ಮಸೀದಿಗಳಲ್ಲಿನ ಲೌಡ್ ಸ್ಪೀಕರ್ ತೆಗೆದುಹಾಕಲು ಮೇ3ರ ವರೆಗೆ ಗಡುವು; ದೇಶಭಕ್ತ ಹಿಂದೂಗಳು ಬೆಂಬಲಿಸುವಂತೆ ಕರೆ ನೀಡಿದ ಎಂಎನ್ಎಸ್

ಮುಂಬೈ: ಮಹಾರಾಷ್ಟ್ರ ನವನಿರ್ಮಾಣ ಸೇನೆಯ (Maharashtra Navnirman Sena) ಮುಖ್ಯಸ್ಥ ರಾಜ್ ಠಾಕ್ರೆ (Raj Thackeray) ಅವರು ತಮ್ಮ ಹಿಂದುತ್ವದ ಅಜೆಂಡಾವನ್ನು ಮತ್ತಷ್ಟು ಮುಂದಿಟ್ಟುಕೊಂಡು, ಮಸೀದಿಗಳಲ್ಲಿ ಧ್ವನಿವರ್ಧಕಗಳ ವಿಷಯವು ಸಾಮಾಜಿಕ ಸಮಸ್ಯೆಯಾಗಿದೆ, ಧಾರ್ಮಿಕ ವಿಷಯವಲ್ಲ ಎಂದು ಪುನರುಚ್ಚರಿಸಿದರು. ತಮ್ಮ ಧರ್ಮವನ್ನು ಕಾನೂನಿಗಿಂತ ಹೆಚ್ಚು ಮುಖ್ಯವೆಂದು ಪರಿಗಣಿಸುವ ಜನರಿಗೆ “ತಕ್ಕ ಉತ್ತರ” ನೀಡುವಂತೆ ಎಲ್ಲಾ “ದೇಶಭಕ್ತ” ಹಿಂದೂಗಳಿಗೆ ಠಾಕ್ರೆ ಕರೆ ನೀಡಿದ್ದಾರೆ. “ಕೆಲವರು ಮಸೀದಿಗಳಲ್ಲಿನ (mosques) ಸ್ಪೀಕರ್ ಸಮಸ್ಯೆಯನ್ನು ಧಾರ್ಮಿಕ ವಿಷಯವೆಂದು ಪರಿಗಣಿಸುತ್ತಿದ್ದಾರೆ ಆದರೆ ಅದು ಹಾಗಲ್ಲ. ಇದನ್ನು ಸಾಮಾಜಿಕ ಸಮಸ್ಯೆಯಾಗಿ ನೋಡಬೇಕು ಎಂದು ಸುದ್ದಿಗಾರರೊಂದಿಗೆ ಮಾತನಾಡಿದ ಠಾಕ್ರೆ ಹೇಳಿದ್ದಾರೆ. ತಮ್ಮ ಪಕ್ಷವು ಮೇ 1 ರಂದು ಔರಂಗಾಬಾದ್‌ನಲ್ಲಿ ಸಾರ್ವಜನಿಕ ರ್ಯಾಲಿಯನ್ನು ನಡೆಸಲಿದೆ. ನಾನು ಮತ್ತು ಪಕ್ಷದ ಸಹೋದ್ಯೋಗಿಗಳು ಜೂನ್ 5 ರಂದು ಅಯೋಧ್ಯೆಯಲ್ಲಿ ನಿರ್ಮಾಣ ಹಂತದಲ್ಲಿರುವ ರಾಮಮಂದಿರಕ್ಕೆ ಭೇಟಿ ನೀಡಲಿದ್ದೇವೆ ಎಂದು ಠಾಕ್ರೆ ಹೇಳಿದ್ದಾರೆ. ಶಿವಸೇನೆ ನಾಯಕ ಮತ್ತು ಮಹಾರಾಷ್ಟ್ರ ಸಚಿವ ಆದಿತ್ಯ ಠಾಕ್ರೆ ಅವರು ಕೂಡಾ ಮೇ ತಿಂಗಳಲ್ಲಿ ಅಯೋಧ್ಯೆಗೆ ಭೇಟಿ ನೀಡುವುದಾಗಿ ಘೋಷಿಸಿದ್ದಾರೆ. “ಮಸೀದಿಗಳಲ್ಲಿ ಸ್ಪೀಕರ್‌ಗಳ ದೊಡ್ಡ ಶಬ್ದವು ಕೇವಲ ಹಿಂದೂಗಳಿಗೆ ಮಾತ್ರವಲ್ಲದೆ ಮುಸ್ಲಿಮರಿಗೂ ಸಮಸ್ಯೆಗಳನ್ನು ಸೃಷ್ಟಿಸುತ್ತಿದೆ. ಈ ಸಮಸ್ಯೆ ಬಹಳ ದಿನಗಳಿಂದ ಮುಂದುವರಿದಿದೆ. ನೀವು ದಿನಕ್ಕೆ ಐದು ಬಾರಿ ಸ್ಪೀಕರ್ ನುಡಿಸಲು ಹೋದರೆ, ನಾವು ಮಸೀದಿಗಳ ಮುಂದೆ ಹನುಮಾನ್ ಚಾಲೀಸಾವನ್ನು ಅದೇ ರೀತಿಯಲ್ಲಿ ನುಡಿಸುತ್ತೇವೆ.  ದೇಶದ ಎಲ್ಲಾ ದೇಶಭಕ್ತ ಹಿಂದೂ ಸಮುದಾಯದವರು ಸಿದ್ಧರಾಗಿರಬೇಕೆಂಬುದು ನನ್ನ ವಿನಂತಿ. ರಂಜಾನ್ ಹಬ್ಬ ಇರುವುದರಿಂದ ನಾನು ಏನನ್ನೂ ಹೇಳುತ್ತಿಲ್ಲ. ಅವರು ಮೇ 3 ರೊಳಗೆ ಅರ್ಥಮಾಡಿಕೊಳ್ಳಲು ಸಾಧ್ಯವಾಗದಿದ್ದರೆ ಮತ್ತು ಕಾನೂನು ಮತ್ತು ಸುಪ್ರೀಂ ಕೋರ್ಟ್‌ಗಿಂತ ತಮ್ಮ ಧರ್ಮವನ್ನು ಹೆಚ್ಚು ಮುಖ್ಯವೆಂದು ಪರಿಗಣಿಸಿದರೆ, ಅವರಿಗೆ ಸೂಕ್ತ ಉತ್ತರವನ್ನು ನೀಡಬೇಕಾಗಿದೆ ಎಂದು ಠಾಕ್ರೆ ಹೇಳಿದರು.

ಮಹಾರಾಷ್ಟ್ರ ಮತ್ತು ದೇಶದಲ್ಲಿ ಗಲಭೆಗಳು ನಮಗೆ ಬೇಕಾಗಿಲ್ಲ. ನಾವು ಯಾವುದೇ ರೀತಿಯ ಹಿಂಸಾಚಾರವನ್ನು ಬಯಸುವುದಿಲ್ಲ ಮತ್ತು ಶಾಂತಿಗೆ ಅಡ್ಡಿಪಡಿಸಲು ಬಯಸುವುದಿಲ್ಲ. ಮುಸ್ಲಿಂ ಸಮುದಾಯದವರು ಮಾನವೀಯ ನೆಲೆಯಲ್ಲಿ ಸಮಸ್ಯೆಯನ್ನು ಪರಿಗಣಿಸಬೇಕು. ಅವರ ಪ್ರಾರ್ಥನೆಗೆ ನಾವು ಯಾವುದೇ ರೀತಿಯ ವಿರೋಧವನ್ನು ಹೊಂದಿಲ್ಲ ಆದರೆ ಅವರು ಇತರರನ್ನು ಅವರ ಪ್ರಾರ್ಥನೆಗಳನ್ನು ಕೇಳುವಂತೆ ಮಾಡುತ್ತಿದ್ದರೆ, ಅವರು ನಮ್ಮ ಪ್ರಾರ್ಥನೆಯನ್ನು ಸಹ ಕೇಳಬೇಕಾಗುತ್ತದೆ.

ಹನುಮಾನ್ ಚಾಲೀಸಾವನ್ನು ಪಠಿಸಿದ್ದಕ್ಕಾಗಿ ತಮ್ಮ ಪಕ್ಷದ ಕಾರ್ಯಕರ್ತರ ವಿರುದ್ಧದ ಕ್ರಮದ ಕುರಿತು, ಮಾತನಾಡಿದ ಎಂಎನ್ಎಸ್ ಮುಖ್ಯಸ್ಥರು ಮಸೀದಿಗಳಿಂದ “ಅಕ್ರಮ” ಧ್ವನಿವರ್ಧಕಗಳನ್ನು ತೆಗೆದುಹಾಕದಿದ್ದರೆ ಅವರ ಕೃತ್ಯಗಳನ್ನು ಕಾನೂನುಬಾಹಿರ ಎಂದು ಕರೆಯಲಾಗುವುದಿಲ್ಲ ಎಂದು ಹೇಳಿದರು. “ಶಬ್ದ ಮಟ್ಟ ಮತ್ತು ಶಾಂತಿಯನ್ನು ಉಲ್ಲಂಘಿಸುವವರಿಗೆ ಅನುಮತಿ ನಿರಾಕರಿಸಬೇಕು ಎಂದು ಸುಪ್ರೀಂ ಕೋರ್ಟ್ ಆದೇಶಿಸಿದೆ. ನಾವು ಪರಿಸ್ಥಿತಿಯನ್ನು ಅರ್ಥಮಾಡಿಕೊಳ್ಳಲು ಹೋಗುವುದಿಲ್ಲವೇ? ಈ ವಿಚಾರವನ್ನು ಮುಸ್ಲಿಂ ಸಮುದಾಯವೂ ಅರ್ಥ ಮಾಡಿಕೊಳ್ಳಬೇಕು. ದೇಶಕ್ಕಿಂತ ಧರ್ಮ ಮುಖ್ಯವಾಗಲಾರದು. ಧ್ವನಿವರ್ಧಕಗಳಿಂದ ನಾಗರಿಕರು ಸಮಸ್ಯೆ ಎದುರಿಸುತ್ತಿದ್ದಾರೆ ಎಂಬುದನ್ನು ಅರಿತುಕೊಳ್ಳಬೇಕು’ ಎಂದರು.

ಮೇ 1 ರ ಮೆರವಣಿಗೆಯಲ್ಲಿ ಯಾವುದೇ ಹಿಂಸಾಚಾರವನ್ನು ಸಹಿಸಲಾಗುವುದಿಲ್ಲ ಎಂದು ಠಾಕ್ರೆ ಹೇಳಿದರು.
ಶನಿವಾರ, ಠಾಕ್ರೆ ಅವರು ದೇವಸ್ಥಾನದಲ್ಲಿ ಹನುಮ ಜಯಂತಿಯ ಸಂದರ್ಭದಲ್ಲಿ ತಮ್ಮ ಪಕ್ಷದ ನಗರ ಘಟಕದಿಂದ ಮಹಾ ಆರತಿ ಮತ್ತು ಹನುಮಾನ್ ಚಾಲೀಸಾ ಪಠಣದಲ್ಲಿ ಪಾಲ್ಗೊಂಡರು. ಆಡಳಿತಾರೂಢ ಎನ್‌ಸಿಪಿಯು ಉಪ ಮುಖ್ಯಮಂತ್ರಿ ಅಜಿತ್ ಪವಾರ್, ಪಕ್ಷದ ರಾಜ್ಯ ಮುಖ್ಯಸ್ಥ ಜಯಂತ್ ಪಾಟೀಲ್ ಮತ್ತು ಸಂಸದೆ ಸುಪ್ರಿಯಾ ಸುಳೆ ಅವರ ಸಮ್ಮುಖದಲ್ಲಿ ಇಫ್ತಾರ್ ಕೂಟದೊಂದಿಗೆ ಮಹಾ ಆರತಿ ಮತ್ತು ಹನುಮಾನ್ ಚಾಲೀಸಾ ವಾಚನ ಮಾಡುವ ಮೂಲಕ ಎನ್​​ಸಿಪಿ ಕಾರ್ಯಕ್ರಮ ಆಯೋಜಿಸಿತ್ತು.

ಏಪ್ರಿಲ್ 2 ರಂದು ಎಂಎನ್‌ಎಸ್ ಮುಖ್ಯಸ್ಥರು ಮಸೀದಿಗಳಿಂದ ಧ್ವನಿವರ್ಧಕಗಳನ್ನು ತೆಗೆದುಹಾಕುವಂತೆ ಸರ್ಕಾರವನ್ನು ಒತ್ತಾಯಿಸಿದರು ಮತ್ತು ಹಾಗೆ ಮಾಡಲು ವಿಫಲವಾದರೆ, ಅವರ ಪಕ್ಷವು ಮಸೀದಿಗಳ ಮುಂದೆ ಧ್ವನಿವರ್ಧಕಗಳನ್ನು ಹಾಕಿ ಹನುಮಾನ್ ಚಾಲೀಸಾ ನುಡಿಸುತ್ತದೆ ಎಂದು ಎಚ್ಚರಿಸಿದರು. ಈ ಹೇಳಿಕೆಯು ವಿವಾದವನ್ನು ಹುಟ್ಟುಹಾಕಿದ್ದು ಮುಸ್ಲಿಂ ಸದಸ್ಯರು ಎಂಎನ್ಎಸ್ ತೊರೆಯಲು ಕಾರಣವಾಯಿತು.

ಇದನ್ನೂ ಓದಿ: ಬೊಚಹಾಂ ವಿಧಾನಸಭಾ ಉಪಚುನಾವಣೆಯಲ್ಲಿ ಸೋಲು; ಜನರೇ ಮಾಲೀಕರು ಎಂದು ಪ್ರತಿಕ್ರಿಯಿಸಿದ ನಿತೀಶ್ ಕುಮಾರ್