ಅನಿಲ್​ ಅಂಬಾನಿಯ RCom ಸಮೂಹವು ಬ್ಯಾಂಕುಗಳಿಗೆ ಕಟ್ಟಬೇಕಿದೆ 49 ಸಾವಿರ ಕೋಟಿ ರೂ ಸಾಲ! ಆದ್ರೆ..

ಇತ್ತೀಚೆಗೆ ಏಷ್ಯಾದ ಅತ್ಯಧಿಕ ಧನಿಕ ಪಟ್ಟದಿಂದ ಕೆಳಗಿಳಿದ ರಿಲಯನ್ಸ್​ ಕಂಪನಿಯ ಸಾಮ್ರಾಟ ಮುಕೇಶ್ ಅಂಬಾನಿ ಅವರ ಸೋದರ ದಿವಾಳಿಯೆದ್ದು ಯಾವುದೋ ಕಾಲವಾಗಿದೆ. ಅಪ್ಪ ಧೀರೂ ಭಾಯಿ ಅಂಬಾನಿ ಚಾಣಾಕ್ಯತನ ರೂಢಿಸಿಕೊಳ್ಳದ ಅನಿಲ್ ಅಂಬಾನಿ ಸಹಜವಾಗಿಯೇ ತನ್ನ ಅಣ್ಣನಂತೆ ಸಾಮ್ರಾಜ್ಯ ಕಟ್ಟುವಲ್ಲಿ ಯಶಸ್ವಿಯಾಗಲಿಲ್ಲ. ತತ್ಫಲವಾಗಿ ಈಗ ಅನಿಲ್ ಅಂಬಾನಿ ನೇತೃತ್ವದ Reliance Communications ಸಾರ್ವಜನಿಕ ಬ್ಯಾಂಕುಗಳಿಗೆ 49 ಸಾವಿರ ಕೋಟಿ ರೂ ಸಾಲ ಮರುಪಾವತಿಸಲು ಪರದಾಡುವಂತಾಗಿದೆ. ಸಾರ್ವಜನಿಕ ಹಣಕಾಸು ಸಂಸ್ಥೆಗಳಿಗೆ ಪೈಸೆ ಪೈಸೆ ಕಟ್ಟಲು ಹರಸಾಹಸ ಪಡುತ್ತಿದ್ದಾರೆ. ಈ ಮಧ್ಯೆ ನಿಜಕ್ಕೂ ಲುಕ್ಸಾನು ಅನುಭವಿಸುತ್ತಿರುವುದು ಈ ಹಣಕಾಸು ಸಂಸ್ಥೆಗಳೇ ಎಂಬುದು ದಿಟ.

ಅನಿಲ್ ಅಂಬಾನಿ ನೇತೃತ್ವದ ಕಂಪನಿಗಳಿಗೆ ಅಪಾರ ಸಾಲ ನೀಡಿ, ಹಗ್ಗ ಕೊಟ್ಟು ಕೈ ಕಟ್ಟಿಸಿಕೊಂಡಂತಾಗಿದೆ ಈ ಹಣಕಾಸು ಸಂಸ್ಥೆಗಳ ಇಂದಿನ ಪರಿಸ್ಥಿತಿ. ಈ ಹಣಕಾಸು ಸಂಸ್ಥೆಗಳು ಒಗ್ಗೂಡಿ, ಬಿಡುಗಡೆ ಮಾಡಿರುವ ವರದಿಯ ಪ್ರಕಾರ RCom ಸಮೂಹ 49 ಸಾವಿರ ಕೋಟಿ ರೂ ಸಾಲ ಮರುಪಾವತಿಸಬೇಕಿದೆ.

ಈ ಹಣಕಾಸು ಸಂಸ್ಥೆಗಳು ಈಗ ನ್ಯಾಷನಲ್ ಕಂಪನಿ ಲಾ ಟ್ರೈಬ್ಯುನಲ್ (NCLT) ಎದುರು ತಮ್ಮ ಅಹವಾಲನ್ನು ಸಲ್ಲಿಸಿದ್ದು, Reliance Telecom ವತಿಯಿಂದ 49,000 ಕೋಟಿ ರೂ ಮತ್ತು Reliance Infratel ವತಿಯಿಂದ 12,000 ಕೋಟಿ ರೂ ಸಾಲ ಮರುಪಾವತಿಯಾಗಬೇಕಿದೆ. ಇದು ವಂಚನೆಯ ಪ್ರಕರಣ ಎಂದು ಅಲವತ್ತುಕೊಂಡಿವೆ.

ಆದರೆ Rcom ಹೇಳುವುದೇ ಬೇರೆ. ಅದರ ವಾದವೇ ಬೇರೆಯಾಗಿದೆ. NCLT ನ್ಯಾಯಾಧಿಕರಣದ ಎದುರು ತಮ್ಮ ವಿರುದ್ಧ ಹಣಕಾಸು ಸಂಸ್ಥೆಗಳು ಸಲ್ಲಿಸಿರುವ ಆರೋಪ ಸತ್ಯಕ್ಕೆ ದೂರವಾಗಿದೆ. ತಾನು ಅಷ್ಟೊಂದು ದೊಡ್ಡ ಮೊತ್ತದ ಸಾಲ ಕಟ್ಟುವ ಜರೂರತ್ತು ಇಲ್ಲ. ಅಷ್ಟೊಂದು ಭಾರೀ ಪ್ರಮಾಣದಲ್ಲಿ ತಾನು ಸಾಲ ಮರುಪಾವತಿಸುವ ಅವಶ್ಯಕತೆಯಿಲ್ಲ. ತಾನು ಯಾವುದೇ ವಂಚನೆ ಎಸಗಿಲ್ಲ. ಕೇವಲ 26 ಸಾವಿರ ಕೋಟಿ ರೂ ಮರುಪಾವತಿ ಮಾಡಬೇಕಿದೆ ಅಷ್ಟೇ ಎಂದು ವಾದಿಸಿದೆ.

ಕುತೂಹಲಕಾರಿ ಸಂಗತಿಯೆಂದರೆ ದೆಹಲಿ ಹೈಕೋರ್ಟ್​ ಸಹ Rcom ವಾದಕ್ಕೆ ಮನ್ನಣೆ ನೀಡಿದೆ. ಸದ್ಯಕ್ಕೆ Rcom ವಿರುದ್ಧ ಯಾವುದೇ ಕ್ರಮ ಜರುಗಿಸದಂತೆ ಸೂಚಿಸಿದೆ. ಇದರ ಮಧ್ಯೆ ಸಾಲ ನೀಡಿರುವ ಹಣಕಾಸು ಸಂಸ್ಥೆಗಳ ಜೊತೆ Rcom ಮಾತುಕತೆ ನಡೆಸುತ್ತಿದ್ದು, ತಾನು ಪಡೆದಿರುವ ಸಾಲದ ಮೇಲಿನ ಶೇ. 70 ರಷ್ಟು ಮೊತ್ತವನ್ನಷ್ಟೇ ಮರುಪಾವತಿಸಬೇಕಿದೆ ಎಂದು ಹೇಳುತ್ತಾ ಬಂದಿದೆ. ಅಂತಿಮವಾಗಿ.. ದಿವಾಳಿಯೆದ್ದ ಅನಿಲ್ ಅಂಬಾನಿ ನೇತೃತ್ವದ Rcom ಸಮೂಹದಿಂದ ಎಷ್ಟರ ಮಟ್ಟಿಗೆ ಸಾಲ ಮರುಪಾವತಿಯಾಗಲಿದೆ ಎಂಬುದಷ್ಟೇ ಜನರ ಸದ್ಯದ ಕುತೂಹಲವಾಗಿದೆ.