Suzuki WagonR: ಹೊಸ ಲುಕ್ನಲ್ಲಿ ಮತ್ತೆ ಬಂದ ವ್ಯಾಗನ್ಆರ್: ಬೆಲೆಯಲ್ಲೂ ವ್ಯತ್ಯಾಸ
Suzuki WagonR Smile: ಇನ್ನು ಲೈಟ್ ವಿನ್ಯಾಸ ಕೂಡ ಬದಲಾಗಿದ್ದು, ಈ ಹಿಂದಿನ ಸ್ಕೈರ್ ಡೂಮ್ ಬದಲಿಗೆ ರೌಂಡ್ ಹೆಡ್ಲೈಟ್ಗಳನ್ನು ನೀಡಲಾಗಿದೆ. ಈ ಲೈಟ್ಗಳು ಮಿನಿ ಕೂಪರ್ ಕಾರಿನ ಲೈಟ್ಗಳ ವಿನ್ಯಾಸವನ್ನು ಹೊಂದಿರುವುದು ಮೇಲ್ನೋಟಕ್ಕೆ ಸ್ಪಷ್ಟವಾಗುತ್ತದೆ.
ವಿಶ್ವದ ಜನಪ್ರಿಯ ವಾಹನ ತಯಾರಿಕಾ ಕಂಪೆನಿ ಸುಜುಕಿ ತನ್ನ ವ್ಯಾಗನ್ಆರ್ ಕಾರಿನ ಹೊಸ ಎಡಿಷನ್ ಬಿಡುಗಡೆ ಮಾಡಿದೆ. ವ್ಯಾಗನಾರ್ ಸ್ಮೈಲ್ ಹೆಸರಿನಲ್ಲಿ ನೂತನ ಕಾರು ಜಪಾನ್ನಲ್ಲಿ ಬಿಡುಗಡೆ ಆಗಿದ್ದು, ಮುಂದಿನ ದಿನಗಳಲ್ಲಿ ಇದೇ ಕಾರು ಭಾರತದ ಮಾರುಕಟ್ಟೆಗೂ ಪ್ರವೇಶಿಸಲಿದೆ ಎಂದು ಹೇಳಲಾಗಿದೆ.
ವ್ಯಾಗನ್ಆರ್ ಸ್ಮೈಲ್ ಔಟ್ ಲುಕ್ ಆಕರ್ಷಕ ವಿನ್ಯಾಸವನ್ನು ಹೊಂದಿದ್ದು, ಮಿನಿ ವ್ಯಾನ್ನಂತೆ ಇದರ ಮೇಲ್ಮೈಯನ್ನು ರೂಪಿಸಲಾಗಿದೆ. ಅಲ್ಲದೆ ಎರಡೂ ಬದಿಗಳಲ್ಲಿ ಸ್ಲೈಡಿಂಗ್ ಡೋರ್ಗಳನ್ನು ನೀಡಿರುವುದು ವಿಶೇಷ. ಅಂದರೆ ಹೊಸ ವ್ಯಾಗನ್ಆರ್ನಲ್ಲಿ ಪ್ರಸ್ತುತ ಭಾರತದಲ್ಲಿನ ಓಮ್ನಿ ವ್ಯಾನ್ನಂತೆ ಸ್ಲೈಡಿಂಗ್ ಡೋರ್ಗಳನ್ನು ನೀಡಲಾಗಿದೆ.
ಇನ್ನು ಲೈಟ್ ವಿನ್ಯಾಸ ಕೂಡ ಬದಲಾಗಿದ್ದು, ಈ ಹಿಂದಿನ ಸ್ಕೈರ್ ಡೂಮ್ ಬದಲಿಗೆ ರೌಂಡ್ ಹೆಡ್ಲೈಟ್ಗಳನ್ನು ನೀಡಲಾಗಿದೆ. ಈ ಲೈಟ್ಗಳು ಮಿನಿ ಕೂಪರ್ ಕಾರಿನ ಲೈಟ್ಗಳ ವಿನ್ಯಾಸವನ್ನು ಹೊಂದಿರುವುದು ಮೇಲ್ನೋಟಕ್ಕೆ ಸ್ಪಷ್ಟವಾಗುತ್ತದೆ. ಇನ್ನು ರೇಡಿಯೇಟರ್ ಗ್ರಿಲ್ ಮತ್ತು ಕ್ರೋಮ್‌ ನೀಡಲಾಗಿದ್ದು ಹಾಗೆಯೇ ಹಿಂಭಾಗದಲ್ಲಿನ ಟೈಲ್‌ಲ್ಯಾಂಪ್‌ಗಳು ಲಂಬ ಆಕಾರದಲ್ಲಿ ನೀಡಲಾಗಿದೆ.
ಸಮತಟ್ಟಾದ ಮೇಲ್ಛಾವಣಿ ಹೊಂದಿರುವ ವ್ಯಾಗನ್ಆರ್ ಸ್ಮೈಲ್ ಪ್ರಸ್ತುತ ವ್ಯಾಗನ್ಆರ್ ಮಾಡೆಲ್ಗಿಂತ 45 ಮಿಮೀ ದೊಡ್ಡದು ಎಂಬುದು ವಿಶೇಷ. ಇನ್ನು ಈ ಕಾರಿಗೆ ಬ್ರ್ಯಾಂಡ್ ಡ್ಯುಯಲ್-ಟೋನ್ ಪೇಂಟ್ ಸ್ಕೀಮ್ ನೀಡಿರುವುದು ಕಾರಿನ ಮತ್ತಷ್ಟು ಸೊಗಸಾಗಿಸಿದೆ.
ವ್ಯಾಗನ್ಆರ್ ಸ್ಮೈಲ್ ನ ಒಳ ವಿನ್ಯಾಸಕ್ಕೆ ಸುಜುಕಿ ವಿಶೇಷ ಗಮನ ನೀಡಿದ್ದು, ಅದರಂತೆ ಈ ಕಾರಿನಲ್ಲಿ ದೊಡ್ಡ ಟಚ್‌ಸ್ಕ್ರೀನ್ ಇನ್ಫೋಟೈನ್‌ಮೆಂಟ್ ಸಿಸ್ಟಮ್ ಮತ್ತು ಡ್ಯುಯಲ್-ಶೇಡ್ ಥೀಮ್‌ನಲ್ಲಿ ಡ್ಯಾಶ್‌ಬೋರ್ಡ್ ನೀಡಲಾಗಿದೆ. ಇದಲ್ಲದೆ ಡ್ಯಾಶ್ಬೋರ್ಡ್ಗೆ ಹೊಂದಿಕೊಂಡಂತೆ ಮೊಬೈಲ್ ಫೋನ್ ಸೇರಿದಂತೆ ವಸ್ತುಗಳನ್ನು ಇಡಲು ಆಕರ್ಷಕ ಬಾಕ್ಸ್ಗಳನ್ನು ನೀಡಿದೆ.
ಇನ್ನು ಸುಜುಕಿ ವ್ಯಾಗನ್ಆರ್ ಸ್ಮೈಲ್ನಲ್ಲಿ 657 ಸಿಸಿ ಸಾಮರ್ಥ್ಯದ ಮೂರು ಸಿಲಿಂಡರ್ ನೈಸರ್ಗಿಕ ಆಕಾಂಕ್ಷಿತ ಪೆಟ್ರೋಲ್ ಎಂಜಿನ್ ನೀಡಲಾಗಿದ್ದು, ಈ ಎಂಜಿನ್ 47 ಬಿಎಚ್‌ಪಿ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. ಹಾಗೆಯೇ ಇದು 58 ಎನ್ಎಂ ಗರಿಷ್ಠ ಟಾರ್ಕ್ ಉತ್ಪಾದಿಸುತ್ತದೆ. ಇನ್ನು ಇದರಲ್ಲಿ CVT ಟ್ರಾನ್ಸ್ಮಿಷನ್ ಗೇರ್ ಬಾಕ್ಸ್ ನೀಡಲಾಗಿದೆ.
ಜಪಾನ್ನಲ್ಲಿ ಈ ಕಾರುಗಳನ್ನು ಫ್ರಂಟ್-ವೀಲ್ ಡ್ರೈವರ್ ಮತ್ತು ಆಲ್-ವೀಲ್-ಡ್ರೈವ್ ಆಯ್ಕೆಗಳಲ್ಲಿ ಸುಜುಕಿ ಬಿಡುಗಡೆ ಮಾಡಿದ್ದು, ಎಂಟ್ರಿ ಲೆವೆಲ್ ಟ್ರಿಮ್ ಮತ್ತು ಟಾಪ್ ವೆರಿಯಂಟ್ ಬೆಲೆಯಲ್ಲಿ ಭಾರೀ ವ್ಯತ್ಯಾಸವಿದೆ. ಜಪಾನ್ ಮಾರುಕಟ್ಟೆಯಲ್ಲಿ ಹೊಸ ವ್ಯಾಗನ್ಆರ್ ಸ್ಮೈಲ್ 1.29 ಮಿಲಿಯನ್ ಯೆನ್ (ಸುಮಾರು 8.30 ಲಕ್ಷ) ಮತ್ತು 1.71 ಮಿಲಿಯನ್ ಯೆನ್ (ಸುಮಾರು 11.44 ಲಕ್ಷ) ರೂ.ನಲ್ಲಿ ಖರೀದಿಗೆ ಲಭ್ಯವಿದೆ.