ಮಂಗಳವಾರ ರಾತ್ರಿ 8 ಗಂಟೆಯಿಂದ ಸ್ತಬ್ಧವಾಗಲಿದೆ ರಾಜಧಾನಿ

ಬೆಂಗಳೂರು: ಸರ್ಕಾರದ ಅಂದಾಜಿಗೆ ಸಿಗಲಿಲ್ಲ. ತಜ್ಞರ ಮಾತು ಸುಳ್ಳಾಗಲಿಲ್ಲ. ಕೊರೊನಾ ಹೆಮ್ಮಾರಿ ರಾಜಧಾನಿಯನ್ನ ಸಂಪೂರ್ಣ ಆವರಿಸಿಕೊಂಡಿದೆ. ಕೊರೊನಾದ ಈ ಉಡದ ಪಟ್ಟಿನಿಂದ ಬಿಡಿಸಿಕೊಳ್ಳಲು ಸರ್ಕಾರ ಲಾಕ್‌ಡೌನ್‌ ದಾಳ ಹಾಕಿದೆ.

ನಾಳೆ ರಾತ್ರಿ 8ಗಂಟೆಯಿಂದಲೇ ಒಂದು ವಾರ ಬೆಂಗಳೂರು ನಗರ ಮತ್ತು ಬೆಂಗಳೂರು ಗ್ರಾಮಾಂತರ ಜಿಲ್ಲೆಗಳು ಸಂಪೂರ್ಣ ಶಟ್‌ಡೌನ್‌ ಆಗಲಿದೆ. ಆದ್ರೆ, ಈ ಲಾಕ್‌ಡೌನ್‌ ವೇಳೆಯಲ್ಲೇ ಹುಟ್ಟಿಕೊಂಡಿರುವ ಮತ್ತೊಂದು ಯಕ್ಷಪ್ರಶ್ನೆ ಎಂದ್ರೆ ಲಾಕ್‌ಡೌನ್‌ ಒಂದು ವಾರನಾ? ಒಂದು ತಿಂಗಳಾ? ಅನ್ನೋದು?

7 ದಿನದ ಲಾಕ್‌ಡೌನಾ..? 1 ತಿಂಗಳು ಬಂದ್‌ ಆಗುತ್ತಾ..?
ಇಂಥದ್ದೊಂದು ಪ್ರಶ್ನೆ ಜನಸಾಮಾನ್ಯರಲ್ಲಿ ಕೇಳಿಬರ್ತಿರೋ ಗಾಳಿಮಾತಲ್ಲ. ಯಾರೋ ತೇಲಿಬಿಟ್ಟ ವಿಷಯವಲ್ಲ. ಇಂಥಾ ಅನುಮಾನ ಹುಟ್ಟೋಕೆ ಖುದ್ದು ಸಚಿವರೇ ಹೇಳಿರೋ ಮಾತುಗಳು.

ಈಗ 7 ದಿನ ಲಾಕ್‌ಡೌನ್‌ ಮಾಡ್ತಿದ್ದೇವೆ. ಅದನ್ನ ವಿಸ್ತರಿಸುವ ಬಗ್ಗೆ ತಜ್ಞರ ವರದಿ ನೋಡ್ತೀವಿ ಅಂತಿದ್ದಾರೆ ಸಚಿವ ಸುಧಾಕರ್‌. ಸುದೀರ್ಘವಾದ ಹೋರಾಟ ಎನ್ನುತ್ತಲೇ, ಮತ್ತಷ್ಟು ದಿನ ಲಾಕ್‌ಡೌನ್‌ ವಿಸ್ತರಿಸಬೇಕಾಗಬಹುದು ಎಂಬ ಸಂಶಯ ಹುಟ್ಟುಹಾಕಿದ್ದಾರೆ. ಹೀಗಾಗೇ, ಈ ಲಾಕ್​ಡೌನ್ ಕೇವಲ ಒಂದು ವಾರಕ್ಕಲ್ಲ, ಅದಕ್ಕೂ ಹೆಚ್ಚಿಗೆ ಆಗುತ್ತೆ ಅನ್ನೋ ಅನುಮಾನ ಎದ್ದಿವೆ. ಒಂದು ವೇಳೆ ಇದೇ ಅಂದಾಜು ನಿಜವಾದ್ರೆ, ಎಷ್ಟು ದಿನ ಲಾಕ್​ಡೌನ್ ಆಗಬಹುದು. ಸರ್ಕಾರ ಏನ್ ಮಾಡ್ಬಹುದು ಅನ್ನೋ ವಿವರ ಹೇಳ್ತೀವಿ ನೋಡಿ.

ಒಂದು ತಿಂಗಳು ಲಾಕ್​ಡೌನ್..?
ವೈದ್ಯಕೀಯ ವ್ಯವಸ್ಥೆ ಮಾಡಿಕೊಳ್ಳಲು ಹಾಗೂ ಕೊರೊನಾ ವ್ಯಾಪಿಸೋದಕ್ಕೆ ಬ್ರೇಕ್ ಹಾಕಲು ಸದ್ಯ ಒಂದು ವಾರದ ಲಾಕ್​ಡೌನ್ ಜಾರಿ ಮಾಡಿದೆ. ಒಂದು ವಾರದ ಲಾಕ್​ಡೌನ್ ಫಲಿತಾಂಶ ಮುಂದಿನ ವಾರ ಗೊತ್ತಾಗುತ್ತೆ. ಅಂದ್ರೆ ಬೆಂಗಳೂರಿನಲ್ಲಿ ಕೊರೊನಾ ವ್ಯಾಪಿಸುವ ವೇಗ ತಗ್ಗಿದ್ಯಾ, ಇಲ್ವಾ ಅನ್ನೋದು ಅಂದಾಜಿಗೆ ಸಿಗಲಿದೆ.

ಸರ್ಕಾರ ಈ ಒಂದು ವಾರದಲ್ಲಿ ಬೆಂಗಳೂರಿನಲ್ಲಿ ಎಷ್ಟು ಪ್ರಮಾಣದಲ್ಲಿ ಕೊರೊನಾ ಕಂಟ್ರೋಲ್​ಗೆ ಬಂತು ಅನ್ನೋ ಡೇಟಾ ಸಂಗ್ರಹಿಸುತ್ತೆ. ಈ ಅವಧಿಯಲ್ಲಿ ಕೊರೊನಾ ಸ್ವಲ್ಪನಿಯಂತ್ರಣಕ್ಕೆ ಬಂದ್ರೆ ಲಾಕ್‌ಡೌನ್‌ ಮುಂದುವರಿಸುವ ಸಾಧ್ಯತೆಯಿದೆ. ಅಂದ್ರೆ ಸೋಂಕಿನ ಗ್ರಾಫ್‌ ಇಳಿಸಲು ಒಂದು ವಾರದ ಲಾಕ್​ಡೌನ್ ಅನ್ನ ಎರಡು ವಾರಕ್ಕೆ ಅಥವಾ 15 ದಿನಕ್ಕೆ ವಿಸ್ತರಿಸೋ ಸಾಧ್ಯತೆ ತಳ್ಳಿಹಾಕುವಂತಿಲ್ಲ. ಇಲ್ಲದಿದ್ರೆ, ಕಂಪ್ಲೀಟ್ ಒಂದು ತಿಂಗಳು ಲಾಕ್​ಡೌನ್ ಮಾಡಬಹುದು.

ಒಟ್ನಲ್ಲಿ, ಸರ್ಕಾರ ಏನೇ ಮಾಡಿದ್ರೂ, ಏನೇ ನಿರ್ಧಾರ ತೆಗೆದುಕೊಂಡು ತಜ್ಞರ ವರದಿಯನ್ನ ಆಧರಿಸಿಯೇ ಮುಂದಿನ ಹೆಜ್ಜೆ ಇಡಬೇಕಾಗಿದೆ.. ಈ ಹಿಂದೆ ಮಾಡಿದ ತಪ್ಪನ್ನ ಈಗ ಮಾಡದಿರಲು ಸರ್ಕಾರವೂ ತೀರ್ಮಾನಿಸಿದೆ. ಹೀಗಾಗಿ, ಬೆಂಗಳೂರಿನಲ್ಲಿ ಒಂದು ವಾರವಷ್ಟೇ ಅಲ್ಲ ಒಂದು ವಾರದ ಬಳಿಕವೂ ಲಾಕ್​ಡೌನ್ ಮುಂದುವರಿದ್ರೆ ಅಚ್ಚರಿಯಿಲ್ಲ.