Stock Market Holiday: ಬಿಎಸ್ಇ, ಎನ್ಎಸ್ಇ ಷೇರುಪೇಟೆಗಳಿಗೆ ಇಂದೇಕೆ ರಜೆ?
ದೇಶದ ಷೇರುಪೇಟೆಗಳಾದ ಬಿಎಸ್ಇ ಹಾಗೂ ಎನ್ಎಸ್ಇಗಳಿಗೆ ಇಂದು (ಬುಧವಾರ) ರಜೆ. ಕರೆನ್ಸಿ ವಹಿವಾಟು ಕೂಡ ಇಂದು ನಡೆಯುವುದಿಲ್ಲ.
Updated on: Oct 26, 2022 | 10:16 AM
ಮುಂಬೈ: ದೇಶದ ಷೇರುಪೇಟೆಗಳಾದ (Stock market) ಬಿಎಸ್ಇ (BSE) ಹಾಗೂ ಎನ್ಎಸ್ಇಗಳಿಗೆ (NSE) ಇಂದು (ಬುಧವಾರ) ರಜೆ. ಉಭಯ ಮಾರುಕಟ್ಟೆಗಳಲ್ಲಿ ಇಂದು ಯಾವುದೇ ವಹಿವಾಟು ನಡೆಯುತ್ತಿಲ್ಲ. ದೀಪಾವಳಿಯ (Diwali) ಬಲಿಪಾಡ್ಯಮಿ ನಿಮಿತ್ತ ಮಾರುಕಟ್ಟೆ ತೆರೆದಿಲ್ಲ. ಅಕ್ಟೋಬರ್ 26ರಂದು ಮಾರುಕಟ್ಟೆಗಳಲ್ಲಿ ಯಾವುದೇ ವಹಿವಾಟು ನಡೆಯುವುದಿಲ್ಲ ಎಂದು ಬಿಎಸ್ಇ ಹಾಗೂ ಎನ್ಎಸ್ಇ ವೆಬ್ಸೈಟ್ಗಳಲ್ಲಿ ಉಲ್ಲೇಖಿಸಲಾಗಿದೆ.
ಬಿಎಸ್ಇ ಅಧಿಕೃತ ವೆಬ್ಸೈಟ್ನಲ್ಲಿ ಉಲ್ಲೇಖಿಸಿರುವ ಈ ವರ್ಷದ ರಜಾ ದಿನಗಳ ಪಟ್ಟಿಯಲ್ಲಿ ಇಂದೂ ಸೇರಿದೆ. ಈ ಮಧ್ಯೆ, ಕರೆನ್ಸಿ ವಹಿವಾಟಿಗೂ ಇಂದು ರಜೆ ಇದೆ. ಇನ್ನು, ಷೇರು ಮಾರುಕಟ್ಟೆಯ ಮೊದಲ ಮೂರು ದಿನಗಳಲ್ಲಿ ರಜೆ ಇರುವ ಕಮಾಡಿಟಿ ಮಾರುಕಟ್ಟೆ ಕೊನೆಯ ರಜೆಯ ದಿನದ ಎರಡನೇ ಅವಧಿಯಲ್ಲಿ, ಅಂದರೆ ಸಂಜೆ 5ರ ನಂತರ ತುಸು ಹೊತ್ತು ವಹಿವಾಟು ನಡೆಸಲಿದೆ.
ನವೆಂಬರ್ 8ರಂದು ಕೂಡ ಬಿಎಸ್ಇ, ಎನ್ಎಸ್ಇ ರಜೆ ಇರಲಿವೆ. ಷೇರುಪೇಟೆ ರಜಾ ದಿನಗಳಂದು ಈಕ್ವಿಟಿ ವಿಭಾಗ, ಇಕ್ವಿಟಿ ಉತ್ಪನ್ನ ವಿಭಾಗ ಮತ್ತು ಎಸ್ಎಲ್ಬಿ ವಿಭಾಗಗಳಲ್ಲಿ ಯಾವುದೇ ವಹಿವಾಟು ನಡೆಯುವುದಿಲ್ಲ ಎಂದು ಬಿಎಸ್ಇ ಹೇಳಿದೆ.
ಈ ಮಧ್ಯೆ, ದೇಶದ ಷೇರುಪೇಟೆಗಳ 7 ದಿನಗಳ ಓಟಕ್ಕೆ ಮಂಗಳವಾರ ತಡೆ ಬಿದ್ದಿತ್ತು. ಸತತ ಗಳಿಕೆಯ ಓಟ ಮುಂದುವರಿಸಿದ್ದ ಬಿಎಸ್ಇ ಹಾಗೂ ಎನ್ಎಸ್ಇಗಳು ಮಂಗಳವಾರದ ವಹಿವಾಟಿನ ಕೊನೆಯಲ್ಲಿ ತುಸು ಕುಸಿತ ಕಂಡಿದ್ದವು. ಬಿಎಸ್ಇ 317.87 ಅಂಶ ಇಳಿಕೆಯೊಂದಿಗೆ 59,513.79 ರಲ್ಲಿ ವಹಿವಾಟು ಕೊನೆಗೊಳಿಸಿದ್ದರೆ, ಎನ್ಎಸ್ಇ ನಿಫ್ಟಿ ಕೂಡ 74.40 ಇಳಿಕೆಯಾಗಿ 17,656.35 ರಲ್ಲಿ ವಹಿವಾಟು ಮುಕ್ತಾಯಗೊಳಿಸಿತ್ತು. ಟೆಕ್ ಮಹೀಂದ್ರಾ, ಮಾರುತಿ, ಎಲ್ ಆ್ಯಂಡ್ ಟಿ, ಡಾ. ರೆಡ್ಡೀಸ್, ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಹಾಗೂ ಎನ್ಟಿಪಿಸಿ ಷೇರುಗಳು ಗಳಿಕೆ ದಾಖಲಿಸಿದ್ದವು. ಸೋಮವಾರ ಸಂಜೆ ನಡೆದಿದ್ದ ಮುಹೂರ್ತ ವಹಿವಾಟಿನಲ್ಲಿ ಬಿಎಸ್ಇ ಸೆನ್ಸೆಕ್ಸ್ 524.51 ಅಂಶ ಏರಿಕೆ ಕಂಡು 89,831.66ರಲ್ಲಿ ವಹಿವಾಟು ಕೊನೆಗೊಳಿಸಿತ್ತು. ನಿಫ್ಟಿ 154.45 ಅಂಶ ಚೇತರಿಕೆ ಕಂಡು 17,730.75ರಲ್ಲಿ ವಹಿವಾಟು ಕೊನೆಗೊಳಿಸಿತ್ತು.
ರೂಪಾಯಿ ಮೌಲ್ಯ ಮಾತ್ರ ಮಂಗಳವಾರ ಸಂಜೆ ವೇಳೆಗೆ ತುಸು ಚೇತರಿಕೆ ದಾಖಲಿಸಿ ಭರವಸೆ ಮೂಡಿಸಿತ್ತು. ಅಮೆರಿಕನ್ ಡಾಲರ್ ವಿರುದ್ಧ 7 ಪೈಸೆ ಚೇತರಿಕೆ ದಾಖಲಿಸಿದ ರೂಪಾಯಿ ಮೌಲ್ಯ ಕೊನೆಯಲ್ಲಿ 82.81 ರಲ್ಲಿ ವಹಿವಾಟು ಕೊನೆಗೊಳಿಸಿತ್ತು.
ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ
