ಕಾಫಿ ಟೀ ಜೊತೆಗೆ ಬೆಸ್ಟ್ ಕಾಂಬಿನೇಶನ್ ಚಿಕನ್ ಈರುಳ್ಳಿ ಪಕೋಡ, ಇಲ್ಲಿದೆ ಸಿಂಪಲ್ ರೆಸಿಪಿ
ಸಂಜೆಯ ಕಾಫಿ ಟೀಗೆ ಏನಾದ್ರೂ ಸ್ನಾಕ್ಸ್ ಇದ್ದರೆ ಅದರ ಮಜಾನೇ ಬೇರೆ. ಈ ಹವಾಮಾನ ಬದಲಾವಣೆಯಿಂದಾಗಿ ಸಂಜೆಯ ಹೊತ್ತಿನಲ್ಲಿ ಏನಾದರೂ ತಿನ್ನುವ ಬಯಕೆಯು ಸಹಜವಾಗಿಯೇ ಆಗುತ್ತದೆ. ಹೀಗಾಗಿ ಬಿಸಿ ಬಿಸಿಯಾಗಿ ಏನಾದರೂ ಮಾಡಿಕೊಂಡು ತಿಂದು ಬಿಟ್ಟರೆ, ಬಾಯಿಗೆ ಮಾತ್ರವಲ್ಲ ಮನಸ್ಸಿಗೂ ಆನಂದ. ಈ ಚಳಿಗಾಲದಲ್ಲಿ ಸಂಜೆ ಕಾಫಿ ಜೊತೆಗೆ ಏನಾದರೂ ತಿನ್ನೋಣ ಎಂದುಕೊಂಡವರು ಚಿಕನ್ ಈರುಳ್ಳಿ ಪಕೋಡವನ್ನು ಮಾಡಿ ಸವಿಯಬಹುದು. ಸಿಂಪಲ್ ರೆಸಿಪಿಯ ಕಂಪ್ಲೀಟ್ ಡೀಟೇಲ್ಸ್ ಇಲ್ಲಿದೆ.
ಈರುಳ್ಳಿ ಪಕೋಡ ಅಥವಾ ಈರುಳ್ಳಿ ಪಕೋರವನ್ನು ಕೇಳಿರಬಹುದು. ಮಳೆಗಾಲವಿರಲಿ, ಚಳಿಗಾಲವಿರಲಿ ಈಗಾಗಲೇ ಈ ಈರುಳ್ಳಿ ಪಕೋಡವನ್ನು ಮನೆಯಲ್ಲಿ ಮಾಡಿ ಸವಿದಿದ್ದೀರಿ. ಆದರೆ ಸಂಜೆ ಕಾಫಿಗೆ ಬಿಸಿ ಬಿಸಿಯಾಗಿ ಏನಾದರೂ ತಿನ್ನುವ ಅನಿಸಿದರೆ ಚಿಕನ್ ಈರುಳ್ಳಿ ಪಕೋಡ ಟ್ರೈ ಮಾಡಬಹುದು. ಮನೆಯಲ್ಲಿಯೇ ಇರುವ ಸಾಮಗ್ರಿಗಳಿಂದ ಈ ಸಿಂಪಲ್ ಚಿಕನ್ ಈರುಳ್ಳಿ ಪಕೋಡವನ್ನು ಸುಲಭವಾಗಿ ಮಾಡಿ ಸವಿಯಬಹುದು.
ಬೇಕಾಗುವ ಸಾಮಾಗ್ರಿಗಳು:
200 ಗ್ರಾಂ ನಷ್ಟು ಚಿಕನ್ (ಬೋನ್ಲೆಸ್), 100 ಗ್ರಾಂನಷ್ಟು ಸಣ್ಣದಾಗಿ ಕತ್ತರಿಸಿದ ಈರುಳ್ಳಿ ರಿಂಗ್ಗಳು, ಕತ್ತರಿಸಿದ ನಾಲ್ಕು ಹಸಿಮೆಣಸು, 2 ಎಸಳು ಕೊತ್ತಂಬರಿ ಸೊಪ್ಪು, ಒಂದು ಕಪ್ ನಷ್ಟು ಕಡಲೆ ಹಿಟ್ಟು, ಒಂದು ಚಮಚ ಕಬಾಬ್ ಮಸಾಲಾ, ಅರ್ಧ ಚಮಚ ಫೆನ್ನಲ್ ಬೀಜಗಳು, ರುಚಿಗೆ ತಕ್ಕಷ್ಟು ಉಪ್ಪು, ಮೂರು ಕಪ್ ಎಣ್ಣೆ.
ಇದನ್ನೂ ಓದಿ: ಸಂಜೆ ಬಿಸಿ ಬಿಸಿಯಾಗಿ ಏನಾದರೂ ತಿನ್ನಬೇಕಾ? ಹಾಗಾದರೆ ಪಾಲಕ್ ಪಕೋಡ ಉತ್ತಮ
ಚಿಕನ್ ಈರುಳ್ಳಿ ಪಕೋಡ ಮಾಡುವ ವಿಧಾನ:
* ಕಡಲೆಹಿಟ್ಟನ್ನು ನೀರು, ಉಪ್ಪು ಹಾಗೂ ಕಬಾಬ್ ಮಸಾಲಾದೊಂದಿಗೆ ಚೆನ್ನಾಗಿ ಮಿಶ್ರಣ ಮಾಡಿಟ್ಟುಕೊಳ್ಳಬೇಕು.
* ಈ ಮಿಶ್ರಣಕ್ಕೆ ಹಸಿಮೆಣಸು, ಫೆನ್ನಲ್ ಬೀಜ ಹಾಗೂ ಕೊತ್ತಂಬರಿ ಸೊಪ್ಪನ್ನು ಹಾಕಿ ಮಿಕ್ಸ್ ಮಾಡಿ.
* ಕೊನೆಯದಾಗಿ ಚಿಕನ್ ತುಂಡುಗಳು ಹಾಗೂ ಈರುಳ್ಳಿ ರಿಂಗ್ ಅನ್ನು ಕಡಲೆ ಹಿಟ್ಟಿಗೆ ಹಾಕಿ ಕಲಸಿಕೊಂಡು ಸ್ವಲ್ಪ ಹೊತ್ತು ಹಾಗೆ ಬಿಡಿ.
* ಇನ್ನೊಂದೆಡೆ ಸ್ಟವ್ ನಲ್ಲಿ ಬಾಣಲೆ ಇಟ್ಟು, ಅದಕ್ಕೆ ಎಣ್ಣೆ ಹಾಕಿ ಅದನ್ನು ಬಿಸಿಯಾಗಲು ಬಿಡಿ.
* ಎಣ್ಣೆ ಕಾದಂತೆ ಹಿಟ್ಟಿನಲ್ಲಿ ಮಿಕ್ಸ್ ಆಗಿರುವ ಚಿಕನ್ ತುಂಡುಗಳು ಮತ್ತು ಈರುಳ್ಳಿ ರಿಂಗ್ ಅನ್ನು ಎಣ್ಣೆಯಲ್ಲಿ ಬಿಡಿ.
* ಪಕೋಡಾವು ಚಿನ್ನ ಮಿಶ್ರಿತ ಕಂದು ಬಣ್ಣಕ್ಕೆ ತಿರುಗುವವರೆಗೆ ಎಣ್ಣೆಯಲ್ಲಿ ತಿವಿರಿ ಹಾಕುತ್ತಾ ಇರಿ. ಕಂದು ಬಣ್ಣಕ್ಕೆ ತಿರುಗಿದ ಬಳಿಕ ಎಣ್ಣೆಯಿಂದ ತೆಗೆದು, ಸಂಜೆಯ ಕಾಫಿ ಅಥವಾ ಟೀಯೊಂದಿಗೆ ಸವಿಯಿರಿ.
ಜೀವನಶೈಲಿಗೆ ಸಂಬಂಧಿಸಿದ ಇನ್ನಷ್ಟು ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ: