2024ರ ಲೋಕಸಭಾ ಚುನಾವಣೆ ಮೇಲೆ ಕಣ್ಣು, ಕೇಂದ್ರ ಸಚಿವ ಸಂಪುಟ ಮತ್ತೆ ಪುನರ್ರಚನೆ ಸಾಧ್ಯತೆ
ಇಷ್ಟು ದಿನ ತೆರೆಮರೆಯಲ್ಲಿ ಕೇಳಿ ಬರುತ್ತಿದ್ದ ಈ ಮಾತುಗಳಿಗೆ ಇದೀಗ ಪ್ರಕಟವಾಗಿರುವ ರಾಜ್ಯಸಭಾ ಉಮೇದುವಾರರ ಪಟ್ಟಿ ಪುಷ್ಟಿ ನೀಡಿದೆ.
Updated on:Jun 01, 2022 | 9:37 AM
ದೆಹಲಿ: ವಿವಿಧ ರಾಜ್ಯಗಳ ವಿಧಾನಸಭೆ ಮತ್ತು ಮುಂದಿನ ಲೋಕಸಭಾ ಚುನಾವಣೆ ಮೇಲೆ ಕಣ್ಣಿಟ್ಟಿರುವ ಭಾರತೀಯ ಜನತಾ ಪಕ್ಷವು (Bharatiya Janata Party – BJP) ಕೇಂದ್ರ ಸಚಿವ ಸಂಪುಟದಲ್ಲಿ ಹಲವು ಬದಲಾವಣೆಗಳನ್ನು ತರುವ ಸಾಧ್ಯತೆಯಿದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಮತ್ತೊಮ್ಮೆ ಸಚಿವ ಸಂಪುಟ ಪುನರ್ರಚನೆ ಮಾಡಬಹುದು ಎಂದು ಇಷ್ಟು ದಿನ ತೆರೆಮರೆಯಲ್ಲಿ ಕೇಳಿ ಬರುತ್ತಿದ್ದ ಈ ಮಾತುಗಳಿಗೆ ಇದೀಗ ಪ್ರಕಟವಾಗಿರುವ ರಾಜ್ಯಸಭಾ ಉಮೇದುವಾರರ ಪಟ್ಟಿ ಪುಷ್ಟಿ ನೀಡಿದೆ. ಪ್ರಸ್ತುತ ಅಧಿಕಾರದಲ್ಲಿರುವ ಇಬ್ಬರು ಸಚಿವರಿಗೆ ಈ ಬಾರಿಯ ರಾಜ್ಯಸಭಾ ಟಿಕೆಟ್ ಸಿಕ್ಕಿಲ್ಲ.
ಕೇಂದ್ರ ಅಲ್ಪಸಂಖ್ಯಾತರ ವ್ಯವಹಾರ ಇಲಾಖೆ ಸಚಿವ ಮುಖ್ತಾರ್ ಅಬ್ಬಾಸ್ ನಖ್ವಿ ಅವರಿಗೆ ಬಿಜೆಪಿ ಮತ್ತು ಉಕ್ಕು ಖಾತೆ ಸಚಿವ ರಾಮ್ ಚಂದ್ರ ಪ್ರಸಾದ್ ಸಿಂಗ್ (ಆರ್ಸಿಬಿ ಸಿಂಗ್) ಅವರಿಗೆ ಬಿಜೆಪಿಯ ಮುಖ್ಯ ಮಿತ್ರಪಕ್ಷ ಜೆಡಿಯು ಟಿಕೆಟ್ ನಿರಾಕರಿಸಿದೆ. ರಾಜ್ಯಸಭೆ ಸದಸ್ಯತ್ವಕ್ಕೆ ಉಮೇದುವಾರಿಕೆ ಸಲ್ಲಿಸಲು ನಿನ್ನೆ (ಮೇ 31 ಕೊನೆಯ ದಿನವಾಗಿತ್ತು. ನಖ್ವಿ ಮತ್ತು ಆರ್ಸಿಬಿ ಸಿಂಗ್ ಅವರ ಸದಸ್ಯತ್ವದ ಅವಧಿಯು ಜುಲೈ 4ಕ್ಕೆ ಅಂತ್ಯವಾಗಲಿದೆ. ಸಂವಿಧಾನ ನೀಡಿರುವ ಕೆಲವು ವಿನಾಯ್ತಿಗಳ ಅನ್ವಯ ಇವರಿಬ್ಬರೂ ಜನವರಿ 3, 2023ರವರೆಗೆ ರಾಜ್ಯಸಭೆ ಸದಸ್ಯತ್ವ ಹೊಂದಿರಬಹುದು.
ಮುಖ್ತಾರ್ ಅಬ್ಬಾಸ್ ನಖ್ವಿ ಅವರಿಗೆ ರಾಂಪುರ ಲೋಕಸಭಾ ಕ್ಷೇತ್ರದ ಉಪಚುನಾವಣೆಯಲ್ಲಿ ಸ್ಪರ್ಧಿಸುವಂತೆ ಅಥವಾ ಬಿಜೆಪಿ ಸಂಘಟನೆಯಲ್ಲಿ ಪೂರ್ಣಾವಧಿ ತೊಡಗಿಸಿಕೊಳ್ಳುವಂತೆ ಪಕ್ಷವು ಸೂಚಿಸಬಹುದು. ಆರ್ಸಿಬಿ ಸಿಂಗ್ ಅವರು ಇತ್ತೀಚೆಗೆ ಬಿಜೆಪಿಯೊಂದಿಗೆ ಹೆಚ್ಚು ನಿಕಟವಾಗಿದ್ದರು. ತಮ್ಮ ಆಶಯಕ್ಕೆ ವಿರುದ್ಧವಾಗಿ ನಡೆದುಕೊಂಡಿದ್ದಕ್ಕಾಗಿ ಟಿಕೆಟ್ ನಿರಾಕರಣೆಯ ಮೂಲಕ ಶಿಕ್ಷಿಸಲು ಜೆಡಿಯುವ ವರಿಷ್ಠ ನಿತೀಶ್ ಕುಮಾರ್ ಮುಂದಾಗಿರಬಹುದು ಎಂದು ವಿಶ್ಲೇಷಿಸಲಾಗಿದೆ.
ಈ ಬೆಳವಣಿಗೆಯನ್ನು ಪಕ್ಷದ ಸಂಘಟನೆ ಮತ್ತು 2024ರ ಲೋಕಸಭಾ ಚುನಾವಣೆ ಸಿದ್ಧತೆಗೆ ಪೂರಕವಾಗಿ ಬಳಸಿಕೊಳ್ಳಲು ಮೋದಿ ಮುಂದಾಗುವ ಸಾಧ್ಯತೆಯಿದೆ. ಪಕ್ಷದಲ್ಲಿ ಸಕ್ರಿಯರಾಗಿರುವ ಯುವಸಂಸದರಿಗೆ ಸಚಿವ ಸ್ಥಾನ ಸಿಗಬಹುದು. ಅಥವಾ ಪಕ್ಷದ ಸಂಘಟನೆಗೆ ನೆರವಾಗುವವರಿಗೆ ಅಧಿಕಾರ ನೀಡಿ, ಅವರ ಕೈ ಬಲಪಡಿಸಬಹುದು ಎಂದು ಹೇಳಲಾಗಿದೆ.
ಇವರಿಬ್ಬರೂ ಟಿಕೆಟ್ ನಿರಾಕರಿಸಲು ಏನು ಕಾರಣ ಎಂದು ಎರಡೂ ಪಕ್ಷಗಳು ಈವರೆಗೆ ವಿವರಣೆ ನೀಡಿಲ್ಲ. ತಮ್ಮ ಸಂಪುಟ ಸದಸ್ಯರ ಕಾರ್ಯವೈಖರಿಯನ್ನು ನಿಯಮಿತವಾಗಿ ಮೌಲ್ಯಮಾಪನ ಮಾಡುವ ಮೋದಿ, ಈ ಹಿಂದೆಯೂ ಸಮರ್ಪಕ ರೀತಿಯಲ್ಲಿ ಕಾರ್ಯನಿರ್ವಹಿಸುವಲ್ಲಿ ವಿಫಲರಾದ 12 ಸಂಪುಟ ದರ್ಜೆ ಸಚಿವರನ್ನು ಕೈಬಿಟ್ಟಿದ್ದನ್ನು ಇಲ್ಲಿ ಸ್ಮರಿಸಬಹುದು.
ಈ ಸುದ್ದಿಯನ್ನು ಇಂಗ್ಲಿಷ್ನಲ್ಲಿ ಓದಲು ಲಿಂಕ್: Modi may rejig his Cabinet
ಕರ್ನಾಟಕದ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ. ದೇಶದ ಇತರ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ ಪ್ರಮುಖ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 9:35 am, Wed, 1 June 22
