ಮಾಜಿ ಶಾಸಕ ವಿಜಯಾನಂದ ಕಾಶಪ್ಪನವರ ಹಾಗೂ ಸಂಗಡಿಗರ ವಿರುದ್ಧ ಎಫ್​ಐಆರ್

ಬಾಗಲಕೋಟೆ: ಹುನಗುಂದ ಮತಕ್ಷೇತ್ರದಲ್ಲಿ ಕಾಂಗ್ರೆಸ್ (Congress) ಮತ್ತು ಬಿಜೆಪಿ (BJP) ನಾಯಕರ ನಡುವಿನ ರಾಜಕೀಯ ಮತ್ತೊಂದು ಹಂತಕ್ಕೆ ತಲುಪಿದೆ. ಟಿಪ್ಪು ಭಾವಚಿತ್ರ (Tipu Controversy) ವಿಚಾರದಲ್ಲಿ ಅಕ್ರಮಕೂಟ ರಚಿಸಿ ಒಂದೆಡೆ ಗುಂಪುಸೇರಿ ಇಳಕಲ್ ತಹಶೀಲ್ದಾರ್ (Ilakkal Tahsildar)​ಗೆ ಜೀವ ಬೆದರಿಕೆ ಹಾಕಿದ ಆರೋಪದಡಿ ಕಂದಾಯ ಇಲಾಖೆ ನೌಕರ ಮಹೇಶ ಎನ್ನುವವರು ಮಾಜಿ ಶಾಸಕ ವಿಜಯಾನಂದ ಕಾಶಪ್ಪನವರ (Vijayanand Kashappanavar) ಮತ್ತು ಅವರ ಸಂಗಡಿಗರ ವಿರುದ್ಧ ದೂರು ನೀಡಿದ್ದು, ಒಟ್ಟು 27 ಜನರ ವಿರುದ್ದ ಇಳಕಲ್ ನಗರ ಪೊಲೀಸ್ ಠಾಣೆಯಲ್ಲಿ ಎಫ್​ಐಆರ್ (FIR) ದಾಖಲಾಗಿದೆ. ಇಳಕಲ್ ತಹಶೀಲ್ದಾರರಿಗೆ ಜೀವ ಬೆದರಿಕೆ ಹಾಗೂ ಅಶ್ಲೀಲವಾಗಿ ಬೈದಾಡಿ ಮುಂದೆ ನಮ್ಮ ಸರ್ಕಾರ ಬಂದಾಗ ಎಲ್ಲಿದ್ದರೂ ಈ ಅಧಿಕಾರಿಗಳನ್ನ ಬಿಡಲ್ಲ, ಒಂದು ಗತಿ ಕಾಣಿಸಿಯೇ ಕಾಣಿಸ್ತೇನೆ ಎಂದು ಬೆದರಿಕೆ ಹಾಕಿರುವುದಾಗಿ ದೂರು ನೀಡಲಾಗಿದೆ.

ಹುನಗುಂದ ಕ್ಷೇತ್ರದ ಮಾಜಿ ಶಾಸಕ ವಿಜಯಾನಂದ ಕಾಶಪ್ಪನವರ ದೂರಿನಲ್ಲಿ 2ನೇ ಆರೋಪಿಯಾಗಿದ್ದು, ಕಾಶಪ್ಪನವರ ಸಂಬಂಧಿಕ ಮುತ್ತಣ್ಣ ಕಲ್ಗುಡಿ ಮೊದಲ‌ ಆರೋಪಿಯಾಗಿದ್ದಾರೆ. ಇವರಿಬ್ಬರು ಮತ್ತು ಮಹಾಂತೇಶ್ ಅಂಗಡಿ, ಸುರೇಶ್ ಜಂಗ್ಲಿ, ಮೌಲಾ ಬಂಡಿವಡ್ಡರ, ಶರಣಪ್ಪ ಅಮದಿಹಾಳ, ಅಬ್ದುಲ್ ರಜಾಕ್ ತಟಗೇರ, ಅಬ್ದುಲ್ ಹಳ್ಳಿ ಸೇರಿದಂತೆ ಒಟ್ಟು 27 ಜನರ ವಿರುದ್ಧ 143, 147, 283, 504, 506, 149 ಕಲಂ ಅಡಿ ದೂರು ದಾಖಲಾಗಿದೆ.

ಇದನ್ನೂ ಓದಿ: Rahul Gandhi Political Prediction 2023ರಲ್ಲಿ ರಾಹುಲ್ ಗಾಂಧಿಗೆ ಕರ್ಮ ಪರಿವರ್ತನೆ ಯೋಗ: ಹುದ್ದೆಯೋ ಬುದ್ಧನೋ?

ಎಫ್​ಐಆರ್​ನಲ್ಲಿ ಏನಿದೆ?

ನವಂಬರ್ 27 ರಂದು ಇಳಕಲ್ ನಗರದಲ್ಲಿ ವಿಜಯಾನಂದ ಕಾಶಪ್ಪನವರ ಸೇರಿ ಹಲವು ಮುಖಂಡರು ಸರ್ವಧರ್ಮ ಸೌಹಾರ್ದ ಭಾವೈಕ್ಯತಾ ಸಮಾವೇಶವನ್ನು ಕಂಠಿ ಸರ್ಕಲ್ ಏರ್ಪಡಿಸಿದ್ದರು. ಸಮಾವೇಶ ಹಿನ್ನಲೆ 42 ಜನ ಸ್ವಾತಂತ್ರ್ಯ ಹೋರಾಟಗಾರರು ಹಾಗೂ ಧಾರ್ಶನಿಕರ ಭಾವಚಿತ್ರ ಮೆರವಣಿಗೆ ಹಮ್ಮಿಕೊಂಡಿದ್ದರು. ಇದಕ್ಕಾಗಿ ತಹಶೀಲ್ದಾರ್ ಅವರಿಂದ ಪರವಾನಿಗೆ ಪಡೆದುಕೊಂಡಿದ್ದರು. ಆದರೆ ಕಾರ್ಯಕ್ರಮದ ಬಗ್ಗೆ ಸಂಘಟಕರು ಸಾಮಾಜಿಕ ಜಾಲತಾಣದಲ್ಲಿ ಟಿಪ್ಪು ಸುಲ್ತಾನ್ ಭಾವಚಿತ್ರವನ್ನು ಹರಿಬಿಟ್ಟಿದ್ದರಂತೆ. ಟಿಪ್ಪು ಭಾವಚಿತ್ರ ಮೆರವಣಿಗೆಯಲ್ಲಿ ಕಾಣಿಸಿಕೊಂಡರೆ ಕಾನೂನು ಸುವ್ಯವಸ್ಥೆಗೆ ದಕ್ಕೆ ಆಗಬಹುದು ಎಂದು ಇಳಕಲ್ ತಹಶೀಲ್ದಾರ್ ನೀಡಿದ್ದ ಅನುಮತಿ ರದ್ದು ಪಡಿಸಿದ್ದರು.

ಅನುಮತಿ ರದ್ದು ಮಾಡಿದ ಹಿನ್ನೆಲೆ ಆಕ್ರೋಶಗೊಂಡ ಸಂಘಟಕರು ಅಕ್ರಮಕೂಟ ರಚಿಸಿಕೊಂಡ ಇಳಕಲ್ ನಗರದ ಕಂಠಿ ಸರ್ಕಲ್​ನಲ್ಲಿ ಗುಂಪು ಕೂಡಿ ಮಾಜಿ ಶಾಸಕ ಕಾಶಪ್ಪನವರ ಮೈಕ್ ಹಿಡಿದುಕೊಂಡು ತಹಸೀಲ್ದಾರ್​ಗೆ ಅಶ್ಲೀಲವಾಗಿ ಬೈದಿದ್ದಾರೆ. ಮೊದಲು ಕಾರ್ಯಕ್ರಮಕ್ಕೆ ಅನುಮತಿ ಕೊಟ್ಟು ಬಳಿಕ ರದ್ದು ಮಾಡುತ್ತಾನೆ. ಚುನಾವಣೆ ಇನ್ನು 123 ದಿನ ಮಾತ್ರ ಇದೆ. ನಮ್ಮದೇ ಸರ್ಕಾರ ಬರುತ್ತದೆ. ಆಗ ಈ ಅಧಿಕಾರಿಗಳು ಎಲ್ಲೇ ಇದ್ದರೂ ಬಿಡುವುದಿಲ್ಲ ಎಂದು ಜೀವ ಬೆದರಿಕೆ ಹಾಕಿದ್ದಾರೆ. ಜೊತೆಗೆ ರಸ್ತೆಯಲ್ಲಿ ಸಂಚರಿಸುವ ವಾಹನ ಹಾಗೂ ಸಾರ್ವಜನಿಕರಿಗೆ ತೊಂದರೆ ಮಾಡಿದ್ದಾರೆಂದು ಆರೋಪಿಸಿ ದೂರು ದಾಖಲಿಸಲಾಗಿದೆ. ಡಿ.1ರಂದು ಕಂದಾಯ ಇಲಾಖೆ ನೌಕರ ಮಹೇಶ ಎನ್ನುವವರು ದೂರು ದಾಖಲಿಸಿದ್ದಾರೆ.

ಮತ್ತಷ್ಟು ರಾಜಕೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ