ಸಚಿನ್ ಬಳಸಿದ ಬ್ಯಾಟ್‌ಗಳೇ ಹೇಳಲಿವೆ ಅವರ ಕ್ರಿಕೆಟ್ ಯಶೋಗಾಥೆ: ‘ಬ್ಯಾಟೋಗ್ರಫಿ’ ಪ್ರದರ್ಶನ ಅನಾವರಣ
ಸಚಿನ್ ತೆಂಡೂಲ್ಕರ್ ತಮ್ಮ ಐತಿಹಾಸಿಕ ಬ್ಯಾಟ್‌ಗಳನ್ನು ಮುಂಬೈ ಕ್ರಿಕೆಟ್ ಅಸೋಸಿಯೇಷನ್‌ನ ಶರದ್ ಪವಾರ್ ಮ್ಯೂಸಿಯಂಗೆ ದಾನ ಮಾಡಿದ್ದಾರೆ. 100 ಶತಕದ ಬ್ಯಾಟ್ ಸೇರಿ ವೃತ್ತಿಜೀವನದ ಮಹತ್ವದ ಬ್ಯಾಟ್‌ಗಳು 'ಬ್ಯಾಟೋಗ್ರಫಿ' ಪ್ರದರ್ಶನದ ಭಾಗವಾಗಿ ಅನಾವರಣಗೊಳ್ಳಲಿವೆ. ನವೆಂಬರ್ 16, 2026 ರಂದು ಸಚಿನ್ ನಿವೃತ್ತಿ ದಿನದಂದು ಈ ಸಂಗ್ರಹ ಪ್ರದರ್ಶನಕ್ಕೆ ಲಭ್ಯವಾಗಲಿದ್ದು, ಅವರ ಕ್ರಿಕೆಟ್ ಪಯಣವನ್ನು ಅನಾವರಣಗೊಳಿಸಲಿದೆ.
ಕ್ರಿಕೆಟ್ ಲೋಕದ ದಿಗ್ಗಜ ಸಚಿನ್ ತೆಂಡೂಲ್ಕರ್ ಅವರ ಕ್ರಿಕೆಟ್ ಸಾಧನೆಗಳನ್ನು ಮುಂದಿನ ಪೀಳಿಗೆಗೂ ಪರಿಚಯಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯೊಂದನ್ನು ಇಡಲಾಗಿದೆ. ತಮ್ಮ ಕ್ರಿಕೆಟ್ ಜೀವನದ ಅತ್ಯಂತ ಅಮೂಲ್ಯ ನೆನಪುಗಳಲ್ಲಿ ಒಂದಾಗಿರುವ ಬ್ಯಾಟ್‌ಗಳನ್ನು ಸಚಿನ್ ತೆಂಡೂಲ್ಕರ್ ಮುಂಬೈ ಕ್ರಿಕೆಟ್ ಅಸೋಸಿಯೇಷನ್‌ನ ಶರದ್ ಪವಾರ್ ಕ್ರಿಕೆಟ್ ಮ್ಯೂಸಿಯಂಗೆ ಉಡುಗೊರೆಯಾಗಿ ನೀಡಲಿದ್ದಾರೆ(PC-PTI).
ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 100 ಶತಕಗಳನ್ನು ಸಿಡಿಸಿದ ಐತಿಹಾಸಿಕ ಸಾಧನೆಗೆ ಸಾಕ್ಷಿಯಾದ ಬ್ಯಾಟ್‌ಗಳು ಸೇರಿದಂತೆ ತಮ್ಮ ವೃತ್ತಿಜೀವನದ ಪ್ರಮುಖ ಸಂದರ್ಭಗಳಲ್ಲಿ ಬಳಸಿದ ಬ್ಯಾಟ್‌ಗಳನ್ನು ಮ್ಯೂಸಿಯಂನಲ್ಲಿ ಪ್ರದರ್ಶನಕ್ಕೆ ಇಡಲಾಗುತ್ತದೆ(PC-PTI).
2026ರ ನವೆಂಬರ್ 16ರಂದು ವಿಶೇಷ ಕಾರ್ಯಕ್ರಮದ ಮೂಲಕ ಈ ಸಂಗ್ರಹವನ್ನು ಅನಾವರಣಗೊಳಿಸಲಾಗುತ್ತದೆ. ವಿಶೇಷವೆಂದರೆ, ಇದೇ ದಿನಾಂಕದಂದು 13 ವರ್ಷಗಳ ಹಿಂದೆ ಸಚಿನ್ ತೆಂಡೂಲ್ಕರ್ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹೇಳಿದ್ದರು. ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ತಮ್ಮ 200ನೇ ಟೆಸ್ಟ್ ಪಂದ್ಯವನ್ನಾಡುವ ಮೂಲಕ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದರು(PC-PTI).
ಸಚಿನ್ ಅವರ ಕ್ರಿಕೆಟ್ ಪಯಣವನ್ನು ಅವರ ಬ್ಯಾಟ್‌ಗಳ ಮೂಲಕವೇ ಅಭಿಮಾನಿಗಳಿಗೆ ಪರಿಚಯಿಸುವ ವಿನೂತನ ಪ್ರಯತ್ನಕ್ಕೆ ಮುಂಬೈ ಕ್ರಿಕೆಟ್ ಅಸೋಸಿಯೇಷನ್ ಮುಂದಾಗಿದೆ. ಇದಕ್ಕಾಗಿ ‘ಬ್ಯಾಟೋಗ್ರಫಿ' (Batography) ಎಂಬ ವಿಶೇಷ ಪ್ರದರ್ಶನವನ್ನು ಆಯೋಜಿಸಲಾಗುತ್ತಿದೆ. ಈ ಪ್ರದರ್ಶನದಲ್ಲಿ ಸಚಿನ್ ತೆಂಡೂಲ್ಕರ್ ತಮ್ಮ ವೃತ್ತಿಜೀವನದಲ್ಲಿ ಬಳಸಿದ ಒಟ್ಟು 26 ಬ್ಯಾಟ್‌ಗಳು ಸೇರಿದಂತೆ ಹಲವು ಅಮೂಲ್ಯ ಕ್ರಿಕೆಟ್ ಸ್ಮರಣಿಕೆಗಳನ್ನು ಇರಿಸಲಾಗುತ್ತದೆ(PC-PTI).
ಜೀವನ ಚರಿತ್ರೆ ಎಂಬ ಪರಿಕಲ್ಪನೆಯಿಂದ ಪ್ರೇರಣೆ ಪಡೆದು ರೂಪಿಸಿರುವ ‘ಬ್ಯಾಟೋಗ್ರಫಿ', ಸಚಿನ್ ಅವರ ಕ್ರಿಕೆಟ್ ಬದುಕಿನ ಕಥೆಯನ್ನು ಅವರ ಬ್ಯಾಟ್‌ಗಳ ಮೂಲಕವೇ ಹೇಳಲಿದೆ. ಪ್ರತಿಯೊಂದು ಬ್ಯಾಟ್ ಕೂಡ ಅವರ ವೃತ್ತಿಜೀವನದ ಮಹತ್ವದ ಸಾಧನೆ, ಸ್ಮರಣೀಯ ಪಂದ್ಯ ಹಾಗೂ ಐತಿಹಾಸಿಕ ಕ್ಷಣವೊಂದರ ನೆನಪನ್ನು ಹೊತ್ತು ತರಲಿದೆ. ಈ ಮೂಲಕ ಕ್ರಿಕೆಟ್ ಅಭಿಮಾನಿಗಳಿಗೆ ಸಚಿನ್ ಅವರ ಸಾಧನೆಗಳ ಹಿಂದಿನ ಕಥೆಗಳನ್ನು ಹತ್ತಿರದಿಂದ ತಿಳಿದುಕೊಳ್ಳುವ ಅಪರೂಪದ ಅವಕಾಶ ಸಿಗಲಿದೆ(PC-PTI).
ಸಚಿನ್ ಅವರ ಬ್ಯಾಟ್‌ಗಳ ಜೊತೆಗೆ ಅವರ ಕ್ರಿಕೆಟ್ ಜೀವನದ ಪ್ರಮುಖ ಪಂದ್ಯಗಳು ಮತ್ತು ಸಾಧನೆಗಳಿಗೆ ಸಂಬಂಧಿಸಿದ ಹೆಲ್ಮೆಟ್‌ಗಳು, ಜೆರ್ಸಿಗಳು, ವೈಯಕ್ತಿಕ ಟಿಪ್ಪಣಿಗಳು ಸೇರಿದಂತೆ ಹಲವು ಸ್ಮರಣಿಕೆಗಳನ್ನೂ ಪ್ರದರ್ಶನಕ್ಕೆ ಇಡಲಾಗುತ್ತದೆ(PC-PTI).
ಸಚಿನ್ ತೆಂಡೂಲ್ಕರ್ ಅವರ ಅಪೂರ್ವ ಕ್ರಿಕೆಟ್ ಪಯಣವನ್ನು ಶಾಶ್ವತವಾಗಿ ಸ್ಮರಿಸುವ ಉದ್ದೇಶದಿಂದ ಈ ವಿಶೇಷ ವಿಭಾಗವನ್ನು ರೂಪಿಸಲಾಗುತ್ತಿದೆ. ಒಟ್ಟಿನಲ್ಲಿ, ಕ್ರಿಕೆಟ್ ದೇವರು ಎಂದೇ ಅಭಿಮಾನಿಗಳಿಂದ ಕರೆಯಲ್ಪಡುವ ಸಚಿನ್ ಅವರ ಐತಿಹಾಸಿಕ ಸಾಧನೆಗಳನ್ನು ಮತ್ತೊಮ್ಮೆ ನೆನಪಿಸಿಕೊಳ್ಳಲು ಈ ಮ್ಯೂಸಿಯಂ ಪ್ರದರ್ಶನ ಅಭಿಮಾನಿಗಳಿಗೆ ಅಪರೂಪದ ಅವಕಾಶವಾಗಲಿದೆ(PC-PTI).