾಗಿಸಿ ನಾಮನಿರ್ದೇಶನ ಮಾಡಲಾಗಿದೆ.

ಪಕ್ಷದ ಮುಖ್ಯಸ್ಥ ಹಾಗೂ ಮಹಾರಾಷ್ಟ್ರ ಮುಖ್ಯಮಂತ್ರಿ ಉದ್ಧವ್​ ಠಾಕ್ರೆ ನೇತೃತ್ವದಲ್ಲಿ ಊರ್ಮಿಳಾರನ್ನು ಪಕ್ಷಕ್ಕೆ ಸೇರಿಸಿಕೊಳ್ಳಲಾಯಿತು. ಈ ಸಂದರ್ಭದಲ್ಲಿ ಉದ್ಧವ್​ ಠಾಕ್ರೆ ಪತ್ನಿ ರಶ್ಮಿ ಠಾಕ್ರೆ ಮಾತೋಂಡ್ಕರ್ ಕೈಗೆ ಶಿವ ಬಂಧನ್​ ಕಟ್ಟಿ ಶಿವಸೇನೆಗೆ ಬರಮಾಡಿಕೊಂಡರು.

ಊರ್ಮಿಳಾ ಮಾತೋಂಡ್ಕರ್​ ಶಿವಸೇನೆ ಸೇರುವುದು ನಿಶ್ಚಿತವಾಗಿತ್ತಾದರೂ ಪಕ್ಷಕ್ಕೆ ಸೇರಿದ ಕೂಡಲೇ ವಿಧಾನ ಪರಿಷತ್​​ ಸದಸ್ಯೆ ಸ್ಥಾನಕ್ಕೆ ನಾಮಿನೇಟ್ ಮಾಡಿರುವ ಶಿವಸೇನೆಯ ನಡೆ ರಾಜಕೀಯ ವಲಯದಲ್ಲಿ ಅಚ್ಚರಿ ಮೂಡಿಸಿದೆ.