Multibagger: ಈ ಬ್ಯಾಂಕಿಂಗ್​ ಸ್ಟಾಕ್​ ಮೇಲೆ 23 ವರ್ಷದ ಹಿಂದೆ ಮಾಡಿದ 1 ಲಕ್ಷ ರೂ. ಹೂಡಿಕೆ ಈಗ 2.68 ಕೋಟಿ ರೂ.

ಷೇರು ಮಾರುಕಟ್ಟೆಯ ಖ್ಯಾತ ಹೂಡಿಕೆದಾರ ವಾರೆನ್ ಬಫೆಟ್ ಅದೊಮ್ಮೆ ಹೇಳಿದ ಪ್ರಕಾರ, ಹೂಡಿಕೆ ಅಂದರೆ ಒಳ್ಳೆಯ ಸಮಯದಲ್ಲಿ ಉತ್ತಮ ಷೇರುಗಳನ್ನು ಆರಿಸುವುದು ಮತ್ತು ಅವು ಉತ್ತಮ ಕಂಪೆನಿಗಳಾಗಿ ಉಳಿಯುವವರೆಗೆ ಅದರೊಂದಿಗೆ ಉಳಿಯುವುದು. ಬರ್ಕ್‌ಷೈರ್ ಹಾಥ್‌ವೇ ಅಧ್ಯಕ್ಷ ಮತ್ತು ಸಿಇಒ ಕೂಡ ಆದ ಬಫೆಟ್ ಹೇಳುವಂತೆ, ಷೇರು ಮಾರುಕಟ್ಟೆಯ ಹೂಡಿಕೆದಾರರು ಎಲ್ಲಿಯವರೆಗೆ ಸ್ಟಾಕ್ ಅನ್ನು ಇಟ್ಟುಕೊಳ್ಳಲು ಸಾಧ್ಯವೋ ಅಲ್ಲಿಯ ತನಕ ಇರಿಸಿಕೊಳ್ಳಲು ಸಲಹೆ ನೀಡುತ್ತಾರೆ. ಹಣ ಗಳಿಸಬಹುದಾದ್ದು ಷೇರುಗಳ ಖರೀದಿ ಅಥವಾ ಮಾರಾಟದಲ್ಲಿ ಅಲ್ಲ, ಆದರೆ ಕಾಯುವುದರಲ್ಲಿ ಎಂದು ಹೇಳಿದ್ದರು. ‘ಖರೀದಿಸಿ, ಇಟ್ಟುಕೊಳ್ಳಿ ಮತ್ತು ಮರೆತುಬಿಡಿ’ ತಂತ್ರವನ್ನು ನಂಬುವವರು ಸಮಯ ಕಳೆದಂತೆ ದೊಡ್ಡ ಮೊತ್ತವನ್ನು ಗಳಿಸುತ್ತಾರೆ. ಎಚ್‌ಡಿಎಫ್‌ಸಿ ಬ್ಯಾಂಕ್ ಷೇರು ಇದಕ್ಕೆ ಉತ್ತಮ ಉದಾಹರಣೆಯಾಗಿದೆ. ಈ ಬ್ಯಾಂಕಿಂಗ್ ಸ್ಟಾಕ್ ಬೆಲೆಯು ರೂ. 5.52ರಿಂದ (1ನೇ ಜನವರಿ 1999 ರಂದು NSEನಲ್ಲಿ ಬೆಲೆ) ರೂ. 1481ಕ್ಕೆ (31 ಡಿಸೆಂಬರ್ 2021ರಂದು NSE ದರ) 23 ವರ್ಷಗಳಲ್ಲಿ ಸುಮಾರು 268 ಪಟ್ಟು ಏರಿಕೆ ಕಂಡಿದೆ.

ಎಚ್​ಡಿಎಫ್​ಸಿ ಬ್ಯಾಂಕ್ ಷೇರು ಬೆಲೆ ಇತಿಹಾಸ ಎಚ್​ಡಿಎಫ್​ಸಿ ಬ್ಯಾಂಕ್ ಷೇರು ಕಳೆದ ಆರು ತಿಂಗಳಿನಿಂದ ಮಾರಾಟದ ಒತ್ತಡದಲ್ಲಿದೆ. ಕಳೆದ ಒಂದು ತಿಂಗಳಲ್ಲಿ ಎಚ್‌ಡಿಎಫ್‌ಸಿ ಬ್ಯಾಂಕ್ ಷೇರಿನ ಬೆಲೆ ಸುಮಾರು ಶೇ 1.50ರಷ್ಟು ಕುಸಿದಿದೆ. ಆದರೆ ಕಳೆದ ಒಂದು ವರ್ಷದಲ್ಲಿ ಅದು ಕೇವಲ ಶೇ 4ರಷ್ಟು ಲಾಭವನ್ನು ದಾಖಲಿಸಿದೆ. ಆದರೆ ಎಚ್‌ಡಿಎಫ್‌ಸಿ ಬ್ಯಾಂಕ್ ಕೆಟ್ಟ ಕಂಪನಿ ಎಂದು ಇದರ ಅರ್ಥವಲ್ಲ ಮತ್ತು ಇದರಿಂದ ದೂರ ಇರಬೇಕು ಅಂತಲೂ ಅಲ್ಲ. ಇತರ ಯಾವುದೇ ಬ್ಯಾಂಕಿಂಗ್ ಸ್ಟಾಕ್‌ನಂತೆ, ಎಚ್‌ಡಿಎಫ್‌ಸಿ ಬ್ಯಾಂಕ್ ಕಳೆದ ಒಂದು ವರ್ಷದಿಂದ ಕೊರೊನಾ ಬಿಕ್ಕಟ್ಟಿನ ಪರಿಣಾಮ ಎದುರಿಸುತ್ತಿದೆ.

ಎಚ್​ಡಿಎಫ್​ಸಿ ಬ್ಯಾಂಕ್ ಷೇರು ಭಾರತದಲ್ಲಿನ ಮಲ್ಟಿಬ್ಯಾಗರ್ ಷೇರುಗಳಲ್ಲಿ ಒಂದಾಗಿದೆ. ಕಳೆದ 5 ವರ್ಷಗಳಲ್ಲಿ ಎಚ್‌ಡಿಎಫ್‌ಸಿ ಬ್ಯಾಂಕ್ ಷೇರಿನ ಬೆಲೆಯು ಸುಮಾರು ರೂ. 596ರಿಂದ ರೂ. 1481ಕ್ಕೆ ಏರಿದೆ. ಈ ಅವಧಿಯಲ್ಲಿ ಸುಮಾರು ಶೇಕಡಾ 150ರಷ್ಟು ಏರಿಕೆಯಾಗಿದೆ. ಕಳೆದ 10 ವರ್ಷಗಳಲ್ಲಿ ಎಚ್‌ಡಿಎಫ್‌ಸಿ ಬ್ಯಾಂಕ್ ಷೇರಿನ ಬೆಲೆ ಸುಮಾರು ರೂ. 215ರಿಂದ ರೂ. 1481ಕ್ಕೆ ಹೆಚ್ಚಳ ಆಗಿದ್ದು, ಈ ಅವಧಿಯಲ್ಲಿ 7 ಪಟ್ಟು ಹೆಚ್ಚು ಲಾಭ ಕಂಡಿದೆ. ಕಳೆದ 20 ವರ್ಷಗಳಲ್ಲಿ ಎಚ್​ಡಿಎಫ್​ಸಿ ಬ್ಯಾಂಕ್ ಷೇರಿನ ಬೆಲೆಯು ಸುಮಾರು ರೂ. 22ರ ಹಂತಗಳಿಂದ ರೂ. 1481ಕ್ಕೆ ಮೇಲೇರಿದ್ದು, ಕಳೆದ ಎರಡು ದಶಕಗಳಲ್ಲಿ ಸುಮಾರು 67 ಪಟ್ಟು ಹೆಚ್ಚಳವಾಗಿದೆ. ಆದರೆ ಕಳೆದ 23 ವರ್ಷಗಳಲ್ಲಿ ಎಚ್‌ಡಿಎಫ್‌ಸಿ ಬ್ಯಾಂಕ್ ಷೇರು ರೂ. 5.52ರಿಂದ ರೂ. 1481ಕ್ಕೆ ತಲುಪಿದೆ. ಈ ಅವಧಿಯಲ್ಲಿ ಷೇರುದಾರರಿಗೆ ಸುಮಾರು ಶೇ 26,725ರಷ್ಟು ಲಾಭವನ್ನು ನೀಡಿದೆ.

ಹೂಡಿಕೆ ಮೇಲೆ ಪರಿಣಾಮ ಎಚ್‌ಡಿಎಫ್‌ಸಿ ಬ್ಯಾಂಕ್ ಷೇರು ಬೆಲೆ ಇತಿಹಾಸ ಗಮನಿಸುವುದಾದರೆ, ಹೂಡಿಕೆದಾರರು 5 ವರ್ಷಗಳ ಹಿಂದೆ ಎಚ್‌ಡಿಎಫ್‌ಸಿ ಬ್ಯಾಂಕ್ ಷೇರುಗಳಲ್ಲಿ ಹೂಡಿಕೆ ಮಾಡಿದ್ದರೆ ಅದರ ರೂ. 1 ಲಕ್ಷ ಇಂದು 2.5 ಲಕ್ಷ ರೂಪಾಯಿ ಆಗುತ್ತಿತ್ತು. 10 ವರ್ಷಗಳ ಹಿಂದೆ ಈ ಮಲ್ಟಿಬ್ಯಾಗರ್ ಕೌಂಟರ್‌ನಲ್ಲಿ 1 ಲಕ್ಷ ಹೂಡಿಕೆ ಮಾಡಿದ್ದರೆ ಇಂದು ರೂ. 7 ಲಕ್ಷ ಆಗುತ್ತಿತ್ತು. ಆದರೆ ಅದೇ 1 ಲಕ್ಷ ರೂಪಾಯಿ 20 ವರ್ಷಗಳಲ್ಲಿ 67 ಲಕ್ಷಕ್ಕೆ ಬದಲಾಗುತ್ತಿತ್ತು. ಅದೇ ರೀತಿ, ಹೂಡಿಕೆದಾರರು 23 ವರ್ಷಗಳ ಹಿಂದೆ ಎಚ್‌ಡಿಎಫ್‌ಸಿ ಬ್ಯಾಂಕ್ ಷೇರುಗಳಲ್ಲಿ 1 ಲಕ್ಷ ಹೂಡಿಕೆ ಮಾಡಿ, ರೂ. 5.52 ಮಟ್ಟದಲ್ಲಿ ಒಂದು ಷೇರು ಖರೀದಿಸಿದ್ದರೆ ಮತ್ತು ಹೂಡಿಕೆದಾರರು ಈ ಬ್ಯಾಂಕಿಂಗ್ ಸ್ಟಾಕ್‌ನಲ್ಲಿ ಇಲ್ಲಿಯವರೆಗೆ ಹೂಡಿಕೆ ಮಾಡಿದ್ದರೆ ಆ 1 ಲಕ್ಷ ಇಂದು ರೂ. 2.68 ಕೋಟಿಗೆ ಬದಲಾಗುತ್ತಿತ್ತು.

ಇದನ್ನೂ ಓದಿ: Multibagger Stocks: ಏನಿದು ಮಲ್ಟಿಬ್ಯಾಗರ್ ಸ್ಟಾಕ್? ಇದನ್ನು ಗುರುತಿಸುವುದು ಹೇಗೆ ತಿಳಿಯಿರಿ