ಇನ್ನೇನು ಅಂತ್ಯಕ್ರಿಯೆ ಮಾಡಬೇಕೆನ್ನುವಷ್ಟರಲ್ಲಿ ಕಣ್ಬಿಟ್ಟು, ದೊಡ್ಡದಾಗಿ ಅಳಲು ಶುರು ಮಾಡಿದ ಕೊರೊನಾ ಸೋಂಕಿತ ಮಹಿಳೆ..

ಕೊವಿಡ್​ ಸೋಂಕಿಗೆ ಒಳಗಾಗಿ ಸತ್ತೇ ಹೋದರು ಎಂದು ಭಾವಿಸಿ, ಅಂತ್ಯಕ್ರಿಯೆಗೆ ಎಲ್ಲ ಸಿದ್ಧತೆಯನ್ನು ಮಾಡಿಕೊಂಡು, ಇನ್ನೇನು ಅಂತಿಮ ವಿಧಿವಿಧಾನ ನೆರವೇರಿಸಬೇಕು..ಅಷ್ಟರಲ್ಲಿ ಕಣ್ಣುತೆರೆದರು ಈ 76ವರ್ಷದ ವೃದ್ಧೆ. ಈ ವಿಚಿತ್ರ ಘಟನೆ ನಡೆದಿದ್ದು ಮಹಾರಾಷ್ಟ್ರದ ಪುಣೆಯ ಬಾರಾಮತಿ ಎಂಬಲ್ಲಿ. ಹಿರಿಯ ಮಹಿಳೆ ಶಕುಂತಲಾ ಗಾಯಕ್​ವಾಡ್​ಗೆ ಕಳೆದ ಕೆಲವು ದಿನಗಳ ಹಿಂದೆ ಕೊವಿಡ್​ ಸೋಂಕು ತಗುಲಿತ್ತು. ಮನೆಯಲ್ಲೇ ಐಸೋಲೇಟ್​ ಆಗಿ ಚಿಕಿತ್ಸೆ ಪಡೆಯುತ್ತಿದ್ದರು. ಆದರೆ ವಯಸ್ಸಾದ ಕಾರಣದಿಂದ ಅವರ ಆರೋಗ್ಯ ದಿನೇದಿನೆ ಹದಗೆಡಲು ಶುರುವಾಯಿತು. ಇದರಿಂದ ಆತಂಕಗೊಂಡ ಕುಟುಂಬದವರು ಶಕುಂತಲಾ ಅವರನ್ನು ಬಾರಾಮತಿಯ ಆಸ್ಪತ್ರೆಗೆ ದಾಖಲಿಸಲು ತೆರಳಿದರು.

ಇದು ನಡೆದಿದ್ದು ಮೇ 10ರಂದು. ಕುಟುಂಬದವರು ಆಸ್ಪತ್ರೆಗೆ ಕರೆದುಕೊಂಡು ಹೋದರೂ ದುರದೃಷ್ಟಕ್ಕೆ ಬೆಡ್​ ಸಿಗಲಿಲ್ಲ. ಇನ್ನೊಂದು ಆಸ್ಪತ್ರೆಗೆ ಕರೆದುಕೊಂಡು ಹೋಗಲು ವಾಹನಕ್ಕೆ ಬರಹೇಳಿ, ಕಾಯುತ್ತಿದ್ದ ವೇಳೆ ಶಕುಂತಲಾ ಅವರು ಎಚ್ಚರತಪ್ಪಿದರು. ಅವರಲ್ಲಿ ಯಾವುದೇ ಚಲನೆ ಇಲ್ಲದಂತಾಯಿತು. ಇದರಿಂದಾಗಿ ಶಕುಂತಲಾ ಮೃತಪಟ್ಟಿದ್ದಾರೆಂದು ಭಾವಿಸಿದ ಕುಟುಂಬದವರು ಅವರನ್ನು ಆಸ್ಪತ್ರೆಯಿಂದ ಮನೆಗೆ ಕರೆದುಕೊಂಡು ಬಂದಿದ್ದಲ್ಲದೆ, ಸಂಬಂಧಿಕರಿಗೆ ವಿಷಯವನ್ನೂ ತಿಳಿಸಿದರು.

ಹೀಗೆ ವೃದ್ಧೆಯ ಶವವನ್ನು ಮನೆಗೆ ಕರೆದುಕೊಂಡು ಹೋಗಿ ಅಂತ್ಯಕ್ರಿಯೆಗೆ ಸಿದ್ಧಮಾಡುತ್ತಿದ್ದಾಗಲೇ ಒಮ್ಮೆಲೇ ಎಚ್ಚರಗೊಂಡ ಶಕುಂತಲಾ ದೊಡ್ಡದಾಗಿ ಅಳಲು ಶುರು ಮಾಡಿದರು. ಶಾಕ್​ಗೆ ಒಳಗಾದ ಮನೆಯವರು ಮತ್ತೆ ಅವರನ್ನು ಕರೆದುಕೊಂಡು ಆಸ್ಪತ್ರೆಗೆ ಹೋದರು. ಸದ್ಯ ಶಕುಂತಲಾರನ್ನು ಬಾರಾಮತಿಯ ಸಿಲ್ವರ್​ ಜುಬ್ಲೀ ಆಸ್ಪತ್ರೆಗೆ ದಾಖಲು ಮಾಡಲಾಗಿದ್ದು, ಅವರು ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ತಿಳಿದುಬಂದಿದೆ.

ಇದನ್ನೂ ಓದಿ: ತೌಕ್ತೆ ಚಂಡಮಾರುತದ ಪ್ರಭಾವ ಚಿಕ್ಕಮಗಳೂರು, ಹಾಸನ, ಕೊಡಗು ಜಿಲ್ಲೆಗಳಿಗೂ ವ್ಯಾಪಿಸುವ ಸಾಧ್ಯತೆ: ಗೃಹ ಸಚಿವ ಬಸವರಾಜ್ ಬೊಮ್ಮಾಯಿ

Covid 19 infected elderly woman opened her eyes before cremation in Baramati Pune