ಬಹುತೇಕ ರೈತ ಸಂಘಟನೆಗಳು 3 ಕೃಷಿ ಕಾನೂನುಗಳನ್ನು ಬೆಂಬಲಿಸಿವೆ: ಸುಪ್ರೀಂಕೋರ್ಟ್ ನೇಮಿಸಿದ ಸಮಿತಿಯ ವರದಿಯಿಂದ ಬಹಿರಂಗ

ದೆಹಲಿ: ಬಹುತೇಕ ರೈತ ಸಂಘಟನೆಗಳು ಕೃಷಿ ಕಾನೂನುಗಳ (farm laws) ಅಧ್ಯಯನಕ್ಕಾಗಿ ಸುಪ್ರೀಂಕೋರ್ಟ್ (Supreme Court) ನೇಮಿಸಿದ ಸಮಿತಿ ಜತೆ ಸಂವಾದ ನಡೆಸಿದ್ದು ಇವುಗಳು  ಶಾಸನವನ್ನು ಬೆಂಬಲಿಸಿದೆ ಎಂದು ಸೋಮವಾರ ಸಾರ್ವಜನಿಕವಾಗಿ ಪ್ರಕಟಿಸಿದ ಸಮಿತಿಯ ವರದಿ ಬಹಿರಂಗಪಡಿಸಿದೆ.  ರೈತ ಮುಖಂಡ ಮತ್ತು ಸಮಿತಿಯ ಸದಸ್ಯ ಅನಿಲ್ ಘನವಟ (Anil Ghanwat)ವರದಿಯನ್ನು ಬಿಡುಗಡೆ ಮಾಡಿದ್ದು ಸಮಿತಿಯ ಅವಲೋಕನಗಳು ಕಾನೂನುಗಳ ಮೇಲೆ ಅದರ ಪ್ರಭಾವದ ದೃಷ್ಟಿಯಿಂದ ಸ್ವಲ್ಪ ಪ್ರಾಮುಖ್ಯತೆಯನ್ನು ಹೊಂದಿದ್ದರೂ, ಅವುಗಳನ್ನು ಈಗಾಗಲೇ ರದ್ದುಗೊಳಿಸಲಾಗಿದೆ. ಇದು ಸಾಮಾನ್ಯವಾಗಿ ನೀತಿ ನಿರೂಪಕರು ಮತ್ತು ರೈತರಿಗೆ ಗಮನಾರ್ಹವಾದುದಾಗಿದೆ ಎಂದಿದ್ದಾರೆ. ಸಮಿತಿಯ ಇತರ ಇಬ್ಬರು ಸದಸ್ಯರಾದ ಅಶೋಕ್ ಗುಲಾಟಿ ಕೃಷಿ ಅರ್ಥಶಾಸ್ತ್ರಜ್ಞ ಮತ್ತು ಕೃಷಿ ವೆಚ್ಚಗಳು ಮತ್ತು ಬೆಲೆಗಳ ಆಯೋಗದ ಮಾಜಿ ಅಧ್ಯಕ್ಷರು ಮತ್ತು ಕೃಷಿ ಅರ್ಥಶಾಸ್ತ್ರಜ್ಞ ಡಾ. ಪರಮೋದ್ ಕುಮಾರ್ ಜೋಶಿ, ದಕ್ಷಿಣ ಏಷ್ಯಾ, ಅಂತರರಾಷ್ಟ್ರೀಯ ಆಹಾರ ನೀತಿ ಸಂಶೋಧನಾ ಸಂಸ್ಥೆ ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು. ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರವು ರೈತರ ಉತ್ಪನ್ನ ವ್ಯಾಪಾರ ಮತ್ತು ವಾಣಿಜ್ಯ (ಉತ್ತೇಜನೆ ಮತ್ತು ಅನುಕೂಲ) ಕಾಯಿದೆ, ರೈತರ (ಸಬಲೀಕರಣ ಮತ್ತು ರಕ್ಷಣೆ) ಬೆಲೆ ಭರವಸೆ ಮತ್ತು ಕೃಷಿ ಸೇವೆಗಳ ಕಾಯಿದೆ ಮತ್ತು ಅಗತ್ಯ ಸರಕುಗಳ (ತಿದ್ದುಪಡಿ) ಕಾಯಿದೆ 2020 ಎಂಬ ಮೂರು ಕೃಷಿ ಕಾನೂನುಗಳನ್ನು ತಂದಿತ್ತು. ಇದರ ವಿರುದ್ಧ ರೈತರು ನಿರಂತರ  ಪ್ರತಿಭಟನೆ ನಡೆಸಿದ್ದು ನವೆಂಬರ್ 2021 ರಲ್ಲಿ ಹಿಂಪಡೆಯಲಾಯಿತು. ಅರ್ಜಿಗಳ ವಿಚಾರಣೆಯ ಸಂದರ್ಭದಲ್ಲಿ ಸುಪ್ರೀಂ ಕೋರ್ಟ್ ಧರಣಿ ನಿರತ ರೈತರೊಂದಿಗೆ ತೊಡಗಿಸಿಕೊಳ್ಳಲು ಮತ್ತು ಕಾನೂನುಗಳನ್ನು ಅಧ್ಯಯನ ಮಾಡಲು ಮೂರು ಸದಸ್ಯರ ಸಮಿತಿಯನ್ನು ನೇಮಿಸಿತ್ತು.

ವರದಿಯ ಪ್ರಕಾರ ಸಮಿತಿಯು ಆಂದೋಲನ ನಡೆಸುತ್ತಿರುವವರು ಸೇರಿದಂತೆ 266 ರೈತ ಸಂಘಟನೆಗಳನ್ನು ಸಂಪರ್ಕಿಸಿದೆ. ಅದೇ ರೀತಿ ಸಮಿತಿಯು ಮೀಸಲಾದ ಪೋರ್ಟಲ್‌ನಲ್ಲಿ 19,027 ಪ್ರಾತಿನಿಧ್ಯಗಳನ್ನು ಮತ್ತು 1,520 ಇಮೇಲ್‌ಗಳನ್ನು ಸ್ವೀಕರಿಸಿದೆ. ಸಮಿತಿಯು ಮಾರ್ಚ್ 19, 2021 ರಂದು ಸುಪ್ರೀಂಕೋರ್ಟ್‌ಗೆ ಮುಚ್ಚಿದ ಲಕೋಟೆಯಲ್ಲಿ ವರದಿಯನ್ನು ಸಲ್ಲಿಸಿತ್ತು. ಘನವಟ ಅವರು ಮುಖ್ಯ ನ್ಯಾಯಮೂರ್ತಿಗಳಿಗೆ ಮೂರು ಬಾರಿ ಪತ್ರ ಬರೆದಿದ್ದು, ವರದಿಯನ್ನು ಬಿಡುಗಡೆ ಮಾಡುವಂತೆ ಪ್ರಧಾನಿ ಮೋದಿಯವರಿಗೆ ಪತ್ರ ಬರೆದಿದ್ದರು. ವರದಿಯನ್ನು ಸಲ್ಲಿಸಿ ಸೋಮವಾರಕ್ಕೆ ಒಂದು ವರ್ಷವಾಗಿದ್ದರಿಂದ ಘನವಟ ಅದನ್ನು ಸಾರ್ವಜನಿಕಗೊಳಿಸಲು ನಿರ್ಧರಿಸಿದರು. 3.83 ಕೋಟಿ ರೈತರನ್ನು ಪ್ರತಿನಿಧಿಸುವ 73 ಕೃಷಿ ಸಂಸ್ಥೆಗಳು ನೇರವಾಗಿ ಅಥವಾ ವಿಡಿಯೊ ಲಿಂಕ್‌ಗಳ ಮೂಲಕ ಅವರೊಂದಿಗೆ ಸಂವಾದ ನಡೆಸಿವೆ ಎಂದು ಇಂಡಿಯನ್ ಎಕ್ಸ್‌ಪ್ರೆಸ್‌ ವರದಿ ಮಾಡಿದೆ.

73 ಕೃಷಿ ಸಂಸ್ಥೆಗಳ ಪೈಕಿ 3.3 ಕೋಟಿ ರೈತರನ್ನು ಒಳಗೊಂಡ 61 ಸಂಘಟನೆಗಳು ಕಾನೂನನ್ನು ಬೆಂಬಲಿಸಿವೆ. 51 ಲಕ್ಷ ರೈತರನ್ನು ಪ್ರತಿನಿಧಿಸುವ ನಾಲ್ಕು ಸಂಘಟನೆಗಳು ಇದನ್ನು ವಿರೋಧಿಸಿದ್ದವು. 3.6 ಲಕ್ಷ ರೈತರನ್ನೊಳಗೊಂಡ ಏಳು ಸಂಸ್ಥೆಗಳು ತಿದ್ದುಪಡಿಗಳನ್ನು ಬಯಸಿದ್ದವು. ಆದಾಗ್ಯೂ ರೈತ ಸಂಘಟನೆಗಳೊಂದಿಗಿನ ಈ ಸಂವಾದ ಸೆಷನ್‌ಗಳಲ್ಲಿ ದೆಹಲಿಯ ಪರಿಧಿಯಲ್ಲಿ ಆಂದೋಲನ ನಡೆಸುತ್ತಿರುವ ರೈತ ಸಂಘಟನೆಗಳು ಸಮಿತಿಗೆ ಪುನರಾವರ್ತಿತ ಆಹ್ವಾನಗಳನ್ನು ಕಳುಹಿಸಿದ್ದರೂ ಸಹ ಸಮಿತಿಯೊಂದಿಗೆ ಚರ್ಚೆಗೆ ಸೇರಲಿಲ್ಲ ಎಂಬುದನ್ನು ಗಮನಿಸಬಹುದು. ಸಂಸ್ಥೆಗಳು ಸಮಿತಿಯ ಮುಂದೆ ಹಾಜರಾಗಲು ಸಿದ್ಧರಿಲ್ಲ ಮತ್ತು ಸರ್ಕಾರದೊಂದಿಗೆ ದ್ವಿಪಕ್ಷೀಯ ಚರ್ಚೆಗೆ ಆದ್ಯತೆ ನೀಡುತ್ತವೆ ಎಂದು ಸಮಿತಿಗೆ ತಿಳಿಸಲಾಯಿತು. ಸಮಿತಿಯು ತನ್ನ ಚರ್ಚೆಗಳಲ್ಲಿ ಭಾಗವಹಿಸದಿರುವ ಅವರ ನಿರ್ಧಾರವನ್ನು ಗೌರವಿಸುತ್ತದೆ. ಆದಾಗ್ಯೂ, ಅವರ ಕಳವಳಗಳು, ಮಾಧ್ಯಮ ವರದಿಗಳು ಮತ್ತು ಸರ್ಕಾರದೊಂದಿಗಿನ ಸಂವಾದಗಳಿಂದ ಖಚಿತವಾದಂತೆ, ಸಮಿತಿಯು ತನ್ನ ಶಿಫಾರಸುಗಳನ್ನು ರೂಪಿಸುವಾಗ ಮನಸ್ಸಿನಲ್ಲಿಟ್ಟುಕೊಳ್ಳುತ್ತದೆ ”ಎಂದು ವರದಿ ಹೇಳಿದೆ.

ಮೀಸಲಾದ ಪೋರ್ಟಲ್‌ನಲ್ಲಿ ಸ್ವೀಕರಿಸಿದ ಸುಮಾರು ಮೂರನೇ ಎರಡರಷ್ಟು ಸಲಹೆಗಳು ಕಾನೂನುಗಳನ್ನು ಬೆಂಬಲಿಸಿದವು. ಇದರ ಜತೆಗೆ ಶೇಕಡಾ 27.5 ರಷ್ಟು ರೈತರು ಮಾತ್ರ ತಮ್ಮ ಉತ್ಪನ್ನಗಳನ್ನು ಸರ್ಕಾರ ಘೋಷಿಸಿದ ಕನಿಷ್ಠ ಬೆಂಬಲ ಬೆಲೆಗೆ (MSP) ಮಾರಾಟ ಮಾಡಿದ್ದಾರೆ ಮತ್ತು ಅವರು ಮುಖ್ಯವಾಗಿ ಛತ್ತೀಸ್‌ಗಢ, ಪಂಜಾಬ್ ಮತ್ತು ಮಧ್ಯಪ್ರದೇಶದಲ್ಲಿದ್ದಾರೆ ಎಂದು ವರದಿ ತಿಳಿಸಿದೆ.

ಸಮಿತಿಯು ಶಿಫಾರಸುಗಳನ್ನು ಪ್ರಸ್ತಾಪಿಸಿದ್ದು ಅದರಲ್ಲಿ ಒಂದು ಭಾರತೀಯ ಆಹಾರ ನಿಗಮದಿಂದ (FCI) ಗೋಧಿ ಮತ್ತು ಭತ್ತದ ಸಂಗ್ರಹಣೆಯನ್ನು ಮಿತಿಗೊಳಿಸುವುದು ಕೂಡಾ ಒಂದು. ದೊಡ್ಡ ಪ್ರಮಾಣದ ಖರೀದಿಗಳ ಬದಲಿಗೆ, ಎಣ್ಣೆಕಾಳುಗಳು ಮತ್ತು ದ್ವಿದಳ ಧಾನ್ಯಗಳ ಸಂಗ್ರಹಣೆಯ ವಿಷಯದಲ್ಲಿ ರಾಷ್ಟ್ರೀಯ ಸಹಕಾರಿ ಕೃಷಿ ಮಾರುಕಟ್ಟೆ ಒಕ್ಕೂಟ (NAFED) ಅಳವಡಿಸಿಕೊಂಡ ಮಾದರಿಯನ್ನು ಅಳವಡಿಸಿಕೊಳ್ಳಬಹುದು ಎಂದು ಸಮಿತಿಯು ಭಾವಿಸಿದೆ. ರಾಷ್ಟ್ರೀಯ ಸಹಕಾರಿ ಕೃಷಿ ಮಾರುಕಟ್ಟೆ ಒಕ್ಕೂಟ ರೈತರಿಂದ ವೈಯಕ್ತಿಕ ಸಂಗ್ರಹಣೆಗೆ ಮಿತಿಯೊಂದಿಗೆ ಒಟ್ಟು ಉತ್ಪನ್ನದ 25 ಪ್ರತಿಶತವನ್ನು ಸಂಗ್ರಹಿಸುತ್ತದೆ. ಸಾರ್ವಜನಿಕ ವಿತರಣಾ ವ್ಯವಸ್ಥೆಯಲ್ಲಿ ವಿವಿಧ ರೀತಿಯ ಬದಲಾವಣೆಗಳನ್ನು ಸಹ ಸೂಚಿಸಲಾಗಿದೆ.

ಸಮಿತಿಯ ವರದಿಗೆ ಸಂಬಂಧಿಸಿದಂತೆ ಇದು ರೈತರಿಗೆ ಮತ್ತು ನೀತಿ ನಿರೂಪಕರಿಗೆ ಉತ್ತಮ ಶೈಕ್ಷಣಿಕ ಮೌಲ್ಯವನ್ನು ಹೊಂದಿದೆ ಮತ್ತು ಆದ್ದರಿಂದ ಅದನ್ನು ಸಾರ್ವಜನಿಕಗೊಳಿಸಲು ನಿರ್ಧರಿಸಿದ್ದೇನೆ ಎಂದು ಘನವಟ ಹೇಳಿದರು.

ಮುಖ್ಯವಾಗಿ ಈ ಕಾನೂನುಗಳ ವಿರುದ್ಧ ಪ್ರತಿಭಟಿಸಿದ ಉತ್ತರ ಭಾರತದ ರೈತರು ಈಗ ತಮ್ಮ ಆದಾಯವನ್ನು ಹೆಚ್ಚಿಸುವ ಅವಕಾಶವನ್ನು ಕಳೆದುಕೊಳ್ಳುತ್ತಾರೆ ಎಂದು ಅವರು ಹೇಳಿದರು. ಘನವಟ ಪ್ರಕಾರ ಪಂಜಾಬ್ ಚುನಾವಣೆಯಲ್ಲಿ ಬಿಜೆಪಿ ಕಳಪೆ ಪ್ರದರ್ಶನಕ್ಕೆ ಕಾರಣವಾಗಿದ್ದು ಕೃಷಿ ಕಾನೂನಿನ ರದ್ದತಿ ಆಗಿದೆ.

ಇದನ್ನೂ ಓದಿ: ತಮಿಳುನಾಡು: ಸರಿಸುಮಾರು ₹16 ಲಕ್ಷ ತೆರಿಗೆ ಪಾವತಿಸದ್ದಕ್ಕೆ ಬಿಎಸ್​​ಎನ್ಎಲ್ ಕಚೇರಿಯಿಂದ ಪೀಠೋಪಕರಣ ವಶ