Sabarimala Temple: ಶಬರಿಮಲೆ ಅಯ್ಯಪ್ಪ ದೇವಾಲಯದ 18 ಪವಿತ್ರ ಮೆಟ್ಟಿಲುಗಳ ಮಹತ್ವವೇನು ಗೊತ್ತಾ?
ಶಬರಿಮಲೆ ಅಯ್ಯಪ್ಪ ದೇವಾಲಯದ 18 ಪವಿತ್ರ ಮೆಟ್ಟಿಲುಗಳು ಆಳವಾದ ಆಧ್ಯಾತ್ಮಿಕ ಮಹತ್ವವನ್ನು ಹೊಂದಿವೆ. ಪಂಚೇಂದ್ರಿಯಗಳು, ಅಷ್ಟರಾಗಗಳು, ತ್ರಿಗುಣಗಳು ಮತ್ತು ಅಜ್ಞಾನವನ್ನು ಜಯಿಸುವುದರ ಮೂಲಕ ಭಕ್ತರು ಆತ್ಮ ಶುದ್ಧಿಯನ್ನು ಪಡೆಯುವ ಸಂಕೇತವಾಗಿ ಈ ಮೆಟ್ಟಿಲುಗಳನ್ನು ಏರುತ್ತಾರೆ. ಇದು ಭಕ್ತಿಯ ಮಾರ್ಗದಲ್ಲಿ ಆತ್ಮ ಸಾಕ್ಷಾತ್ಕಾರದ ಕಡೆಗೆ ಸಾಗುವ ಪ್ರಯಾಣ.
ಪ್ರಸ್ತುತ ಅಯ್ಯಪ್ಪ ಮಾಲೆ ಋತುವಿನಲ್ಲಿ, ಶಬರಿಮಲೆ ಯಾತ್ರೆಗೆ ದೇಶಾದ್ಯಂತ ಭಕ್ತರು ಆಗಮಿಸುತ್ತಿದ್ದಾರೆ. ಶಬರಿಮಲೆ ಅಯ್ಯಪ್ಪ ದೇವಾಲಯದ 18 ಪವಿತ್ರ ಮೆಟ್ಟಿಲುಗಳು ಹಿಂದೂ ಸಂಪ್ರದಾಯದಲ್ಲಿ ಮತ್ತು ಸನಾತನ ಸಂಸ್ಕೃತಿಯಲ್ಲಿ ಆಳವಾದ ಆಧ್ಯಾತ್ಮಿಕ ಮತ್ತು ತಾತ್ವಿಕ ಮಹತ್ವವನ್ನು ಹೊಂದಿವೆ. ಭಕ್ತರು ಅಯ್ಯಪ್ಪ ಸ್ವಾಮಿಯ ದರ್ಶನಕ್ಕೆ ಸಾಗುವಾಗ ಈ ಮೆಟ್ಟಿಲುಗಳನ್ನು ಹತ್ತುವುದು ಕೇವಲ ದೈಹಿಕ ಕ್ರಿಯೆಯಾಗಿರದೆ, ಆತ್ಮಶುದ್ಧಿ ಮತ್ತು ಆತ್ಮಸಾಕ್ಷಾತ್ಕಾರದ ಒಂದು ಪ್ರಮುಖ ಭಾಗವಾಗಿದೆ ಎಂದು ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ತಮ್ಮ ನಿತ್ಯಭಕ್ತಿ ಕಾರ್ಯಕ್ರಮದಲ್ಲಿ ವಿವರಿಸಿದ್ದಾರೆ.
ಈ 18 ಮೆಟ್ಟಿಲುಗಳ ಮಹತ್ವದ ಬಗ್ಗೆ ಅನೇಕ ವ್ಯಾಖ್ಯಾನಗಳಿವೆ. ಅವುಗಳಲ್ಲಿ ಒಂದು ಮುಖ್ಯ ವ್ಯಾಖ್ಯಾನವು ಮಾನವನ ಆಧ್ಯಾತ್ಮಿಕ ವಿಕಾಸದ ಹಂತಗಳನ್ನು ಪ್ರತಿಬಿಂಬಿಸುತ್ತದೆ:
ಪಂಚೇಂದ್ರಿಯಗಳ ಜಯ (ಮೊದಲ 5 ಮೆಟ್ಟಿಲುಗಳು):
ಮೊದಲ ಐದು ಮೆಟ್ಟಿಲುಗಳು ಮಾನವನ ಪಂಚೇಂದ್ರಿಯಗಳನ್ನು – ಕಣ್ಣು, ಕಿವಿ, ಮೂಗು, ಬಾಯಿ ಮತ್ತು ನಾಲಿಗೆಯನ್ನು – ಪ್ರತಿನಿಧಿಸುತ್ತವೆ. ಭಕ್ತರು ಈ ಮೆಟ್ಟಿಲುಗಳನ್ನು ಹತ್ತುವಾಗ ತಮ್ಮ ಇಂದ್ರಿಯಗಳನ್ನು ಶುದ್ಧವಾಗಿಟ್ಟುಕೊಳ್ಳುವ ಸಂಕಲ್ಪ ಮಾಡುತ್ತಾರೆ. ಕಣ್ಣುಗಳಿಂದ ದೇವರ ರೂಪವನ್ನು ಮಾತ್ರ ನೋಡುವುದು, ಕಿವಿಗಳಿಂದ ಭಜನೆಗಳನ್ನು ಮಾತ್ರ ಕೇಳುವುದು, ಮೂಗಿನಿಂದ ದೈವಿಕ ಸುಗಂಧವನ್ನು ಮಾತ್ರ ಗ್ರಹಿಸುವುದು, ನಾಲಿಗೆ ಮತ್ತು ಬಾಯಿಯಿಂದ ಶುದ್ಧ ಮಾತುಗಳನ್ನು ಮಾತ್ರ ಆಡುವುದು ಮತ್ತು ಸದ್ಭಾವನೆಯನ್ನು ಮಾತ್ರ ವ್ಯಕ್ತಪಡಿಸುವುದನ್ನು ಇದು ಸೂಚಿಸುತ್ತದೆ. ಪಂಚೇಂದ್ರಿಯಗಳನ್ನು ನಿಗ್ರಹಿಸಿ ಶುದ್ಧಗೊಳಿಸುವುದು ವ್ರತಾಚರಣೆಯ ಪ್ರಮುಖ ಭಾಗವಾಗಿದೆ.
ಅಷ್ಟರಾಗಗಳ ನಿವಾರಣೆ (ಮುಂದಿನ 8 ಮೆಟ್ಟಿಲುಗಳು):
ನಂತರದ ಎಂಟು ಮೆಟ್ಟಿಲುಗಳು ಅಷ್ಟರಾಗಗಳನ್ನು ಅಥವಾ ಅಷ್ಟ ದುರ್ಗುಣಗಳನ್ನು ಪ್ರತಿನಿಧಿಸುತ್ತವೆ: ಕಾಮ (ಆಸೆ), ಕ್ರೋಧ (ಕೋಪ), ಲೋಭ (ದುರಾಶೆ), ಮೋಹ (ಅತಿಯಾದ ಆಕರ್ಷಣೆ/ಅಂಟು), ಮದ (ಅಹಂಕಾರ), ಮತ್ಸರ (ಅಸೂಯೆ), ದಂಭ (ಕಪಟತನ), ಮತ್ತು ದ್ವೇಷ (ವೈರತ್ವ). ಈ ಮೆಟ್ಟಿಲುಗಳನ್ನು ಹತ್ತುವಾಗ ಭಕ್ತರು ಈ ದುರ್ಗುಣಗಳನ್ನು ತೊರೆದು, ನಿಷ್ಕಲ್ಮಷ ಮನಸ್ಸಿನಿಂದ ದೇವರ ಕಡೆಗೆ ಸಾಗುವ ಸಂಕಲ್ಪ ಮಾಡುತ್ತಾರೆ.
ತ್ರಿಗುಣಗಳ ಅರಿವು (ಮುಂದಿನ 3 ಮೆಟ್ಟಿಲುಗಳು):
ಇದರ ನಂತರದ ಮೂರು ಮೆಟ್ಟಿಲುಗಳು ಸತ್ವ, ರಜಸ್ಸು ಮತ್ತು ತಮಸ್ಸು ಎಂಬ ಮೂರು ಗುಣಗಳನ್ನು ಪ್ರತಿನಿಧಿಸುತ್ತವೆ. ಸತ್ವಗುಣವು ಜ್ಞಾನ ಮತ್ತು ಶುದ್ಧತೆಯನ್ನು, ರಜೋಗುಣವು ಕ್ರಿಯೆ ಮತ್ತು ಆವೇಗವನ್ನು, ತಮೋಗುಣವು ಅಜ್ಞಾನ ಮತ್ತು ಜಡತ್ವವನ್ನು ಸೂಚಿಸುತ್ತದೆ. ಭಕ್ತರು ಈ ಗುಣಗಳನ್ನು ಅರ್ಥಮಾಡಿಕೊಂಡು ಅವುಗಳ ಪ್ರಭಾವದಿಂದ ಮುಕ್ತಿ ಹೊಂದಲು ಪ್ರಯತ್ನಿಸುತ್ತಾರೆ.
ಇದನ್ನೂ ಓದಿ: ಮದುವೆಯಲ್ಲಿ ಹೆಚ್ಚಾಗಿ ವಧು ಕೆಂಪು ಬಣ್ಣದ ಸೀರೆ ಉಡೋದು ಯಾಕೆ ಗೊತ್ತಾ?
ಅಜ್ಞಾನದಿಂದ ಜ್ಞಾನದೆಡೆಗೆ (ಕೊನೆಯ 2 ಮೆಟ್ಟಿಲುಗಳು):
ಅಂತಿಮ ಎರಡು ಮೆಟ್ಟಿಲುಗಳು ಅಜ್ಞಾನವನ್ನು ತೊಡೆದು ಜ್ಞಾನವನ್ನು ಪಡೆಯುವ ಹಾದಿಯನ್ನು ಸೂಚಿಸುತ್ತವೆ. ನನ್ನದು ಎಂಬ ಅಹಂಕಾರವನ್ನು ತ್ಯಜಿಸಿ, ಎಲ್ಲಾ ಸಂಪತ್ತು ಮತ್ತು ಸಂಪರ್ಕಗಳು ಭಗವಂತನಿಂದ ಬಂದವು ಎಂಬ ಜ್ಞಾನವನ್ನು ಇದು ಪ್ರತಿಬಿಂಬಿಸುತ್ತದೆ. ಈ ಜ್ಞಾನವನ್ನು ಪಡೆದ ನಂತರವೇ ಭಕ್ತರು ಅಯ್ಯಪ್ಪ ಸ್ವಾಮಿಯ ದರ್ಶನಕ್ಕೆ ಅರ್ಹರಾಗುತ್ತಾರೆ.
ಈ 18 ಮೆಟ್ಟಿಲುಗಳು ಭಕ್ತರ ದುರ್ಗುಣಗಳನ್ನು ತೊಡೆದುಹಾಕಿ ಸದ್ಗುಣಗಳನ್ನು ತುಂಬುತ್ತದೆ. ಇದು ವ್ರತಾಚರಣೆಯ ಫಲವಾಗಿ ದೊರೆಯುವ ಆತ್ಮಶುದ್ಧಿಯ ಪರೀಕ್ಷೆಯಾಗಿದೆ. ಈ ಪರೀಕ್ಷೆಯನ್ನು ಯಶಸ್ವಿಯಾಗಿ ಪೂರೈಸಿದಾಗ, ಅಯ್ಯಪ್ಪ ಸ್ವಾಮಿಯ ದರ್ಶನವು ಪೂರ್ಣ ಫಲವನ್ನು ನೀಡುತ್ತದೆ ಎಂದು ಗುರೂಜಿ ಸಲಹೆ ನೀಡಿದ್ದಾರೆ.
ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ