ಕೊರೊನಾ ರೂಪಾಂತರ: ಬ್ರಿಟನ್​ನಿಂದ ಆಗಮಿಸುವವರ ತಪಾಸಣೆಗಾಗಿ ಕೇಂದ್ರದಿಂದ ನಿಯಮಾವಳಿ ಬಿಡುಗಡೆ

ದೆಹಲಿ: ಬ್ರಿಟನ್​ ದೇಶದಲ್ಲಿ ಕೊರೊನಾ ವೈರಾಣುವಿನ ಹೊಸ ಪ್ರಭೇದ ಕಾಣಿಸಿಕೊಳ್ಳುತ್ತಿದ್ದಂತೆಯೇ ಹಲವಾರು ರಾಷ್ಟ್ರಗಳು ಸೇರಿದಂತೆ ಭಾರತ ಸಹ ಎಚ್ಚೆತ್ತುಕೊಂಡಿದೆ. ಹೊಸ ಪ್ರಭೇದದ ಕೊರೊನಾವಾದ ಸಾರ್ಸ್​ ಕೋವ್​-2 ವಿ.ಯು.ಐ [SARS-CoV-2 VUI 202012/01 (Variant Under Investigation, year 2020, month 12, variant 01)] ವೈರಾಣುವಿನಿಂದ ದೇಶವನ್ನು ಕಾಪಾಡುವ ಸಲುವಾಗಿ ಕೇಂದ್ರ ಸರ್ಕಾರದ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ನೂತನ ನಿಯಮಾವಳಿಗಳನ್ನು ಪ್ರಕಟಿಸಿದೆ.

ಡಿಸೆಂಬರ್​ 23ರಿಂದ 31ರವರೆಗೆ ಅಥವಾ ಮುಂದಿನ ಆದೇಶ ಬರುವ ತನಕ ಬ್ರಿಟನ್​ ಮತ್ತು ಭಾರತದ ನಡುವಿನ ವಿಮಾನ ಸೇವೆಯನ್ನು ಸ್ಥಗಿತಗೊಳಿಸಲಾಗಿದೆ. ಆದರೆ, ಈಗಾಗಲೇ ಬ್ರಿಟನ್​ನಿಂದ ಆಗಮಿಸಿದವರ ತಪಾಸಣೆ ನಡೆಸಲು ಕೆಲ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಲಾಗಿದೆ.

ನವೆಂಬರ್​ 25ರಿಂದ ಡಿಸೆಂಬರ್​ 23ರ ಅವಧಿಯಲ್ಲಿ ಬ್ರಿಟನ್​ ಮಾರ್ಗವಾಗಿ ಆಗಮಿಸಿದವರು ತಮ್ಮ ಪ್ರಯಾಣದ ವಿವರವನ್ನು (ಟ್ರಾವೆಲ್​ ಹಿಸ್ಟರಿ) ನೀಡಬೇಕಿದೆ. ಜೊತೆಗೆ, ಇಂದು ಮತ್ತು ನಾಳೆ ಆಗಮಿಸುವವರ ಬಗ್ಗೆ ನಿಗಾ ವಹಿಸಲು ವಿಮಾನ ನಿಲ್ದಾಣಗಳಿಗೆ ಸೂಚನೆ ನೀಡಲಾಗಿದೆ.

ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗಳಲ್ಲಿ ಪಾಲಿಸಬೇಕಾದ ನಿಯಮಗಳು 1. ಬ್ರಿಟನ್​ ಮಾರ್ಗವಾಗಿ ಆಗಮಿಸುವ ಎಲ್ಲಾ ಪ್ರಯಾಣಿಕರು ಕಡ್ಡಾಯವಾಗಿ RT-PCR ಪರೀಕ್ಷೆಗೆ ಒಳಪಡುವಂತೆ ಆಯಾ ರಾಜ್ಯ ಸರ್ಕಾರಗಳು ನಿಗಾ ವಹಿಸಬೇಕು. ಯಾವುದೇ ವ್ಯಕ್ತಿಯಲ್ಲಿ ಸೋಂಕು ಕಾಣಿಸಿಕೊಂಡರೆ ತಕ್ಷಣವೇ ವಂಶವಾಹಿ (ಜೀನ್)​ ಮಾದರಿಯನ್ನು ಪರೀಕ್ಷಿಸುವ ಸಲುವಾಗಿ ಪ್ರಯೋಗಾಲಯಕ್ಕೆ ಕಳುಹಿಸಬೇಕು 2. ಕೊವಿಡ್​ ಪಾಸಿಟಿವ್​ ಲಕ್ಷಣ ಕಾಣಿಸಿಕೊಂಡರೆ ಸದರಿ ವ್ಯಕ್ತಿಯನ್ನು ಪ್ರತ್ಯೇಕವಾಗಿ ಐಸೋಲೇಟ್​ ಮಾಡಲು ಆಯಾ ರಾಜ್ಯದ ಆರೋಗ್ಯ ಇಲಾಖೆಗಳು ಸೂಕ್ತ ವ್ಯವಸ್ಥೆ ಮಾಡಬೇಕು. ಪರೀಕ್ಷೆ ನಡೆಸಲು ಬೇಕಾದ ಮಾದರಿಯನ್ನು ಪುಣೆಯ ನ್ಯಾಷನಲ್​ ಇನ್​ಸ್ಟಿಟ್ಯೂಟ್ ಆಫ್​ ವೈರಾಲಜಿ ಅಥವಾ ಇನ್ನಿತರ ಸುಸಜ್ಜಿತ ಪ್ರಯೋಗಾಲಯಕ್ಕೆ ಕಳುಹಿಸಬೇಕು 3. ಒಂದು ವೇಳೆ ಸೋಂಕಿತರಲ್ಲಿ ರೂಪಾಂತರಗೊಂಡ ಕೊರೊನಾ ವೈರಾಣು ಪತ್ತೆಯಾದರೆ, ಆ ವ್ಯಕ್ತಿಯನ್ನು 14 ದಿನ ಪ್ರತ್ಯೇಕವಾಗಿ ಕ್ವಾರಂಟೈನ್​ ಮಾಡಿ. ಜೊತೆಗೆ, 14ನೇ ದಿನ ಆತನನ್ನು ಮತ್ತೆ ಪರೀಕ್ಷೆಗೆ ಒಳಪಡಿಸಬೇಕು. ಆಗಲೂ ಪಾಸಿಟಿವ್​ ಕಾಣಿಸಿಕೊಂಡರೆ 24 ಗಂಟೆಗಳ ಅಂತರದಲ್ಲಿ 2 ಬಾರಿ ನೆಗೆಟಿವ್​ ಕಾಣಿಸಿಕೊಳ್ಳುವ ತನಕ ವ್ಯಕ್ತಿಯ ಮೇಲೆ ನಿಗಾ ಇರಿಸಬೇಕು 4. ಪರೀಕ್ಷೆಯ ವೇಳೆ ನೆಗೆಟಿವ್​ ಬಂದರೂ ಅವರಿಗೆ ಕೆಲ ನಿಯಮಗಳನ್ನು ಪಾಲಿಸಲು ಸೂಚಿಸಬೇಕು. ಇದಲ್ಲದೆ, ಅವರ ವಿವರವನ್ನು ರಾಜ್ಯ ಸರ್ಕಾರಗಳು ಕೇಂದ್ರಕ್ಕೆ ನೀಡಬೇಕು 5. ಪ್ರಯಾಣಿಕರಿಗೆ ಸರಿಯಾದ ಮಾಹಿತಿ ನೀಡುವುದು ವಿಮಾನ ಸಂಸ್ಥೆಗಳ ಜವಾಬ್ದಾರಿ ಆಗಿರುತ್ತದೆ. ವಿಮಾನ ನಿಲ್ದಾಣಗಳಲ್ಲೂ ನಿಯಮಾವಳಿಗಳ ಮಾಹಿತಿ ಲಭ್ಯವಿರುವಂತೆ ನೋಡಿಕೊಳ್ಳಬೇಕು 6. RT-PCR ಪರೀಕ್ಷೆಯ ಫಲಿತಾಂಶ ಲಭ್ಯವಾಗುವುದು ತಡವಾದಲ್ಲಿ ಆ ವ್ಯಕ್ತಿಗಳಿಗೆ ವಿಮಾನ ನಿಲ್ದಾಣದಲ್ಲಿ ಪ್ರತ್ಯೇಕ ವ್ಯವಸ್ಥೆ ಮಾಡುವ ಕುರಿತು ಅಲ್ಲಿನ ಅಧಿಕಾರಿಗಳೊಂದಿಗೆ ಚರ್ಚಿಸಿ ಕ್ರಮ ಕೈಗೊಳ್ಳಬೇಕು

ವಲಸೆ ಕಚೇರಿ (Bureau of Immigration) ಅಧಿಕಾರಿಗಳಿಗೆ ನೀಡಲಾದ ಸೂಚನೆಗಳು 1. ಬ್ರಿಟನ್​ನಿಂದ ಕಳೆದ 4 ವಾರಗಳ ಅವಧಿಯಲ್ಲಿ ದೇಶದ ವಿವಿಧ ವಿಮಾನ ನಿಲ್ದಾಣಗಳಿಗೆ ಆಗಮಿಸಿದ ಪ್ರಯಾಣಿಕರ ಪಟ್ಟಿಯನ್ನು ವಲಸೆ ಕಚೇರಿಯು ಆಯಾ ರಾಜ್ಯಗಳಿಗೆ ನೀಡಬೇಕು 2. ಆಯಾ ರಾಜ್ಯಗಳು ರಚಿಸಿದ ರೋಗ ನಿರ್ವಹಣಾ ಇಲಾಖೆಗೆ ಮಾಹಿತಿ ನೀಡಬೇಕು

ಇದೇ ರೀತಿ ಎಲ್ಲಾ ರಾಜ್ಯಗಳಿಗೂ ಸುತ್ತೋಲೆ ಹೊರಡಿಸಲಾಗಿದ್ದು ಯಾವುದೇ ಪ್ರಯಾಣಿಕರಲ್ಲಿ ಸೋಂಕು ದೃಢಪಟ್ಟರೆ ಸ್ಥಳೀಯ ಆಡಳಿತದ ಸಹಕಾರದೊಂದಿಗೆ ತಕ್ಷಣ ಪತ್ತೆಹಚ್ಚಿ, ಟ್ರಾವಲ್​ ಹಿಸ್ಟರಿಯನ್ನು ಗುರುತಿಸಿ, ಪರೀಕ್ಷೆಗೆ ಒಳಪಡಿಸಲು ನಿರ್ದೇಶನ ನೀಡಲಾಗಿದೆ.

ನಮ್ಮ​ ಲಸಿಕೆ ಹೊಸ ಪ್ರಭೇದದ ಕೊರೊನಾ ವಿರುದ್ಧವೂ ಪರಿಣಾಮಕಾರಿ -ಬಯೋಎನ್​ಟೆಕ್ ಮುಖ್ಯಸ್ಥ ಉಗುರ್​ ಸಹಿನ್

Published On - 6:12 pm, Tue, 22 December 20