CM Bommai Interview: ಟಿವಿ9 ವೇದಿಕೆಯಲ್ಲಿ ಜನ ಸಾಮಾನ್ಯರ ಕಷ್ಟಕ್ಕೆ ಸ್ಪಂದಿಸಿ ಪರಿಹಾರ ಘೋಷಿಸಿದ ಸಿಎಂ ಬೊಮ್ಮಾಯಿ

ಬೀದರ್​ನ ಗಡಿ ಭಾಗದಲ್ಲಿ ವಿದ್ಯಾರ್ಥಿಗಳಿಗೆ ಬಸ್ ಸಮಸ್ಯೆ; ಸಿಎಂ ಎದುರಲ್ಲೇ ಪರಿಹಾರದ ಭರವಸೆ

ಬಸ್ ಸೌಲಭ್ಯವಿಲ್ಲದೆ ಬೀದರ್ ಜಿಲ್ಲೆಯ ಶಾಲಾ ವಿದ್ಯಾರ್ಥಿಗಳು ಸಂಕಷ್ಟ ಅನುಭವಿಸುತ್ತಿದ್ದಾರೆ. ಈ ಸಮಸ್ಯೆಯನ್ನು ಸಾರಿಗೆ ಸಚಿವ ಶ್ರೀರಾಮುಲು ಹಾಗೂ ಸಿಎಂ ಬೊಮ್ಮಾಯಿ ಅವರ ಗಮನಕ್ಕೆ ಟಿವಿ9  ತಂದಿದೆ. ಈ ಕುರಿತು ಫೋನ್ ಕರೆಯ ಮೂಲಕ ಮಾತನಾಡಿದ ಶ್ರೀರಾಮುಲು, ‘‘ಸಮಸ್ಯೆಯನ್ನು ಕೂಡಲೇ ಪರಿಹರಿಸುವ ಕೆಲಸ ಮಾಡುತ್ತೇನೆ’’ ಎಂದು ಸಿಎಂ ಎದುರಲ್ಲಿ ಭರವಸೆ ನೀಡಿದ್ದಾರೆ.

ಇಂತಹ ಸಮಸ್ಯೆ ರಾಜ್ಯಾದ್ಯಂತ ಹಲವೆಡೆ ಇದೆ ಎಂದು ಟಿವಿ9 ಸಿಎಂ ಅವರನ್ನು ಗಮನ ಸೆಳೆದಾಗ, ‘‘ರಾಜ್ಯದ ಎಲ್ಲಾ ಕಡೆಯೂ ಸೂಕ್ತ ಬಸ್ ವ್ಯವಸ್ಥೆ ಮಾಡಿ. ವಿದ್ಯಾರ್ಥಿಗಳಿಗೆ ತೊಂದರೆಯಾಗದಂತೆ ನೋಡಿಕೊಳ್ಳಿ’’ ಎಂದು ಸಿಎಂ ಸೂಚನೆ ನೀಡಿದ್ದಾರೆ.

ನಮ್ಮ ನೀರು ನಾವು ಪಡೆಯಲು ಯಾರ ಅಪ್ಪಣೆ ಬೇಕಿಲ್ಲ; ಅಣ್ಣಾಮಲೈ ಉಪವಾಸಕ್ಕೆ ಸಿಎಂ ಟಾಂಗ್

ನೀರಾವರಿ ಯೋಜನೆಗಳ ಸಂಬಂಧ ಸರ್ಕಾರಕ್ಕೆ ನೀರಾವರಿ ತಜ್ಞ ಕ್ಯಾಪ್ಟನ್ ಎಸ್.ರಾಜಾರಾವ್ ಟಿವಿ9 ಮುಖಾಂತರ ಸಲಹೆ ನೀಡಿದ್ದಾರೆ. ಇದರ ಕುರಿತು ಮಾತನಾಡಿರುವ ಸಿಎಂ, ರಾಜಾರಾವ್ ಹೇಳಿರುವುದು ಸತ್ಯ. ಅವರಿಂದ ಹಲವು ವಿಚಾರ ಕಲಿತಿದ್ದೇನೆ ಎಂದಿದ್ದಾರೆ. ‘‘ಕೃಷ್ಣಾ ನದಿ 130 ಟಿಎಂಸಿ ನೀರು ಬಳಕೆಗೆ ಆದ್ಯತೆ ನೀಡಲಾಗಿದೆ. ಈ ಕುರಿತು ದೆಹಲಿಗೆ ಹೋದಾಗ ವಕೀಲರ ಜೊತೆ ಚರ್ಚಿಸಿ, ಇದಕ್ಕೆ ಮೊದಲ ಆದ್ಯತೆಯನ್ನು ನೀಡುವಂತೆ ಹಾಗೂ ತಾತ್ಕಾಲಿಕ ಸ್ಟೇ ತೆಗೆದುಹಾಕಲು ವಾದಕ್ಕೆ ತಿಳಿಸಿದ್ದೇನೆ’’ ಎಂದು ಸಿಎಂ ತಿಳಿಸಿದ್ದಾರೆ. ಮೇಕೆದಾಟು, ಮಹದಾಯಿ ಯೋಜನೆಗಳ ಬಗ್ಗೆ ಮಾತನಾಡಿದ ಮಾಡಿದ ಸಿಎಂ, ‘‘ನಮ್ಮ ನೀರು ನಾವು ಪಡೆಯಲು ಯಾರ ಅಪ್ಪಣೆ ಬೇಕಿಲ್ಲ. ಯಾರಾದ್ರೂ ಉಪವಾಸ ಕೂರಲಿ, ಏನಾದ್ರೂ ಮಾಡಲಿ’’ ಎಂದು ತಮಿಳುನಾಡು ರಾಜ್ಯ ಬಿಜೆಪಿ ಘಟಕದ ಅಧ್ಯಕ್ಷ ಅಣ್ಣಾಮಲೈ ಉಪವಾಸಕ್ಕೆ ಸಿಎಂ ಬೊಮ್ಮಾಯಿ ಟಾಂಗ್ ನೀಡಿದ್ದಾರೆ.

‘‘750 ರೈತ ಉತ್ಪಾದಕ ಸಂಸ್ಥೆಗಳಿಗೆ 3 ವರ್ಷಕ್ಕೆ ₹225 ಕೋಟಿ’’: ಸಿಎಂ

750 ರೈತ ಉತ್ಪಾದಕ ಸಂಸ್ಥೆಗಳಿಗೆ 3 ವರ್ಷಕ್ಕೆ ₹225 ಕೋಟಿಯನ್ನು ನೀಡುವ ಯೋಜನೆಯನ್ನು ಸಿಎಂ ಬಸವರಾಜ ಬೊಮ್ಮಾಯಿ ಟಿವಿ9 ಸ್ಟುಡಿಯೋದಲ್ಲಿ ಅಧಿಕೃತವಾಗಿ ಪ್ರಕಟಿಸಿದ್ದಾರೆ. ಯೋಜನೆಯ ಪ್ರಸಕ್ತ ವರ್ಷದ ಆದೇಶದ ಬಗ್ಗೆ ಸಿಎಂ ಬೊಮ್ಮಾಯಿ ಟಿವಿ9 ಸ್ಟುಡಿಯೋದಲ್ಲಿ ಆದೇಶ ಪ್ರಕಟಿಸಿದ್ದಾರೆ.

‘‘ರೈತರು ಬೆಳೆದ ಬೆಳೆಗೆ ಸೂಕ್ತ ಬೆಲೆ ಸಿಗುವಂತಾಗಬೇಕು, ರೈತರ ಆದಾಯ ದ್ವಿಗುಣವಾಗಬೇಕು’’

‘‘ವರ್ಷಕ್ಕೆ ₹3-4 ಸಾವಿರ ಕೋಟಿಯಷ್ಟು ಮೊತ್ತದ ರೈತರ ವಿದ್ಯುತ್ ಬಿಲ್ ಸರ್ಕಾರ ಪಾವತಿ ಮಾಡುತ್ತಿದೆ. ಹಾಲು ಉತ್ಪಾದಕರಿಗೆ ಪ್ರೋತ್ಸಾಹಧನ ನೀಡಲಾಗುತ್ತಿದೆ. ರೈತರು ಬೆಳೆದ ಬೆಳೆಗೆ ಸೂಕ್ತ ಬೆಲೆ ಸಿಗುವಂತಾಗಬೇಕು. ರೈತರ ಆದಾಯ ದ್ವಿಗುಣವಾಗಬೇಕು’’ ಎಂದು ಸಿಎಂ ಬೊಮ್ಮಾಯಿ ಹೇಳಿದ್ದಾರೆ.

ಕೊರೊನಾ ನಿರ್ವಹಣೆ ಮಾಡೋದು ಬಹಳ ಕಷ್ಟವಾಗಿತ್ತು; ಆದರೂ ಪಿಎಂ ಮೋದಿ, ಬಿಎಸ್‌ವೈ ಚೆನ್ನಾಗಿ ನಿರ್ವಹಿಸಿದರು

ಕೊರೊನಾ ನಿರ್ವಹಣೆ ಮಾಡೋದು ಬಹಳ ಕಷ್ಟವಾಗಿತ್ತು; ಆದರೂ ಪ್ರಧಾನಿ ಮೋದಿ, ಬಿಎಸ್‌ವೈ ಬಹಳ ಉತ್ತಮವವಾಗಿ ನಿರ್ವಹಿಸಿದರು ಎಂದು ಸಿಎಂ ಬೊಮ್ಮಾಯಿ ಶ್ಲಾಘಿಸಿದ್ದಾರೆ. ಸಾಲ ಹೆಚ್ಚಾಗಿ ಪಡೆಯಲು ಕೇಂದ್ರ ಅವಕಾಶ ಕೊಟ್ಟಿದೆ. ಆದ್ದರಿಂದ ಕಷ್ಟಕಾಲದಲ್ಲಿ ಆರ್ಥಿಕ ನಿರ್ವಹಣೆಗೆ ಸಹಾಯವಾಗುತ್ತದೆ ಎಂದು ಬೊಮ್ಮಾಯಿ ಹೇಳಿದ್ದಾರೆ.

ಹಾವೇರಿಯಲ್ಲಿ ಶುದ್ಧ ಕುಡಿಯುವ ನೀರಿನ ಘಟಕಗಳು ಹಾಳಾದ ವಿಚಾರ; ಪ್ರತಿಕ್ರಿಯಿಸಿದ ಬೊಮ್ಮಾಯಿ

ಹಾವೇರಿಯಲ್ಲಿ ಶುದ್ಧ ಕುಡಿಯುವ ನೀರಿನ ಘಟಕಗಳು ಹಾಳಾದ ವಿಚಾರಕ್ಕೆ ಸಂಬಂಧಪಟ್ಟಂತೆ ಸಿಎಂ ಪ್ರತಿಕ್ರಿಯೆ ನೀಡಿದ್ದಾರೆ. ‘‘ಶಿಗ್ಗಾಂವಿ, ಬಂಕಾಪುರಕ್ಕೆ ವರದಾ ನದಿಯಿಂದ ನೀರು ವ್ಯವಸ್ಥೆ ಮಾಡಲಾಗಿದೆ. ಉಳಿದ ಕೆಲವೆಡೆ ಮಾತ್ರ ಕುಡಿಯುವ ನೀರಿನ ಘಟಕಗಳಿವೆ. ಹಾಗಂತ ಎಲ್ಲ ಕಡೆ ಸಮಸ್ಯೆ ಇದೆ ಎನ್ನುವುದಕ್ಕೆ ಆಗುವುದಿಲ್ಲ. ಶುದ್ಧ ನೀರಿನ ಘಟಕಗಳಲ್ಲಿ ಬಹಳ ಲೋಪಗಳಿವೆ. ನೀರಿನ ಘಟಕ ಆರಂಭಿಸುವಾಗಲೇ ಈ ಮಾತು ಹೇಳಿದ್ದೆ. ನೀರಿನ ಘಟಕಗಳ ನಿರ್ವಹಣೆ ಖಾಸಗಿಯವರಿಗೆ ಕೊಟ್ಟಿದ್ದಾರೆ. ಒಂದು ಲೀಟರ್ ನೀರಿಗೆ 2 ರೂ. ಪಡೆದು ನಿರ್ವಹಣೆ ಮಾಡಲಾಗುತ್ತಿದೆ. ಆದರೆ ಕೆಲವೆಡೆ ನಿರ್ವಹಣೆ ಮಾಡಲಾಗದೆ ಬಾಗಿಲು ಹಾಕಿದ್ದಾರೆ. ಹಿಂದಿನ ಸರ್ಕಾರದಲ್ಲಿ ಹಾಕಿರುವ ಕೆಲವು ಘಟಕಗಳು ಹಾಳಾಗಿವೆ. ಬೋರ್‌ವೆಲ್ ಇಲ್ಲದ ಕಡೆಯೂ ನೀರಿನ ಘಟಕ ಹಾಕಿರುವುದರಿಂದ ಈ ಸಮಸ್ಯೆ ಉಂಟಾಗಿದೆ. ಇದಕ್ಕೆ ಪರಿಹಾರ ಕೈಗೊಳ್ಳಲಾಗುವುದು’’ ಎಂದು ಬೊಮ್ಮಾಯಿ ಸ್ಪಷ್ಟನೆ ನೀಡಿದ್ದಾರೆ.

ಪ್ರಕರಣದ ಕುರಿತಂತೆ ಹಾವೇರಿ ಡಿಸಿ ಸಂಜಯ್ ಶೆಟ್ಟಣ್ಣನವರ್ ಅವರೊಂದಿಗೆ ಸಿಎಂ ಟಿವಿ9 ವೇದಿಕೆಯಲ್ಲಿ ಮಾತನಾಡಿದ್ದಾರೆ. ಕುಡಿಯುವ ನೀರಿನ ಘಟಕ ಹಾಕಿ ಎಷ್ಟು ದಿನ ಆಗಿದೆ ಎಂದು ಇಂದು ಸಂಜೆಯ ವೇಳೆಗೆ ಮಾಹಿತಿ ನೀಡಲು ಸೂಚನೆ ಮುಖ್ಯಮಂತ್ರಿ ಡಿಸಿಗೆ ಸೂಚನೆ ನೀಡಿದ್ದಾರೆ. ‘‘ಜಿಲ್ಲೆಯಲ್ಲಿ ಹಾಳಾಗಿರುವ ಎಲ್ಲ ಘಟಕಗಳ ಮಾಹಿತಿ ನೀಡಿ. ದುರಸ್ತಿ ಮಾಡುವ ಕೆಲಸವೂ ಆಗಲಿ. ಕೆಲವು ಘಟಕಗಳಲ್ಲಿ ನೀರೇ ಬರುವುದಿಲ್ಲ, ಅದೇಕೆ ಬೇಕು? ಅಂತಹ ಘಟಕಗಳನ್ನು ತೆಗೆದುಹಾಕಿ. ಕುಡಿಯುವ ನೀರಿನ ಘಟಕ ಯಾವಾಗ ಹಾಕಲಾಯಿತು; ಅದರ ಈಗಿನ ಪರಿಸ್ಥಿತಿ ಹೇಗಿದೆ ಎಂಬ ಬಗ್ಗೆ ಮಾಹಿತಿ ನೀಡಿ’’ ಎಂದು ಸಿಎಂ ಜಿಲ್ಲಾಧಿಕಾರಿಯವರಿಗೆ ಸೂಚನೆ ನೀಡಿದ್ದಾರೆ.

ಹೆಣ್ಣುಮಕ್ಕಳ ಸುರಕ್ಷತೆಗೆ ಒಬ್ಬ ಅಣ್ಣ, ತಮ್ಮ, ತಂದೆಯಾಗಿ ಕ್ರಮ ತೆಗೆದುಕೊಳ್ಳುತ್ತೇನೆ

ಹೆಣ್ಣುಮಕ್ಕಳ ಸುರಕ್ಷತೆಗೆ ಒಬ್ಬ ಅಣ್ಣ, ತಮ್ಮ, ತಂದೆಯಾಗಿ ಕ್ರಮ ತೆಗೆದುಕೊಳ್ಳುತ್ತೇನೆ ಎಂದು ಸಿಎಂ ಬೊಮ್ಮಾಯಿ ಹೇಳಿದ್ದಾರೆ. ಈ ಕುರಿತು ಸರ್ಕಾರದಿಂದ ಕೈಗೊಳ್ಳಲಾಗಿರುವ ಕ್ರಮಗಳ ಕುರಿತು ಮಾತನಾಡಿದ ಸಿಎಂ, ‘‘ಕಾಲೇಜುಗಳಲ್ಲಿ ಸೆಲ್ಫ್ ಡಿಫೆನ್ಸ್ ಪ್ರೋಗ್ರಾಂ ಮಾಡುತ್ತೇವೆ. ಕೊರೊನಾ ಹಿನ್ನೆಲೆಯಲ್ಲಿ ಆ ಕಾರ್ಯಕ್ರಮ ವಿಳಂಬಗೊಂಡಿದೆ. ಶೀಘ್ರದಲ್ಲಿಯೇ ವಿದ್ಯಾರ್ಥಿನಿಯರಿಗೆ ತಮ್ಮನ್ನು ರಕ್ಷಿಸಿಕೊಳ್ಳಲು ಸೆಲ್ಫ್ ಡಿಫೆನ್ಸ್ ಪ್ರೋಗ್ರಾಂ ಮಾಡುತ್ತೇವೆ’’ ಎಂದು ಅವರು ಹೇಳಿಕೆ ನೀಡಿದ್ದಾರೆ.

ಪೊಲೀಸರ ಕಾರ್ಯವೈಖರಿಯ ಕುರಿತು ಮಾತನಾಡಿರುವ ಸಿಎಂ, ‘‘ಪೊಲೀಸರು ಸಮಯಪ್ರಜ್ಞೆಯಿಂದ ಕೆಲಸ ಮಾಡಬೇಕು. ಪೊಲೀಸರು ಶೇ.99ರಷ್ಟು ಒಳ್ಳೆಯ ಕೆಲಸ ಮಾಡಿರುತ್ತಾರೆ. ಯಾವುದೋ ಒಂದೆರಡು ಕೆಲಸದಲ್ಲಿ ಸ್ವಲ್ಪ ಸಮಸ್ಯೆ ಆಗುತ್ತದೆ. ಹಾಗಂತ ಪೊಲೀಸ್ ಇಲಾಖೆಯನ್ನು ದೂರಲು ಆಗುವುದಿಲ್ಲ’’ ಎಂದು ಬೊಮ್ಮಾಯಿ ಹೇಳಿದ್ದಾರೆ.

ಸೂಕ್ಷ್ಮ ಘಟನೆಗಳಿಗೆ ರಾಜಕೀಯ ನಾಯಕರ ಪ್ರತಿಕ್ರಿಯೆ ಕುರಿತು ಮಾತನಾಡಿದ ಸಿಎಂ

ಈಗ ಟಿವಿ ನೋಡಿ ಆಚೆ ಬರಬೇಕಾದ ಪರಿಸ್ಥಿತಿ ಇದೆ. ಇಲ್ಲದಿದ್ದರೆ ಬೆಳವಣಿಗೆಗಳ ಬಗ್ಗೆ ಪ್ರತಿಕ್ರಿಯಿಸಲು ಆಗಲ್ಲ. ಆದರೆ ಪ್ರತಿಕ್ರಿಯಿಸುವಾಗ ಜಾಗ್ರತೆ ವಹಿಸಬೇಕು. ಘಟನೆಗಳಿಗೆ ತಕ್ಷಣ ಪ್ರತಿಕ್ರಿಯೆ ನೀಡಬೇಕಾಗಿ ಬಂದಾಗ ಇಂತಹ ತಪ್ಪುಗಳಾಗಬಹುದು. ಆದ್ದರಿಂದ ಬಹಳ ಸೂಕ್ಷ್ಮವಾಗಿರಬೇಕು ಎಂದು ಸಿಎಂ ಹೇಳಿದ್ದಾರೆ.

ಜಿ.ಎಚ್.ಪಟೇಲ್​ರ ಮಾತುಗಳನ್ನು ಸ್ಮರಿಸಿದ ಮುಖ್ಯಮಂತ್ರಿ ಬೊಮ್ಮಾಯಿ

‘‘ಭೂಮಿಯಲ್ಲಿ ನಾವು ಗಿಡಗಳಾಗಿ ಉಳಿಯಬಾರದು. ಬಲವಾಗಿ ಬೇರೂರುವ ಮರಗಳಾಗಿ ಬೆಳೆಯಬೇಕು. ಎಲ್ಲರಿಗೂ ನೆರಳು ನೀಡುವಂತಾಗಬೇಕು’’ ಎಂದು ಜೆ.ಹೆಚ್.ಪಟೇಲ್ ಹೇಳಿದ್ದರು. ಆ ಮಾತುಗಳನ್ನು ಸಿಎಂ ಸ್ಮರಿಸಿ, ಅವರ ಮಾತಿನಂತೆ ತಾನು ನಡೆಯುತ್ತಿದ್ದೇನೆ ಎಂದು ಹೇಳಿದ್ದಾರೆ.

‘ಖೇಲೋ ಇಂಡಿಯಾ’ಕ್ಕೆ ಅರ್ಹ ಕ್ರೀಡಾಪಟುಗಳನ್ನು ಆಯ್ಕೆ ಮಾಡಿ ನೆರವಿಗೆ ಕ್ರಮ: ಸಿಎಂ

‘‘ಕ್ರೀಡಾಪಟುಗಳಿಗೆ ನೆರವಿನ ಜೊತೆಗೆ ಶಿಕ್ಷಣಕ್ಕೆ ಆದ್ಯತೆ ನೀಡಲಾಗುತ್ತಿದೆ. ಕ್ರೀಡಾಪಟುಗಳ ಶಿಕ್ಷಣಕ್ಕೆ ತೊಂದರೆಯಾಗದಂತೆ ಕ್ರಮ ಕೈಗೊಳ್ಳಲು ಯೋಜನೆ ರೂಪಿಸಲಾಗಿದೆ. 75 ಅರ್ಹ ಕ್ರೀಡಾಪಟುಗಳನ್ನು ಆಯ್ಕೆ ಮಾಡಿ ಸೂಕ್ತ ವ್ಯವಸ್ಥೆ ಕಲ್ಪಿಸಲಾಗುವುದು. ಈಗಾಗಲೇ ಕ್ರೀಡಾಪಟುಗಳ ಆಯ್ಕೆ ಪ್ರಕ್ರಿಯೆ ಆರಂಭವಾಗಿದೆ’’ ಎಂದು ಸಿಎಂ ‘ಖೇಲೋ ಇಂಡಿಯಾ’ ಕುರಿತು ಮಾಹಿತಿ ನೀಡಿದ್ದಾರೆ.

ಸಾಧನೆ ಶಿಖರವೇರಲು ಹೊರಟ ಛಲಗಾರ್ತಿಗೆ ಬಡತನ ಅಡ್ಡಿ; ಸಹಾಯದ ಭರವಸೆ ನೀಡಿದ ಸಿಎಂ

ಟಿವಿ9ಗೆ ಸೈಕ್ಲಿಂಗ್ ಕ್ರೀಡಾಪಟು ಪವಿತ್ರಾ ಕುರ್ತಕೋಟಿ ಸಹಾಯಕ್ಕಾಗಿ ಮನವಿ ಮಾಡಿದ್ದರು. ಸಾಧನೆ ಶಿಖರವೇರಲು ಹೊರಟ ಛಲಗಾರ್ತಿಗೆ ಬಡತನ ಅಡ್ಡಿಯಾಗಿದ್ದು, ಸೈಕಲ್ ಕೊಡಿಸಿ ಎಂದು ಆಕೆ ಮನವಿ ಮಾಡಿದ್ದರು. ‘ಹಳ್ಳಿ’ಗಾಡಲ್ಲಿ ಅರಳಿದ ‘ಹೂವಿ’ಗೆ ಸರ್ಕಾರ ನೆರವಿನ ಭರವಸೆ ನೀಡಿದೆ.

ಬಾಲಕಿಗೆ ₹10 ಲಕ್ಷ ಮೌಲ್ಯದ ಸೈಕಲ್​ ಕೊಡಿಸುವ ಭರವಸೆಯನ್ನು ಸಿಎಂ ನೀಡಿದ್ದಾರೆ. ಕ್ರೀಡಾ ಇಲಾಖೆ ಜತೆ ಚರ್ಚಿಸಿ ಹಣಕಾಸು ನೆರವು ನೀಡುತ್ತೇವೆ ಎಂದು ತಿಳಿಸಿರುವ ಬೊಮ್ಮಾಯಿ, ‘‘ಕೇವಲ ಸೈಕಲ್ ಮಾತ್ರವಲ್ಲ, ಎಲ್ಲ ಸೌಲಭ್ಯ ಒದಗಿಸುತ್ತೇವೆ’’ ಎಂದು ಭರವಸೆ ನೀಡಿದ್ದಾರೆ.

ಚಿತ್ರರಂಗದ ಸಮಸ್ಯೆ ತೆರೆದಿಟ್ಟ ರಮೇಶ್ ಅರವಿಂದ್

ಚಿತ್ರರಂಗ ಕೊರೊನಾ ಹೊಡೆತದಿಂದ ಎದುರಿಸಿರುವ ಸಮಸ್ಯೆಗಳ ಕುರಿತು ಕನ್ನಡ ಚಿತ್ರರಂಗದ ಖ್ಯಾತ ನಟ ರಮೇಶ್ ಅರವಿಂದ್ ಮುಖ್ಯಮಂತ್ರಿಯವರೊಂದಿಗೆ ಮಾತನಾಡಿದ್ದಾರೆ. ‘‘ಕೊರೊನಾದಿಂದ ಚಿತ್ರರಂಗ ಸಮಸ್ಯೆ ಎದುರಿಸುತ್ತಿದೆ. ಎಲ್ಲ ಚಿತ್ರ ಕಾರ್ಮಿಕರು ಸಮಸ್ಯೆಗೆ ಸಿಲುಕಿದ್ದಾರೆ. ರಾಜ್ಯ ಸರ್ಕಾರ ಸಮಸ್ಯೆ ಬಗೆಹರಿಸುವ ವಿಶ್ವಾಸವಿದೆ’’ ಎಂದು ಅವರು ಟಿವಿ9 ಮುಖಾಂತರ ಹೇಳಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಸಿಎಂ, ‘‘ನಾವು ಚಿತ್ರರಂಗದ ಪರವಾಗಿದ್ದೇವೆ. ಚಿತ್ರರಂಗದ ಎಲ್ಲ ಚಟುವಟಿಕೆಗೆ ಆದಷ್ಟು ಶೀಘ್ರವಾಗಿ ಅನುಮತಿ ನೀಡುತ್ತೇವೆ. ಆದರೆ, ಕೊರೊನಾ 3ನೇ ಅಲೆ ನೋಡಿಕೊಂಡು ನಿರ್ಧಾರ ಕೈಗೊಳ್ಳುತ್ತೇವೆ’‘ ಎಂದು ಅವರು ತಿಳಿಸಿದ್ದಾರೆ.

ಡಾ.ರಾಜ್​ಕುಮಾರ್ ಕುಟುಂಬದೊಂದಿಗಿನ ಆತ್ಮೀಯತೆಯ ಕುರಿತು ಮಾತನಾಡುತ್ತಾ ರಾಜ್ ಅವರನ್ನು ಸಿಎಂ ನೆನಪಿಸಿಕೊಂಡರು. ಈ ಕುರಿತು ಮಾತನಾಡಿದ ಸಿಎಂ, ‘‘ಡಾ.ರಾಜ್‌ಕುಮಾರ್ ಪುತ್ರರು ನನಗೆ ಆತ್ಮೀಯರು. ಡಾ.ರಾಜ್‌ಕುಮಾರ್ ಕಾಲದಿಂದಲೂ ಹತ್ತಿರವಾಗಿದ್ದಾರೆ. 30-40 ವರ್ಷದ ಹಿಂದೆ ಹುಬ್ಬಳ್ಳಿಯಲ್ಲಿ ಕಚೇರಿ ಓಪನ್ ಮಾಡಿದ ಕಾಲದಿಂದಲೂ ಡಾ.ರಾಜ್‌ಕುಮಾರ್ ಪರಿಚಯವಿದ್ದರು’’ ಎಂದು ರಾಜ್ ಅವರನ್ನು ಸಿಎಂ ನೆನಪಿಸಿಕೊಂಡಿದ್ದಾರೆ.

B.Ed ಶಿಕ್ಷಣದ ಸಮಸ್ಯೆಯನ್ನು ತೆರೆದಿಟ್ಟ ಗುರುರಾಜ ಕರ್ಜಗಿ; ಶಿಕ್ಷಣದ ಗುಣಮಟ್ಟ ಹೆಚ್ಚಿಸಲು ಮನವಿ

ವೃತ್ತಿಯಲ್ಲಿ ಶಿಕ್ಷಕರಾಗಿರುವ ಗುರುರಾಜ ಕರ್ಜಗಿ ಸಿಎಂ ಅವರಲ್ಲಿ ನೂತನ ಶಿಕ್ಷಣ ನೀತಿಯ ಕುರಿತು ತಮ್ಮಲ್ಲಿರುವ ಜಿಜ್ಞಾಸೆಯನ್ನು ತೆರೆದಿಟ್ಟಿದ್ದಾರೆ. ‘‘ಶಿಕ್ಷಕನಾಗಿ ನನಗೆ ರಾಷ್ಟ್ರೀಯ ಶಿಕ್ಷಣ ನೀತಿಯ ಕುರಿತು ಒಂದಷ್ಟು‌ ಜಿಜ್ಞಾಸೆಗಳಿವೆ. ಇತರ ದೇಶಗಳಂತೆ ನಮ್ಮ ದೇಶದ ಶಿಕ್ಷಣ ವ್ಯವಸ್ಥೆಯೂ ಜಾಗತಿಕ ಮಟ್ಟದಲ್ಲಿ ಬೆಳೆಯಬೇಕು. ಆದರೆ ಬಿ.ಎಡ್ ನಂತರ ಕೋರ್ಸ್​​ಗಳಲ್ಲಿ ಹಲವು ವ್ಯಕ್ತಿಗಳು ಕೇವಲ ಸರ್ಟಿಫಿಕೇಟ್ ಹಿಡಿದು ಬರುತ್ತಾರೆ. ಒಂದೂ ತರಗತಿಗಳಿಗೆ ಹೋಗಿರುವುದಿಲ್ಲ. ಶಿಕ್ಷಣದ ಗುಣಮಟ್ಟ ಹೆಚ್ಚಿಸಲು ಪ್ರಯತ್ನಿಸಿ’’ ಎಂದು ಗುರುರಾಜ ಕರ್ಜಗಿ‌ ಮನವಿ ಮಾಡಿದ್ದಾರೆ.

ಇದಕ್ಕೆ ಪ್ರತಿಕ್ರಿಯಿಸಿರುವ ಸಿಎಂ, ಗುರುರಾಜ ಕರ್ಜಗಿಯವರ ಮಾತುಗಳು ನಿಜ ಎಂದು ಒಪ್ಪಿದ್ದಾರೆ. ‘‘ಉತ್ತಮ ಶಿಕ್ಷಕರಿಂದ ಉತ್ತಮ ಸಾಧನೆ ಮಾಡಿದವರಿದ್ದಾರೆ. ಶಿಕ್ಷಕರು ತನ್ನ ಜೀವನ ಪರ್ಯಂತ ಕಲಿಯಬೇಕಾಗುತ್ತದೆ. ಉತ್ತಮ ವಿದ್ಯಾರ್ಥಿಯಾದವರು ಉತ್ತಮ ಶಿಕ್ಷಕರಾಗಿರುತ್ತಾರೆ’’ ಎಂದಿದ್ದಾರೆ. ಉತ್ತಮ ಶಿಕ್ಷಕರನ್ನು ರೂಪಿಸುವ ಕುರಿತು ಮಾತನಾಡಿರುವ ಸಿಎಂ, ‘‘ಉತ್ತಮ ಶಿಕ್ಷಕರನ್ನು ತಯಾರಿಸುವ ಕೆಲಸವಾಗಬೇಕಿದೆ. ಉನ್ನತ ಶಿಕ್ಷಣ ಇಲಾಖೆಯಲ್ಲೂ ಸ್ವಲ್ಪ ಕೊರತೆ ಇದೆ. ಅತಿಥಿ ಉಪನ್ಯಾಸಕರು ತರಗತಿಗಳನ್ನು ಮಾಡುತ್ತಿದ್ದಾರೆ. ಸಮಸ್ಯೆಗಳಿಗೆ ಯೋಜನೆ ರೂಪಿಸಿ ಪರಿಹಾರ ಕೈಗೊಳ್ಳಲಾಗುವುದು’’ ಎಂದಿದ್ದಾರೆ.

ಕಾರ್ಯಕ್ರಮದ ವಿಡಿಯೊ ಲೈವ್ ಇಲ್ಲಿ ವೀಕ್ಷಿಸಬಹುದು.

BDA ನಿರ್ಲಕ್ಷ್ಯಕ್ಕೆ 312 ಕುಟುಂಬಗಳಿಗೆ ಸಂಕಷ್ಟ ವಿಚಾರ; ಸುಮಾರು 7 ವರ್ಷದಿಂದ ಪರದಾಡುತ್ತಿರುವ ಕುಟುಂಬಗಳು

BDA ನಿರ್ಲಕ್ಷ್ಯಕ್ಕೆ 312 ಕುಟುಂಬಗಳು ಸಂಕಷ್ಟ ಅನುಭವಿಸುತ್ತಿವೆ. ಮನೆಗಳಿಗೆ ಮೂಲಸೌಕರ್ಯ ಇಲ್ಲದ ಹಿನ್ನೆಲೆಯಲ್ಲಿ ಅಲ್ಲಿ ಹೋಗಿ ವಾಸಿಸಲು ಸಾಧ್ಯವಾಗುತ್ತಿಲ್ಲ. ಸುಮಾರು 7 ವರ್ಷದಿಂದ ಕುಟುಂಬಗಳು ಈ ಸಮಸ್ಯೆಯಿಂದ ಪರದಾಡುತ್ತಿವೆ. ಪ್ರಕರಣದ ಕುರಿತಂತೆ ಸಿಎಂ ಟಿವಿ9 ವೇದಿಕೆಯಲ್ಲಿ ಸ್ಥಳದಲ್ಲೇ ಪರಿಹಾರ ಸೂಚಿಸಿದ್ದಾರೆ.

ಬಿಡಿಎ ಆಯುಕ್ತ ಎಂ.ಬಿ.ರಾಜೇಶ್‌ಗೌಡ ಅವರೊಂದಿಗೆ ಫೋನ್ ಕರೆಯ ಮುಖಾಂತರ ಸಿಎಂ ಮಾತನಾಡಿದ್ದು, 2 ತಿಂಗಳಲ್ಲಿ ಮೂಲಸೌಕರ್ಯ ಒದಿಗಿಸುವುದಾಗಿ ಆಯುಕ್ತ ಹೇಳಿಕೆ ನೀಡಿದ್ದಾರೆ. ಆಗ ಸಿಎಂ ‘‘2 ತಿಂಗಳು ಆಗಲ್ಲ, ಹಗಲು-ರಾತ್ರಿ ಕೆಲಸ ಮಾಡಿ, ಒಂದು ತಿಂಗಳಲ್ಲಿ ಕಾಮಗಾರಿ ಪೂರ್ಣಗೊಳಿಸಿ-  ಎಲ್ಲ ಕೆಲಸ ಮುಗಿಸಿ’’ ಎಂದು ಖಡಕ್ ಸೂಚನೆ ನೀಡಿದ್ದಾರೆ.

ಬೆಂಗಳೂರಿನ ರಸ್ತೆಗಳು ಗುಂಡಿ ಬಿದ್ದಿರುವುದಕ್ಕೆ ಪರಿಹಾರವೇನು?

ಬೆಂಗಳೂರಿನ ರಸ್ತೆಗಳು ಗುಂಡಿ ಬಿದ್ದಿರುವ ಕುರಿತು ಮಾತನಾಡಿರುವ ಸಿಎಂ, ಮಳೆ ಹೆಚ್ಚಾಗಿ ಬೆಂಗಳೂರಿನ ರಸ್ತೆಗಳಲ್ಲಿ ಗುಂಡಿ ಬಿದ್ದಿದೆ. ಇದೇ ಮೊದಲ ಬಾರಿಗೆ ರಸ್ತೆ ಗುಂಡಿಗಳು ಆಗಿರುವುದಲ್ಲ. ಆದರೆ, ಕೂಡಲೇ ರಸ್ತೆ ಗುಂಡಿ ಮುಚ್ಚುವಂತೆ ಸೂಚನೆ ನೀಡಲಾಗಿದೆ. ಬಿಬಿಎಂಪಿ ಮುಖ್ಯ ಆಯುಕ್ತರಿಗೆ ಈ ಕುರಿತು ಸೂಚನೆ ನೀಡಿದ್ದು, ಆದ್ಯತೆ ಮೇರೆಗೆ ರಸ್ತೆ  ಗುಂಡಿ ಮುಚ್ಚುವಂತೆ ಸೂಚಿಸಿದ್ದೇನೆ ಎಂದು ಮುಖ್ಯಮಂತ್ರಿ ಬೊಮ್ಮಾಯಿ ತಿಳಿಸಿದ್ದಾರೆ.

ಸಿಎಂ ಪರಿಹಾರ ನಿಧಿ ಚೆಕ್ ನೀಡದೆ ತಹಶೀಲ್ದಾರ್ ಕಳ್ಳಾಟ; ನಾಳೆ ಸಂಜೆಯೊಳಗೆ ಚೆಕ್ ಕೊಡಿಸುವ ವ್ಯವಸ್ಥೆ ಮಾಡುತ್ತೇನೆ: ಸಿಎಂ

ಸಿಎಂ ಪರಿಹಾರ ನಿಧಿ ಚೆಕ್ ನೀಡದೆ ತಹಶೀಲ್ದಾರ್ ಕಳ್ಳಾಟ ಮಾಡುತ್ತಿರುವ ಘಟನೆಯನ್ನು ಟಿವಿ9 ಮುಖ್ಯಮಂತ್ರಿಗಳಿಗೆ ತೋರಿಸಿದೆ. ಇದು ನಿಜವಾಗಲೂ ದುರದೃಷ್ಟಕರ ಸಂಗತಿ ಎಂದ ಬೊಮ್ಮಾಯಿ, 24 ಗಂಟೆಯಲ್ಲಿ ಸಂತ್ರಸ್ತೆಗೆ ಚೆಕ್ ತಲುಪಿಸುವ ಕೆಲಸವಾಗುತ್ತದೆ ಎಂದು ಭರವಸೆ ನೀಡಿದ್ದಾರೆ. ರಾಯಚೂರು ಜಿಲ್ಲಾಧಿಕಾರಿಗೆ ಹೇಳಿ ಸಮಸ್ಯೆ ಬಗೆಹರಿಸುತ್ತೇನೆ ಎಂದು ಅವರು ಸಂತ್ರಸ್ತ ವ್ಯಕ್ತಿಗೆ ಅಭಯ ನೀಡಿದ್ದಾರೆ.

ಒಂದು ತಿಂಗಳ ಕೆಲಸ ಕಾರ್ಯ ತೃಪ್ತಿ ತಂದಿದೆಯೇ?

ಒಂದು ತಿಂಗಳಲ್ಲಿ‌ಸರ್ಕಾರದ ಕೆಲಸ ಕಾರ್ಯಗಳನ್ನು ಅಳೆಯಲು ಸಾಧ್ಯವಿಲ್ಲ.‌ ಆದರೆ ಜನಪರ ಯೋಜನೆಗಳ ಅನುಷ್ಠಾನಕ್ಕೆ‌ ಮತ್ತು ಸ್ವಚ್ಛ ದಕ್ಷ ಆಡಳಿತಕ್ಕೆ, ಕನ್ನಡಿಗರ ಬದುಕಿನಲ್ಲಿ‌ ನಗು ತರಲು ಭದ್ರ ಬುನಾದಿ ಹಾಕಲು ನಾನು ಪ್ರಯತ್ನಿಸುತ್ತಿದ್ದೇನೆ. ಅದಕ್ಕಾಗಿ ಈ ಒಂದು ತಿಂಗಳ ಅನುಭವ ಸಹಾಯ ಮಾಡುತ್ತದೆ ಎಂದು ನಾನು ಭಾವಿಸುತ್ತೇನೆ.

ತಿಂಗಳಲ್ಲಿ ಸರ್ಕಾರದ ಕಾರ್ಯಕ್ಷಮತೆ ಅಳೆಯಲು ಆಗಲ್ಲ. ಜವಾಬ್ದಾರಿ ಹೊತ್ತವರಿಂದ ಬದಲಾವಣೆ ಆರಂಭವಾಗಬೇಕು. ನನ್ನಿಂದಲೇ ಬದಲಾವಣೆ ಆರಂಭವಾಗಬೇಕಿದೆ ಎಂದು ಬೊಮ್ಮಾಯಿ ಹೇಳಿದ್ದಾರೆ. ಬಳಿಕ ಸಚಿವರು, ಅಧಿಕಾರಿಗಳಿಂದ ಬದಲಾವಣೆ ಆಗಬೇಕು. ಅಧಿಕಾರಿಗಳಿಗೆ ಹಳ್ಳಿಗಳಿಗೆ ಹೋಗಿ, ಇಲಾಖೆ ಕೆಲಸದ ಬಗ್ಗೆ ಪರಿಶೀಲಿಸುವಂತೆ ಹೇಳಿದ್ದೇನೆ ಎಂದು ಮಾಹಿತಿ ನೀಡಿದ್ದಾರೆ ಸಿಎಂ