16 ಬೌಂಡರಿ, 8 ಸಿಕ್ಸರ್, ಅಜೇಯ 161 ರನ್! ದೇಸಿ ಟೂರ್ನಿಯಲ್ಲಿ ಆರ್ಸಿಬಿಯ ಮಾಜಿ ಬ್ಯಾಟರ್ ಅಬ್ಬರ
Vijay Hazare Trophy: ಆಂಧ್ರ ತಂಡದ ನಾಯಕರಾಗಿದ್ದ ಭರತ್ ಹಿಮಾಚಲ ಪ್ರದೇಶದ ವಿರುದ್ಧ 109 ಎಸೆತಗಳಲ್ಲಿ 16 ಬೌಂಡರಿ ಹಾಗೂ 8 ಸಿಕ್ಸರ್‌ಗಳ ನೆರವಿನಿಂದ ಅಜೇಯ 161 ರನ್ ಗಳಿಸಿದರು.
ಭಾರತೀಯ ಕ್ರಿಕೆಟ್‌ನ ಸ್ಟಾರ್‌ಗಳು ಪ್ರಸ್ತುತ ವಿಜಯ್ ಹಜಾರೆ ಟ್ರೋಫಿ 2021 ರಲ್ಲಿ ಬ್ಯುಸಿಯಾಗಿದ್ದಾರೆ. ಟೀಂ ಇಂಡಿಯಾದಲ್ಲಿ ಸ್ಥಾನ ಗಳಿಸಿರುವ ಮತ್ತು ಸ್ಥಾನ ಗಳಿಸಲು ತಯಾರಿ ನಡೆಸುತ್ತಿರುವ ಆಟಗಾರರು ಇಲ್ಲಿ ಬೆವರು ಹರಿಸುತ್ತಿದ್ದಾರೆ. ಈ ಸಂಚಿಕೆಯಲ್ಲಿ, ಯುವ ವಿಕೆಟ್-ಕೀಪರ್ ಬ್ಯಾಟ್ಸ್‌ಮನ್ ಶ್ರೀಕರ್ ಭರತ್ ಡಿಸೆಂಬರ್ 12 ರಂದು ಬಿರುಗಾಳಿಯ ಶತಕವನ್ನು ಗಳಿಸಿದರು. ಆಂಧ್ರ ತಂಡದ ನಾಯಕರಾಗಿದ್ದ ಭರತ್ ಹಿಮಾಚಲ ಪ್ರದೇಶದ ವಿರುದ್ಧ 109 ಎಸೆತಗಳಲ್ಲಿ 16 ಬೌಂಡರಿ ಹಾಗೂ 8 ಸಿಕ್ಸರ್‌ಗಳ ನೆರವಿನಿಂದ ಅಜೇಯ 161 ರನ್ ಗಳಿಸಿದರು. ಇದರ ನೆರವಿನಿಂದ ಆಂಧ್ರ ನಾಲ್ಕು ವಿಕೆಟ್‌ಗೆ 322 ರನ್ ಗಳಿಸಿತು. ವಿಜಯ್ ಹಜಾರೆ ಟ್ರೋಫಿಯಲ್ಲಿ ಇದು ಶ್ರೀಕರ್ ಭರತ್ ಅವರ ಮೊದಲ ಶತಕವಾಗಿದೆ. ಮೊದಲ ಮೂರು ಪಂದ್ಯಗಳಲ್ಲಿ ಹೆಚ್ಚಿನ ಸಾಧನೆ ಮಾಡಲು ಸಾಧ್ಯವಾಗಲಿಲ್ಲ.
ಮೊದಲು ಆಡಿದ ಆಂಧ್ರ 45 ರನ್‌ಗಳಾಗುವಷ್ಟರಲ್ಲಿ ಆರಂಭಿಕ ಸಿಆರ್ ಗಣೇಶ್ವರ್ ವಿಕೆಟ್ ಕಳೆದುಕೊಂಡಿತು. ನಂತರ ಅಶ್ವಿನ್ ಹೆಬ್ಬಾರ್ (100) ಮತ್ತು ಶ್ರೀಕರ್ ಭರತ್ ಇನ್ನಿಂಗ್ಸ್ ಜವಬ್ದಾರಿ ವಹಿಸಿಕೊಂಡರು. ಇಬ್ಬರೂ ಎರಡನೇ ವಿಕೆಟ್‌ಗೆ 174 ರನ್‌ಗಳ ಜೊತೆಯಾಟ ನೀಡಿದರು. ಈ ಸಮಯದಲ್ಲಿ, ಅಶ್ವಿನ್ ತಮ್ಮ ಲಿಸ್ಟ್ ಎ ವೃತ್ತಿಜೀವನದ ಎರಡನೇ ಶತಕವನ್ನು ಗಳಿಸಿದರು. 132 ಎಸೆತಗಳಲ್ಲಿ 10 ಬೌಂಡರಿಗಳ ನೆರವಿನಿಂದ 100 ರನ್ ಗಳಿಸಿದರು. ಅದೇ ಸಮಯದಲ್ಲಿ, ಭರತ್ ತಮ್ಮ ಲಿಸ್ಟ್ ಎ ವೃತ್ತಿಜೀವನದ ನಾಲ್ಕನೇ ಶತಕವನ್ನು ಗಳಿಸಿದರು. ಕೊನೆಯ ಓವರ್‌ನಲ್ಲಿ ಅಂಬಟಿ ರಾಯುಡು ಜೊತೆಗೂಡಿ ತಂಡಕ್ಕೆ ವೇಗವಾಗಿ ರನ್ ಸೇರಿಸಿದರು. ಇವರಿಬ್ಬರ ನಡುವೆ ನಾಲ್ಕನೇ ವಿಕೆಟ್‌ಗೆ 76 ರನ್‌ಗಳ ಜೊತೆಯಾಟವಿತ್ತು. ರಾಯುಡು 14 ಎಸೆತಗಳಲ್ಲಿ 2 ಬೌಂಡರಿ ಹಾಗೂ 3 ಸಿಕ್ಸರ್ ನೆರವಿನಿಂದ 34 ರನ್ ಗಳಿಸಿದರು.
ಭರತ್ ಕೊನೆಯವರೆಗೂ ಔಟಾಗದೆ 161 ರನ್ ಗಳಿಸಿದರು, ಇದು ಲಿಸ್ಟ್ ಎ ವೃತ್ತಿಜೀವನದಲ್ಲಿ ಅವರ ಗರಿಷ್ಠ ಸ್ಕೋರ್ ಆಗಿದೆ. ಇದಕ್ಕೂ ಮುನ್ನ 2013ರಲ್ಲಿ ಅವರ 125 ರನ್‌ಗಳ ಇನ್ನಿಂಗ್ಸ್ 50 ಓವರ್‌ಗಳ ಕ್ರಿಕೆಟ್‌ನಲ್ಲಿ ಅವರ ಗರಿಷ್ಠ ಸ್ಕೋರ್ ಆಗಿತ್ತು. ಹಿಮಾಚಲ ಪ್ರದೇಶದ ನಾಯಕ ರಿಷಿ ಧವನ್ ಆಂಧ್ರದ ಬ್ಯಾಟ್ಸ್‌ಮನ್‌ಗಳನ್ನು ಔಟ್ ಮಾಡಲು ಏಳು ಬೌಲರ್‌ಗಳನ್ನು ಬಳಸಿಕೊಂಡರು ಆದರೆ ಹೆಚ್ಚಿನ ಯಶಸ್ಸನ್ನು ಪಡೆಯಲಿಲ್ಲ. ಮಯಾಂಕ್ ದಾಗರ್ 57 ರನ್ ನೀಡಿ ಎರಡು ವಿಕೆಟ್ ಪಡೆದರು. ಮತ್ತೊಂದೆಡೆ, ಧವನ್ ಮತ್ತು ಅರ್ಪಿತ್ ಗುಲೇರಿಯಾ ತಲಾ ಒಂದು ಯಶಸ್ಸು ಪಡೆದರು.
ಶ್ರೀಕರ್ ಭರತ್ ಭಾರತ ಟೆಸ್ಟ್ ತಂಡದಲ್ಲಿ ಸೇರ್ಪಡೆಗೊಳ್ಳುವ ಸ್ಪರ್ಧಿಯಾಗಿದ್ದಾರೆ. ವೃದ್ಧಿಮಾನ್ ಸಹಾ ನಂತರ ಆಯ್ಕೆದಾರರು ಭರತ್ ಕಡೆಗೆ ಒಲವು ತೋರಿದ್ದಾರೆ. ಭರತ್, ರಿಷಬ್ ಪಂತ್ ಜೊತೆಗೆ ಕೀಪಿಂಗ್‌ನಲ್ಲಿ ಭಾರತ ತಂಡಕ್ಕೆ ಸಾಕಷ್ಟು ಆಯ್ಕೆಗಳನ್ನು ನೀಡುತ್ತಾರೆ. ಇತ್ತೀಚಿನ ನ್ಯೂಜಿಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯ ಸಂದರ್ಭದಲ್ಲಿ, ಸಹಾ ಗಾಯಗೊಂಡ ನಂತರ ಕಾನ್ಪುರ ಟೆಸ್ಟ್‌ನಲ್ಲಿ ಭರತ್ ವಿಕೆಟ್ ಕೀಪಿಂಗ್ ಮಾಡಿದ್ದರು. ಈ ವೇಳೆ ತಮ್ಮ ಕೈಚಳಕದಿಂದ ಎಲ್ಲರ ಗಮನ ಸೆಳೆದಿದ್ದರು.
ಶ್ರೀಕರ್ ಭರತ್ ಅವರು ಐಪಿಎಲ್ 2021 ರಲ್ಲಿ ತಮ್ಮ ಆಟದಿಂದ ಗಮನ ಸೆಳೆದಿದ್ದರು. ಅವರು ವಿರಾಟ್ ಕೊಹ್ಲಿ ನಾಯಕತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಭಾಗವಾಗಿದ್ದರು. ಇಲ್ಲಿ ಅವರು ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧದ ಪಂದ್ಯದ ಕೊನೆಯ ಎಸೆತದಲ್ಲಿ ಸಿಕ್ಸರ್ ಬಾರಿಸಿ ತಂಡಕ್ಕೆ ಗೆಲುವು ತಂದಿತ್ತಿದ್ದರು. ಈ ಮೂಲಕ ಟೆಸ್ಟ್, ಏಕದಿನ ಹಾಗೂ ಟಿ20 ಕ್ರಿಕೆಟ್‌ನಲ್ಲಿ ಸಂಪೂರ್ಣ ಪಾಂಡಿತ್ಯದೊಂದಿಗೆ ಆಡುವ ಸಾಮರ್ಥ್ಯ ಶ್ರೀಕರ್ ಅವರದ್ದಾಗಿದೆ. ಶ್ರೀಕರ್ ಭರತ್ ಇದುವರೆಗೆ 78 ಪ್ರಥಮ ದರ್ಜೆ ಪಂದ್ಯಗಳಲ್ಲಿ 37.24 ಸರಾಸರಿಯಲ್ಲಿ 4283 ರನ್ ಗಳಿಸಿದ್ದಾರೆ. ಅದೇ ಸಮಯದಲ್ಲಿ, 54 ಲಿಸ್ಟ್ ಎ ಪಂದ್ಯಗಳಲ್ಲಿ 1404 ರನ್ ಗಳಿಸಿದ್ದಾರೆ. ಅದೇ ಸಮಯದಲ್ಲಿ, ಅವರು 61 ಟಿ20 ಗಳಲ್ಲಿ 1050 ರನ್ ಗಳಿಸಿದ್ದಾರೆ.