ಎಎಪಿಗೆ ₹100 ಕೋಟಿ ಕಿಕ್‌ಬ್ಯಾಕ್, ಫೋನ್‌ನಿಂದ ಸಾಕ್ಷ್ಯ ಅಳಿಸಿ ಹಾಕಿದ್ದಾರೆ ಕವಿತಾ: ಇಡಿ

ದೆಹಲಿ ಜೂನ್ 03: ಭಾರತ್ ರಾಷ್ಟ್ರ ಸಮಿತಿ (BRS) ನಾಯಕಿ ಕೆ.ಕವಿತಾ (K kavitha) ಅವರು ದೆಹಲಿ ಅಬಕಾರಿ ನೀತಿ (Delhi excise policy )ಹಗರಣದಲ್ಲಿ 1,100 ಕೋಟಿ ರೂ.ಗಳಲ್ಲಿ ಸುಮಾರು ₹ 300 ಕೋಟಿ ಮೌಲ್ಯದ ಅಪರಾಧದಲ್ಲಿ ಭಾಗಿಯಾಗಿದ್ದಾರೆ ಎಂದು ಜಾರಿ ನಿರ್ದೇಶನಾಲಯ ಸೋಮವಾರ ಆರೋಪಿಸಿದೆ. ದೆಹಲಿ ನ್ಯಾಯಾಲಯದಲ್ಲಿ ವಿಶೇಷ ನ್ಯಾಯಾಧೀಶರಾದ ಕಾವೇರಿ ಬವೇಜಾ ಅವರ ಮುಂದೆ ಸಲ್ಲಿಸಿದ ಪೂರಕ ಆರೋಪಪಟ್ಟಿಯಲ್ಲಿ ಈ ಆರೋಪ ಮಾಡಲಾಗಿದೆ. ಕವಿತಾ ಅವರ ನ್ಯಾಯಾಂಗ ಬಂಧನವನ್ನು ಜುಲೈ 3 ರವರೆಗೆ ವಿಸ್ತರಿಸಲಾಗಿದೆ. ಏಜೆನ್ಸಿಯ ತನಿಖೆಯ ಸಮಯದಲ್ಲಿ ಬಂಧಿಸದೆ ಆರೋಪಪಟ್ಟಿ ಸಲ್ಲಿಸಲಾಗಿದ್ದ ಪ್ರಿನ್ಸ್, ದಾಮೋದರ್ ಮತ್ತು ಅರವಿಂದ್ ಸಿಂಗ್ ಎಂಬ ಮೂವರು ಸಹ ಆರೋಪಿಗಳಿಗೆ ನ್ಯಾಯಾಲಯವು ಜಾಮೀನು ನೀಡಿದೆ ಎಂದು ಪಿಟಿಐ ವರದಿ ಮಾಡಿದೆ.

ಇಡಿ ಆರೋಪಪಟ್ಟಿಯಲ್ಲಿ ಏನಿದೆ?

ಇಡಿ ಚಾರ್ಜ್‌ಶೀಟ್ ಪ್ರಕಾರ ಒಟ್ಟು ₹ 1,100 ಕೋಟಿ ಅಕ್ರಮ ಹಣ ವರ್ಗಾವಣೆಯಾಗಿದ್ದು, ಇದರಲ್ಲಿ ₹ 292.8 ಕೋಟಿ ಮೌಲ್ಯದ ಅಪರಾಧದ ಆದಾಯವಾಗಿದೆ. ಏಜೆನ್ಸಿಯ ಪ್ರಕಾರ, ಕವಿತಾ, ಚನ್‌ಪ್ರೀತ್ ಸಿಂಗ್, ಪ್ರಿನ್ಸ್ ಕುಮಾರ್, ದಾಮೋದರ್ ಶರ್ಮಾ ಮತ್ತು ಅರವಿಂದ್ ಸಿಂಗ್ ಅವರ ಆಪಾದಿತ ಚಟುವಟಿಕೆಗಳ ಮೂಲಕ, ಅಪರಾಧದ ದೊಡ್ಡ ಆದಾಯವನ್ನು ಸೃಷ್ಟಿಸಲಾಗಿದೆ. ತೆಲಂಗಾಣ ಮಾಜಿ ಮುಖ್ಯಮಂತ್ರಿ ಕೆ ಚಂದ್ರಶೇಖರ ರಾವ್ ಅವರ ಪುತ್ರಿ ಕವಿತಾ ಅವರು ₹ 292.80 ಕೋಟಿ ಮೌಲ್ಯದ ಅಪರಾಧದಲ್ಲಿ ಭಾಗಿಯಾಗಿದ್ದಾರೆ ಎಂದು ಆರೋಪಿಸಲಾಗಿದೆ, ಈ ಪೈಕಿ ₹ 100 ಕೋಟಿಯನ್ನು ಆಮ್ ಆದ್ಮಿ ಪಕ್ಷದ ನಾಯಕರಿಗೆ ಕಿಕ್‌ಬ್ಯಾಕ್‌ ಆಗಿ ಪಾವತಿಸಲಾಗಿದೆ.

₹ 100 ಕೋಟಿ ಕಿಕ್‌ಬ್ಯಾಕ್ ಮತ್ತು ಅನಪೇಕ್ಷಿತ ಪ್ರಯೋಜನಗಳನ್ನು ಪಡೆಯಲು ಎಎಪಿಯ ಉನ್ನತ ನಾಯಕತ್ವದ ಪರವಾಗಿ ಕಾರ್ಯನಿರ್ವಹಿಸುತ್ತಿದ್ದ ಮತ್ತೊಬ್ಬ ಆರೋಪಿ ವಿಜಯ್ ನಾಯರ್ ಮೂಲಕ ಕವಿತಾ ಅವರು ಸೌತ್ ಗ್ರೂಪ್ ಸದಸ್ಯರು ಮತ್ತು ಎಎಪಿ ನಾಯಕರೊಂದಿಗೆ ಪಿತೂರಿ ನಡೆಸುತ್ತಿದ್ದಾರೆ ಎಂದು ಇಡಿ ಆರೋಪಿಸಿದೆ.

ಇಡಿ ಪ್ರಕಾರ, ಕವಿತಾ ಅವರು ಪಿತೂರಿ ಮತ್ತು ಇಂಡೋಸ್ಪಿರಿಟ್ಸ್ ಎಂಬ ಆರೋಪಿತ ಕಂಪನಿಯ ಮೂಲಕ ₹192.80 ಕೋಟಿ ಮೌಲ್ಯದ ಅಪರಾಧದ ಉತ್ಪಾದನೆ, ಸ್ವಾಧೀನ ಮತ್ತು ಬಳಕೆಯಲ್ಲಿ ಭಾಗಿಯಾಗಿದ್ದಾರೆ. ಕವಿತಾ ಅವರು ಕಂಪನಿಯನ್ನು ‘ನಿಜವಾದ ವ್ಯಾಪಾರ ಘಟಕ’ ಎಂದು ತೋರಿಸಿದ್ದಾರೆ. ₹192.80 ಕೋಟಿ ಮೌಲ್ಯದ ಅಪರಾಧದ ಆದಾಯವನ್ನು ಗಳಿಸಿದ್ದಾರೆ ಎಂದು ಸಂಸ್ಥೆ ಆರೋಪಿಸಿದೆ.

ಇಂಡೋಸ್ಪಿರಿಟ್ಸ್‌ನ ರಚನೆಯ ಸಂಚಿನಲ್ಲಿ ಭಾಗವಹಿಸುವ ಮೂಲಕ ₹ 100 ಕೋಟಿ ಮುಂಗಡ ಲಂಚವನ್ನು ಮರುಪಾವತಿಸಲು, ನವೆಂಬರ್ 2021 ರಿಂದ ಆಗಸ್ಟ್ 2022 ರ ಅವಧಿಯಲ್ಲಿ ಇಂಡೋಸ್ಪಿರಿಟ್ಸ್ ಗಳಿಸಿದ ಲಾಭದ ಸೋಗಿನಲ್ಲಿ ಕವಿತಾ ಅವರು ₹ 100 ಕೋಟಿಯ ಪಿಒಸಿ ಉತ್ಪಾದನೆ ಮತ್ತು ವರ್ಗಾವಣೆ ಮತ್ತು ₹ 192.8 ಕೋಟಿ ಪಿಒಸಿ ಉತ್ಪಾದನೆ, ಮತ್ತು ಸ್ವಾಧೀನದಲ್ಲಿ ತೊಡಗಿಸಿಕೊಂಡಿದ್ದಾರೆ ಎಂದು ಇಡಿ ತನ್ನ ಆರೋಪಪಟ್ಟಿಯಲ್ಲಿ ಆರೋಪಿಸಿದೆ.

ಇದನ್ನೂ ಓದಿ:ರಾಹುಲ್ ಗಾಂಧಿ ಜಿಮ್ ತೆರೆಯಬೇಕು: ಕೇಂದ್ರ ಸಚಿವ ರಾಜೀವ್ ಚಂದ್ರಶೇಖರ್

ಮಾರ್ಚ್ 15 ರಂದು ಕವಿತಾ ಅವರನ್ನು ಹೈದರಾಬಾದ್ ನಿವಾಸದಿಂದ ಬಂಧಿಸಿದ ಕೇಂದ್ರ ಸಂಸ್ಥೆ, ಬಿಆರ್‌ಎಸ್ ಎಂಎಲ್‌ಸಿ ಅವರ ಸಹಾಯಕ ಅಭಿಷೇಕ್ ಬೋಯೈನ್‌ಪಲ್ಲಿ ಹೆಸರಿನಲ್ಲಿ ಇಂಡೋಸ್ಪಿರಿಟ್ಸ್‌ನಿಂದ ₹ 5.5 ಕೋಟಿ ಪಡೆದಿದ್ದಾರೆ ಎಂದು ಆರೋಪಿಸಿತ್ತು.

ಡಿಜಿಟಲ್ ಸಾಕ್ಷ್ಯ ನಾಶಪಡಿಸಿದ ಕವಿತಾ: ಇಡಿ

ಇಡಿ ಪ್ರಕಾರ, ಕೆ ಕವಿತಾ ಅವರು ತಮ್ಮ ಮೊಬೈಲ್ ಫೋನ್‌ನ ಸಾಕ್ಷ್ಯಗಳು ಮತ್ತು ವಿಷಯಗಳನ್ನು ಅಳಿಸಿದ್ದಾರೆ ಎಂದು ಆರೋಪಿಸಲಾಗಿದೆ. “ಅವರು ಪರೀಕ್ಷೆಗಾಗಿ ಒಂಬತ್ತು ಫೋನ್‌ಗಳನ್ನು ನೀಡಿದ್ದರು. ಅವುಗಳು ಫಾರ್ಮ್ಯಾಟ್ ಮಾಡಲ್ಪಟ್ಟವು. ಅದರಲ್ಲಿ ಯಾವುದೇ ಡೇಟಾ ಇಲ್ಲ. ಆಕೆ ಆ ಫಾರ್ಮ್ಯಾಟ್ ಮಾಡಿದ ಫೋನ್‌ಗಳಿಗೆ ಯಾವುದೇ ವಿವರಣೆಯನ್ನು ನೀಡಲು ಸಾಧ್ಯವಾಗಲಿಲ್ಲ” ಎಂದು ಇಡಿ ಆರೋಪಿಸಿದೆ. ಅದೇ ವೇಳೆ ಕವಿತಾ ಅವರು ಸಾಕ್ಷಿಗಳ ಮೇಲೆ ಪ್ರಭಾವ ಬೀರುವ ಕೃತ್ಯಗಳಲ್ಲಿ ಭಾಗಿಯಾಗಿದ್ದಾರೆ ಎಂದು ಜಾರಿ ನಿರ್ದೇಶನಾಲಯ ಆರೋಪಿಸಿದೆ.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ