ಕರ್ನಾಟಕದ ಈ ಖಾಸಗಿ ಆಸ್ಪತ್ರೆಗಳು ಕೊವಿಡ್​ ಲಸಿಕಾ ಕೇಂದ್ರಗಳು; ಪಟ್ಟಿ ಬಿಡುಗಡೆ ಮಾಡಿದ ಕೇಂದ್ರ ಸರ್ಕಾರ

ದೆಹಲಿ: ಮಾರ್ಚ್​ 1ರಿಂದ ಎರಡನೇ ಹಂತದ ಕೊವಿಡ್​-19 ಲಸಿಕೆ ವಿತರಣೆ ಅಭಿಯಾನ ಶುರುವಾಗಲಿದೆ. ಈ ಹಂತದಲ್ಲಿ 60 ವರ್ಷ ಮೇಲ್ಪಟ್ಟವರಿಗೆ, ಇತರ ರೋಗಗಳಿಂದ ಬಳಲುತ್ತಿರುವ 45ವರ್ಷ ಮೇಲ್ಪಟ್ಟವರಿಗೆ ಲಸಿಕೆ ನೀಡಲಾಗುತ್ತದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ. ಇದೀಗ ಕೇಂದ್ರ ಸರ್ಕಾರ ಲಸಿಕೆ ನೀಡುವ ಸರ್ಕಾರಿ ಮತ್ತು ಖಾಸಗಿ ಆಸ್ಪತ್ರೆಗಳ ಲಿಸ್ಟ್​ನ್ನು ಬಿಡುಗಡೆ ಮಾಡಿದೆ. ಲಸಿಕೆ ಪ್ರತಿಯೊಬ್ಬ ಭಾರತೀಯನಿಗೂ ಸಿಗಬೇಕು ಎಂಬ ದೃಷ್ಟಿಯಿಂದ ಕೇಂದ್ರ ಸರ್ಕಾರ, ಈ ಹಂತದ ಲಸಿಕೆ ವಿತರಣಾ ಅಭಿಯಾನದಲ್ಲಿ ಹೆಚ್ಚಿನ ಸಂಖ್ಯೆಯ ಖಾಸಗಿ ಆಸ್ಪತ್ರೆಗಳನ್ನು ಬಳಸಿಕೊಳ್ಳುತ್ತಿದೆ.

ಲಸಿಕೆ ವಿತರಣೆ ಮಾಡಲು ಪ್ರಧಾನಮಂತ್ರಿ ಜನ್​ ಆರೋಗ್ಯ ಯೋಜನೆಯಾದ ಆಯುಷ್ಮಾನ್ ಭಾರತ್​ ಅಡಿ ಸುಮಾರು 10,000 ಖಾಸಗಿ ಆಸ್ಪತ್ರೆಗಳನ್ನು, ಕೇಂದ್ರ ಸರ್ಕಾರದ ಆರೋಗ್ಯ ಯೋಜನೆ (Central Government Health Scheme)ಯಡಿ 687 ಖಾಸಗಿ ಆಸ್ಪತ್ರೆಗಳನ್ನು ಮತ್ತು ರಾಜ್ಯ ಸರ್ಕಾರಗಳ ಆರೋಗ್ಯ ವಿಮಾ ಯೋಜನೆಯಡಿ ಕೆಲವು ಆಸ್ಪತ್ರೆಗಳನ್ನು ಕೊವಿಡ್​ ಲಸಿಕಾ ಕೇಂದ್ರಗಳ ಪಟ್ಟಿಗೆ ಸೇರಿಸಲಾಗಿದೆ. ಈ ಖಾಸಗಿ ಕೇಂದ್ರಗಳು ಪ್ರತಿ ವ್ಯಕ್ತಿಯ ಪ್ರತಿ ಡೋಸ್​ಗೆ 250 ರೂ.ವಸೂಲಿ ಮಾಡಬಹುದು ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ. ರಾಷ್ಟ್ರರಾಜಧಾನಿ ದೆಹಲಿಯಲ್ಲಿ ಸರ್​ ಗಂಗಾರಾಮ್​, ಸೆಂಟರ್ ಫಾರ್​ ಸೈಟ್​, ಸ್ಮೈಲ್​ ಡೆಂಟಲ್​ ಕ್ಲಿನಿಕ್​, ಮೇದಾಂತಾ ಮೆಡಿಸಿಟಿ, ಶ್ರೀ ಬಾಲಾಜಿ ಆ್ಯಕ್ಷನ್​ ಮೆಡಿಕಲ್​ ಸಂಸ್ಥೆ, ಮಹಾರಾಜಾ ಆಗ್ರಾಸೇನ್​​ ಮಲ್ಟಿಸ್ಪೆಶಾಲಿಟಿ ಆಸ್ಪತ್ರೆ ಸೇರಿ ಹಲವು ಖಾಸಗಿ ಆಸ್ಪತ್ರೆಗಳು ಕೊವಿಡ್​ 19 ಲಸಿಕೆ ನೀಡುವ ಕೇಂದ್ರಗಳಾಗಿವೆ.

ಇನ್ನು ಕೊವಿಡ್​-19 ಲಸಿಕೆ ನೀಡುವ ಖಾಸಗಿ ಆಸ್ಪತ್ರೆಗಳು ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು. ರಾಷ್ಟ್ರೀಯ Co-Win ಟೆಕ್ನಾಲಜಿ ನಿಗದಿ ಮಾಡಿರುವ ಗುಣಮಟ್ಟ ಮತ್ತು ಸುರಕ್ಷತಾ ನಿಯಮಗಳನ್ನು ಪಾಲಿಸಬೇಕು ಎಂದು ಹೇಳಿರುವ ಕೇಂದ್ರ ಆರೋಗ್ಯ ಸಚಿವಾಲಯ, ಸರ್ಕಾರಿ ಕೊವಿಡ್​-19 ಕೇಂದ್ರಗಳಲ್ಲಿ ಲಸಿಕೆಯನ್ನು ಉಚಿತವಾಗಿ ನೀಡಲಾಗುವುದು ಎಂದು ತಿಳಿಸಿದೆ.

ಕರ್ನಾಟಕದಲ್ಲಿ ಯಾವ್ಯಾವ ಆಸ್ಪತ್ರೆಗಳು?
ಕರ್ನಾಟಕದ ಬೆಂಗಳೂರಿನಲ್ಲಿ ಯಾವ್ಯಾವ ಖಾಸಗಿ ಆಸ್ಪತ್ರೆಗಳಲ್ಲಿ ಕೊರೊನಾ ಲಸಿಕೆ ವಿತರಣೆಯಾಗಲಿದೆ ಎಂಬುದರ ಬಗ್ಗೆ ಮಾಹಿತಿ ಇಲ್ಲಿದೆ: ಫೋರ್ಟೀಸ್​ ಆಸ್ಪತ್ರೆ- ಕನ್ನಿಂಗ್​ಹ್ಯಾಂ ರೋಡ್​, ಇಂಪೇರಿಯನ್ ಆಸ್ಪತ್ರೆ ಮತ್ತು ರಿಸರ್ಚ್​ ಸೆಂಟರ್​ (ಅಪೋಲೋ), ಕಿಮ್ಸ್​ ಹಾಸ್ಪಿಟಲ್​​ ಆ್ಯಂಡ್ ರಿಸರ್ಚ್​ ಸೆಂಟರ್​, ಮಲ್ಯಾ ಆಸ್ಪತ್ರೆ, ನಾರಾಯಣ ಹೃದಯಾಲಯ, ಸಾಗರ ಆಸ್ಪತ್ರೆ-ಬನಶಂಕರಿ, ಜಯನಗರ ಸಾಗರ ಆಸ್ಪತ್ರೆ, ಶ್ರೀ ಶಂಕರ ಕ್ಯಾನ್ಸರ್ ಆಸ್ಪತ್ರೆ, ವೈದೇಹಿ ಇನ್ಸ್​ಟಿಟ್ಯೂಟ್ ಆಫ್​ ಮೆಡಿಕಲ್ ಸೈನ್ಸ್​ ಆ್ಯಂಡ್​ ರಿಸರ್ಚ್​ ಸೆಂಟರ್, ಹೆಲ್ತ್​ ಕೇರ್​ ಗ್ಲೋಬಲ್ ಎಂಟರ್​ಪ್ರೈಸಸ್​, ಪಿಡಿ ಹಿಂದುಜಾ ಸಿಂಧಿ ಆಸ್ಪತ್ರೆ, ಹೊಸ್ಮಠ್​ ಹಾಸ್ಪಿಟಲ್​, ಜಯನಗರ ಅಪೋಲೋ ಸ್ಪೆಷಾಲಿಟಿ ಆಸ್ಪತ್ರೆ, ನಾರಾಯಣ ಮಲ್ಟಿ ಸ್ಪೆಶಾಲಿಟಿ ಹಾಸ್ಪಿಟಲ್​-ಎಚ್​.ಎಸ್​.ಆರ್​.ಲೇಔಟ್​, Pan Nagarbhavi Hospital Pvt. Ltd. ಈ ಆಸ್ಪತ್ರೆಯ ಹೆಸರುಗಳು ಕೇಂದ್ರ ಬಿಡುಗಡೆ ಮಾಡಿರುವ ಪಟ್ಟಿಯಲ್ಲಿ ಇವೆ.

ಇದನ್ನೂ ಓದಿ: 45ವರ್ಷ ಮೇಲ್ಪಟ್ಟವರಾಗಿದ್ದು, ಯಾವುದಾದರೂ ಕಾಯಿಲೆಗಳಿವೆಯಾ? ಈ ಬಾರಿ ಕೊರೊನಾ ಲಸಿಕೆ ಪಡೆಯಲು ಸಿದ್ಧರಾಗಿ.. ಒಂದಷ್ಟು ನಿಯಮಗಳಿವೆ ನೋಡಿ