Daily Devotional: ಸಾಕು ಪ್ರಾಣಿ- ಪಕ್ಷಿಗಳನ್ನು ಪಂಜರಗಳಲ್ಲಿ ಬಂಧಿಸಿ ಇಡಬಹುದಾ? ಜ್ಯೋತಿಷ್ಯ ಸಲಹೆ ಇಲ್ಲಿದೆ

ಮನೆಯಲ್ಲಿ ಸಣ್ಣಪುಟ್ಟ ಪ್ರಾಣಿ ಪಕ್ಷಿಗಳನ್ನು ಬಂಧಿಸಿ ಸಾಕೋದು ಶುಭಾನಾ ಅಶುಭಾನಾ? ಎಂಬುದರ ಬಗ್ಗೆ ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ತಮ್ಮ ನಿತ್ಯ ಭಕ್ತಿ ಕಾರ್ಯಕ್ರಮದಲ್ಲಿ ವಿವರಿಸಿದ್ದಾರೆ. ಗುರೂಜಿಯವರು ಹೇಳುವಂತೆ, ಹಿಂದಿನ ಕಾಲದಿಂದಲೂ, ಅನೇಕರು ಪಕ್ಷಿಗಳನ್ನು ಪಂಜರಗಳಲ್ಲಿ ಇಟ್ಟು ಸಾಕುವುದನ್ನು ಕಾಣಬಹುದು. ಆದರೆ ಇದು ಒಳ್ಳೆಯದೇ, ಶುಭವೋ ಅಥವಾ ಎಲ್ಲರಿಗೂ ಒಳ್ಳೆಯದಾಗುತ್ತದೆಯೇ ಎಂಬ ಗೊಂದಲ ಹಲವರಲ್ಲಿ ಇದೆ. ಮನೆಗಳಲ್ಲಿ ಮೀನು, ಆಮೆ, ನಾಯಿ ಅಥವಾ ಗಿಳಿ, ಪಾರಿವಾಳ, ಇತ್ಯಾದಿ ಪ್ರಾಣಿಗಳಿಗೆ ಏನಾದರೂ ತೊಂದರೆಯಾದರೆ, ಅದು ಶುಭವೇ ಅಶುಭವೇ ಎಂದು ಜನರು ಚಿಂತಿಸುತ್ತಾರೆ.

ಮಾನವರನ್ನು ಕಾರಾಗೃಹದಲ್ಲಿ ಇಟ್ಟು ಸಾಕಿದಾಗ, ಅವರಿಗೆ ಅನ್ನ ಆಹಾರ ನೀಡಿದರೂ, ಅದು ಅವರ ಸ್ವಾತಂತ್ರ್ಯವನ್ನು ಕಿತ್ತುಕೊಂಡ ಶಿಕ್ಷೆಯಾಗುತ್ತದೆ. ಆದರೆ ಪ್ರಾಣಿ-ಪಕ್ಷಿಗಳು ಯಾವ ಅಪರಾಧವನ್ನು ಮಾಡಿರುತ್ತವೆ? ಅವುಗಳ ಸ್ವೇಚ್ಛೆ ಮತ್ತು ಸ್ವಾತಂತ್ರ್ಯವನ್ನು ಕಸಿದುಕೊಳ್ಳುವುದು ಸರಿಯಲ್ಲ. ಪಕ್ಷಿಗಳನ್ನು ಪಂಜರಗಳಲ್ಲಿ ಹಾಕಿ ಬಂಧಿಸುವುದು ಅಷ್ಟು ಶುಭಕರವಲ್ಲ. ಪಂಜರಗಳಿಲ್ಲದೆ ಪ್ರಾಣಿಗಳನ್ನು ಸಾಕಲು ಅಡ್ಡಿಯಿಲ್ಲ. ಆದರೆ ಅವುಗಳನ್ನು ನಿರ್ದಿಷ್ಟ ಗಡಿಯಲ್ಲಿ, ಪಂಜರದಲ್ಲಿ ಇಡುವುದು ಒಂದು ರೀತಿಯಲ್ಲಿ ಅಶುಭಕರ.

ವಿಡಿಯೋ ಇಲ್ಲಿದೆ ನೋಡಿ:

ಭೂಮಿ, ಗಾಳಿ ಮತ್ತು ನೀರು ಇವೆಲ್ಲವೂ ಭಗವಂತನು ನಮಗೆ ಕೊಟ್ಟಿರುವ ವರಗಳಾಗಿವೆ. ಇದು ಯಾರ ಸ್ವತ್ತು ಅಲ್ಲ. ಪ್ರಕೃತಿಯ ಭಾಗವಾಗಿರುವ ಇವುಗಳನ್ನು ಭಗವಂತನು ಎಲ್ಲಾ ಜೀವಿಗಳಿಗೂ ಸಮಾನವಾಗಿ ನೀಡಿರುವ ಕಾರಣ, ಪ್ರತಿ ಪ್ರಾಣಿಗೂ ಸ್ವೇಚ್ಛೆಯಾಗಿ ಬದುಕುವ ಹಕ್ಕು ಈ ಪ್ರಪಂಚದಲ್ಲಿದೆ. ನಾವು ಜೀವಿಗಳನ್ನು ಮೂರು ವರ್ಗಗಳಾಗಿ ವಿಂಗಡಿಸುತ್ತೇವೆ: ಭೂಚರ (ಭೂಮಿಯ ಮೇಲೆ ವಾಸಿಸುವ ಮನುಷ್ಯರು, ಪಶುಗಳು), ಜಲಚರ (ನೀರಿನಲ್ಲಿ ವಾಸಿಸುವ ಮೀನು, ಮೊಸಳೆ), ಮತ್ತು ವಾಯುಚರ (ಪಕ್ಷಿಗಳು). ವಾಯುಚರಗಳಾದ ಪಕ್ಷಿಗಳನ್ನು ಪಂಜರಗಳಲ್ಲಿ ಇಟ್ಟು ಸಾಕುವುದರಿಂದ ಅಷ್ಟು ಶುಭ ಉಂಟಾಗುವುದಿಲ್ಲ. ಇದು ಮನೆಗಳಲ್ಲಿ ಶಾಂತಿಗೆ ಭಂಗ ತರಬಹುದು.

ಇದನ್ನೂ ಓದಿ: ಬಡ್ಡಿ ವ್ಯಾಪಾರ ಮಾಡುವುದು ಶುಭವೇ, ಅಶುಭವೇ? ಧರ್ಮಶಾಸ್ತ್ರಗಳು ಹೇಳುವುದೇನು?

ಪುರಾಣಗಳಲ್ಲಿ ಉಲ್ಲೇಖವಿರುವಂತೆ, ಸೀತಾದೇವಿಯು ಗಿಳಿಯೊಂದನ್ನು ಪಂಜರದಲ್ಲಿಟ್ಟು ಸಾಕಿದ್ದರು. ಇದರ ಪರಿಣಾಮವಾಗಿ ಶ್ರೀರಾಮನು ವನವಾಸಕ್ಕೆ ಹೋಗಬೇಕಾಯಿತು ಎಂಬ ಪ್ರತೀತಿಯೂ ಇದೆ. ಇದು ಪಂಜರದಲ್ಲಿ ಪಕ್ಷಿಗಳನ್ನು ಸಾಕುವುದರ ಅಶುಭ ಪರಿಣಾಮಕ್ಕೆ ಉದಾಹರಣೆಯಾಗಿದೆ. ಹಾಗಾಗಿ, ಪಂಜರಗಳಲ್ಲಿ ಪಕ್ಷಿಗಳನ್ನು ಮನೆಗಳಲ್ಲಿ ಶಾಶ್ವತವಾಗಿ ಇಟ್ಟುಕೊಳ್ಳುವುದು ಶುಭಕರವಲ್ಲ. ಅವುಗಳನ್ನು ಮುಕ್ತವಾಗಿ ಬದುಕಲು ಬಿಡಬೇಕು. ಒಂದು ವೇಳೆ ಪಂಜರ ಬಳಸಿದರೆ, ಅದು ಯಾವಾಗಲೂ ತೆರೆದಿರಬೇಕು, ಇದರಿಂದ ಪಕ್ಷಿಗಳು ಬಂದು ಆಹಾರ ಸೇವಿಸಿ, ನಂತರ ತಮ್ಮಿಷ್ಟದಂತೆ ಹಾರಾಡಬಹುದು. ಯಾವುದೇ ಕಾರಣಕ್ಕೂ ಅವುಗಳನ್ನು ಕಟ್ಟಿಹಾಕುವುದು ಶುಭವಲ್ಲ, ಮನೆಗೂ ಶುಭವಲ್ಲ ಎಂದು ಗುರೂಜಿ ಎಚ್ಚರಿಸಿದ್ದಾರೆ.

ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ