ಲಂಡನ್​ನಲ್ಲಿ ಸ್ವಾಸರಿ-ಕೊರೊನಿಲ್​ ಕಿಟ್​ ಅನಧಿಕೃತ ಮಾರಾಟ; ಪ್ರಯೋಜನವಿಲ್ಲದ ಮಾತ್ರೆಗಳು ಎಂದ ಲ್ಯಾಬ್​ ವರದಿ

ಲಂಡನ್​: ಕೊರೊನಾ ಸೋಂಕಿನ ಪ್ರಮಾಣ ಹೆಚ್ಚುತ್ತಿದ್ದ ದಿನಗಳಲ್ಲಿ ಕೊರೊನಿಲ್​ ಮತ್ತು ಸ್ವಾಸರಿ ಎಂಬ ಹೆಸರಿನ ಮಾತ್ರೆಗಳನ್ನು ತಯಾರಿಸಿದ್ದ ಪತಂಜಲಿ ಸಂಸ್ಥೆ, ಇದು ಕೊರೊನಾವನ್ನು ಸಂಪೂರ್ಣ ಗುಣಪಡಿಸುತ್ತದೆ ಎಂದು ಹೇಳಿತ್ತು. ಆದರೆ ನಂತರ ಅದು ವಿವಾದಕ್ಕೂ ಕಾರಣವಾಗಿ ಮಾರಾಟಕ್ಕೆ ಆಯುಷ್​ ಇಲಾಖೆ ತಡೆ ನೀಡಿತ್ತು. ಬಳಿಕ. ಈ ಔಷಧವನ್ನು ಕೊರೊನಾ ಗುಣಪಡಿಸುತ್ತದೆ ಎಂಬ ಪ್ರಚಾರ ಮಾಡುವಂತಿಲ್ಲ, ಬದಲಿಗೆ ರೋಗನಿರೋಧಕ ಶಕ್ತಿ ಉತ್ತೇಜಕ ಎಂದಷ್ಟೇ ಪ್ರಚಾರ ಮಾಡಿ, ಮಾರಾಟ ಮಾಡಬಹುದು ಎಂದು ಖಡಾಖಂಡಿತವಾಗಿ ಸೂಚನೆ ನೀಡಿತ್ತು.

ಅದಾದ ಬಳಿಕ ಪತಂಜಲಿ ತನ್ನ ಕೊರೊನಿಲ್ ಮತ್ತು ಸ್ವಾಸರಿ ಮಾತ್ರೆಗಳನ್ನು ಇಮ್ಯೂನಿಟಿ ಬೂಸ್ಟರ್​ (ರೋಗನಿರೋಧಕ ಶಕ್ತಿ ಉತ್ತೇಜಕ) ಎಂದೇ ಹೇಳಿ ಮಾರಾಟ ಮಾಡುತ್ತಿದೆ. ಇದು ಬರೀ ಭಾರತದಲ್ಲಿ ಮಾತ್ರವಲ್ಲ. ಲಂಡನ್​ನಲ್ಲೂ ಭರ್ಜರಿ ಮಾರಾಟವಾಗುತ್ತಿದೆ. ಈ ಬಗ್ಗೆ ಬಿಬಿಸಿ ವರದಿ ಮಾಡಿದೆ.

ಏಷ್ಯಾದ ಜನರು ಪ್ರಧಾನವಾಗಿ ಇರುವ ಎಲ್ಲ ಪ್ರದೇಶಗಳ ಹಲವು ಅಂಗಡಿಗಳಲ್ಲಿ ಕೊರೊನಿಲ್​ ಕಿಟ್​ ಮಾರಾಟವೂ ಅಧಿಕವಾಗಿದೆ. ಈ ಮಾತ್ರೆಗಳು ರೋಗನಿರೋಧಕ ಶಕ್ತಿ ಹೆಚ್ಚಿಸುತ್ತವೆ, ಉಸಿರಾಟಕ್ಕೆ ತೊಂದರೆ ಉಂಟುಮಾಡುವ ಸೋಂಕಿನ ವಿರುದ್ಧ ಹೋರಾಡುತ್ತವೆ ಎಂದು ಕಿಟ್​ ತಯಾರಕರು ಪ್ರಚಾರ ಮಾಡುತ್ತಿದ್ದಾರೆ. ಆದರೆ ಈ ಕೊರೊನಿಲ್-ಸ್ವಾಸರಿ ಮಾತ್ರೆಗಳಲ್ಲಿ ಕೊರೊನಾ ವಿರುದ್ಧ ಹೋರಾಡುವ ಯಾವುದೇ ಶಕ್ತಿಯೂ ಇಲ್ಲ ಎಂಬುದು ಲ್ಯಾಬ್ ಟೆಸ್ಟ್​ನಲ್ಲಿ ಸಾಬೀತಾಗಿದೆ ಎಂದು ಬಿಬಿಸಿ ಹೇಳಿದೆ.

ಕೊರೊನಾ ವಿರುದ್ಧ ಹೋರಾಡೋಲ್ಲ ಬರ್ಮಿಂಗ್​ಹ್ಯಾಂ ಯೂನಿವರ್ಸಿಟಿಯ ಲ್ಯಾಬ್​ನಲ್ಲಿ ಕೊರೊನಿಲ್​-ಸ್ವಾಸರಿ ಮಾತ್ರೆಗಳನ್ನು ಪರೀಕ್ಷಿಸಿಲಾಗಿದ್ದು, ಇದರಲ್ಲಿ ಸಸ್ಯಮೂಲ ಪದಾರ್ಥಗಳನ್ನು ಬಳಸಲಾಗಿದೆ ಎಂಬುದು ಸಾಬೀತಾಗಿದೆ. ಆದರೆ ಈ ಪದಾರ್ಥಗಳು ಕೊರೊನಾ ವಿರುದ್ಧ ಹೋರಾಡುವುದಿಲ್ಲ ಎಂದು ಲ್ಯಾಬ್​ ರಿಪೋರ್ಟ್ ನೀಡಿದ್ದಾಗಿ ಹೇಳಲಾಗಿದೆ.

ಇನ್ನು ಲಂಡನ್​​ನ ಕೆಲವು ಅಂಗಡಿಗಳು ಪತಂಜಲಿ ಬಗ್ಗೆ ಭರ್ಜರಿ ಪ್ರಚಾರ ನೀಡುತ್ತಿವೆ. ತಮ್ಮ ವೆಬ್​ಸೈಟ್​ಗಳಲ್ಲೂ ಕೊರೊನಿಲ್ ಕಿಟ್​ ಆ್ಯಡ್​ಗಳನ್ನು ನೀಡುತ್ತಿವೆ. ಆದರೆ ಬ್ರಿಟಿಷ್​ ಔಷಧ ಮತ್ತು ಆರೋಗ್ಯ ಉತ್ಪನ್ನಗಳ ನಿಯಂತ್ರಣಾ ಏಜೆನ್ಸಿ (MHRA), ತಾವು ಪತಂಜಲಿಯ ಸ್ವಾಸರಿ-ಕೊರೊನಿಲ್ ಕಿಟ್ ಮಾರಾಟಕ್ಕೆ ಇದುವರೆಗೂ ಅನುಮೋದನೆ ನೀಡಿಲ್ಲ ಎಂದು ಹೇಳಿದೆ. ಅಷ್ಟೇ ಅಲ್ಲ, ಲಂಡನ್​ನ ಯಾವುದೇ ಮಾರುಕಟ್ಟೆಯಲ್ಲಿ ಅನಧಿಕೃತ ಔಷಧಗಳ ಮಾರಾಟ ಮಾಡುತ್ತಿರುವವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದೆ.

ದೇಶದಲ್ಲಿ ಸಕ್ರಿಯ ಕೊರೊನಾ ಪ್ರಕರಣಗಳು 3.05ಲಕ್ಷ; ಚೇತರಿಕೆ ಪ್ರಮಾಣದಲ್ಲಿ ಗಣನೀಯ ಏರಿಕೆ