ಟಿಟಿಡಿ ಇತಿಹಾಸದಲ್ಲೇ ಮಹಾ ದಾಖಲೆ; ಕೇವಲ 9 ತಿಂಗಳಲ್ಲಿ ತಿರುಪತಿ ಹುಂಡಿಯಲ್ಲಿ 1,100 ಕೋಟಿ ರೂ. ಸಂಗ್ರಹ!

ಭಾರತದ ಅತ್ಯಂತ ಶ್ರೀಮಂತ ದೇವಸ್ಥಾನಗಳಲ್ಲಿ ಒಂದಾದ ಆಂಧ್ರಪ್ರದೇಶದ ತಿರುಪತಿ ವೆಂಕಟೇಶ್ವರ ಸ್ವಾಮಿ ದೇವಸ್ಥಾನವು ಪ್ರತಿವರ್ಷ ಲಕ್ಷಾಂತರ ಭಕ್ತರನ್ನು ಸೆಳೆಯುತ್ತದೆ. ವೇಂಕಟೇಶ್ವರ ಸ್ವಾಮಿಯ ಹುಂಡಿಗೆ ಭಕ್ತರು ಅರ್ಪಿಸುವ ಕಾಣಿಕೆಗಳ ಮೂಲಕ ತಿರುಮಲ ತಿರುಪತಿ ದೇವಸ್ಥಾನದ (ಟಿಟಿಡಿ) ಖಜಾನೆಗೆ ಶ್ರೇಷ್ಠ ಮಟ್ಟದ ಆದಾಯ ಹರಿದುಬರುತ್ತಿದೆ. ಈ ವರ್ಷದ ಕಳೆದ 9 ತಿಂಗಳುಗಳಲ್ಲೇ (ಜನವರಿಯಿಂದ ಸೆಪ್ಟೆಂಬರ್) ಶ್ರೀವಾರಿ ಹುಂಡಿ ಆದಾಯವು ಬರೊಬ್ಬರಿ 1,129.04 ಕೋಟಿ ರೂಪಾಯಿಗಳನ್ನು ತಲುಪಿ ಹೊಸ ಇತಿಹಾಸ ಸೃಷ್ಟಿಸಿದೆ. ಪ್ರತಿ ತಿಂಗಳು ಸರಾಸರಿ 125 ಕೋಟಿ ರೂಪಾಯಿಗೂ ಹೆಚ್ಚು ಆದಾಯ ಹರಿದುಬರುತ್ತಿದ್ದು, ದೇಶ-ವಿದೇಶಗಳಿಂದ ತಿರುಮಲಕ್ಕೆ ಆಗಮಿಸುವ ಲಕ್ಷಾಂತರ ಭಕ್ತಾದಿಗಳು ತಮ್ಮ ಹರಿಕೆ ಮತ್ತು ಪ್ರಾರ್ಥನೆಗಳ ಮೂಲಕ ಉದಾರವಾಗಿ ಕಾಣಿಕೆಗಳನ್ನು ಅರ್ಪಿಸುತ್ತಿದ್ದಾರೆ.

ಜುಲೈ ತಿಂಗಳಲ್ಲಿ ಸಾರ್ವಕಾಲಿಕ ದಾಖಲೆಯ ಆದಾಯ:

ಈ 9 ತಿಂಗಳ ಅವಧಿಯಲ್ಲಿ ಜುಲೈ ತಿಂಗಳ ಆದಾಯವು ಟಿಟಿಡಿ ಇತಿಹಾಸದಲ್ಲೇ ಅತ್ಯಂತ ಗರಿಷ್ಠ ತಿಂಗಳ ಆದಾಯವಾಗಿ ದಾಖಲಾಗಿದೆ. ಒಂದೇ ತಿಂಗಳಲ್ಲಿ 140.25 ಕೋಟಿ ರೂಪಾಯಿ ಹಣ ಸಂಗ್ರಹವಾಗಿದೆ. ಜುಲೈ ತಿಂಗಳೊಂದರಲ್ಲೇ 24.52 ಲಕ್ಷಕ್ಕೂ ಹೆಚ್ಚು ಭಕ್ತಾದಿಗಳು ಶ್ರೀವಾರಿ ದರ್ಶನ ಪಡೆದಿದ್ದಾರೆ. 5 ಬಾರಿ ದಿನನಿತ್ಯದ ಹುಂಡಿ ಆದಾಯ 5 ಕೋಟಿ ರೂಪಾಯಿಗಳ ಗಡಿಯನ್ನು ದಾಟಿರುವುದು ವಿಶೇಷ.

ಇದನ್ನೂ ಓದಿ: ಹನುಮಾನ್ ಚಾಲೀಸಾ ಉಗಮದ ರೋಚಕ ಕಥೆ: ಬಂದೀಖಾನೆಯಲ್ಲಿ ತುಳಸಿದಾಸರು ರಚಿಸಿದ ದಿವ್ಯ ಸ್ತೋತ್ರದ ಇತಿಹಾಸ

ತಿಂಗಳವಾರು ಹುಂಡಿ ಆದಾಯದ ವಿವರ (2026):

• ಜನವರಿ: 124.36 ಕೋಟಿ ರೂ.
• ಫೆಬ್ರವರಿ: 110.92 ಕೋಟಿ ರೂ.
• ಮಾರ್ಚ್: 125.24 ಕೋಟಿ ರೂ.
• ಜುಲೈ (ಆಲ್-ಟೈಮ್ ರೇಕಾರ್ಡ್): 140.25 ಕೋಟಿ ರೂ.

ಇದಲ್ಲದೆ, ಸೆಪ್ಟೆಂಬರ್ 10 ರಂದು ಒಂದೇ ದಿನದಲ್ಲಿ ಬರೊಬ್ಬರಿ 6.94 ಕೋಟಿರೂ. ಹುಂಡಿ ಕಾಣಿಕೆ ಸಂಗ್ರಹವಾಗಿದ್ದು ಈ ವರ್ಷದ ದಿನವೊಂದರ ಗರಿಷ್ಠ ದಾಖಲೆಯಾಗಿದೆ.

ದಿನಕ್ಕೆ ಸರಾಸರಿ 75 ರಿಂದ 80 ಸಾವಿರ ಭಕ್ತರ ದರ್ಶನ:

ತಿರುಮಲ ಬೆಟ್ಟದಲ್ಲಿ ಪ್ರತಿದಿನ ಸರಾಸರಿ 75,000 ದಿಂದ 80,000 ಭಕ್ತರು ಶ್ರೀವಾರಿ ದರ್ಶನ ಪಡೆಯುತ್ತಿದ್ದಾರೆ. ಭಕ್ತರ ಸಂಖ್ಯೆ ಹೆಚ್ಚಿದಂತೆ ಹುಂಡಿ ಆದಾಯ ಮಾತ್ರವಲ್ಲದೆ ಶ್ರೀವಾರಿ ಪ್ರಸಾದವಾದ ‘ಲಡ್ಡು’ ಮಾರಾಟದಲ್ಲೂ ದಾಖಲೆ ನಿರ್ಮಾಣವಾಗಿದೆ. ಕೇವಲ ಜುಲೈ ತಿಂಗಳೊಂದರಲ್ಲೇ 1.30 ಕೋಟಿಗೂ ಹೆಚ್ಚು ಲಡ್ಡುಗಳನ್ನು ತಯಾರಿಸಿ ಭಕ್ತರಿಗೆ ವಿತರಿಸಲಾಗಿದೆ. ಹಣಕಾಸು, ಬಂಗಾರ, ಬೆಳ್ಳಿ ಹಾಗೂ ವಿದೇಶಿ ಕರೆನ್ಸಿಗಳ ರೂಪದಲ್ಲಿ ಭಕ್ತರು ಸಲ್ಲಿಸುವ ಈ ಕಾಣಿಕೆಯನ್ನು ಅತ್ಯಂತ ಪಾರದರ್ಶಕವಾಗಿ ಸ್ವಾಮಿಯ ಸೇವೆಗಳು, ಧಾರ್ಮಿಕ ಕಾರ್ಯಕ್ರಮಗಳು ಹಾಗೂ ಭಕ್ತರ ಮೂಲಸೌಕರ್ಯಗಳಿಗಾಗಿ ವಿನಿಯೋಗಿಸಲಾಗುತ್ತಿದೆ ಎಂದು ಟಿಟಿಡಿ ಮಂಡಳಿ ತಿಳಿಸಿದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ