ಭಾರತದ ಅತ್ಯಂತ ತೂಕದ ಉಪಗ್ರಹ ಹೊತ್ತು ಯಶಸ್ವಿಯಾಗಿ ನಭಕ್ಕೆ ಹಾರಿದ ಇಸ್ರೋ ‘ಬಾಹುಬಲಿ’ ರಾಕೆಟ್

ಶ್ರೀಹರಿಕೋಟ, ನವೆಂಬರ್ 2: ಭಾರತದಲ್ಲಿ ಇದೂವರೆಗೂ ನಿರ್ಮಿಸಲಾಗಿರುವ ಸೆಟಿಲೈಟ್​ಗಳಲ್ಲಿ ಅತ್ಯಂತ ಭಾರದ್ದೆನ್ನಲಾದ ಸಿಎಂಎಸ್-03 ಕಮ್ಯೂನಿಕೇಶನ್ ಸೆಟಿಲೈಟ್ (CMS-03 satellite) ಅನ್ನು ಯಶಸ್ವಿಯಾಗಿ ನಭಕ್ಕೆ ಸಾಗಿಸಲಾಗಿದೆ. ಇಸ್ರೋ ನಿರ್ಮಿಸಿರುವ, ಬಾಹುಬಲಿ ಎಂದೇ ಖ್ಯಾತವಾಗಿರುವ 43.5 ಮೀಟರ್ ಎತ್ತರದ ಎಲ್​ವಿಎಂ3-ಎಂ4 ರಾಕೆಟ್​ನಲ್ಲಿ (LVM3-M4 rocket) ಸಿಎಂಎಸ್-03 ಉಪಗ್ರಹವನ್ನು ಕೂರಿಸಿ ಆಗಸಕ್ಕೆ ಕಳುಹಿಸಲಾಗಿದೆ. ಆಂಧ್ರದ ಶ್ರೀಹರಿಕೋಟದಲ್ಲಿರುವ ಸತೀಶ್ ಧವನ್ ಸ್ಪೇಸ್ ಸೆಂಟರ್​ನಲ್ಲಿ ಸಂಜೆ 5:26ಕ್ಕೆ ಈ ಉಡಾವಣೆ ಮಾಡಲಾಗಿದೆ.

ಸಂವಹನ ಉಪಗ್ರಹವಾದ ಸಿಎಂಎಸ್-03 ಬರೋಬ್ಬರಿ 4,410 ಕಿಲೋ ತೂಕದ್ದಾಗಿದೆ. ಇದನ್ನು ಜಿಟಿಒ (ಜಿಯೋಸಿಂಕ್ರೊನಸ್ ಟ್ರಾನ್ಸ್​ಫರ್ ಆರ್ಬಿಟ್) ಕಕ್ಷೆಗೆ ಸೇರಿಸಲಾಗಿದೆ. ಬಹಳ ಕಡಿಮೆ ವೆಚ್ಚದಲ್ಲಿ ಈ ಭಾರೀ ತೂಕದ ಉಪಗ್ರಹವನ್ನು ನಭಕ್ಕೆ ಸಾಗಿಸಲಾಗಿದೆ.

ಇದನ್ನೂ ಓದಿ: ಜೇನುತುಪ್ಪಗೆ ದೊಡ್ಡ ಬೇಡಿಕೆ; ಜೇನುಸಾಕಣೆಗೆ ಕೇಂದ್ರದಿಂದ ಉತ್ತೇಜನ; ‘ಸಿಹಿ ಕ್ರಾಂತಿ’ ಹಾದಿಯಲ್ಲಿ ಭಾರತ

ದೊಡ್ಡ ತೂಕದ ಉಪಗ್ರಹಗಳನ್ನು ಕಕ್ಷೆಗೆ ಕಳುಹಿಸಲು ಇಸ್ರೋ ಫ್ರಾನ್ಸ್ ದೇಶದ ಏರಿಯೇನ್​ಸ್ಪೇಸ್ ಕಂಪನಿಯ ರಾಕೆಟ್​ಗಳನ್ನು ಬಳಸುತ್ತಿತ್ತು. ಫ್ರೆಂಚ್ ಗಯಾನ ಪ್ರದೇಶದಲ್ಲಿ ಅವುಗಳನ್ನು ಉಡಾವಣೆ ಮಾಡಲಾಗುತ್ತಿತ್ತು. ಈಗ ಭಾರತದ ನೆಲದಲ್ಲಿ ಉಡಾವಣೆಯಾದ ಅತ್ಯಂತ ಹೆಚ್ಚು ತೂಕದ ಸೆಟಿಲೈಟ್ ಎನ್ನುವ ದಾಖಲೆಯನ್ನು ಸಿಎಂಎಸ್-03 ಬರೆದಿದೆ.

ಸಿಎಂಎಸ್-03 ಸಂವಹನ ಉಪಗ್ರಹದ ವಿಶೇಷತೆಗಳೇನು?

ಸಿಎಂಎಸ್-03 ಒಂದು ಕಮ್ಯೂನಿಕೇಶನ್ ಸೆಟಿಲೈಟ್ ಆಗಿದ್ದು, ಟೆಲಿಕಾಂ, ಇಂಟರ್ನೆಟ್, ಬ್ರಾಡ್​ಕ್ಯಾಸ್ಟಿಂಗ್ ಸೇವೆಗಳನ್ನು ಬಲಪಡಿಸಲು ಸಹಾಯವಾಗುತ್ತದೆ. ಮಿಲಿಟರಿ ಕಣ್ಗಾವಲು ನಡೆಸುವುದು ಸೇರಿದಂತೆ ಹಲವು ಕಾರ್ಯಗಳಿಗೆ ಸಿಎಂಎಸ್-03 ಸೇವೆಯನ್ನು ಬಳಸಿಕೊಳ್ಳಲಾಗಬಹುದು.

ಇದನ್ನೂ ಓದಿ: ಆರ್​ಜೆಡಿ ಕಾಂಗ್ರೆಸ್ ತಲೆಗೆ ಬಂದೂಕಿಟ್ಟು, ಮುಖ್ಯಮಂತ್ರಿ ಅಭ್ಯರ್ಥಿಯನ್ನು ಘೋಷಿಸಿದೆ: ನರೇಂದ್ರ ಮೋದಿ

ಚಂದ್ರಯಾನ-3 ಉಪಗ್ರಹ ಹೊತ್ತು ಹೋಗಿದ್ದ ಬಾಹುಬಲಿ ರಾಕೆಟ್

ಸಿಎಂಎಸ್-03 ಸೆಟಿಲೈಟ್ ಅನ್ನು ಹೊತ್ತು ಹೋದ ಎಲ್​ವಿಎಂ-3 ಬಾಬುಬಲಿ ರಾಕೆಟ್ ಎಂದೇ ಹೆಸರಾಗಿದೆ. ಹೆಚ್ಚು ತೂಕದ ಸೆಟಿಲೈಟ್​ಗಳನ್ನು ಹೊತ್ತು ಹೋಗುವ ಸಾಮರ್ಥ್ಯ ಇದಕ್ಕಿದೆ. 4,000 ಕಿಲೋವರೆಗಿನ ಸೆಟಿಲೈಟ್​ಗಳನ್ನು ಇದು ಜಿಟಿಒ ಕಕ್ಷೆಗೆ ಸೇರಿಸಬಲ್ಲುದು. ಕೆಳ ಭೂಕಕ್ಷೆಯಾದರೆ 8,000 ಕಿಲೋ ತೂಕದ ಸೆಟಿಲೈಟ್​ಗಳನ್ನೂ ಇದು ಹೊತ್ತೊಯ್ಯಬಲ್ಲುದು.

2023ರಲ್ಲಿ ಚಂದ್ರನ ದಕ್ಷಿಣ ಧ್ರುವಕ್ಕೆ ಹೋದ ಚಂದ್ರಯಾನ-3 ಸೆಟಿಲೈಟ್ ಅನ್ನು ಆಗಸಕ್ಕೆ ಸೇರಿಸಿದ್ದು ಇದೇ ಎಲ್​ವಿಎಂ-3 ರಾಕೆಟ್ ಎಂಬುದು ವಿಶೇಷ. ಅದಕ್ಕೂ ಹಿಂದಿನ ವರ್ಷದಲ್ಲಿ (2022) 72 ಸೆಟಿಲೈಟ್​ಗಳನ್ನು ಹೊತ್ತೊಯ್ದು ಕೆಳ ಭೂಕಕ್ಷೆಗೆ ಸೇರಿಸಿತ್ತು ಈ ರಾಕೆಟ್.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ