ದೇಶದಲ್ಲಿ ಇಲ್ಲಿಯವರೆಗೆ 44 ಲಕ್ಷ ಡೋಸ್ ಲಸಿಕೆ ವ್ಯರ್ಥ; ಅತಿ ಹೆಚ್ಚು ಪೋಲಾಗಿದ್ದು ತಮಿಳುನಾಡಿನಲ್ಲಿ

ಭಾರತದಲ್ಲಿ ಎರಡನೇ ವಾರದಿಂದ ಕೊರೊನಾ ಲಸಿಕೆ ವಿತರಣೆ ಅಭಿಯಾನ ಶುರುವಾಗಿದೆ. ಇಲ್ಲಯವರೆಗೆ ಅನೇಕರಿಗೆ ಲಸಿಕೆ ನೀಡಲಾಗಿದೆ. ಈ ಮಧ್ಯೆ ಕೆಲವು ರಾಜ್ಯಗಳು ಕೊರೊನಾ ಲಸಿಕೆ ಅಭಾವವಾಗಿದೆ ಎಂದು ಹೇಳುತ್ತಿವೆ. ಆದರೆ ಇದೀಗ ಆರ್​ಟಿಐನಿಂದ ಶಾಕಿಂಗ್ ಮಾಹಿತಿಯೊಂದು ಹೊರಬಿದ್ದಿದೆ.

ಭಾರತದಲ್ಲಿ ಏಪ್ರಿಲ್ 11ರವರೆಗೆ ರಾಜ್ಯಗಳು 10 ಕೋಟಿ ಡೋಸ್ ಲಸಿಕೆಯನ್ನು ಬಳಸಿದ್ದು, ಅದರಲ್ಲಿ 44 ಲಕ್ಷ ಡೋಸ್​​ಗಳು ವ್ಯರ್ಥವಾಗಿವೆ ಎಂದು ಆರ್​ಟಿಐ ಮಾಹಿತಿ ಬಹಿರಂಗಗೊಳಿಸಿದೆ. ಅದರಲ್ಲಿ ತಮಿಳುನಾಡಿನಲ್ಲೇ ಹೆಚ್ಚು ಅಂದರೆ ಶೇ.12.10 ಡೋಸ್ ಲಸಿಕೆ ಪೋಲಾಗಿದೆ. ಇನ್ನುಳಿದಂತೆ ಹರ್ಯಾಣದಲ್ಲಿ ಶೇ.9.74, ಪಂಜಾಬ್​ನಲ್ಲಿ ಶೇ.8.12, ಮಣಿಪುರದಲ್ಲಿ ಶೇ.7.8 ಮತ್ತು ತೆಲಂಗಾಣದಲ್ಲಿ ಶೇ.7.55 ಡೋಸ್​ಗಳಷ್ಟು ಲಸಿಕೆ ಹಾಳಾಗಿದೆ ಎಂದು ಮಾಹಿತಿಯಲ್ಲಿ ಉಲ್ಲೇಖಿಸಲಾಗಿದೆ. ಹಾಗೆ ಕೇರಳ, ಪಶ್ಚಿಮಬಂಗಾಳ, ಹಿಮಾಚಲಪ್ರದೇಶ, ಮಿಜೋರಾಂ, ಗೋವಾ, ದಮನ್, ದಿಯು, ಅಂಡಮಾನ್​, ನಿಕೋಬಾರ್​ ಮತ್ತು ಲಕ್ಷದ್ವೀಪ್​ಗಳಲ್ಲಿ ಲಸಿಕೆ ವ್ಯರ್ಥದ ಪ್ರಮಾಣ ತೀರ ಕಡಿಮೆ ಇರುವುದಾಗಿ ಆರ್​ಟಿಐ ತಿಳಿಸಿದೆ.

ಸದ್ಯ ಕೇಂದ್ರ ಸರ್ಕಾರ ಮತ್ತು ಮಹಾರಾಷ್ಟ್ರ, ಪಂಜಾಬ್​, ದೆಹಲಿಗಳ ನಡುವೆ ಲಸಿಕೆ ಅಭಾವದ ಬಗ್ಗೆ ಜಟಾಪಟಿ ನಡೆಯುತ್ತಿದೆ. ನಮ್ಮಲ್ಲಿರುವ ನಮ್ಮಲ್ಲಿರುವ ಜನಸಂಖ್ಯೆಗೂ, ಹಂಚಿಕೆಯಾಗಿರುವ ಲಸಿಕೆಗೂ ಸಂಬಂಧವೇ ಇಲ್ಲವೆಂದು ದೆಹಲಿ ಸರ್ಕಾರ ಆರೋಪ ಮಾಡಿದೆ. ಈ ಮಧ್ಯೆ ಮಾಹಿತಿ ಹಕ್ಕು ಕಾಯ್ದೆ, ಲಸಿಕೆ ವ್ಯರ್ಥವಾಗುತ್ತಿರುವ ಮಾಹಿತಿಯನ್ನು ಬಿಡುಗಡೆ ಮಾಡಿದೆ.

ಇದನ್ನೂ ಓದಿ: ನಟ ರಣವೀರ್ ಸಿಂಗ್​ಗೆ​ ಪತ್ನಿ ದೀಪಿಕಾ ಪಡುಕೋಣೆಯಿಂದಲೇ ಬಹಿರಂಗ ಬೆದರಿಕೆ!