ದೆಹಲಿ: ಕೇಂದ್ರ ಸರ್ಕಾರ ಘೋಷಿಸಿರುವ ನೂತನ ಕೃಷಿ ಕಾಯ್ದೆಗಳನ್ನು ಮಾರ್ಚ್ 23ರ ಒಳಗಾಗಿ ಹಿಂಪಡೆಯದಿದ್ದರೆ ಅಮರಣಾಂತ ಉಪವಾಸ ಮಾಡುವುದಾಗಿ ಸ್ವಾತಂತ್ರ್ಯ ಹೋರಾಟಗಾರ ಭಗತ್ ಸಿಂಗ್ ಅವರ ಅಣ್ಣನ ಮಗ ಅಭಯ್ ಸಂಧು ಬುಧವಾರ (ಫೆ.24) ಘೋಷಿಸಿದರು. ಹೊಸ ಕಾಯ್ದೆಗಳು ತಮಗೆ ಮಾರಕವಾಗಲಿವೆ, ಕಾರ್ಪೊರೇಟ್ಗಳ ಕಪಿಮುಷ್ಟಿಗೆ ಸಿಕ್ಕು ನರಳಬೇಕಾಗುತ್ತದೆ ಎಂದು ಹೇಳುತ್ತಿರುವ ರೈತರು ಅವುಗಳನ್ನು ವಾಪಸ್ಸು ಪಡೆಯಲು ಆಗ್ರಹಿಸಿ ಹಲವಾರು ತಿಂಗಳುಗಳಿಂದ ದೆಹಲಿಯ ಹೊರವಲಯದಲ್ಲಿ ಮುಷ್ಕರ ನಡೆಸುತ್ತಿದ್ದಾರೆ. ಸಂಧು ತಮ್ಮ ಸಂಬಂಧಿಯೊಬ್ಬರ ಜೊತೆ ದೆಹಲಿಯ ಸಿಂಘು ಗಡಿಯಲ್ಲಿ ಮುಷ್ಕರನಿರತ ರೈತರನ್ನು ಇಂದು ಸೇರಿಕೊಂಡರು. ಮುಷ್ಕರದ ಸ್ಥಳವನ್ನು ತಲುಪಿದ ನಂತರವೇ ಸಂಧು ಅಮರಣಾಂತ ಉಪವಾಸ ನಡೆಸುವ ಬಗ್ಗೆ ಘೋಷಣೆ ಮಾಡಿದರು. ಸಂಯುಕ್ತ ಕಿಸಾನ್ ಮೊರ್ಚಾದ ರೈತರು ಹುತಾತ್ಮ ಭಗತ್ ಸಿಂಗ್ ಅವರ ಸಂಬಂಧಿಗಳಿಗೆ ರುಮಾಲುಗಳಿಂದ (ಪಗಡಿ) ಸನ್ಮಾನಿಸಿ ನೆನಪಿನ ಕಾಣಿಕೆಗಳನ್ನು ನೀಡಿದ್ದು ನೂರು ವರ್ಷಗಳಿಗೂ ಹಿಂದೆ ನಡೆದ ಪಗಡಿ ಸಂಭಾಲ್ ಜತ್ತಾ ಚಳುವಳಿಯನ್ನು ಜ್ಞಾಪಿಸಿಕೊಳ್ಳುವಂತೆ ಮಾಡಿತು.
ಸಂಧು ಅವರು ಆಯ್ಕೆ ಮಾಡಿಕೊಂಡಿರುವ ಮಾರ್ಚ್ 23 ಒಂದು ಐತಿಹಾಸಿಕ ದಿನವಾಗಿದೆ. ಆ ದಿನದಂದೇ ಭಗತ್ ಸಿಂಗ್, ರಾಜಗುರು ಮತ್ತು ಸುಖ್ದೇವ್ ಅವರು ಹುತಾತ್ಮರಾಗಿದ್ದು. ಸದರಿ ದಿನವನ್ನು ಶಹೀದ್ ದಿವಸ್ (ಹುತಾತ್ಮರ ದಿನ) ಎಂದು ಸ್ಮರಿಸಲಾಗುತ್ತದೆ. 1906 ರಲ್ಲೂ ಆಗಿನ ಬ್ರಿಟಿಷ್ ಸರ್ಕಾರ ಮೂರು ಕೃಷಿ ಕಾಯ್ದೆಗಳನ್ನು ಘೋಷಿಸಿದಾಗ ರೈತರು ಅವುಗಳನ್ನು ವಿರೋಧಿಸಿ ಪಗಡಿ ಸಂಭಾಲ್ ಚಳುವಳಿ ನಡೆಸಿ ಆಂಗ್ಲರು ಆ ಕಾಯ್ದೆಗಳನ್ನು ಹಿಂಪಡೆಯುವಂತೆ ಮಾಡಿದ್ದರು ಎನ್ನುವುದನ್ನು ರೈತರು ಜ್ಞಾಪಿಸಿಕೊಂಡರು.
ಆ ಚಳುವಳಿಯಂತೆಯೇ ಈಗ ರೈತರು ನಡೆಸುತ್ತಿರುವ ಚಳುವಳಿಯು ಕೇಂದ್ರ ಸರ್ಕಾರ ಜಾರಿ ಮಾಡಿರುವ ಮೂರು ನೂತನ ಕೃಷಿ ವಿಧೇಯಕಗಳನ್ನು ವಾಪಸ್ಸು ಪಡೆದುಕೊಳ್ಳುವಂತೆ ಮಾಡುವಲ್ಲಿ ಯಶಸ್ವೀಯಾಗಲಿದೆ ಎಂಭ ಭರವಸೆಯನ್ನು ರೈತರು ವ್ಯಕ್ತಪಡಿಸಿದರು.
ಇದನ್ನೂ ಓದಿ: ಪ್ರತಿಭಟನಾನಿರತ ಉತ್ತರ ಪ್ರದೇಶ ರೈತರೊಂದಿಗೆ ಮಾತುಕತೆ ನಡೆಸಿದ ಅರವಿಂದ್ ಕೇಜ್ರಿವಾಲ್; ಫೆ.28ಕ್ಕೆ ಮಹಾ ಕಿಸಾನ್ ಪಂಚಾಯತ್
