World Television Day 2022: ವ್ಯಕ್ತಿಯ ಜೀವನದಲ್ಲಿ ನಿರ್ಣಾಯಕ ಪಾತ್ರ ವಹಿಸುವ ದೂರದರ್ಶನಕ್ಕೂ ಒಂದು ದಿನ; ಅದರ ಇತಿಹಾಸ, ಮಹತ್ವ ಇಲ್ಲಿದೆ

ವಿಶ್ವ ದೂರದರ್ಶನ ದಿನ (World Television Day 2022)ವನ್ನು ಪ್ರತಿ ವರ್ಷ ನವೆಂಬರ್ 21 ಆಚರಿಸಲಾಗುತ್ತದೆ. ಇದು ನಮ್ಮ ಜೀವನದಲ್ಲಿ ದೂರದರ್ಶನ (Television)ದ ಮೌಲ್ಯ ಮತ್ತು ಪ್ರಭಾವವನ್ನು ಗುರುತಿಸುವ ದಿನವಾಗಿದೆ. ದೂರದರ್ಶನವು ಸಮಾಜದಲ್ಲಿ ಮತ್ತು ವ್ಯಕ್ತಿಯ ಜೀವನದಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸುತ್ತದೆ. ಅಲ್ಲದೆ, ದೂರದರ್ಶನದ ಆವಿಷ್ಕಾರ (Invention of television)ವು ಜಗತ್ತನ್ನು ಕ್ರಾಂತಿಗೊಳಿಸುವುದರ ಜೊತೆಗೆ ಮನರಂಜನೆ, ಶಿಕ್ಷಣ, ದೂರದ ಸುದ್ದಿ ಮತ್ತು ರಾಜಕೀಯ ಚಟುವಟಿಕೆಗಳ ಬಗ್ಗೆ ಮಾಹಿತಿಯನ್ನು ಪಡೆಯುವ ಸಮೂಹ ಸಂವಹನದ ಪ್ರಬಲ ಮಾಧ್ಯಮವಾಗಿ ಬೆಳೆದುನಿಂತಿದೆ. ಈ ಮಹತ್ವದ ದಿನದಂದು ಪ್ರತಿಯೊಬ್ಬರು ದೂರದರ್ಶನ ದಿನದ ಇತಿಹಾಸ ಮತ್ತು ಸತ್ಯಗಳನ್ನು ತಿಳಿದುಕೊಳ್ಳುವುದು ಮುಖ್ಯವಾಗಿದೆ.

ವಿಶ್ವ ದೂರದರ್ಶನ ದಿನದ ಇತಿಹಾಸ ಮತ್ತು ಮಹತ್ವ (World Television Day History and Significance)

1927 ರಲ್ಲಿ ಅಮೇರಿಕನ್ ಸಂಶೋಧಕ ಫಿಲೋ ಟೇಲರ್ ಫಾರ್ನ್ಸ್ವರ್ತ್ ವಿಶ್ವದ ಮೊದಲ ಎಲೆಕ್ಟ್ರಾನಿಕ್ ದೂರದರ್ಶನವನ್ನು ಕಂಡುಹಿಡಿದರು. ಒಂದು ವರ್ಷದ ನಂತರ ಚಾರ್ಲ್ಸ್ ಫ್ರಾನ್ಸಿಸ್ ಜೆಂಕಿನ್ಸ್ ರಚಿಸಿದ ಮೊದಲ ಮೆಕ್ಯಾನಿಕಲ್ ಟಿವಿ ಸ್ಟೇಷನ್ W3XK ತನ್ನ ಮೊದಲ ಪ್ರಸಾರವನ್ನು ಪ್ರಸಾರ ಮಾಡಿತು. ಇದು ಮಾಹಿತಿಯನ್ನು ತಲುಪಿಸುವಲ್ಲಿ ಟಿವಿಯ ಪ್ರಾಮುಖ್ಯತೆ ಮತ್ತು ಬದಲಾಗುತ್ತಿರುವ ಜಗತ್ತಿನಲ್ಲಿ ಅದು ಹೇಗೆ ಭಾಗವಹಿಸುತ್ತದೆ ಎಂಬುದನ್ನು ಚರ್ಚಿಸಲು 1996 ರಲ್ಲಿ 51/205 ನಿರ್ಣಯದ ಮೂಲಕ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯು ನವೆಂಬರ್ 21 ಅನ್ನು ವಿಶ್ವ ದೂರದರ್ಶನ ದಿನವೆಂದು ಘೋಷಿಸಿತು.

ದೂರದರ್ಶನದ ಆವಿಷ್ಕಾರ ಮತ್ತು ನಮ್ಮ ದೈನಂದಿನ ಜೀವನದಲ್ಲಿ ಅದು ವಹಿಸುವ ಪಾತ್ರವನ್ನು ಗುರುತಿಸಲು ವಿಶ್ವ ದೂರದರ್ಶನ ದಿನವನ್ನು ಸ್ಮರಿಸಲಾಗುತ್ತದೆ. ವೈವಿಧ್ಯಮಯ ಸುದ್ದಿಗಳು, ಕ್ರೀಡೆಗಳು ಮತ್ತು ಮನರಂಜನೆಯನ್ನು ಪರದೆಯ ಮೇಲೆ ತರಲು ಜನರು ಪಟ್ಟ ಶ್ರಮಕ್ಕೆ ಇದು ಮನ್ನಣೆಯಾಗಿದೆ. ಕೊನೆಯಲ್ಲಿ, ದೂರದರ್ಶನದ ಮೂಲಕ ಜನರು ಸಂಪರ್ಕಿಸಬಹುದಾದ ಸಮುದಾಯಗಳನ್ನು ಕಂಡುಕೊಂಡಿದ್ದಾರೆ.

ಇದನ್ನೂ ಓದಿ: Mental Health: ಈ ವಿಷಯಗಳು ಮಕ್ಕಳಿಗೆ ಮಾನಸಿಕ ಒತ್ತಡವನ್ನುಂಟು ಮಾಡಬಹುದು

ವಿಶ್ವ ದೂರದರ್ಶನ ದಿನ 2022ರ ಥೀಮ್ (World Television Day Theme)

ವಿಶ್ವ ದೂರದರ್ಶನ ದಿನ 2022 ಅಧಿಕೃತ ಥೀಮ್ ಹೊಂದಿಲ್ಲ. ಟಿವಿಯ ಆವಿಷ್ಕಾರವನ್ನು ಆಚರಿಸುವುದು ದಿನದ ಮುಖ್ಯ ಗುರಿಯಾಗಿದೆ. ವಿಶ್ವ ದೂರದರ್ಶನ ದಿನದ ಬಗ್ಗೆ ಜಾಗೃತಿ ಮೂಡಿಸಲು ಪ್ರತಿಯೊಂದು ಸಂಸ್ಥೆ ಮತ್ತು ವ್ಯಕ್ತಿ ತನ್ನದೇ ಆದ ಮಾರ್ಗವನ್ನು ಹೊಂದಿದೆ.

ವಿಶ್ವ ದೂರದರ್ಶನ ದಿನದ ಆಚರಣೆಗಳು (World Television Day Celebration)

ಮುದ್ರಣ ಮಾಧ್ಯಮ, ಪ್ರಸಾರ ಮಾಧ್ಯಮ ಮತ್ತು ಸಾಮಾಜಿಕ ಮಾಧ್ಯಮಗಳ ಮೂಲಕ ದೂರದರ್ಶನದ ಪಾತ್ರದ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ಹರಡುವ ಮತ್ತು ಹಂಚಿಕೊಳ್ಳುವ ಪತ್ರಕರ್ತರು, ಬರಹಗಾರರು ಮತ್ತು ಬ್ಲಾಗಿಗರು ಸೇರಿದಂತೆ ವಿವಿಧ ಜನರು ಒಟ್ಟಾಗಿ ಸೇರಿ ಈ ದಿನವನ್ನು ಆಚರಿಸುತ್ತಾರೆ. ಶಾಲೆಗಳಲ್ಲಿ, ಮಾಧ್ಯಮ ಮತ್ತು ಸಂವಹನ ಸಮಸ್ಯೆಗಳ ಬಗ್ಗೆ ಮಾತನಾಡಲು ಹಲವಾರು ಅತಿಥಿ ಭಾಷಣಕಾರರನ್ನು ಆಹ್ವಾನಿಸಲಾಗುತ್ತದೆ. ನಮ್ಮ ಜೀವನದಲ್ಲಿ ದೂರದರ್ಶನದ ಪಾತ್ರವೇನು, ದೂರದರ್ಶನವು ಸಾಂಸ್ಕೃತಿಕ ವೈವಿಧ್ಯತೆ ಮತ್ತು ಸಾಮಾನ್ಯ ತಿಳುವಳಿಕೆಯನ್ನು ಹೇಗೆ ಉತ್ತೇಜಿಸುತ್ತದೆ, ಇದು ಪ್ರಜಾಪ್ರಭುತ್ವ ಮತ್ತು ದೂರದರ್ಶನದ ನಡುವೆ ಸಂಪರ್ಕವನ್ನು ಹೇಗೆ ಒದಗಿಸುತ್ತದೆ ಮತ್ತು ಸಾಮಾಜಿಕ, ರಾಜಕೀಯ ಮತ್ತು ಆರ್ಥಿಕ ಬೆಳವಣಿಗೆಗಳಲ್ಲಿ ದೂರದರ್ಶನದ ಪಾತ್ರದಂತಹ ವಿಷಯಗಳನ್ನು ಅವರು ಚರ್ಚಿಸುತ್ತಾರೆ.

ಮತ್ತಷ್ಟು ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 9:19 am, Mon, 21 November 22