ಗಡಿ ಪಹರೆಗೆ ತರಬೇತಿ ಪಡೆಯಲಿವೆ ಮುಧೋಳ ಶ್ವಾನಗಳು; ಮೇಘಾಲಯ ಬಿಎಸ್ಎಫ್ ನಿರ್ಧಾರ

ಕೇವಲ ಗಡಿ ಭದ್ರತಾ ಪಡೆಯಷ್ಟೇ ಅಲ್ಲದೇ, ಭಾರತೀಯ ಸೇನೆಯೂ ಭಾರತೀಯ ತಳಿಯ ಶ್ವಾನಗಳಿಗೆ ಹೆಚ್ಚಿನ ತರಬೇತಿ ನೀಡಿ, ಸೇನೆಗೆ ಸೇರ್ಪಡೆ ಮಾಡಿಕೊಳ್ಳಲು ತೀರ್ಮಾನಿಸಿದೆ.

ಪ್ರಾತಿನಿಧಿಕ ಚಿತ್ರ

Lakshmi Hegde |
Updated on:Jan 03, 2021 | 5:41 PM

ಶಿಲ್ಲಾಂಗ್: ಮೇಘಾಲಯದ ಶಿಲ್ಲಾಂಗ್ನಲ್ಲಿ ಗಡಿ ಭದ್ರತಾ ಪಡೆ ಎರಡು ಭಾರತೀಯ ತಳಿಯ ಶ್ವಾನಗಳಿಗೆ ಗಡಿ ಪಹರೆ ತರಬೇತಿ ನೀಡಲು ನಿರ್ಧರಿಸಿದೆ. ಅದರಲ್ಲಿ ಒಂದು ಬಾಗಲಕೋಟೆಯ ಮುಧೋಳ ತಳಿಯ ನಾಯಿಗಳು ಮತ್ತು ಇನ್ನೊಂದು ತಮಿಳುನಾಡಿನ ವಿರುಧುನಗರದ ರಾಜಪಾಳಯಂ ತಳಿಯ ನಾಯಿಗಳು. ಒಂದೊಮ್ಮೆ ತರಬೇತಿ ಯಶಸ್ವಿಯಾಗಿ, ಶ್ವಾನಗಳು ಗಡಿಕಾಯಲು ಸಂಪೂರ್ಣ ಸಿದ್ಧಗೊಂಡರೆ, ಇನ್ನೂ ಹೆಚ್ಚಿನ ಭಾರತೀಯ ತಳಿಗಳ ಶ್ವಾನಗಳಿಗೆ ತರಬೇತಿ ನೀಡಿ, ಗಡಿಯಲ್ಲಿ ನಿಯೋಜಿಸಲು ಶಿಲ್ಲಾಂಗ್ ಬಿಎಸ್ಎಫ್ ನಿರ್ಧಾರ ಮಾಡಿದೆ.

ನಾವು ಸದ್ಯಕ್ಕೆ ಮುಧೋಳ ಮತ್ತು ರಾಜಪಾಳಯಂ ತಳಿಯ ಶ್ವಾನಗಳಿಗೆ ಪ್ರಯೋಗಾತ್ಮಕವಾಗಿ ತರಬೇತಿ ನೀಡುತ್ತೇವೆ. ಆದಷ್ಟು ಬೇಗನೇ ಈ ತರಬೇತಿ ಮುಕ್ತಾಯವಾಗಲಿದ್ದು, ಗಡಿಯಲ್ಲಿ ಪಹರೆಗೆ ಇಳಿಯಲಿವೆ. ಇವು ಎಷ್ಟು ಚುರುಕಾಗಿ ಗಡಿ ಕಾಯುತ್ತವೆ, ಹೇಗೆ ಕೆಲಸ ಮಾಡುತ್ತವೆ ಎಂಬುದನ್ನು ಗಮನಿಸಿ, ಇನ್ನಷ್ಟು ಭಾರತದ ತಳಿಯ ನಾಯಿಗಳಿಗೆ ತರಬೇತಿ ನೀಡುತ್ತೇವೆ. ನಾಯಿಗಳಿಗೆ ಸಂಪೂರ್ಣ ತರಬೇತಿ ಸಿಗಲು ಒಂದು ವರ್ಷ ಬೇಕು ಎಂದು ಮೇಘಾಲಯದ ಬಿಎಸ್ಎಫ್ ಹಿರಿಯ ಅಧಿಕಾರಿಯೋರ್ವರು ತಿಳಿಸಿದ್ದಾರೆ.

ಕೇವಲ ಗಡಿ ಭದ್ರತಾ ಪಡೆಯಷ್ಟೇ ಅಲ್ಲದೇ, ಭಾರತೀಯ ಸೇನೆಯೂ ಭಾರತೀಯ ತಳಿಯ ಶ್ವಾನಗಳಿಗೆ ಹೆಚ್ಚಿನ ತರಬೇತಿ ನೀಡಿ, ಸೇನೆಗೆ ಸೇರ್ಪಡೆ ಮಾಡಿಕೊಳ್ಳಲು ತೀರ್ಮಾನಿಸಿದೆ.