ಕೊವಿಡ್​ 19 ಕೇಂದ್ರಕ್ಕೆ ಹೋಗಿ ಸಿರಿಂಜ್​ಗೆ ಔಷಧಿ ತುಂಬಿಸಿದ ಬಿಜೆಪಿ ಶಾಸಕ; 4ನೇ ಕ್ಲಾಸ್​​ವರೆಗೆ ಮಾತ್ರ ಓದಿದ್ದೀರಿ ಎಂದ ಕಾಂಗ್ರೆಸ್​

ಬಿಜೆಪಿ ಶಾಸಕರೊಬ್ಬರು ರೆಮ್​​ಡಿಸಿವಿರ್​ ಇಂಜೆಕ್ಷನ್​​ ಔಷಧಿಯನ್ನು ಸಿರಿಂಜ್​​ಗೆ ತುಂಬಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟೆ ವೈರಲ್ ಆಗಿದೆ. ಅದರ ಬೆನ್ನಲ್ಲೇ ಕಾಂಗ್ರೆಸ್​ನಿಂದ ಟೀಕೆಗಳ ಸುರಿಮಳೆಯೇ ಸುರಿದಿದೆ.
ಗುಜರಾತ್​ನ ಸೂರತ್​​ನಲ್ಲಿರುವ ಕಾಮ್ರೇಜ್​ ವಿಧಾನಸಭಾ ಕ್ಷೇತ್ರದ ಶಾಸಕ ವಿ.ಡಿ. ಜಲವಾಡಿಯಾ ಅವರು ಕೊವಿಡ್​ 19 ಕೇಂದ್ರವೊಂದರಲ್ಲಿ ಈ ಕೆಲಸ ಮಾಡಿದ್ದಾರೆ. ರೆಮ್​ಡಿಸಿವಿರ್​ನ ಪುಟ್ಟ ಬಾಟಲಿಯಿಂದ ಔಷಧಿಯನ್ನು ಸಿರಿಂಜ್​​ಗೆ ತುಂಬಿದ್ದಾರೆ. ಕೊವಿಡ್​ 19 ರೋಗಿಗೆ ಅಳವಡಿಸಲಾದ ಡ್ರಿಪ್​ ಬಾಟಲಿಗೆ ಇಂಜೆಕ್ಟ್ ಮಾಡುವ ಮೊದಲು ಬಿಜೆಪಿ ಶಾಸಕನೇ ಅದರಲ್ಲಿ ರೆಮ್​ಡಿಸಿವಿರ್​ ತುಂಬಿಸಿದ್ದಾರೆ.

ಈ ವಿಡಿಯೋ ನೋಡಿದ ಕಾಂಗ್ರೆಸ್​ ವಕ್ತಾರ ಜಯರಾಜ್​ಸಿನ್ಹ್​ ಪಾರ್ಮರ್ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಶಾಸಕ ವಿ.ಡಿ. ಜಲವಾಡಿಯಾರಿಂದ ಗುಜರಾತ್​ನ ಆರೋಗ್ಯ ಸಚಿವ ನಿತಿನ್​ ಪಟೇಲ್​ ಅವರು ಸ್ಫೂರ್ತಿ ಪಡೆಯಬೇಕು. ಬಿಜೆಪಿ ಕಾರ್ಯಕರ್ತರಿಗೆ ಇಂಜೆಕ್ಷನ್​ ನೀಡುವ ತರಬೇತಿ ನೀಡುವ ಕೇಂದ್ರವೊಂದನ್ನು ತೆರೆಯಬೇಕು ಎಂದು ವ್ಯಂಗ್ಯವಾಡಿದ್ದಾರೆ.

ನಮ್ಮ ರಾಜ್ಯದಲ್ಲಿ ವೈದ್ಯರು, ನರ್ಸ್​ಗಳು, ಆರೋಗ್ಯ ಸಿಬ್ಬಂದಿ ಮತ್ತು ಪ್ಯಾರಾ ಮೆಡಿಕಲ್​ ಸಿಬ್ಬಂದಿಯ ಅಭಾವ ಇದೆ. ಹಾಗಾಗಿ ಆರೋಗ್ಯ ಸಚಿವರು ಬಿಜೆಪಿ ಕಾರ್ಯಕರ್ತರಿಗೆ ತರಬೇತಿ ನೀಡಲಿ ಎಂದು ಟೀಕೆ ಮಾಡಿರುವ ಅವರು, ಸೂರತ್​ ಶಾಸಕ ವಿ.ಡಿ. ಜಲವಾಡಿಯಾ 4ನೇ ತರಗತಿವರೆಗೆ ಓದಿದ್ದಾರೆ. ಅವರೀಗ ಹೋಗಿ ಇಂಜೆಕ್ಷನ್​ ಕೊಡಲು ಪ್ರಯತ್ನಿಸುತ್ತಿದ್ದಾರೆ ಎಂದು ವ್ಯಂಗ್ಯ ಮಾಡಿದ್ದಾರೆ.

ಇದನ್ನೂ ಓದಿ: ಕೊರೊನಾ ಸಾವಿನ ಸಂಖ್ಯೆಯಲ್ಲಿ 3ನೇ ಸ್ಥಾನಕ್ಕೆ ಏರಿದ ಭಾರತ; ಮೊದಲೆರಡು ಸ್ಥಾನ ಯಾವ ದೇಶಗಳಿಗೆ?

PPE Kit: ಕೊರೊನಾ ಯೋಧರಿಗಾಗಿ ಹೊಸ ಮಾದರಿಯ ತಂಪಾದ ಪಿಪಿಇ ಕಿಟ್; ವಿದ್ಯಾರ್ಥಿಯೊಬ್ಬನ ವಿನೂತನ ಸಂಶೋಧನೆ!