Poetry; ಅವಿತಕವಿತೆ: ಬುದ್ಧನಾಗುವ ಭ್ರಮೆ ಕಳಚಿ

ಪ್ರತೀ ಭಾನುವಾರ ನಿಮ್ಮ ಬೆರಳತುದಿಯಿಂದ ನಿಮ್ಮ ಅಂತರಂಗವನ್ನು ಪ್ರವೇಶಿಸುತ್ತಿದೆ ಅವಿತಕವಿತೆ. ಇಲ್ಲಿ ಕವಿತೆಯೊಂದಿಗೆ ಕವಿಯೊಂದಿಗೆ ಕವಿಯ ಮಾತಿನೊಂದಿಗೆ ಕವಿಯ ಕೈಬರಹವೂ ಇರುತ್ತದೆ ಜೊತೆಗೆ ಅವರ ಕವಿತ್ವದ ಬಗ್ಗೆ ಸಹೃದಯರು ಬರೆದ ಆಪ್ತಸಾಲುಗಳೂ ಇರುತ್ತವೆ. ಈಗಿಲ್ಲಿ ಕವಿ ಹಂದಲಗೆರೆ ಗಿರೀಶ್ ಅವರ ಎರಡು ಕವನ ನಿಮ್ಮ ಓದಿಗೆ.
ಪರಿಕಲ್ಪನೆ : ಶ್ರೀದೇವಿ ಕಳಸದ

ಕಾವ್ಯವು ಲೋಕಾನುಸಂಧಾನದ ಸರಿದಾರಿಗೆ ಎಲ್ಲರನ್ನೂ ಒಯ್ಯಬೇಕೇ ಹೊರತು ಕಾವ್ಯದ ಆರಾಧನೆಗಲ್ಲ. ಹಾಗೆ ಯಾವುದನ್ನು ಆರಾಧಿಸಿದರೂ ಅದು ಆರಾಧಿಸಿದವರನ್ನು ಗುಲಾಮರನ್ನಾಗಿಸಿ ಆಳಲು ಶುರು ಮಾಡುತ್ತದೆ. ಅದು ನಿಸರ್ಗದ ನಡೆಗೆ ಕೇಡು ತರುತ್ತದೆ. ಗಿರೀಶ್ ಅವರ ಕವಿತೆಗಳು ಲೋಕದ ಜೊತೆಗೆ ಪ್ರತಿ ಜೀವಿಯೂ ಇಟ್ಟುಕೊಳ್ಳಬೇಕಾದ ಸಂಬಂಧಸ್ವರೂಪವನ್ನು ಧೇನಿಸುತ್ತವೆ. ಧ್ವನಿಯೇ ಕಾವ್ಯದ ಆತ್ಮ ಮುಂತಾದ ಸ್ಲೋಗನ್ನುಗಳ ಕಾವ್ಯಮೀಮಾಂಸೆಯ ಕಾವ್ಯಪೂಜಾ ಸಾಮಗ್ರಿಗಳನ್ನು ಪಕ್ಕಕ್ಕಿಟ್ಟು ಇವರ ಕವನಗಳನ್ನು ಓದಬೇಕಾದ ಅಗತ್ಯವಿದೆ.
ಎಸ್. ನಟರಾಜು ಬೂದಾಳು

ಬುದ್ಧನಾಗುವುದೆಂದರೆ

ಕದಡಿದ ನೀರು
ತಂತಾನೆ ತಿಳಿಯಾಗುವ ಪರಿ
ಒಳಗಿನೊಳಗಣದ ಅರಿವು

ನಿರಂತರ
ಚಲನೆಯ ಸಜೀವ ರೂಪಕ
ನದಿಯಾಗುವುದು

ಕತ್ತಲೆ ಬೆಳಕು
ದಡಗಳ ನಡುವೆ ಹರಿದು
ಮೂರನೇ ದಡ ಸೃಜಿಸುವುದು
ಪ್ರಪಾತಕ್ಕೆ ಧುಮ್ಮಿಕ್ಕಿ ಚಿಮ್ಮಿ
ನಭದ ಕಡಲಾಗುವುದು

ಅಂಟಿಯೂ ಅಂಟದ ನಂಟು
ತಾವರೆ ಎಲೆಮೇಗಲ
ಹನಿಯಾಗುವುದು
ಎಚ್ಚರದ ನಿದ್ದೆ ನೀರಿಲ್ಲದ ಜಳಕ

ಹಿಡಿ ಬೆಳಕಿಗಾಗಿ ಅಲೆಯದೆ
ನಮ್ಮ ದಾರಿಗೆ ನಾವೇ
ಮಿಣುಕು ಹುಳುವಾಗುವುದು

ಮುಗಿಲಿಗೆ ಏಣಿಯಾಗಲು
ಹವಣಿಸುತ್ತಿದ್ದ ಬಿದಿರೊಂದು
ಕೊಳಲಾಗಿ ಉಲಿದು
ಒಳಗಿನ ಅನಾದಿ ಖಾಲಿ ನಾದವಾಗಿ
ಮರಳಿ ಕಾಡಿಗೆ ಹೊರಳುವುದು

ಅಂಬರದ ಹೂ ಅರಸದೆ
ಮಣ್ಣಘಮಲು ಹೀರುವ
ಬೇರು ಹೂ ಚುಂಬಿಸುವ
ಎರೆಹುಳುವಾಗುವುದು

ಕಲ್ಲುಮುಳ್ಳುಗಳ ದ್ವೇಷಿಸದೆ
ಮನ ಕಾಲಿಗೆ ಅರಿವಿನ ಮೆಟ್ಟು
ಮೆಟ್ಟಿ ಬಯಲು ಬಯಲ ದಾಟುವ
ಅಲೆಮಾರಿಯಾಗುವುದು

ಬುದ್ಧನಾಗುವುದೆಂದರೆ
ಜಪ ತಪ ಧರ್ಮ ದೇವರು
ಸಿದ್ದಮಾರ್ಗಗಳೆಲ್ಲವನ್ನೂ
ನಿರಾಕರಿಸಲು ಸಿದ್ಧನಾಗುವುದು
ಸಾವೊಂದನು ಬಿಟ್ಟು

ಬುದ್ಧನಾಗುವುದು ಯುದ್ಧ
ತನ್ನ ವಿರುದ್ದ ತಾ ಗೆದ್ದು
ಗಡಿ ಬೇಲಿದಾಟುವ
ಪರಿಮಳದ ಹೂವಾಗಿ ಅರಳುವುದು

ಬೇವಲ್ಲಿ ಸಿಹಿ
ಮಂಜಿನಲ್ಲಿ ಕೆಂಡ
ಬೆಂಕಿಯೊಳಗೆ ತಂಪು
ಸುಖದ ಆಸೆಯ ಆಳದಲ್ಲಿ
ದುಃಖದ ರುಚಿ ಹುಡುಕುವುದು

ಬುದ್ಧನಾಗುವುದೆಂದರೆ
ಕಂಬಳಿ ಹುಳು ಚಿಟ್ಟೆಯಾಗಿ
ರೆಕ್ಕೆಬಿಚ್ಚುವ ಸೋಜಿಗ

ಮೊದಲು
ಬುದ್ಧನಾಗುವ ಭ್ರಮೆ ಕಳಚಿ
ಸಹಜಯಾನಿಯಾಗುವುದು

ಕೈಬರಹದೊಂದಿಗೆ ಹಂದಲಗೆರೆ ಗಿರೀಶ್

ಜೀವ ಜೋಳಿಗೆ

ಅಪ್ಪನೆಂದರೆ ಆಕಾಶವಲ್ಲ
ಕಂದನ ಕೈಗೆಟಕುವ ಅವಕಾಶ
ಹಗುರಾಗಿದೆ ದಿನ ಮೆದುವಾಗಿದೆ ಮನ
ಬೆಳದಿಂಗಳ ತುಂಡೊಂದು ಎದೆಮೇಲಾಡಿ

ಬಯಸಿದ್ದು ಜೋಗಿ ಆಗಿದ್ದು ಅಪ್ಪ
ಹೂ ನಗು ತುಂಬಿದ
ಜೀವ ಜೋಳಿಗೆ ಹೆಗಲಾ ಮ್ಯಾಲೆ
ಬೆಳದಿಂಗಳ ತುಂಡೊಂದು ಎದೆಮೇಲಾಡಿ

ಜೊಲ್ಲು ಸೂಸಿ ನಕ್ಕಾರೆ
ಸಾವಿರ ಸಂಪಿಗೆ ಬಿರಿದಾ ಸೊಬಗು
ಎಚ್ಚರದಲ್ಲೇ ಜೀವ ತಳೆವಾ ಕನಸು
ಬೆಳದಿಂಗಳ ತುಂಡೊಂದು ಎದೆಮೇಲಾಡಿ

ಏಕಾಂತ ಲೋಕಾಂತ ಧಾವಂತದಲ್ಲೂ
ಕಣ್ಣಹೊಲದಿ ಪುಟಿವ ಜೀವ ಕಾವ್ಯ
ಹೆಜ್ಜೆ ಗೆಜ್ಜೆಯ ಸದ್ದು ನನ್ನಾ ಎದೆಗಿಲಕಿ
ಬೆಳದಿಂಗಳ ತುಂಡೊಂದು ಎದೆಮೇಲಾಡಿ

ದಿನವೂ ಅರಳಿ ಹೊರಳಿ
ನನ್ನ ಅಪ್ಪನ ಕಾಣಿಸಿದ
ಸೋಜಿಗದ ಜೀವ ಕನ್ನಡಿ
ಬೆಳದಿಂಗಳ ತುಂಡೊಂದು ಎದೆಮೇಲಾಡಿ

ಹಣ್ಣಾಗಿ ಮಣ್ಣುಸೇರಿದ ತಲೆಮಾರು
ತೇವಕಾದ ಬೀಜದೊಳಗಿನ
ಮೌನ ಉಲಿಯುತ್ತಿದೆ ಅಪ್ಪ ಅಮ್ಮ ತೊದಲು
ಬೆಳದಿಂಗಳ ತುಂಡೊಂದು ಎದೆಮೇಲಾಡಿ

ಬುದ್ಧನ ಕಿರುನಗೆ ನಗುನಗುತ್ತಲೇ ಎದೆಗೊದ್ದು
ನನ್ನ ಮಾಗಿಸಿದ ಹೂ ಪಾದಗಳಿಗೆ ಶರಣು
ಬೆಳದಿಂಗಳ ತುಂಡೊಂದು ಎದೆಮೇಲಾಡಿ

ಗಿರೀಶ್ ಅವರ ಸಂಪಾದಿತ ಪುಸ್ತಕಗಳು ‘ಅರಿವೇ ಅಂಬೇಡ್ಕರ್‘ ಮತ್ತು ‘ಸುರಗಿ‘

ಪರಿಚಯ: ಹಂದಲಗೆರೆ ಗಿರೀಶ್ ಅವರು ತುಮಕೂರು ಜಿಲ್ಲೆಯ ಕುಣಿಗಲ್ ತಾಲೂಕಿನ ಹಂದಲಗೆರೆಯವರು. ರೈತಕುಟುಂಬದಲ್ಲಿ ಹುಟ್ಟಿದ ಇವರು ಸದ್ಯ ಬೆಂಗಳೂರಿನಲ್ಲಿ ವಾಸವಾಗಿದ್ದಾರೆ. ‘ನೇಗಿಲ ಗೆರೆ ‘, ‘ನೀರಮೇಗಲ ಸಹಿ’ ಪ್ರಕಟಿತ ಕವನ ಸಂಕಲನಗಳು. ಸಂಪಾದಿತ ಪುಸ್ತಕಗಳು ‘ಅರಿವೇ ಅಂಬೇಡ್ಕರ್ ‘, ‘ಸುರಗಿ-ಸೀರೆ ಕವಿತೆ.’